Hiɓu 7:26 - WƆŊ FƐ̀Ì EBÒ SÌÀŊ DAYÀA

²⁶ Wo Jisɛ̀ nàŋ yaà wo Kànà Sìèfèìŋ Zòòlo Gbee wiɔ̀ wo yèɔ kiɛ̀ŋ wì e nɛ̀ɛŋ gbiŋ è naiŋ kpɛɛ̀ŋ weè niŋ lɛ. Wò yaà wo nyùùŋ nɛɛmaŋ. Wo kuwà è tɔ̀mɛ yèè màŋ jùumù. Wo Dayà nauŋ wa jàà ɓùla è gbà e yìwìà anyùùŋ jùumù nyàŋ fèemàŋ, yèè wò nauŋ joowò wouŋ nyɛ̀nɛ̀ŋ wo ɓɛ̀màŋɗì manɛ̀ŋ maŋ gbiŋ diɛŋ ko àìjɛnɛ̀ŋ.

Hiɓu 7:26 ပူးပေါင်းရင်းမြစ်များ

Maafiù 27:18

Wo Paalè wa nyìmàŋ kɛ̀ aŋ màmànkùmɛ̀ŋ aŋ Juùù nyaŋ naŋ wa kìɛ̀ŋ wo Jisɛ̀ ko nɛ̀ɛ̀uŋ niìŋ esaɓù kɛ̀ e kooɛ̀ yaà nyiìŋ wa.

Luù 1:35

Wo màikàa naŋ fasàì wààŋ, “Wo Jìnàŋ Nɛɛmaàŋ doum nàŋ dèyè diɛŋ, yèè e gààŋ Dayà Gaàŋ Gbeeɔ̀ doum nàŋ ɓùwò. Weètii mùŋ do nàŋ nyààŋ wo jɔ̀à nɛɛmaŋ wɛɛ̀ wo Jɔ̀àfèlàà Dayàa.

Luù 23:22

Wo Paalè naŋ nyiŋ ɓɛìŋ dawè e dìà taaà sùà wààŋ, “Kɛɛ kiìŋ kè sàwà wò naŋ pɔɔ̀? Miŋ gò yɛ̀mɛ̀ è keì naanààaŋ wò naŋ nyɛ̀nɛ̀ŋ lɛ wèè auŋ jìwà. Mìŋ do nɔŋ nàŋ nyɛ̀nɛ̀ŋ auŋ ɓùlà yèè kauŋ dangè wo ka.”

Luù 23:41

Sèè è nɔ̀ŋ wèè e je wilɛ̀, è yaà tɔ̀ɔ̀nyaàŋ, esaɓù kɛ̀ yàwi bi naŋ niŋ kamè wèè e keì naanààaŋ è naŋ nyɛ̀nɛ̀ŋ lɛ. Kɛɛ wuŋ wo gò nyɛ̀nɛ̀ŋ è keì naanààŋ bà gbiŋ.”

Luù 23:47

Wo kànà aŋ kààlòòɗùà nyaŋ naŋ yɛ̀mɛ̀ e keìɛ naŋ kaaìŋ lɛ, yèè wò naŋ tɛ̀nɛ̀ŋ wo Dayà. Wò naŋ woò wààŋ, “E tɔɔɓaa le, wo felaa wɛɛ̀ yaà wa wo nyùùŋ tɔ̀ɔ̀nyaàŋ!”

Luù 24:26

Niŋ nyimààŋ kɛ̀ wò Kulaìɔ, wo yèɔ wo Dayà naŋ tàeɗùù wèè wo joeyè e ɗuunyaàŋ wɔ, kuwa wa wo kùwà è keì nyìnga paŋgàà wo wa nɔ̀ŋ jòòwouŋ?”

Luù 24:46

yèè wò naŋ nyiŋ woò wààŋ, “Tɛɛ̀ nàŋ yaà sìnga niŋ wɔŋ fɛ̀ì Dayàa sùà, kɛ̀ wo Kulaìɔ, wo yèɔ wo Dayà naŋ tàeɗùù wèè wo joeyè e ɗuunyaàŋ wɔ, kuwa wo kà e keì nyìnga dìì, yèè sèè e gɔ̀ɛ̀ɛ̀ taai è maaŋ wo yèwà e fàaà dìì wɔ̀ŋ nyiiŋ gèeo sùà.

Jɔ̀ɔŋ 14:30

Miŋ naàŋ ɓɛìŋ gbòò kò nɛ̀ɛ̀iŋ niìŋ wèè è teenga mùnlaŋ, esaɓù kɛ̀ wo ɓɛ̀màŋɗì e kànà ɗuunyaŋ lɛɛ̀ kòò wò yaà hinie. Kɛɛ wo kuwà è gààŋ kò diɛim.

Jɔ̀ɔŋ 8:29

Wo nyùnɔ̀ɔŋ naim tùɔ̀ŋ wɔ kòò wò yààìm kɔɔ. Mìŋ nyɛnɛŋ e yèɛ wò manaŋ wèè ka nyɛ̀nɛ̀ŋ lɛ e teenga gbiŋ, yèè wo naàim wa nàwèè jòò miàŋ guùŋ.”

Nyɛ̀nɛ̀ŋ 3:14

Wò naŋ wa kìɛ̀ŋ wuŋ bi koɓɛ̀ Dayài yèè wò naŋ wa nyɛ̀nɛ̀ŋ e yèɛ wo Dayà naŋ woò kɛ̀ è yaà wa tɛ̀ɛ̀ lɛ, kɛɛ nìŋ naŋ wa wòò e keì naanààŋ weèuŋ. Nìŋ naŋ wa dàwè wo Paalè wèè wo daŋgè wo nyuùŋ jìwà nyùnɔ̀ɔŋ wo ka, kɛɛ nààŋ wo Paalè jìwà wo Kanaà Jisɛ̀, wo yèɔ yaà wa e nɛɛmaŋ e kìlà wò yaà tɔ̀ɔ̀nyaàŋ wɔ.

Nyɛ̀nɛ̀ŋ 4:27

Kanaà, è nyìmàŋ kɛ̀ e yèɛ mùŋ naŋ wa woò lɛ è yaà tɔɔɓaa. Wo Hɛɛlɔ̀ yaà wo Pɔuŋtiɔ̀ Paalè naŋ dèènè koɓɛ̀ guùŋ e kpùlìà anyùùŋ nyaŋ fè àŋ Juùù nyaŋ yaà anyùùŋ Ezɔ̀ɛ̀ nyaŋ wèè aŋ nyɛ̀nɛ̀ŋ e ɗèwe naanààŋ koɓɛ̀ wo Ɓɔ̀ìjɔ̀à nɛɛmaŋ mɔɔ̀ŋ Jisɛ̀, wo yèɔ mùŋ naŋ tàeɗùù wèè wo joeyè e ɗuunyaàŋ wɔ.

2 Kɔliìŋ 5:21

Wo Jisɛ̀ Kulaì kuwà wa màŋ jùumù, kɛɛ wo Dayà nauŋ nyɛ̀nɛ̀ŋ wo nɔ̀ŋ wo bàuŋbà maŋ jùumù wi màŋ sùà, e wèè kɛ̀ sèè è nɔ̀ìŋ ke gboòuŋ nɛɛ̀ŋ sùà, kɛ̀ wo Dayà wò wi ɓemè wèè èiŋ nɔ̀ŋ anyùùŋ tɔ̀ɔ̀nyaàŋ ko nɛ̀ɛ̀uŋ niìŋ.

Hiɓu 1:3

Wo Jɔ̀àfèlàà Dayàa nàŋ kuwa e gbolòùŋ nɛ gbiŋ wèè e jòòwò Dayàa, e kìlà wò yaà mààŋ e nɔ̀ŋ kìì Dayàa wuŋ bi. E yìwìà ke mìè gaàŋ gbeeuŋ nɛɛ̀ŋ, wò nyɛnɛŋ manɛ̀ŋ maŋ gbiŋ wo Dayà naŋ banè maŋ, jèè e nɔ̀ŋ kìì bàne miŋ nɛ̀ sùà. Nààŋ wo Jɔ̀àfelaaà naŋ nyɛ̀nɛ̀ŋ wo Dayà naŋ jùùyè anyuùŋ kpùuŋ nyàŋ hakɛ̀ wèè maŋ jùumù nyiŋ màŋ wèè aŋ zɛ̀nɛ̀ŋ, wò naŋ jɛ̀ì wɔŋ kùàŋ jìkà Dayàa, wo yèɔ kuwa e gaàŋ gbeeɛ̀ gbiŋ wɔ̀ ko àìjɛnɛ̀ŋ ko fùùiŋ.

Hiɓu 12:2

Jàà wiìŋ e fɛɛ̀ wilɛ̀ wo Jisɛ̀ diɛŋ, wo yèɔ è naiŋ tùlìè jii e hààwe wilɛ̀ sùà, e yìwìà ko tɔ̀ɔ̀tù e hààwe wilɛ̀ e hàì ko dìaì. Wò naŋ wa nyimèè wèè auŋ sìà sàngè, yèè auŋ kpùùnyàŋ wɔŋ vànèkpaaà diɛŋ. Kɛɛ esàɓù e zɔlɔ̀ɛ yàaùŋ wa fulie lɛ̀, wo gò wa gòngò è kèè ɓɛ̀ɛ̀pɔ̀ɔɛ̀ wèè auŋ kpùùnyàŋ wɔ̀ŋ vànèkpaaà diɛŋ. Yèè kòò wò jaa naàŋ wɔŋ kùàŋ jìka ke kpùà Kanaà Dayà kɔɔ.

Hiɓu 2:10

Wo Dayà nàŋ kanaŋ manɛ̀ŋ bàne màŋ gbiŋ, yèè e gaàuŋ nɛ̀ sùà wò naŋ wa bànè manɛ̀ŋ maŋ gbiŋ. Yèè è yaà wa e kèì tɔ̀ɔ̀nyaàŋ wo Dayà naŋ wa nyɛ̀nɛ̀ŋ, e teengaà wò naŋ nyɛ̀nɛ̀ŋ wo Jisɛ̀ naŋ nɔ̀ŋ wo nyuùŋ tùlìà jii dìà sùà nààŋ wò naŋ wa kɔ̀ e keì nyìnga dìì, wèè wo nyɛ̀nɛ̀ŋ aŋ jɔ̀à Dayà nyaŋ zimgbe nyiŋ aŋ nɔ̀ŋ jòèye nyiŋ, yèè aŋ nɔ̀ŋ aŋ bà nyiŋ bà wèè e jòòwò Dayàa.

Hiɓu 2:17

Tɛɛ̀ naŋ tɔɔ̀ kɛ̀ wò kuwa wa wo nɔ̀ŋ mààŋ aŋ wùìyauŋ nyàŋ e ɗèwè kìì guùŋ nɛ àŋ yaà lɛ, wèè wo nɔ̀ŋ wo nyuùŋ tùlìà jii nyiŋ nɔɔ̀ŋ yèè wo Kànà Sìèfèìŋ Zòòlo Gbee kɛ̀ɛ̀nɛ̀ŋ ke nyowo e tòmò Dayàa sùà, wèè wo Dayà juuyà maŋ jùùmù nyiŋ màŋ hakɛ̀.

Hiɓu 3:1

Nyɛ̀iŋ nààŋ nyuùŋ hààwe dàwium nyàŋ, wo Dayà naiŋ tàeɗùù wèè naŋ nɔ̀ŋ anyùùŋ nɛɛmauŋ. Weètii gòngoìŋ e kèè wo Jisɛ̀, wo yèɔ wo Dayà naŋ tàeɗùù wèè wo nɔ̀ŋ wo keela yèè wo Kànà Sìèfèìŋ Zòòlo Gbeeɔ̀ wèè e hààweɛ̀ è kuwàìŋ lɛ.

Hiɓu 7:11

Wo Dayà naŋ wa kìɛ̀ŋ maŋ sàwà koɓɛ̀ anyunùuŋ nyàŋ e yìwìà ko Ezɔ̀ɛ̀, e teengaà wò naŋ wa kìɛ̀ŋ maŋ sàwà e nyaàiŋ dè aŋ sìèfèìŋ zòòlo nyàŋ. Sèè e yèɛ aŋ sìèfèìŋ zòòlo nyàŋ e yìwìà ke kpòò Liivàa sùà naŋ wa nyɛ̀nɛ̀ŋ lɛ, naŋ wa weè ɓɛ̀nɛ̀ŋ nyɛ̀nɛŋ wèè wò Dayà jùùyà anyùùŋ hakɛ̀ kpɛlɛmɛɛŋ, kɛ̀ tɔɔɓaa esaɓù bà fè weè ɓɛìŋ wèè wò sìèfèìŋ zòòlo joo bà wo hnàŋ, wo yèɔ yewe ke gbòò aŋ sìèfèìŋ zòòlo nyàŋ sùà e nyaàiŋ dè wo Mɛ̀kisiɗɛ̀, kɛɛ e fè e yìwìà ke gbòò aŋ sìèfèìŋ zòòlo nyàŋ ke kpòò Èlɔuɛ̀ŋ sùà.

Hiɓu 8:1

E gbèìŋ gbèìŋ nɛ e nyaàiŋ dè e yèɛ è yààìŋ woo lɛ̀ nàŋ yaà kɛ̀, è kùwàìŋ wo Kànà Sìèfèìŋ Zòòlo Gbee wo yèɔ jaa ke kpùà Kanaà Dàyà Gaàŋ Gbeeɔ̀ kùàŋ jìka wɔ̀ ko àìjɛnɛ̀ŋ.

Hiɓu 9:14

Nààŋ tɛɛ̀ è yaà tɔɔɓaa lɛ̀, maŋ sɛ̀ìŋ Jisɛ̀ Kulaì maŋ kuwa ngèè e gaàŋ e nìàŋ miiŋ gbiŋ, nààŋ wò naŋ wa wùɔ̀ŋ maŋ sɛ̀ìŋ e teengaà àŋ nauŋ wa jìwè lɛ. E yìwìà esàɓù wo Jìnàŋ Nɛɛmaàŋ yaà wɔŋ nyiiŋ gèeɔ̀ sùà wèè julɔfɔ wɔ̀, wò naŋ kìɛ̀ŋ wuŋ bi wèè wo nɔ̀ŋ e nɛ̀ŋ kìɛŋ, e saaà gèe tùlìà jii sùà koɓɛ̀ Dayài. Maŋ sɛnùuŋ màŋ do nàŋ nyɛ̀nɛ̀ŋ maŋ jii wi màŋ maŋ zɛ̀nɛ̀ŋ e yìwìà maŋ langi foo sùà, wèè kɛ̀ è naiŋ ɓɛ̀nɛ̀ŋ zòòlò wo Dàyà nyiiŋ gèeɔ̀.

1Pììlɛ 1:19

È yaà wa maŋ sɛ̀ìŋ nyìngà ɓàà Jisɛ̀ Kulaì maŋ wò naŋ gììyè saàà lɛ, wo yèɔ yaà wa mààŋ wo Ɓaawaa gò kùwìè è tɔ̀mɛ dòmaŋ nyaaŋ gbiŋ wɔ̀.

1Pììlɛ 2:22

Wo gò nyɛ̀nɛ̀ŋ è kèì jùumù, yèè wo nyùùŋ gbiŋ gò kòmàŋ wèè è tòa euŋ fùlìà kò nyààŋ.

1Pììlɛ 3:22

wo yèɔ naŋ naàŋ kɔ̀ ko àìjɛnɛ̀ŋ wò jaa wɔŋ kùàŋ jìkà Dayàa, wò yaà nyìnìè maŋ tòmò gaàŋ gbeegbèè màŋ gbiŋ ko àìjɛnɛ̀ŋ e kìlà wò kuwa e gààŋ aŋ màìkà nyaŋ diɛ̀ŋ.

1Jɔ̀ɔŋ 2:2

Yèè wo Kulaì wuŋ bi nàŋ yaà è nɛ̀ŋ saàa wèè maŋ jùumù wi màŋ nɔ̀ŋ hakɛ̀ jùùya miŋ, yèè e fè nɔŋ wèè màŋ jùumù wi màŋ miŋ gùuŋ kɛɛ è yaà wèè maŋ jùùmù anyùùŋ nyaŋ gbiŋ e ɗuunyaàŋ.

1Jɔ̀ɔŋ 3:5

Nàŋ nyìmàŋ kɛ̀ wo Jisɛ̀ naŋ wa hnè wèè wo ɓèmè maŋ jùumù wi màŋ, yèè wo fè wo nyùùŋ maŋ jùumù.

Maŋ kèì nyɛɛnɛŋ 3:7

Wò naŋ ɓɛìŋ woò wààŋ, “Tɛɛ̀ mùŋ kuwa maŋ sìngà koɓɛ̀ wo màikàa wèè ke gbòò anyuùŋ hààwe nyàŋ ko Fèlèdɛfià. “Ke miè gbìaàŋ kɛɛ̀ e yìwìà wo yèɔ yaà nɛɛmaŋ yèè e tɔ̀ɔ̀nyaàŋ sùà wɔ. Wuŋ nàŋ kuwa e jììŋ Kanaà Dèèweɛ̀, yèè sèè wò yilà wɔŋ gbemgbee, wo nyùùŋ gbiŋ fè wuŋ yìlà, yèè sèè wò yìlè wuùŋ, wo nyùùŋ gbiŋ fè wuŋ ɓɛ̀nɛ̀ŋ yìle.