Hiɓu 10:20 - WƆŊ FƐ̀Ì EBÒ SÌÀŊ DAYÀA

²⁰ Wò naŋ yìlè ke dòmaŋ jɛi ke yèɛ kɔ̀à koɓɛ̀ wɔŋ nyiiŋ gèe lɛ̀. Yèè ke dòmaŋ yɛɛ̀ kɔɔyɛ̀ wì wɔŋ dèè saaŋ yɛmgbɛ̀ɔ sùà. Wɔŋ dèè bi zà nàŋ yaà ke kpùnàŋ Jisɛ̀ Kulaìɛ kiŋ bi.

Hiɓu 10:20 ပူးပေါင်းရင်းမြစ်များ

Jɔ̀ɔŋ 14:6

Wo Jisɛ̀ naŋ fasàì wààŋ, “Miàŋ nàŋ yaà ke dòmaàŋ, e tɔ̀ɔ̀nyaàaŋ yaà wɔŋ nyiiŋ gèeɔ̀. Wo nyùùŋ gbiŋ fè ɓɛ̀nɛ̀ŋ hnàŋ kòɓɛ̀ wò Dèdaì, sɔɔ̀ nɔŋ woim kɔ̀ɛ̀ɛ̀ kùàŋ sùà.

Jɔ̀ɔŋ 10:9

Miàŋ nàŋ yaà wɔŋ gbàngiɔ̀. Aŋ yè nyaŋ gbiŋ doim nàŋ kɔ̀ɛ̀ ko sùà aŋ jɔ̀à nyaŋ do nàŋ nɔ̀ŋ jòèye nyiŋ. Esaɓù mɛ̀ sùà àŋ do nàŋ hnè yèè aŋ ka aŋ mɛ̀ɛ̀ŋ maŋ tùwa ɓou wèè aŋ gbìlà.

Hiɓu 9:3

Wɔŋ dèè saaŋ yɛmgbɛ̀ɔ jɛ̀wɛ̀ ke vààyàa dìì, nàŋ yaà wa koɓɛ̀i àŋ nyaaŋ ko Nɛ̀nɛ̀ŋ Nɛɛmaŋ Gbeeì wèè Dayà.

Hiɓu 9:8

Wo Jìnàŋ Nɛɛmaàŋ kaà wì janjai e yìwìà e ɗeweɛ̀ lɛɛ̀ sùà kɛ̀, ko tààmàiŋ wèè ko Nɛ̀nɛ̀ŋ Nɛɛmaŋ Gbeeì wèè Dayà kòò kò nɔ̀ŋ weè yìle, e teengaà ke vààyàa kè yaà wa weè nɔŋ koɓɛ̀i àŋ zoolà lɛ.

Hiɓu 6:19

Ke jii tùlia yɛɛ̀ nyɛnɛŋ wɔŋ nyììŋ wiɔ̀ jɛi gìli e kìlà ke wi joeyè, yèè kè yaà mààŋ wɔŋ hààŋgàa jàà wɔŋ meeèɔ gìli lɛ̀. Ke jii tùliaà è kùwàìŋ yɛ nàŋ yaà wo Jisɛ̀, wo yèɔ kɔ̀à wo Dayà fɛɛ̀feìŋ, màànààŋ nɔŋ aŋ sìèfèìŋ zòòlò gbee nyàŋ maaŋ wɔŋ dèè saaŋ yɛmgbɛ̀ɔ jɛ̀wɛ̀ aŋ hàì ko zòòlò Nɛɛmaŋ Gbeeì ko Saaŋ Zòòlò Dayài.

Jɔ̀ɔŋ 10:7

Yèè wo Jisɛ̀ naŋ nyiŋ ɓɛìŋ woò wààŋ, “Miŋ yààìŋ wòò e tɔɔɓaaà. Miàŋ nàŋ yaà wɔŋ gbàngiɔ̀ wèè koɓɛ̀i aŋ ɓaawaa nyàŋ joà lɛ.

1Jɔ̀ɔŋ 4:2

E ɗewe lɛɛ̀ sùà nìŋ do nàŋ nyìmè sèè mààŋ kɛ̀ wò Jìnàŋ Dayà wo. Wo nyùnɔ̀ɔŋ gbiŋ naŋ jàà jii kɛ̀ wo Jisɛ̀ Kulaì naŋ hnè e kɔ̀ɔ̀ nyuùŋkpùuŋ sùà wɔ, wò kuwa wo Jinàaŋ yewe Dayà sìwè wɔ.

1Pììlɛ 3:18

Wo Jisɛ̀ Kulaì naŋ fɔ̀ wèè maŋ jùumù è guùŋ kpò wèè maŋ gbiŋ, wo nyùùŋ tɔ̀ɔ̀nyaàŋ naŋ fɔ̀ wèè anyuùŋ gò haawè nyaŋ, wèè wo tɔɔ̀ nyiŋ ke dòmaàŋ koɓɛ̀ Dayà. Àŋ nauŋ jìwè e yìwìà maŋ kèìŋ maŋ sùà, kɛɛ wò naŋ nɔ̀ŋ wɔŋ nyiiŋ gèeɔ̀ sùà wo jinàaŋ sùà,

1Time 3:16

Wo nyùùŋ gbiŋ fè ɓɛ̀nɛ̀ŋ gììyà kè gbùnu gbeeɛ̀ kè yaà e hààwe wilɛ̀ sùà yɛ màŋhɛɛ. Wo Jisɛ̀ Kulaì naŋ wa hnè mààŋ wo nyuùŋkpùuŋ, wo Jìnàŋ Nɛɛmaàŋ nauŋ wa tɔɔ̀ wèè wo nɔ̀ŋ nyuùŋ tɔ̀ɔ̀nyaàaŋ, yèè aŋ màìkà nauŋ wa yɛmɛ̀. Àŋ naŋ dàànè Ebò Siauŋ nɛ̀ maŋ fuɔŋ màŋ gbiŋ sùà, e ɗuunyaàŋ gbiŋ nauŋ sìè e hààwe sùà, yèè wò naŋ nɔ̀ŋ jòòwòuŋ ko àìjɛnɛ̀ŋ.

Maafiù 27:51

Tɛɛ̀ naŋ nɔŋ kaaìŋ fa, wɔŋ dèè saaŋ yɛmgbɛ̀ gbeeɔ̀ sɛ̀ɛ̀ wa ko Saaŋ Zòòlò Dayài wɔ̀ŋ naŋ sɛ̀ɛ̀ tɛɛ fàà tìyèe, e yìwìà ko diɛìŋ e hàì ko dìlìi. E dììɛ naŋ gbiinè, yèè maŋ dùò maŋ naŋ sɛ̀ɛ̀sɛ̀ɛ̀ maŋ fàà.

2Jɔ̀ɔŋ 1:7

Aŋ wɛ̀ijì tòa zimgbe naŋ ɓààyè e ɗuunyaàŋ gbiŋ sùà, anyùùŋ nyaŋ kuwà è hààweɛ̀ kɛ̀ wo Jisɛ̀ Kulaì naŋ wa hnè mààŋ wo nyuùŋkpùuŋ wɔ̀. Wo nyùùŋ mààŋ wii wò yaà wo nyuùŋ tòa yèè wo joo wèè Kulaì.

Ɛfesɔ̀ 2:15

Wò naŋ jàà maŋ Sàwà aŋ Juùù nyaŋ e ɓula yaà maŋ langi miŋ màŋ gbiŋ, wèè wo miinè anyùùŋ tìyèe nyɛɛ̀ŋ wo nyùùŋ guùŋ ke gboòuŋ nɛɛ̀ŋ sùà, wèè wo hiàŋ ke jii fàa.