Gàla 4:5 - WƆŊ FƐ̀Ì EBÒ SÌÀŊ DAYÀA

⁵ wèè wo bìlɛ̀ŋ aŋ yè nyaŋ yaà wa ke Sàwàa dìì nyaŋ, e kìlà wèè yàwi pɛɛ eiŋ nɔ̀ŋ aŋ jɔ̀à Dayà.

Gàla 4:5 ပူးပေါင်းရင်းမြစ်များ

Maafiù 20:28

Màànààŋ nɔŋ miàim wo Jɔ̀àfèlàà Nyuùŋ Kpùnɔɔ̀ŋ kànɔ̀ɔŋ gò wa hnàŋ wèè ànyùùŋ aim tòòmò dìì lɛ, mìŋ naŋ wa hnè wèè ka nɔ̀ŋ wo ɗo, e kìlà wèè ka fè wɔŋ nyiiŋ miɔ̀ŋ wèè ka jòèyè maŋ nyììŋ anyuùŋ zimgbe.”

Luù 1:68

“Tɛ̀nɛ̀ŋ wiìŋ wo Kanaà, wo Dàyà anyùùŋ Ezɔ̀ɛ̀ nyaŋ! Wò hnàŋ wèè wo joeyè anyunùuŋ nyàŋ.

Jɔ̀ɔŋ 1:12

Jòòpɛɛ anyùùŋ nyaŋ bà nyiŋ nauŋ wa jàà kùàŋ dìì yèè àŋ nauŋ sìè e hààwe nyiŋ nɛ̀ sùà. Anyùùŋ bi wò naŋ wa kìɛ̀ŋ e tɔ̀ɔ̀nyaàŋ wèè aŋ nɔ̀ŋ aŋ jɔ̀à koɓɛ̀ Dayài.

Nyɛ̀nɛ̀ŋ 20:28

Weètii yɛ̀mɛìŋ nyɛ̀iŋ bi diɛŋ e kpùlìà anyùùŋ nyaŋ kinɛiŋ wo Jìnàŋ Nɛɛmaàŋ naŋ gbìɛ̀ŋ e gaàiŋ nɛ̀ dìì nyaŋ. Nɔ̀iŋ mààŋ anyuùŋ tùnìàŋ aŋ ɓaawaa wèè ke gbòò anyuùŋ hààwè Dayà nyaŋ. Nyiŋ nàŋ yaà aŋ yè nyaŋ wò naŋ jàà e ɓula wèè wuŋ bi e yìwìà maŋ sɛ̀ìŋ wo Jɔ̀àfèlàà wuŋ biɔ̀ sùà.

Luùm 10:4

Wo Jisɛ̀ Kulaì naŋ wa hìɛ̀ŋ maŋ Sàwà maŋ ko dìa, wèè kɛ̀ anyùùŋ nyaŋ gbiŋ kɛɛnɛ̀ŋ hààwe nyàŋ, àŋ do nàŋ nɔ̀ŋ anyùùŋ tɔ̀ɔ̀nyaàŋ koɓɛ̀ Dayài.

Luùm 8:14

Anyùùŋ nyaŋ wo Jìnàŋ Kanaà Dayà toomàŋ sùà nyaŋ, nàŋ yaà aŋ jɔ̀à Dayà nyaŋ.

Luùm 8:15

Wo Jinàaŋ wo Dayà naŋ wi kiɛ̀ŋ wɔ, wo fè wi mììnè àŋ ɗo, yèè wo fè wi sìà jùù. Kɛɛ wò nyɛ̀nɛ̀ŋ wì eiŋ nɔ̀ŋ aŋ jɔ̀àuŋ yèè euŋ nyààŋ wo Dèda wiɔ̀.

Luùm 8:19

Manɛ̀ŋ maŋ gbiŋ wo Dayà naŋ banè maŋ e ɗuunyaàŋ lɛ, màŋ yaà fùlìè e teenga titiɛ̀ wèè wo Dayà tɔɔ̀ kɛ̀ ɓòò nàŋ yaà aŋ jɔ̀àuŋ nyàŋ.

Luùm 8:23

Kɛɛ e fè nɔŋ mànɛ̀ŋ bàne màŋ miiŋ guùŋ maŋ nɔ̀ŋ gùlìè ɗìòsùà. Kɛɛ yàwi bi pɛɛ aŋ yè nyaŋ wo Jìnàŋ Kanaà Dayà yaà sùà nyaŋ, wèè eiŋ nɔ̀ŋ e nɛ̀ŋ jiɛ̀jiɛ̀ɛ wo Dayà naŋ wi kiɛ̀ŋ lɛ, guliàìŋ maŋ ɗìòsùà, nààŋ è yààìŋ fùlìè wo Dayà wèè wo wi ɓemè wèè èiŋ nɔ̀ŋ aŋ jɔ̀àuŋ. Tɛɛ̀ naŋ tɔɔ̀ kɛ̀ wò do nàŋ jòèyè maŋ kpùnaŋ wi màŋ gbiŋ e yìwìà e ɗò maŋ jùumù dìì.

Luùm 9:4

Anyùùŋ Ezɔ̀ɛ̀ nyaŋ, nyiiŋ wo Dayà naŋ tàeɗùù. Wò naŋ nyiŋ ɓemè wèè aŋ nɔ̀ŋ anyunùuŋ. Wò naŋ nyiŋ tɔ̀ɔ̀ e jòòwouŋ nɛ̀, yèè wò naŋ bànè e ɗààhìì e mìèsùàguùŋ ko nɛ̀ɛ̀ŋ nyiŋ niìŋ yèè wò naŋ nyiŋ kìɛ̀ŋ maŋ Sàwàuŋ màŋ. Nyiiŋ nàŋ kanaŋ e ɗèwè kìì zòòlo kɛnɛɛ̀ yèè e ɗààhiìɛ wo Dayà naŋ ɓèmè ko nɛ̀ɛ̀ŋ nyiŋ niìŋ lɛ.

Gàla 3:13

Kɛɛ wo Jisɛ̀ Kulaì naŋ wi wa bilɛ̀ŋ e yìwìà e gbòònò ke Sàwàa dìì, nààŋ wò naŋ wa dè ebɛ̀ŋ wi wèè e gbòòno wilɛ̀ lɛ. Wɔŋ fɛ̀ì Dayàa naŋ woò wààŋ, “Wo nyùnɔ̀ɔŋ gbiŋ àŋ naŋ kpùùnyɛ̀ŋ wɔŋ vànèkpaaà diɛŋ wɔ̀, wò yaà e gbòònò Dayàa dìì.”

Gàla 3:26

Nyɛiŋ nààŋ gbiŋ nìŋ yaà aŋ jɔ̀à Dayà, esàɓù e hààweɛ̀ niŋ kuwa wo Jisɛ̀ Kulaì sùà lɛ.

Gàla 4:21

Tɔ̀ weè miŋ dawè nyɛiŋ nyàŋ nìŋ manaŋ wèè naŋ nɔ̀ŋ ke Sàwàa wo Dayà naŋ wa kìɛ̀ŋ wo Mòòze yɛ̀ dìì, kɛɛ niŋ gò kòmàŋ è yèɛ ke Sàwàa naŋ woò lɛ?

Gàla 4:7

Niŋ fè ɓɛìŋ aŋ ɗo. Nààŋ nìŋ yaà naàŋ aŋ jɔ̀à Dayà lɛ, wò Dayà doiŋ nàŋ kìɛ̀ŋ e yèɛ wò naŋ ɓèmè e ɗààhiì wèè wo kìɛ̀ŋ aŋ jɔ̀àuŋ nyaŋ lɛ.

Ɛfesɔ̀ 1:5

wo Dayà wa kpɛ̀ɛ̀yɛ̀ ɗèwe kɛ̀ esàɓù Jisɛ̀ Kulaì sùà, wò do wi naŋ ɓemè wèè eiŋ nɔ̀ŋ aŋ jɔ̀àuŋ, tɛɛ̀ nàŋ yaà wa e kèè jiiuŋ nɛ̀, e yèɛ wò manaŋ wa wèè e kaaìŋ lɛ.

Ɛfesɔ̀ 1:7

Esàɓù maŋ sɛ̀ìŋ Jisɛ̀ Kulaì maŋ sùà wo Dayà naŋ wi bilɛ̀ŋ wèè foo, tii naŋ tɔɔ̀ kɛ̀ wò jùùyà maŋ jùumù wi màŋ hakɛ̀. E tɛ̀ɛ̀tɛ̀ɛ̀ Dayàa naŋ dɛɛ̀,

Ɛfesɔ̀ 5:2

E mànaŋ kuwìè gààŋ maŋ nyiiiŋ màŋ diɛŋ, màànààŋ Jisɛ̀ Kulaì naŋ wi mɔ̀nɔ̀ŋ, yèè wò naŋ fè wɔŋ nyiiuŋ nɔɔ̀ŋ wèè wɔŋ nɔ̀ŋ e nɛ̀ŋ saaà e yèɛ naŋ fɔ̀ɔ̀yɛ̀ Dayà jii lɛ̀.

Taitɔ̀ 2:14

Wò naŋ fè wuŋ bi wèè yàwi, yèè wo naŋ wi bilɛ̀ŋ e yìwìà maŋ keì naanààŋ gbiŋ sùà, e kìlà wò naŋ wi nyɛ̀nɛ̀ŋ eiŋ nɔ̀ŋ anyuùŋ zɛ̀nɛŋ, aŋ yè nyaŋ wuŋ guùŋ kpò kanaŋ yèè àŋ naŋ haamìŋ wèè e keì sìàŋ nyɛ̀nɛŋ nyàŋ.

Hiɓu 1:3

Wo Jɔ̀àfèlàà Dayàa nàŋ kuwa e gbolòùŋ nɛ gbiŋ wèè e jòòwò Dayàa, e kìlà wò yaà mààŋ e nɔ̀ŋ kìì Dayàa wuŋ bi. E yìwìà ke mìè gaàŋ gbeeuŋ nɛɛ̀ŋ, wò nyɛnɛŋ manɛ̀ŋ maŋ gbiŋ wo Dayà naŋ banè maŋ, jèè e nɔ̀ŋ kìì bàne miŋ nɛ̀ sùà. Nààŋ wo Jɔ̀àfelaaà naŋ nyɛ̀nɛ̀ŋ wo Dayà naŋ jùùyè anyuùŋ kpùuŋ nyàŋ hakɛ̀ wèè maŋ jùumù nyiŋ màŋ wèè aŋ zɛ̀nɛ̀ŋ, wò naŋ jɛ̀ì wɔŋ kùàŋ jìkà Dayàa, wo yèɔ kuwa e gaàŋ gbeeɛ̀ gbiŋ wɔ̀ ko àìjɛnɛ̀ŋ ko fùùiŋ.

Hiɓu 9:12

Nààŋ wo Jisɛ̀ Kulaì naŋ jɔ̀ ko Nɛ̀nɛ̀ŋ Nɛɛmaŋ Gbeeì wèè Dayà e sùà guùŋ kpò yèè wèè anyùùŋ nyaŋ gbiŋ, wo gò wa kòà màŋ sɛ̀ìŋ àŋ diì wowo yaà àŋ dìi wowo wèè wo miŋ gììyà saaà. Wò naŋ wa gììyè maŋ sɛ̀ìŋ wuŋ bi màŋ saaà, yèè wò naŋ wi joeyè e yìwìà maŋ jùumù sùà wèè julɔfɔ.

Hiɓu 9:15

E wèè saɓù lɛɛ̀, wo Jisɛ̀ Kulaì nàŋ yaà wo nyùnɔ̀ɔŋ sià ke konaŋ fèemàaŋ, wo yèɔ naŋ bànè e ɗààhìì e mìèsùàguùŋ jɛ̀ì, wèè kɛ̀ aŋ yè nyaŋ wo Dayà naŋ nyààŋ nyaŋ aŋ yɛmɛ̀ e kpùùmàŋ wɔŋ nyiiŋ gèe gò jùà e yèɛ wo Dayà naŋ jɔ̀ɔ̀ ɗààhiì wèè wo kiɛ̀ŋ lɛ. Tɛɛ̀ ɓɛ̀nɛ̀ŋ kààiŋ esaɓù kɛ̀ wo Jisɛ̀ Kulaì naŋ fɔ̀, yèè tɛɛ̀ naŋ nyɛ̀nɛ̀ŋ anyùùŋ naŋ fòlò e keì dìì e yìwìà maŋ keì naanààŋ maŋ àŋ naŋ nyɛ̀nɛ̀ŋ maŋ, e teengaà e ɗààhìì mìèsùàguùŋ jiɛ̀jiɛ̀ɛ yaà wa toomo lɛ̀.

1Pììlɛ 3:18

Wo Jisɛ̀ Kulaì naŋ fɔ̀ wèè maŋ jùumù è guùŋ kpò wèè maŋ gbiŋ, wo nyùùŋ tɔ̀ɔ̀nyaàŋ naŋ fɔ̀ wèè anyuùŋ gò haawè nyaŋ, wèè wo tɔɔ̀ nyiŋ ke dòmaàŋ koɓɛ̀ Dayà. Àŋ nauŋ jìwè e yìwìà maŋ kèìŋ maŋ sùà, kɛɛ wò naŋ nɔ̀ŋ wɔŋ nyiiŋ gèeɔ̀ sùà wo jinàaŋ sùà,

Maŋ kèì nyɛɛnɛŋ 14:3

Anyuùŋ taasùùŋ hɔ̀nɔ̀ɔ̀ guùŋ kpɛ̀ùŋ tìyèe jɛ̀wɛ̀ tiinàŋ (144,000) nyaŋ naŋ wa sìè ke kpùà Kanaà Dayà feìŋ, yaà maŋ ɗòlònɛ̀ŋ tiinàŋ maŋ yèè aŋ màmàŋkùmɛŋ nyàŋ. Àŋ yaà wa dàa sùà wɔŋ nùŋ jɛi, wɔŋ yèɔ nyiŋ bi nɔŋ naŋ wa gbeè wɔŋ. E yìwìà anyuùŋ kpùuŋ ziì nyaŋ gbiŋ tɛɛ e dììɛ diɛŋ, nyiŋ nɔŋ wo Dayà naŋ wa bilɛ̀ŋ.

Maŋ kèì nyɛɛnɛŋ 5:9

Àŋ naŋ dàà wɔŋ nuùŋ jɛ̀ì nyààŋ, “Mùŋ yaà tɛ̀ɛ̀ wèè maŋ ɓèmè wɔŋ fɛi fùngò fungoɔ̀ yèè maŋ yìlè e fèè manɛ̀ŋ yìlia màŋ yàa wuùŋ maŋ, esaɓù kɛ̀ àŋ naum wa jìwè, yèè e yìwìà maŋ sɛ̀ìŋ muàŋ bi màŋ, mùŋ naŋ bìlɛ̀ŋ anyùùŋ wèè Dayà, anyùùŋ e yìwìà e ziì gbiŋ sùà, maŋ kàìŋ gbiŋ sùà, wɔŋ fuɔŋ gbiŋ sùà, yèè anyuùŋ kpùuŋ ziì gbiŋ.