Hiɓu 9:12 - WƆŊ FƐ̀Ì EBÒ SÌÀŊ DAYÀA

¹² Nààŋ wo Jisɛ̀ Kulaì naŋ jɔ̀ ko Nɛ̀nɛ̀ŋ Nɛɛmaŋ Gbeeì wèè Dayà e sùà guùŋ kpò yèè wèè anyùùŋ nyaŋ gbiŋ, wo gò wa kòà màŋ sɛ̀ìŋ àŋ diì wowo yaà àŋ dìi wowo wèè wo miŋ gììyà saaà. Wò naŋ wa gììyè maŋ sɛ̀ìŋ wuŋ bi màŋ saaà, yèè wò naŋ wi joeyè e yìwìà maŋ jùumù sùà wèè julɔfɔ.

Hiɓu 9:12 ပူးပေါင်းရင်းမြစ်များ

Luù 1:68

“Tɛ̀nɛ̀ŋ wiìŋ wo Kanaà, wo Dàyà anyùùŋ Ezɔ̀ɛ̀ nyaŋ! Wò hnàŋ wèè wo joeyè anyunùuŋ nyàŋ.

Nyɛ̀nɛ̀ŋ 20:28

Weètii yɛ̀mɛìŋ nyɛ̀iŋ bi diɛŋ e kpùlìà anyùùŋ nyaŋ kinɛiŋ wo Jìnàŋ Nɛɛmaàŋ naŋ gbìɛ̀ŋ e gaàiŋ nɛ̀ dìì nyaŋ. Nɔ̀iŋ mààŋ anyuùŋ tùnìàŋ aŋ ɓaawaa wèè ke gbòò anyuùŋ hààwè Dayà nyaŋ. Nyiŋ nàŋ yaà aŋ yè nyaŋ wò naŋ jàà e ɓula wèè wuŋ bi e yìwìà maŋ sɛ̀ìŋ wo Jɔ̀àfèlàà wuŋ biɔ̀ sùà.

Ɛfesɔ̀ 1:7

Esàɓù maŋ sɛ̀ìŋ Jisɛ̀ Kulaì maŋ sùà wo Dayà naŋ wi bilɛ̀ŋ wèè foo, tii naŋ tɔɔ̀ kɛ̀ wò jùùyà maŋ jùumù wi màŋ hakɛ̀. E tɛ̀ɛ̀tɛ̀ɛ̀ Dayàa naŋ dɛɛ̀,

Kòlo 1:14

e yìwìà esàɓù wo yèɔ è naiŋ nɔ̀ŋ bìlɛŋ wi wɔ̀, tii naŋ tɔɔ̀ kɛ̀ wò naŋ jùùyè maŋ jùumù wi màŋ hakɛ̀.

1Tɛsè 1:10

yèè wèè naŋ fòlà jɔ̀àfelaauŋ nɔɔ̀ŋ Jisɛ̀ Kulaì e yìwìà ko àìjɛnɛ̀ŋ wo yèɔ wò naŋ gè e fàaà dìì yèè wò naŋ wi joeyè e yìwìà e wùàŋ Dayàa yaà hinie lɛ̀.

Taitɔ̀ 2:14

Wò naŋ fè wuŋ bi wèè yàwi, yèè wo naŋ wi bilɛ̀ŋ e yìwìà maŋ keì naanààŋ gbiŋ sùà, e kìlà wò naŋ wi nyɛ̀nɛ̀ŋ eiŋ nɔ̀ŋ anyuùŋ zɛ̀nɛŋ, aŋ yè nyaŋ wuŋ guùŋ kpò kanaŋ yèè àŋ naŋ haamìŋ wèè e keì sìàŋ nyɛ̀nɛŋ nyàŋ.

Hiɓu 1:3

Wo Jɔ̀àfèlàà Dayàa nàŋ kuwa e gbolòùŋ nɛ gbiŋ wèè e jòòwò Dayàa, e kìlà wò yaà mààŋ e nɔ̀ŋ kìì Dayàa wuŋ bi. E yìwìà ke mìè gaàŋ gbeeuŋ nɛɛ̀ŋ, wò nyɛnɛŋ manɛ̀ŋ maŋ gbiŋ wo Dayà naŋ banè maŋ, jèè e nɔ̀ŋ kìì bàne miŋ nɛ̀ sùà. Nààŋ wo Jɔ̀àfelaaà naŋ nyɛ̀nɛ̀ŋ wo Dayà naŋ jùùyè anyuùŋ kpùuŋ nyàŋ hakɛ̀ wèè maŋ jùumù nyiŋ màŋ wèè aŋ zɛ̀nɛ̀ŋ, wò naŋ jɛ̀ì wɔŋ kùàŋ jìkà Dayàa, wo yèɔ kuwa e gaàŋ gbeeɛ̀ gbiŋ wɔ̀ ko àìjɛnɛ̀ŋ ko fùùiŋ.

Hiɓu 10:19

Nyɛ̀iŋ nààŋ wùìyaim nyàŋ, è yààìŋ naàŋ nyaàŋ gè diɛŋ wi wèè eiŋ jɔ̀à ko Nɛ̀nɛ̀ŋ Nɛɛmaŋ Gbeeì wèè Dayà, esàɓù maŋ sɛ̀ìŋ Jisɛ̀ Kulaì maŋ wò naŋ wùɔ̀ŋ dìì maŋ nààŋ àŋ nauŋ wa jìwè.

Hiɓu 10:4

E gbììŋ gbììŋ nɛ nàŋ yaà kɛ̀, maŋ sɛ̀ìŋ ɗolònɛ̀ŋ mààŋ wo dìi wowo ɔ̀ɔ̀ wo diì wowo fè gùà màŋ jùùmù nyùùŋ.

Hiɓu 13:12

Wèè esaɓù lɛɛ̀, àŋ naŋ wa gè wo Jisɛ̀ ko jawa gbeeì, auŋ jìwà, wèè maŋ sɛnùuŋ màŋ nyɛ̀nɛ̀ŋ anyùùŋ nyaŋ aŋ nɔ̀ŋ nɛɛmaŋ sùà.

Hiɓu 5:9

E keì nyìngaà wo Jisɛ̀ naŋ wa kɔ̀ dìì lɛ, naŋ nyɛ̀nɛ̀ŋ wò naŋ wa nɔ̀ŋ wo nyuùŋ tùlìà jii dìà sùà, e kìlà wò naŋ nɔ̀ŋ ko tɔɔtuì wèè e jòèyè anyùùŋ nyaŋ jɔɔlɔ̀uŋ dìì nyaŋ,

Hiɓu 7:27

Wo fè mààŋ àŋ kànà sìèfèìŋ zòòlo gbànaŋ nyàŋ. Wo kuwà èsaɓù bà wèè wo gè màŋ saaà kè ɗɔɔ gbiŋ wèè maŋ jùùmù wuŋ bi màŋ jiɛ̀ yèèngàà wò gè ɓɛìŋ è saaà wèè màŋ jùùmù ànyuùŋ gbànaŋ nyàŋ. Wò naŋ wa gè e sàà ɗì guùŋ e sùà guùŋ yèè wèè anyùùŋ nyaŋ gbiŋ, e teengaà wò naŋ wa gììyè wuŋ bi saaà lɛ.

Hiɓu 9:13

Nààŋ e làngì maŋ Sàwà Mòòze màŋ naŋ tɔɔ̀ lɛ, anyùùŋ nyaŋ naŋ wa nɔ̀ŋ nyuùŋ gò zɛ̀nɛ̀ŋ nyaŋ, fè wa tɛ̀ɛ̀ wèè aŋ zòòlò Dayà. Kɛɛ wo Dayà do nyiŋ nàŋ nyɛ̀nɛ̀ŋ aŋ zɛ̀nɛ̀ŋ e kìlà aŋ nɔ̀ŋ anyùùŋ nɛɛmaŋ, sèè wò vaàì nyiìŋ wa nàwèè maŋ sɛ̀ìŋ aŋ diì wowo yaà maŋ sɛ̀ìŋ aŋ dìi wowo nyàŋ, e kìlà aŋ nyiŋ vààì e dùùm wo dìi jaweɔ̀ àŋ naŋ gììyè saaà yèè àŋ naŋ sùɔ̀ŋ wɔ.

Hiɓu 9:14

Nààŋ tɛɛ̀ è yaà tɔɔɓaa lɛ̀, maŋ sɛ̀ìŋ Jisɛ̀ Kulaì maŋ kuwa ngèè e gaàŋ e nìàŋ miiŋ gbiŋ, nààŋ wò naŋ wa wùɔ̀ŋ maŋ sɛ̀ìŋ e teengaà àŋ nauŋ wa jìwè lɛ. E yìwìà esàɓù wo Jìnàŋ Nɛɛmaàŋ yaà wɔŋ nyiiŋ gèeɔ̀ sùà wèè julɔfɔ wɔ̀, wò naŋ kìɛ̀ŋ wuŋ bi wèè wo nɔ̀ŋ e nɛ̀ŋ kìɛŋ, e saaà gèe tùlìà jii sùà koɓɛ̀ Dayài. Maŋ sɛnùuŋ màŋ do nàŋ nyɛ̀nɛ̀ŋ maŋ jii wi màŋ maŋ zɛ̀nɛ̀ŋ e yìwìà maŋ langi foo sùà, wèè kɛ̀ è naiŋ ɓɛ̀nɛ̀ŋ zòòlò wo Dàyà nyiiŋ gèeɔ̀.

Hiɓu 9:15

E wèè saɓù lɛɛ̀, wo Jisɛ̀ Kulaì nàŋ yaà wo nyùnɔ̀ɔŋ sià ke konaŋ fèemàaŋ, wo yèɔ naŋ bànè e ɗààhìì e mìèsùàguùŋ jɛ̀ì, wèè kɛ̀ aŋ yè nyaŋ wo Dayà naŋ nyààŋ nyaŋ aŋ yɛmɛ̀ e kpùùmàŋ wɔŋ nyiiŋ gèe gò jùà e yèɛ wo Dayà naŋ jɔ̀ɔ̀ ɗààhiì wèè wo kiɛ̀ŋ lɛ. Tɛɛ̀ ɓɛ̀nɛ̀ŋ kààiŋ esaɓù kɛ̀ wo Jisɛ̀ Kulaì naŋ fɔ̀, yèè tɛɛ̀ naŋ nyɛ̀nɛ̀ŋ anyùùŋ naŋ fòlò e keì dìì e yìwìà maŋ keì naanààŋ maŋ àŋ naŋ nyɛ̀nɛ̀ŋ maŋ, e teengaà e ɗààhìì mìèsùàguùŋ jiɛ̀jiɛ̀ɛ yaà wa toomo lɛ̀.

Hiɓu 9:19

Wo Mòòze naŋ wa wòò anyùùŋ nyaŋ gbiŋ e yèɛ gbiŋ wo Dayà naŋ wa woò wèè aŋ nyɛ̀nɛ̀ŋ nààŋ è yaà sìnga niŋ maŋ Sàwà Dayà maŋ sùà lɛ. Wò naŋ ɓèmè maŋ sɛ̀ìŋ aŋ dìi wowo yaà maŋ sɛ̀ìŋ aŋ diì wowo, wo miŋ kàànè e wùìyè, yèè wò naŋ ɓèmè wɔŋ deè wɛ̀ìŋ, wo wuŋ dìkìà ke kùù bà àŋ nyaaŋ hasò, yèè wò naŋ wuŋ hɔ̀ɔ̀ maŋ sɛìŋ kàànè wùìyèɛ sùà, yèè wò naŋ miŋ vààì wɔŋ fɛ̀ì maŋ Sàwà Dayàa, yaà anyùùŋ nyaŋ gbiŋ diɛŋ.

Hiɓu 9:28

E ɗèwè guùŋ nɛ sùà wo Dayà naŋ wa kìɛ̀ŋ wo Jisɛ̀ Kulaì e sùà guùŋ kpò wèè wo nɔ̀ŋ e nɛ̀ŋ saaà, yèè wò naŋ fɔ̀ e sùà guùŋ kpò wèè wo gùà maŋ jùùmù anyuùŋ zimgbe. Kɛɛ sèè wò hnàŋ ɓɛìŋ, e naàŋ ɓɛìŋ nɔ̀ŋ wèè wo gùà màŋ jùumù. Wò do nàŋ hnè wèè wo jòèyè anyùùŋ nyaŋ gbiŋ yàaùŋ fulie nyàŋ.

Hiɓu 9:7

Wo kànà sìèfèìŋ zòòlo gbeeɔ̀ nɔŋ nàŋ jɔ̀à wa wo hàì ko tàamàŋ dìà tìyèeì, ko Nɛ̀nɛ̀ŋ Nɛɛmaŋ Gbeeì wèè Dayà. Wò hewa nɔŋ tii nyɛ̀nɛ̀ŋ e sùà guùŋ kpò wɔŋ doaà sùà. E teenga gbiŋ wò nɔ̀ŋ wa kɔɔyɛ, sɔɔ̀ wo kòà màŋ sɛ̀ìŋ e ɗolònɛ̀ɛŋ àŋ naŋ gììyè saaà maŋ, wèè wo miŋ kiɛ̀ŋ e saaà gèeo sùà koɓɛ̀ Dayài, wèè maŋ jùumùuŋ màŋ yaà maŋ jùumù maŋ gbiŋ anyùùŋ nyaŋ naŋ nyɛ̀nɛ̀ŋ yèè aŋ gò miŋ jàà jii màŋ.

Maŋ kèì nyɛɛnɛŋ 1:5

e yìwìà wo Jisɛ̀ Kulaì sìwè, wo sèì tɔ̀ɔ̀nyaàaŋ, wo jiɛ̀jiɛ̀ɔ wo yèɔ wo Dayà naŋ gè e fàaà dìì wɔ. Wuŋ nàŋ yaà wo sìèfèìŋ aŋ kana nyàŋ gbiŋ e ɗuunyaàŋ diɛŋ. Wo Jisɛ̀ Kulaì mànàŋ wì, yèè e yìwìà maŋ sɛnùuŋ màŋ wò naŋ wi gè maŋ jùumù wi màŋ sùà,

Maŋ kèì nyɛɛnɛŋ 5:9

Àŋ naŋ dàà wɔŋ nuùŋ jɛ̀ì nyààŋ, “Mùŋ yaà tɛ̀ɛ̀ wèè maŋ ɓèmè wɔŋ fɛi fùngò fungoɔ̀ yèè maŋ yìlè e fèè manɛ̀ŋ yìlia màŋ yàa wuùŋ maŋ, esaɓù kɛ̀ àŋ naum wa jìwè, yèè e yìwìà maŋ sɛ̀ìŋ muàŋ bi màŋ, mùŋ naŋ bìlɛ̀ŋ anyùùŋ wèè Dayà, anyùùŋ e yìwìà e ziì gbiŋ sùà, maŋ kàìŋ gbiŋ sùà, wɔŋ fuɔŋ gbiŋ sùà, yèè anyuùŋ kpùuŋ ziì gbiŋ.