Jɔ̀ɔŋ 14:26 - WƆŊ FƐ̀Ì EBÒ SÌÀŊ DAYÀA

²⁶ Kɛɛ wo nyuùŋ kpùùmaàŋ, wo Jìnàŋ Nɛɛmaàŋ do nàŋ hnè wèè woiŋ kpuumàŋ, wo yèɔ wo Dèdaà do nàŋ tùɔ̀ŋ e deè mɛ̀ diɛŋ wɔ̀. Wo Jinàaŋ doiŋ nàŋ kàà maŋ keì maŋ gbiŋ, yèè wò doiŋ nàŋ nyɛ̀nɛ̀ŋ naŋ kɛ̀ɛ̀nɛ̀ŋ jii jàa e nyaàiŋ dè e yèɛ mìŋ naiŋ woò e teengaà mìŋ yaà wa ko nɛ̀ɛ̀iŋ niìŋ lɛ.

Jɔ̀ɔŋ 14:26 ပူးပေါင်းရင်းမြစ်များ

Maafiù 1:18

E ɗewe kii lɛɛ̀ sùà àŋ naŋ wa kòmò wo Jisɛ̀ Kulaì. Wo yèyè Jisɛ̀ɔ nàŋ yaà wa wo Mèèle. Wo Jòòsɛ nauŋ wa dìkìè jèè kpɔ̀nɔ̀ŋ wèè wo nɔ̀ŋ wa wo jawèuŋ. Kɛɛ wèè paŋ tɛɛ̀ kaaìŋ wa, wo Mèèle naŋ wa nyìmè kɛ̀ wò hewa nàŋ kòmò wo jɔ̀à e yìwìà e gààŋ wo Jìnàŋ Nɛɛmaàŋ sùà.

Maafiù 1:20

E teengaà wo Jòòsɛ yaà wa goongo wèè wo tɛɛ̀ nyɛ̀nɛ̀ŋ lɛ, wo màìkà Kanaà Dayà nauŋ fòlò feìŋ e gɔagòo sùà yèè wò naŋ wòò wo Jòòsɛ wààŋ, “Jòòsɛ, jɔ̀àfèlàà Dèèweɔ̀, e jùù ɓɔ̀ è nyɛ̀nɛ̀um wèè mùŋ do ɓèmè wò Mèèle wò do nɔ̀ŋ wò jawèum. Esaɓù kɛ̀, e gààŋ Jìnàŋ Nɛɛmaàŋ sùà wò naŋ ɓèmè le sùà.

Maafiù 28:19

Weètii, kɔ̀àaìŋ koɓɛ̀ anyùùŋ nyaŋ gbiŋ e ɗuunyaàŋ niŋ nyɛ̀nɛ̀ŋ nyiŋ aŋ nɔ̀ŋ anyùùŋ màŋjɛ̀wɛ̀im. Gùaìŋ nyiŋ e dèè Dèdaà diɛŋ, wo Jɔ̀àfelaaà, yèè wo Jìnàŋ Nɛɛmaàŋ,

Maafiù 3:11

Sèè è nɔ̀ŋ wèè miàŋ, mìŋ yààìŋ nɔŋ gùùyà sùà e wùìyè wèè e tɔɔ̀ kɛ̀ nàŋ fè maŋ tùwo naanààiŋ màŋ jɛwɛ. Kɛɛ wo nyùùŋ bà kòò wò yaà hinie eɓìèmàŋjɛ̀wɛ̀ miàŋ, wò kuwa e gààŋ eim nìàŋ, yèè miŋ siàŋ ngèè pɛɛ tɛ̀ɛ̀ wèè ka kòà màŋ bauŋ màŋ. Kɛɛ wuŋ, wò doiŋ nàŋ gùùyè wo Jìnàŋ Nɛɛmaàŋ yèè e hmɔ̀ɔ̀ŋ.

Luù 1:15

Wo Jɔ̀ɔŋ do nàŋ nɔ̀ŋ wo ɓɔ̀ìjɔ̀à nɛɛmaŋ wèè wo Kanaà Dayà. Julɔfɔ ɓɔ̀ wò tìà màŋ tala muaŋ ɔ̀ɔ̀ è biyà, yèè e gààŋ wo Jìnàŋ Nɛɛmaàŋ douŋ nàŋ nɔ̀ŋ diɛŋ e yìwìà ke ɗɔɔɛ̀ àŋ douŋ nàŋ kòmò lɛ.

Luù 1:35

Wo màikàa naŋ fasàì wààŋ, “Wo Jìnàŋ Nɛɛmaàŋ doum nàŋ dèyè diɛŋ, yèè e gààŋ Dayà Gaàŋ Gbeeɔ̀ doum nàŋ ɓùwò. Weètii mùŋ do nàŋ nyààŋ wo jɔ̀à nɛɛmaŋ wɛɛ̀ wo Jɔ̀àfèlàà Dayàa.

Luù 1:41

Nààŋ wo Ìlesebɛ̀ɛ̀ naŋ kòmò ke mìè zùùmò Mèèleɛ̀, wo jɔ̀àa ko suàuŋ niìŋ naŋ mɛɛmɛ̀ɛ̀ŋ. Yèè wo Jìnàŋ Nɛɛmaàŋ naŋ dèyè wo Ìlesebɛ̀ɛ̀ diɛŋ.

Luù 1:67

Wo Jìnàŋ Nɛɛmaàŋ naŋ wa dèyè wo dèdà Jɔ̀ɔɔ̀ŋ Zakalayà diɛŋ, yèè wò naŋ gbòò ke mìè Dayàa wààŋ,

Luù 11:13

Jòòpɛɛ nìŋ kuwa maŋ kpèè naanààŋ, kɛɛ nàŋ nyìmàŋ e ɗèwè manɛ̀ŋ kɛnɛ kìɛŋ koɓɛ̀ aŋ jɔ̀àiŋ nyàŋ. Dièsɔa nìŋ naŋ ɓɛ̀nɛ̀ŋ gòngo kɛ̀ wo Dèdaiŋ nɔɔ̀ŋ ko àìjɛnɛ̀ŋ wo naàŋ kìɛ̀ŋ wò Jìnàŋ Nɛɛmaàŋ kòɓɛ̀ ànyùùŋ nyaŋ dawàuŋ nyaŋ?”

Luù 2:25

E teenga lii sùà wo kenàŋ bà àŋ nyaaŋ wa wo Simiɔ̀ŋ hewa jòò ko Jùlusɛ̀làm. Wò yaà wa wo nyùùŋ tɔ̀ɔ̀nyaàŋ yèè wò duɔŋ wa wo Dayà, e kìlà wò yaà wa fùlìè wo Dayà wèè wo joeyè e kìlà wo kiɛ̀ŋ anyùùŋ Ezɔ̀ɛ̀ nyaŋ ke jii nyingè, nààŋ wò hewa nàŋ tùɔ̀ŋ wo yèɔ wò naŋ tàeɗùù wèè wo joeyè anyùùŋ nyaŋ e ɗuunyaàŋ. E kìlà nààŋ wo Jìnàŋ Nɛɛmaàŋ yàaùŋ wa maŋjɛ̀wɛ,

Luù 24:49

Mìŋ manaŋ naŋ nyìmàŋ kɛ̀ miàŋ bi nàŋ doiŋ nàŋ tùɔ̀ŋ e nɛ̀ŋ kìɛɛ̀ŋ wo Dèda miɔ̀ŋ naŋ wa jɔ̀ɔ̀ e ɗààhiì wèè wo kiɛ̀ŋ lɛ. Kɛɛ ɓɔ̀ nìŋ yèwà kò Jùlusɛ̀làm e jèèsùà e gààaŋ eiŋ dèyà diɛŋ e yìwìà ko àìjɛnɛ̀ŋ.”

Luù 3:22

yèè wo Jìnàŋ Nɛɛmaàŋ, wo yèɔ naŋ tèènè wo poopoò ke kpùnaŋ sùà wɔ, naŋ dèyè wo jɛ̀ì Jisɛ̀ diɛŋ. Kpeiŋ wo Dayà naŋ gbòò e yìwìà ko àìjɛnɛ̀ŋ wò naŋ woò wààŋ, “Muàŋ nàŋ yaà wo jɔ̀àfelaa miɔ̀ŋ, wo yèɔ mìŋ manaŋ wɔ̀. Ke jii naim fɔ̀ weèum.”

Jɔ̀ɔŋ 1:33

Kɛɛ wèè paŋ tɛɛ̀ kaaìŋ wa, miŋ nyimààŋ wa wò nyùnɔ̀ɔŋ yaà wa hinie wɔ̀. Kɛɛ wo Dayàa naim wa tùɔ̀ŋ wèè ka gùùyà anyùùŋ e wùìyè wɔ naim wà tɛɛ̀ woò wààŋ, ‘Mùŋ do nàŋ yɛ̀mɛ̀ wo Jinàaŋ wo dèyà wo jɛ̀ì wo nyùùŋ bà diɛŋ. Kpeiŋ kɛ̀ mùŋ do nàŋ nyìmè kɛ̀ wuŋ nàŋ yaà wo nyùnɔ̀ɔŋ wo yèɔ do nàŋ gùùyè anyùùŋ wo Jìnàŋ Nɛɛmaàŋ.’ ”

Jɔ̀ɔŋ 12:16

Ko tɔɔtuì, anyùùŋ màŋjɛ̀wɛ̀ Jisɛ̀ nyaŋ gò wa nyìmàŋ màŋ keì mɛɛ̀ŋ. Kɛɛ e teengaà wo Jisɛ̀ naŋ wa yèwè e fàaà dìì yèè wo Dayà nauŋ jòòwò ko àìjɛnɛ̀ŋ lɛ, paŋgàà àŋ naŋ wa jàà màŋ keì mɛɛ̀ŋ jii kɛ̀, wɔŋ fɛ̀ì Dayàa naŋ woò kɛ̀ maŋ keì mɛɛ̀ŋ do wa nàŋ kaaìŋ. Màŋ naŋ kaaìŋ màànààŋ nɔŋ màŋ yaà sìnga miŋ lɛ̀ wɔŋ fɛ̀ì Dayàa sùà.

Jɔ̀ɔŋ 14:16

Kpeiŋ mìŋ do nàŋ dàwè wo Dèdaà, yèè wò doiŋ nàŋ tùɔ̀ŋ wo Jìnàŋ Nɛɛmaàŋ wo yèɔ doiŋ nàŋ kpuumò yèè wo nɔ̀ŋ ko nɛ̀ɛ̀iŋ niìŋ wèè julɔfɔ.

Jɔ̀ɔŋ 14:25

“Kàiŋ wòò maŋ keì mɛɛ̀ŋ e teengaà mìŋ yaà nɔŋ ko nɛ̀ɛ̀iŋ niìŋ lɛ.

Jɔ̀ɔŋ 15:26

“Kpeiŋ mìŋ doiŋ nàŋ tùɔ̀ŋ wo Jìnàŋ Nɛɛmaàŋ wo yèɔ yewe koɓɛ̀ wo Dèdaà wɔ yèè wò doiŋ nàŋ wòò e tɔ̀ɔ̀nyaàaŋ. Yèè wò doiŋ nàŋ kpuumò woiŋ wòò e tɔ̀ɔ̀nyaàaŋ e nyaàiŋ eim dè.

Jɔ̀ɔŋ 16:7

Kɛɛ mìŋ yààìŋ wòò sùà e tɔɔɓaaà, è yaà tɛ̀ɛ̀ wèè ka kà koɓɛ̀ Dèda miɔ̀ŋ, sèè mìŋ go ka, wo nyuùŋ kpùùmaàŋ, wo Jìnàŋ Nɛɛmaàŋ naàŋ hnè wèè woiŋ kpuumàŋ. Kɛɛ sèè mìŋ kɔ̀à, mìŋ do nàŋ tùɔ̀ŋ wo Jìnàŋ Nɛɛmaàŋ ko nɛ̀ɛ̀iŋ niìŋ.

Jɔ̀ɔŋ 2:22

Kpeiŋ nààŋ wo Dayà nauŋ wa gè e fàaà dìì wɔŋ gèeo sùà, anyùùŋ màŋjɛ̀wɛ̀uŋ nyàŋ naŋ ngàà kɛ̀ɛ̀nɛ̀ŋ jii jàa wèè e yèɛ wò naŋ nyiŋ wa woò lɛ. Àŋ naŋ hààwè e yèɛ wɔŋ fɛ̀ì Dayàa naŋ woò lɛ yaà e yèɛ wo Jisɛ̀ naŋ nyiŋ wa woò lɛ.

Jɔ̀ɔŋ 20:22

Kpeiŋ wo Jisɛ̀ naŋ nyiŋ dùùlò wɔŋ fòì nyaàuŋ nɔɔ̀ŋ ko diɛŋ yèè wò naŋ woò wààŋ, “Wo Jìnàŋ Nɛɛmaàŋ dèyà nyɛ̀iŋ gbiŋ diɛŋ.

Jɔ̀ɔŋ 6:45

Wo wɛ̀ijìɔ bà guùŋ naŋ wa sìngè wò naŋ woò wààŋ, ‘Wo Dayà do nàŋ kàà anyùùŋ nyaŋ gbiŋ.’ Weètii wo nyùnɔ̀ɔŋ gbiŋ naŋ kòmò yèè wò naŋ gbèè e yèɛ wo Dèdaà naŋ woò lɛ wò do nàŋ hnè ko nɛ̀ɛ̀ŋ miìŋ.

Jɔ̀ɔŋ 7:39

Wo Jisɛ̀ yaà wa wòò e kèè wo Jìnàŋ Dayàa, wo yèɔ wò hewa nàŋ kìɛ̀ŋ koɓɛ̀ wo nyùnɔ̀ɔŋ gbiŋ nauŋ haawè wɔ. Wo Jìnàŋ wo Kanaà Dayà kòò wò nɔ̀ŋ wa kìɛuŋ kòɓɛ̀ wò nyùùŋ gbiŋ, nààŋ wo Jisɛ̀ kòò wò nɔ̀ŋ wa jòòwouŋ wèè wò Dayà wouŋ kìɛ̀ŋ è dɛ̀ɛ̀kɛ.

Nyɛ̀nɛ̀ŋ 1:2

e jèèsùà e hàì ke ɗɔɔɛ̀ wo Dayà nauŋ wa jùwìè ko àìjɛnɛ̀ŋ lɛ. Wèè paŋ wo nɔ̀ŋ wa jòòwouŋ, wo kanaà Jisɛ̀ naŋ wa wòò maŋ mìè gbòa e yìwìà e gààŋ wo Jìnàŋ Nɛɛmaàŋ sùà koɓɛ̀ aŋ keela tàeɗùùuŋ nyàŋ wò naŋ jàà e ɓula titi nyàŋ wèè e nɛ̀ɛŋ àŋ kuwa wa aŋ nyɛ̀nɛ̀ŋ lɛ.

Nyɛ̀nɛ̀ŋ 1:4

E teengaà wo Kanaà Jisɛ̀ yaà anyùùŋ màŋjɛ̀wɛ̀uŋ nyàŋ naŋ wa dèènè koɓɛ̀ guùŋ nɛ, wò naŋ nyiŋ wa kìɛ̀ŋ e go nyìnga wààŋ, “Ɓɔ̀ nìŋ yèwà kò Jùlusɛ̀làm, kɛɛ fòlaìŋ e nɛ̀ŋ kìɛɛ̀ŋ wo Dèda miɔ̀ŋ naiŋ wa wòò kii niŋ lɛ̀, e nɛ̀ŋ kìɛɛ̀ŋ wo Dèda miɔ̀ŋ naŋ wa jɔ̀ɔ̀ e ɗààhiì kɛ̀ wò doiŋ nàŋ kiɛ̀ŋ lɛ.

Nyɛ̀nɛ̀ŋ 1:8

Kɛɛ e teengaà wo Jìnàŋ Nɛɛmaàŋ doiŋ nàŋ kìɛ̀ŋ gààŋ lɛ̀, e gààŋ doiŋ nàŋ sɛ̀ɛ̀ sùà, nìŋ do nàŋ nɔ̀ŋ aŋ sèì e kìlà naŋ wòò anyùùŋ kɛ̀ kiìŋ nìŋ naŋ nyìmè e nyaàiŋ eim dè ko Jùlusɛ̀làm, wɔŋ fùɔ̀ŋ Jùdiàa, wɔŋ fùɔ̀ŋ Sàmiliàa yaà maŋ fuɔŋ joo màŋ gbiŋ sùà e ɗuunyaàŋ.”

Nyɛ̀nɛ̀ŋ 11:16

Kpeiŋ mìŋ naŋ jààèjii e yèɛ wo Kanaà naŋ wa woò lɛ wààŋ, ‘Wo Jɔ̀ɔŋ naŋ wa nɔŋ gùùyè anyùùŋ e wùìyè, kɛɛ wo Dayà doiŋ nàŋ gùùyè wo Jìnàŋ Nɛɛmaàŋ.’

Nyɛ̀nɛ̀ŋ 13:2

E teengaà àŋ yaà wa zòòlò wo Kanaà yèè àŋ yaà kùwìè ke tɔùŋ lɛ, wo Jìnàŋ Nɛɛmaàŋ naŋ nyiŋ woò wààŋ, “Jàaìŋ wo Bànaŋɓà yèè wo Sɔɔ̀ e ɓula weèim wèè e tòmoɛ̀ mìŋ naŋ nyiŋ nyààŋ wèè aŋ nyɛ̀nɛ̀ŋ lɛ.”

Nyɛ̀nɛ̀ŋ 13:4

Nààŋ wo Jìnàŋ Nɛɛmaàŋ naŋ tùɔ̀ŋ wo Bànaŋɓà yaà wo Sɔɔ̀, àŋ naŋ kɔ̀ ko Sèlesìà. E yìwìà kuii àŋ naŋ wa sɛ̀ɛ̀ wɔŋ meeè sùà yèè àŋ naŋ kɔ̀ ko Sapulɔ̀.

Nyɛ̀nɛ̀ŋ 15:28

Wo Jìnàŋ Nɛɛmaàŋ yèè yàwi bi èiŋ nyimèè kɛ̀ ɓɔ̀ è gbùwàiŋ wɔ̀ŋ nɛ̀ŋfoo mùnga joo ɗì màŋ do nìàŋ màŋ Sàwà kɛnɛ mɛɛ̀ŋ,

Nyɛ̀nɛ̀ŋ 15:8

Wo Dayà nyìmàŋ kɛ̀ ke jìì nyuùŋkpùuŋ gbiŋ kiɛ̀ŋ mìè seì, nààŋ wò naŋ kìɛ̀ŋ wo Jìnàŋ Nɛɛmaàŋ koɓɛ̀ anyùùŋ nyaŋ fè àŋ Juùù nyaŋ, màànààŋ nɔŋ wò naŋ wi wuŋ kiɛ̀ŋ yàwi pɛɛ lɛ̀.

Nyɛ̀nɛ̀ŋ 16:6

Wo Pɔɔ̀ yèè aŋ dàwiuŋ nyàŋ naŋ kɔ̀ɛ̀ maŋ kpàlàùŋ kpàlàùŋ Fɛgìà maŋ yèè Gàlatìà maŋ sùà, nààŋ wo Jìnàŋ Nɛɛmaàŋ gò wa nyimèè wèè aŋ gbòà kè mìè Dayàa wɔ̀ŋ fùɔ̀ŋ Eesìàa sùà.

Nyɛ̀nɛ̀ŋ 2:33

Wò naŋ wa nɔ̀ŋ jòòwouŋ wèè wo jɛi wɔŋ kùàŋ jìkà Dayàa, wo Dèdauŋ nɔɔ̀ŋ, e kìlà wò nauŋ kìɛ̀ŋ wo Jìnàŋ Nɛɛmaàŋ, màànààŋ wò naŋ wa jɔ̀ɔ̀ ɗààhiì lɛ. Wo Kanaà Jisɛ̀ nàŋ yaà ɓɛìŋ wo nyùnɔ̀ɔŋ naŋ wi kìɛ̀ŋ wo Jinàaŋ, tiiŋ nàŋ yaà e yèɛ nìŋ yaà yɛɛmɛ yèè nìŋ yaà kumie è yààìŋ woo lɛ̀.

Nyɛ̀nɛ̀ŋ 2:4

Kpeiŋ wo Jìnàŋ Nɛɛmaàŋ naŋ wa dìè aŋ gbiŋ maŋ jiio sùà, yèè àŋ naŋ tɔ̀ɔ̀tù maŋ kaìŋ joo gbùùyà sùà nààŋ wo Jìnàŋ Nɛɛmaàŋ naŋ nyiŋ wa nyɛ̀nɛ̀ŋ wèè aŋ miŋ gbòà lɛ.

Nyɛ̀nɛ̀ŋ 20:28

Weètii yɛ̀mɛìŋ nyɛ̀iŋ bi diɛŋ e kpùlìà anyùùŋ nyaŋ kinɛiŋ wo Jìnàŋ Nɛɛmaàŋ naŋ gbìɛ̀ŋ e gaàiŋ nɛ̀ dìì nyaŋ. Nɔ̀iŋ mààŋ anyuùŋ tùnìàŋ aŋ ɓaawaa wèè ke gbòò anyuùŋ hààwè Dayà nyaŋ. Nyiŋ nàŋ yaà aŋ yè nyaŋ wò naŋ jàà e ɓula wèè wuŋ bi e yìwìà maŋ sɛ̀ìŋ wo Jɔ̀àfèlàà wuŋ biɔ̀ sùà.

Nyɛ̀nɛ̀ŋ 20:35

Kàiŋ tɔ̀ɔ̀ maŋ keì nyɛ̀nɛŋ màŋ gbiŋ sùà kɛ̀ sèè nìŋ tomàŋ nyìnga e ɗewe lɛɛ̀ sùà, nìŋ do nàŋ kpùùmò wo yèɔ yaà e zɔ̀kpɔ̀ sùà wɔ. Jàaìŋ jii, maŋ mìè maŋ wo Kanaà Jisɛ̀ wuŋ bi naŋ wa woò maŋ wààŋ, ‘E zɔlɔ̀ zimgbe doum nàŋ nɔ̀ŋ sèè mùŋ kiɛ̀ŋ wo nyùùŋ, e nìàŋ sèè wo nyùùŋ woum kiɛ̀ŋ.’ ”

Nyɛ̀nɛ̀ŋ 28:25

Nààŋ aŋ gò wa nyimèè nyiŋ wouwòù è fèemàŋ, àŋ naŋ tɔ̀ɔ̀tù kàa. Kɛɛ wo Pɔɔ̀ naŋ nyiŋ tɛɛ̀ woò wààŋ, “Wo Jìnàŋ Nɛɛmaàŋ naŋ wa wòò e keì kɛnɛɛ̀ e teengaà wò naŋ wa tùɔ̀ŋ wo wɛ̀ijìɔ Àzaayà lɛ,

Nyɛ̀nɛ̀ŋ 5:3

Wo Pììlɛ nauŋ dawè wààŋ, “Ananayà, wèè kiɛ̀ŋ mùŋ naŋ dàngè wo Sɛ̀tanàŋ naum zuwò e kìlà wo jɔ̀à ke jii mɔɛ̀ŋ sùà, yèè mùŋ naŋ tɔ̀ɔ̀ koɓɛ̀ wo Jìnàŋ Nɛɛmaàŋ, e kìlà mùŋ naŋ bànè e nɛɛnɛɛ̀ŋ bà hàa e yìwìà e yèɛ mùŋ naŋ yɛmɛ̀ lɛ nààŋ mùŋ naŋ mààŋ e diì mɔ̀ɛ̀?

Nyɛ̀nɛ̀ŋ 7:51

Wo Siiwììŋ naŋ nyiŋ ɓɛìŋ woò wààŋ, “Kiìŋ è ɗì nyinge nìŋ kuwa yɛi le! Nìŋ yaà mààŋ anyùùŋ maŋ jii komaŋ gò jàà kpùa kpùɔ̀ŋ maŋ nùŋ, aŋ yè nyaŋ kòò àŋ kòmò wa kè mìè gbìàŋ Dayàa. Nìŋ yaà mààŋ aŋ nèwàènèweiŋ nyàŋ. Nyɛ̀iŋ pɛɛ nìŋ giiyà wo Jìnàŋ Nɛɛmaàŋ maŋhɛɛ e teenga gbiŋ!

Nyɛ̀nɛ̀ŋ 7:55

Kɛɛ wo Siiwììŋ, wo yèɔ wo Jìnàŋ Nɛɛmaàŋ naŋ wa dìèsùà wɔ, naŋ gè fɛ̀ɛ̀ dìì wo yɛ̀mɛ̀ ko àìjɛnɛ̀ŋ, yèè wò naŋ yɛ̀mɛ̀ e gbòlòùŋ Dayaà yèè wo Jisɛ̀ sia wɔŋ kùàŋ jìkà Dayàa.

Luùm 14:17

E Kànà Dayàa e fè wèè è nɛ̀ŋje jèe yèè màŋ muàŋ tìa, kɛɛ è yaà wèè e tɔ̀ɔ̀nyaàŋ, ke jii fàa, yàà e zɔlɔ̀ e yèɛ wo Jìnàŋ Nɛɛmaàŋ kiɛ̀ŋ lɛ.

Luùm 15:13

Tɔ̀ wo Dayà, wo yèɔ kiɛ̀ŋ ke jii tùlia wɔ̀, wo kpuumàiŋ niŋ kɛɛnɛ̀ŋ e zɔlɔ̀ kɛnɛ yèè ke jii fàa, esàɓù e hààweiŋ nɛ̀, wèè kɛ̀ ke jii tùliaiŋ nɛɛ̀ŋ e gààŋ wo Jìnàŋ Nɛɛmaàŋ sùà, e nɔ̀iŋ maŋjɛ̀wɛ e teenga gbiŋ.

Luùm 15:16

Wò naim wa tàeɗùù wèè ka nɔ̀ŋ ɓɔìjɔ̀à tòmo wèè Jisɛ̀ Kulaì anyùùŋ nyaŋ fè àŋ Juùù nyaŋ tɛɛ, e kìlà wèè ka nyɛ̀nɛ̀ŋ e tòmo mààŋ wo sìèfèìŋ zòòlo, nààŋ mìŋ wòò ke mìè gbìàŋ Ebò Siauŋ nɛ̀, wèè e nyɛ̀nɛ̀ŋ wo jàà anyùùŋ nyaŋ fè àŋ Juùù nyaŋ naŋ hààwè Jisɛ̀ nyaŋ kùàŋ dìì. Àŋ do nàŋ nɔ̀ŋ mààŋ e nɛ̀ŋ kìɛŋ koɓɛ̀ Dayài e yèɛ àŋ naŋ jàà e ɓula ko nɛ̀ɛ̀uŋ niìŋ e yìwìà wo Jìnàŋ Nɛɛmaàŋ.

Luùm 5:5

Ke jii tùlia yɛɛ̀ fè wi zuwò, esaɓù kɛ̀ wo Dayà gbìàŋ e mànauŋ nɛ̀ maŋ jii wi màŋ sùà, esàɓù wo Jìnàŋ Nɛɛmaàŋ wo yèɔ wò naŋ wi kiɛ̀ŋ wɔ.

1 Kɔliìŋ 12:3

Wèètii, mìŋ manaŋ wèè naŋ nyìmàŋ kɛ̀ wo nyùnɔ̀ɔŋ gbiŋ wo Jìnàŋ Dayàa yaà maŋjɛ̀wɛ wɔ̀ wo fè woò wààŋ, “E gbòòno yaà wo Jisɛ̀ Kulaì màŋjɛ̀wɛ!” Wo nyùùŋ gbiŋ fè ɓɛ̀nɛ̀ŋ wòo wààŋ, “Jisɛ̀ Kulaì yaà Kana,” è yèɛ wo Jìnàŋ Dayàa fèeùŋ màŋjɛ̀wɛ lɛ̀.

1 Kɔliìŋ 6:19

Niŋ nyimààŋ kɛ̀ kè kpùnaiŋ nɛɛ̀ŋ nàŋ yaà kè sààŋ zòòlò Dayàa wèè wò Jìnàŋ Dayàa, yààìŋ sùà wɔ, wo yèɔ wo Dayà naiŋ kiɛ̀ŋ wɔ? Niŋ fè wèè nyɛ̀iŋ bi, nìŋ yaà wèè Dayà.

2 Kɔliìŋ 6:6

E gòiŋ nyɛ̀nɛ̀ŋ kèì sàngè, yèè è naŋ kùwìè jiikɛ̀ɛ, è naŋ kùwò jii, e kìlà è naŋ nyɛ̀nɛ̀ŋ keì sìàŋ. Wo Jìnàŋ Dayàa naŋ wi nɔ̀ŋ maŋjɛ̀wɛ, yèè e mànaŋ wilɛ̀ naŋ nɔ̀ŋ e kɛnɛ niŋ,

Ɛfesɔ̀ 1:13

Nyɛ̀iŋ pɛɛ nìŋ naŋ nɔ̀ŋ anyùùŋ Dayà nààŋ nìŋ naŋ kòmò ke miè gbìàŋ tɔ̀ɔ̀nyaàaŋ, e nyaàiŋ dè Ebò Siaàŋ doiŋ nàŋ joeyè lɛ. Nìŋ naŋ hààwè Jisɛ̀ Kulaì sùà, yèè wo Dayà naiŋ sìè e fee wèè e tɔɔ̀ kɛ̀ wuŋ nàŋ kànàìŋ. E fee bi nàŋ yaà wo Jìnàŋ Nɛɛmaàŋ wò naŋ wa ɓèmè e ɗààhiì wèè wo wi kiɛ̀ŋ wɔ.

Ɛfesɔ̀ 1:17

yèè mìŋ dawà wo Dàyà Kana wiɔ̀ Jisɛ̀ Kulaìɔ, wo Dèdà e jòòwoɔ̀, wèè woiŋ fè wo Jìnàŋ Nɛɛmaàŋ, wo yèɔ doiŋ nàŋ nyɛ̀nɛ̀ŋ naŋ kɛ̀ɛ̀jii e kìlà wo nyɛ̀nɛ̀ŋ e nɛ̀ɛŋ è naŋ tɔɔ̀ wèè naŋ nyìmàŋ Dayà lɛ.

Ɛfesɔ̀ 4:30

Yèè ɓɔ̀ mùŋ nyɛ̀nɛ̀ŋ wò Jìnàŋ Nɛ̀ɛ̀màŋ Dayàa kè nyowo douŋ nyɛ̀nɛ̀ŋ, esaɓù kɛ̀ wo Jìnàŋ Nɛɛmaŋ nàŋ yaà e feeɛ̀ yààùm kɔɔ sùà, e yèɛ naŋ tɔɔ̀ kɛ̀ wo Dayà nàŋ kànàùm lɛ. Wuŋ nàŋ yaà ke jii tùliaà kɛ̀ ke ɗɔɔ bà do wa nàwèè nàŋ hnè, wo Dayà woum joeyè wèè foo yèè wo fòum kùwìà màŋ jùumùum màŋ bà gbiŋ.

1Tɛsè 4:8

E wèètii, sèè wo nyùùŋ gbiŋ wo gè kùàŋ e kaà lɛ dìì, wo fè gèe sùà wò nyuùŋkpùuŋ kùàŋ dìì, sɔɔ̀ wo Dayà, wo yèɔ naiŋ fè wo Jìnàŋ Nɛɛmauŋ nɔɔ̀ŋ wɔ.

2Time 1:14

E yìwìà e gààŋ Jìnàŋ Nɛɛmaàŋ wo yèɔ yaà wì sùà wɔ, bànè manɛ̀ŋ siaŋ sìàŋ maŋ àŋ naum tùlìè jii weè miŋ màŋ ko hàa.

Taitɔ̀ 3:5

wò naŋ wi joeyè. E fè kɛ̀ yàwi bi è naŋ nyɛ̀nɛ̀ŋ è tɔ̀ɔ̀nyaàŋ bà, kɛɛ e yìwìà ke nyòwò wuŋ biɛ̀ sùà wò naŋ wi joeyè, esàɓù Jìnàŋ nɛɛmaàŋ sùà, wo yèɔ naŋ wi kìɛ̀ŋ e kòmo jɛi yèè wɔŋ nyiiŋ gèe jɛi esàɓù e gùaà wò naŋ wi gùò lɛ sùà.

Hiɓu 10:15

Wo Jìnàŋ Nɛɛmaàŋ naŋ wi kìɛ̀ŋ ke mìè seì. Wò naŋ wi woò jiɛ̀ wààŋ,

Hiɓu 2:4

Wo Dayà wuŋ bi naŋ kìɛ̀ŋ ke mìè seì, nààŋ wò naŋ tɔ̀ɔ̀ maŋ tɔ̀ɔ̀màŋsèì keì, yèè maŋ kèè mèè, e kìlà wò naŋ wa kìɛ̀ŋ wo Jìnàŋ Nɛɛmaàŋ koɓɛ̀ wo nyùnɔ̀ɔŋ gbiŋ wò manaŋ wouŋ kiɛ̀ŋ wɔ.

Hiɓu 3:7

Weètii, nààŋ wo Jìnàŋ Nɛɛmaàŋ naŋ woò lɛ, “Sèè nìŋ komo nàaŋ kè mìè Dayàa,

Hiɓu 9:8

Wo Jìnàŋ Nɛɛmaàŋ kaà wì janjai e yìwìà e ɗeweɛ̀ lɛɛ̀ sùà kɛ̀, ko tààmàiŋ wèè ko Nɛ̀nɛ̀ŋ Nɛɛmaŋ Gbeeì wèè Dayà kòò kò nɔ̀ŋ weè yìle, e teengaà ke vààyàa kè yaà wa weè nɔŋ koɓɛ̀i àŋ zoolà lɛ.

1Pììlɛ 1:12

Wo Dayà naŋ dàànè ebò koɓɛ̀ aŋ wɛ̀ijì nyɛɛ̀ŋ kɛ̀ aŋ fè wa toomo wèè è nàfà nyiŋ bi, sɔɔ̀ nyɛ̀iŋ nyàŋ, àŋ naŋ wòò maŋ keì maŋ nìŋ naŋ yaà kòmò e yìwìà aŋ keela nyàŋ naŋ dàànè Ebò Siaàŋ esàɓù e gààŋ Jìnàŋ Dayàa sùà e yìwìà ko àìjɛnɛ̀ŋ nyaŋ. Mɛɛ̀ŋ nàŋ yaà maŋ keì maŋ aŋ màikà nyaŋ kàìŋ nyaŋ pɛɛ hewa nàŋ mɔ̀nɔ̀ŋ wèè aŋ nyìmàŋ maŋ.

2Pììlɛ 1:21

E mìè nyààŋ wɛ̀ijì gbiŋ gò wa nɔŋ e yìwìà è gòngò nyiiŋ bi sùà, kɛɛ wo Jìnàŋ Dayàa nàŋ yaà wa tòòmò anyùùŋ nààŋ àŋ yaà wa fèe sùà ke miè gbìaàŋ e yìwìà Dayà.

1Jɔ̀ɔŋ 2:20

Kɛɛ wèè nyɛ̀iŋ wo Jisɛ̀ Kulaì naiŋ sìè wo Jìnàŋ Nɛɛmaàŋ sùà, yèè nyɛ̀iŋ gbiŋ nàŋ nyìmàŋ e tɔ̀ɔ̀nyaàaŋ.

1Jɔ̀ɔŋ 2:27

Kɛɛ nyɛ̀iŋ nyɛɛ̀ŋ, wo Jisɛ̀ naiŋ wa gbìɛ̀ŋ wo Jinàuŋ nɔɔ̀ŋ maŋ jiio sùà. Yèè e teengaà wo Jinààŋ yààìŋ maŋ jiio sùà lɛ, niŋ naàŋ ɓɛìŋ mɔ̀nɔ̀ŋ wèè wò nyùùŋ ba doiŋ kaà. Efèfoo wo Jinàaŋ wòiŋ kàà e nɛ̀ɛŋ gbiŋ, yèè e yèɛ gbiŋ wò naìŋ kaà lɛ, è yaà tɔɔɓaaà, e fè tòa. Jɔ̀ɔ̀lɔìŋ e kàà wo Jinàaŋ dìì, yèè niŋ jeeè aŋ bàiŋbà nɔ̀ɔŋ wo Jisɛ̀ Kulaìɛ sùà.

1Jɔ̀ɔŋ 5:7

Aŋ sèì taai naŋ kìɛ̀ŋ ke mìè seìɛ.

Juù 1:20

Kɛɛ sèè è nɔ̀ŋ wèè nyɛ̀iŋ nààŋ dàwi mànaim nyàŋ, kùnoìŋ nɔŋ nyɛ̀nɛ̀ŋ nyɛ̀iŋ bi wèè niŋ nyìngà sùà wèè e hààwè nɛɛmaàŋ nìŋ kuwa lɛ̀. Zòòloìŋ e gààŋ Jìnàŋ Dayàa sùà,

Maŋ kèì nyɛɛnɛŋ 2:11

Wò naŋ ɓɛìŋ woò wààŋ, “Sèè mùŋ kɛɛnɛ̀ŋ maŋ nùŋ, kɛ̀ kòmàŋ e nɛ̀ɛŋ wo Jìnàŋ Nɛɛmaàŋ naŋ wòò koɓɛ̀ ke gbòò anyuùŋ hààwe nyàŋ lɛ. “Koɓɛ̀ anyùùŋ nyaŋ do nàŋ ɓùlò anyùùŋ maŋ tùwo naanààŋ nyaŋ lɛ̀, aŋ naàŋ kɔ̀ è nìmìlà keì naanààaŋ dìì wèè è fà dìà tìyèeɛ̀.”