Hiɓu 5:7 - WƆŊ FƐ̀Ì EBÒ SÌÀŊ DAYÀA

⁷ E teengaà wo Jisɛ̀ yaà wa e ɗuunyaàŋ lɛ, wò naŋ wa zoolò yèè wò naŋ dàwè wo Dayà ke mìè gòla gbee sùà yaà maŋ fɛɛ̀màì sùà wèè wo joeyèuŋ. Wo Dayà kuwa wa e gààaŋ wèè wo jòèyè ke kpùnàŋ Jisɛ̀ɛ wèè wo gò wa nàŋ fɔ̀. Nààŋ wò naŋ wa dèèyè wùŋ bi wèè wo nyɛ̀nɛ̀ŋ e yèɛ wo Dayà manaŋ wa wo nyɛ̀nɛ̀ŋ lɛ, wo Dayà naŋ jàà e zòòlouŋ nɛ̀ kùàŋ dìì.

Hiɓu 5:7 ပူးပေါင်းရင်းမြစ်များ

Maafiù 27:46

E tèèngà e gɔɛɛ gbòà taaà diɛŋ wo Jisɛ̀ naŋ kpààŋ sɛiŋ yèè wò naŋ wòò wɔŋ kanùuŋ nɔɔ̀ŋ sùà wààŋ, “Ìlɔì, Ìlɔì, làmaŋ sàɓàtanìŋ?” E fàsàì tɛɛ̀ nàŋ yaà, “Dayà miɔ̀ŋ, Dayà miɔ̀ŋ, wèè kiìŋ mùŋ naim gììyè kɛ̀ɛ?”

Maafiù 27:50

Wo Jisɛ̀ naŋ ɓɛìŋ kpààŋ sɛiŋ, yèè wò naŋ mìè wɔŋ nyiiuŋ nɔɔ̀ŋ.

Luù 23:46

Wo Jisɛ̀ naŋ kpààŋ sɛiŋ, yèè wò naŋ woò wààŋ, “Dèda, muàŋ mìŋ naŋ hèè wɔŋ nyììŋ jinàŋ miɔ̀ŋ sìwè.” Wò naŋ tɛɛ̀ woò yèè wò naŋ mìè nyiiŋ.

Jɔ̀ɔŋ 1:14

Wo nyùnɔ̀ɔŋ àŋ nyaaŋ ke Mìèɛ wɔ̀ naŋ wa kìlè wo nyuùŋkpùuŋ, e kìlà e ɗewe lɛɛ̀ sùà wo Dayà wuŋ bi naŋ wa hnè yèè wò naŋ wi kià jòò e tɛɛ. Wò naŋ tɔ̀ɔ̀ e mànaŋ zimgbe yèè e tɔ̀ɔ̀nyààŋ Dayàa koɓɛ̀ anyùùŋ nyaŋ. È naiŋ wa yɛ̀mɛ̀ e jòòwouŋ nɛ̀ ko nɛ̀ɛ̀ŋ wiì. E jòòwoɛ̀ wo Dayà nauŋ wa kiɛ̀ŋ lɛ nààŋ wuŋ nàŋ yaà wo Jɔ̀àfèlàà gunɔ̀ɔŋ koɓɛ̀ wo Dèdaà lɛ.

Jɔ̀ɔŋ 11:35

Yèè wo Jisɛ̀ naŋ tɔ̀ɔ̀tù gòla.

Jɔ̀ɔŋ 11:42

Kà nyìmàŋ kɛ̀ mùŋ jaa e zòòlo mɛ̀ kùàŋ dìì e teenga gbiŋ, kɛɛ mìŋ naŋ tɛɛ̀ woò wèè esàɓù anyùùŋ nyɛɛ̀ŋ kià, wèè kɛ̀ aŋ haawè kɛ̀ muàŋ naim tùɔ̀ŋ.”

Jɔ̀ɔŋ 17:1

Nààŋ wo Jisɛ̀ naŋ kpɛ̀ɛ̀yɛ̀ gbòà koɓɛ̀ anyùùŋ màŋjɛ̀wɛ̀uŋ nyàŋ, wò naŋ gè fɛ̀ɛ̀ dìì yèè wò naŋ yɛ̀mɛ̀ e tèèngà ko àìjɛnɛ̀ŋ wò naŋ zoolò wààŋ, “Dèda, e teengaà è haì wèè maŋ kìɛ̀ŋ miàim wo Jɔ̀àfelaa mɔɔ̀ŋ e jòòwo, wèè kɛ̀ miàŋ pɛɛ mìŋ naum ɓɛ̀nɛ̀ŋ jòòwo.

Luùm 8:3

E yèɛ ke sàwàa fè wa ɓɛ̀nɛ̀ŋ nyɛ̀nɛŋ esàɓù e zɔ̀kpɔ̀ɛ yaà nyuùŋkpùuŋ sùà lɛ, wo Dayà naŋ niŋ wa nyɛ̀nɛ̀ŋ. Wò naŋ wi wa gè e ɗo dìì e yìwìà maŋ jùumù wi màŋ sùà, nààŋ wò naŋ tùɔ̀ŋ wo Jɔ̀àfèlàà wuŋ biɔ̀ wèè wo nɔ̀ŋ wo nyuùŋkpùuŋ mààŋ yàwi bi, e kìlà wèè wo kùwà e nimilà wèè maŋ jùumù wi màŋ.

Gàla 4:4

Kɛɛ nààŋ e teenga kɛnɛɛ̀ naŋ wa haì, wo Dayà naŋ tùɔ̀ŋ wo Jɔ̀àfelaauŋ nɔɔ̀ŋ, yèè wo jɔùŋ nauŋ kòmò. Wo Jɔ̀àfelàà Dayàa naŋ wa jɔ̀ɔ̀lɔ̀ ke Sàwà aŋ Juùù nyaŋ dìì,

1Time 3:16

Wo nyùùŋ gbiŋ fè ɓɛ̀nɛ̀ŋ gììyà kè gbùnu gbeeɛ̀ kè yaà e hààwe wilɛ̀ sùà yɛ màŋhɛɛ. Wo Jisɛ̀ Kulaì naŋ wa hnè mààŋ wo nyuùŋkpùuŋ, wo Jìnàŋ Nɛɛmaàŋ nauŋ wa tɔɔ̀ wèè wo nɔ̀ŋ nyuùŋ tɔ̀ɔ̀nyaàaŋ, yèè aŋ màìkà nauŋ wa yɛmɛ̀. Àŋ naŋ dàànè Ebò Siauŋ nɛ̀ maŋ fuɔŋ màŋ gbiŋ sùà, e ɗuunyaàŋ gbiŋ nauŋ sìè e hààwe sùà, yèè wò naŋ nɔ̀ŋ jòòwòuŋ ko àìjɛnɛ̀ŋ.

Hiɓu 10:10

Nààŋ wo Jisɛ̀ Kulaì naŋ nyɛ̀nɛ̀ŋ e yèɛ wo Dayà manaŋ wa wo nyɛ̀nɛ̀ŋ lɛ̀, yàwi nààŋ gbiŋ naiŋ nɔ̀ŋ anyùùŋ nɛɛmaŋ e yìwìà maŋ jùumù wi màŋ sùà, e teengaà wò naŋ gììyè ke kpùnauŋ nɛɛ̀ŋ saaà e sùà guùŋ kpò wèè anyùùŋ nyaŋ gbiŋ lɛ̀.

Hiɓu 10:5

Weètii, nààŋ e teengaà naŋ wa gbɛ̀ɛ̀ wèè wo Jisɛ̀ Kulaì wo hnàŋ e ɗuunyaàŋ, wò naŋ wa wòò wo Dayà wààŋ, “Muŋ manàŋ wèè ànyùùŋ aŋ gè màŋ saaà ɔ̀ɔ̀ aum kìɛ̀ŋ mànɛ̀ŋ kìɛŋ, kɛɛ mùŋ naim nyɛ̀nɛ̀ŋ ka kɛ̀ɛ̀nɛ̀ŋ ke kpùnàŋ nyuùŋkpùuŋ.

Hiɓu 11:7

E hààwe naŋ wa nyɛ̀nɛ̀ŋ wo Nòa naŋ kòmò ke mìè gòoɛ̀ wo Dayà naŋ wa kiɛ̀ŋ lɛ e nyaàiŋ dè maŋ keì maŋ ko dòmàŋfeìŋ maŋ yè maŋ wo fè wa ɓɛ̀nɛ̀ŋ yɛ̀mɛ màŋ. Wo Nòa naŋ wa jɔ̀ɔ̀lɔ̀ ke mìè Dayàa dìì, yèè wò naŋ bànè wɔŋ gɔ̀ kòi wɔŋ yèɔ naŋ wa jòèyè ke kpoouŋ nɛɛ̀ŋ yèè wuŋ bi. Ko diemeì, wo Dayà naŋ wa nìmìlà anyùùŋ nyaŋ gbiŋ e ɗuunyaàŋ, yèè wo Nòa wa yɛ̀mɛ̀ e tɔ̀ɔ̀nyaàaŋ e yìwìà wo Dayà sìwè e yèɛ hnàŋ esàɓù hààwe lɛ̀.

Hiɓu 12:28

Gè wiìŋ Dayà ke sɛ̀, wèè esaɓù kɛ̀ è naìŋ yɛ̀mɛ̀ e kana e yèɛ fè ɓɛ̀nɛ̀ŋ mɛ̀ɛ̀mɛɛŋ lɛ. Kɛ̀ɛ̀nɛ̀ŋ wiìŋ e jòòwo gbee yèè e zoolòiŋ Dayà e ɗewe kiiɛ̀ douŋ nàŋ fɔ̀ɔ̀yɛ̀ jii lɛ̀ e ɓɛ̀ɛ̀jàa sùà.

Hiɓu 13:20

Tɔɔɓaa, wo Dayà naŋ gè wo Kana wiɔ̀ Jisɛ̀ e fàaà dìì. Wo Jisɛ̀ yaà mààŋ wo nyuùŋ tùnìàŋ ɓaawaa gbee, wo yèɔ naŋ wùɔ̀ŋ maŋ sɛ̀nùuŋ màŋ wèè wo banè e ɗààhìì e mìèsùàguùŋ wèè julɔfɔ e fèèmàŋ Dayà yaà anyunùuŋ nyàŋ. Tɔ̀ wo Dàyà jii fàaà kiɛ̀iŋ e tɛ̀ɛ̀tɛ̀ɛ̀ɛ gbiŋ nìŋ manaŋ lɛ̀, wèè kɛ̀ niŋ nyɛ̀nɛ̀ŋ e yèɛ wò manaŋ lɛ̀. Tɔ̀ esàɓù Jisɛ̀ Kulaìɛ nyɛ̀nɛ̀ŋ wo Dayà toomò wi sùà wèè e nyɛ̀nɛ̀iŋ e yèɛ fɔɔyɛ̀uŋ jii lɛ̀. Yèè tɔ̀ e jòòwo nɔ̀ŋ koɓɛ̀ Jisɛ̀ Kulaìi wèè julɔfɔ yèè julɔfɔ. Àmiinàŋ!

Hiɓu 2:14

Aŋ jɔ̀à nyiiŋ kuwa maŋ kèìŋ yaà maŋ sɛ̀ìŋ, yèè wo Jisɛ̀ naŋ wa nɔ̀ŋ wo bà nyiŋ bà e nɔ̀ŋ kii nyiŋ nɛ̀ sùà. Wò naŋ tɛɛ̀ nyɛ̀nɛ̀ŋ wèè kɛ̀ esàɓù e fàuŋ nɛ̀, wo pɔɔpɔ̀ɔ̀ e gààŋ Dɛwìɔ, wo yèɔ kuwa wa e gààŋ e fàa diɛŋ wɔ̀.

1Jɔ̀ɔŋ 4:3

Kɛɛ wo nyùnɔ̀ɔŋ gbiŋ naŋ gììyè e keì lɛɛ̀ maŋhɛɛ e nyaàiŋ dè Jisɛ̀ Kulaì wɔ, wo kuwà wò Jinàaŋ yewe Dayà sìwè wɔ. Wo jinàaŋ wò kuwa wɔ̀ wò yewe aŋ jòò Jisɛ̀ nyaŋ sùà. Nàŋ wa kòmàŋ kɛ̀ wo jinàŋ tòa wɛɛ̀ do nàŋ hnè, yèè kòò wò yaà naàŋ e ɗuunyaŋ lɛɛ̀ sùà tɛ.

2Jɔ̀ɔŋ 1:7

Aŋ wɛ̀ijì tòa zimgbe naŋ ɓààyè e ɗuunyaàŋ gbiŋ sùà, anyùùŋ nyaŋ kuwà è hààweɛ̀ kɛ̀ wo Jisɛ̀ Kulaì naŋ wa hnè mààŋ wo nyuùŋkpùuŋ wɔ̀. Wo nyùùŋ mààŋ wii wò yaà wo nyuùŋ tòa yèè wo joo wèè Kulaì.