2Time 2:12 - WƆŊ FƐ̀Ì EBÒ SÌÀŊ DAYÀA

¹² Sèè è naiŋ jèè kɔ̀ɔ̀yɛ̀ keì nyìnga dìì, yàwiiŋ nyiŋ doiŋ nàŋ nɔ̀ŋ e kana kɛ̀ɛ̀uŋ nɛ̀ sùà. Sèè euŋ gììyà maŋhɛɛ, wò do wi nàŋ gììyè maŋhɛɛ.

2Time 2:12 ပူးပေါင်းရင်းမြစ်များ

Maafiù 10:33

Kɛɛ anyùùŋ nyaŋ naŋ wòò ko fɛ̀ɛ̀fèìŋ anyùùŋ nyààŋ aŋ nyimààìm nyaŋ, miàŋ pɛɛ mìŋ do wa nàwèè nàŋ woò mìàŋ miŋ nyimààŋ nyìŋ ko fɛ̀ɛ̀fèìŋ wo Dèda miɔ̀ŋ ko àìjɛnɛ̀ŋ.

Maafiù 26:35

Kɛɛ wo Pììlɛ naŋ ɓɛìŋ fasàì wààŋ, “Miŋ naàŋ tii woò julɔfɔ, sèè è tɛɛwɛ̀ pɛɛ wèè yàwuum e fɔ̀ɔ̀yɛ̀ koɓɛ̀ guùŋ!” Yèè anyùùŋ màŋjɛ̀wɛ̀ gbànaŋ nyàŋ gbiŋ naŋ wòò e kèì guùŋ bi.

Maafiù 26:75

yèè wo Pììlɛ e ɗìuŋ naŋ dè koɓɛ̀ e yèɛ wo Jisɛ̀ nauŋ wa woò lɛ wààŋ, “Wèè paŋ wo tɔɔ wowoɔ̀ kolèè, mùŋ do nàŋ gè maŋhɛɛ sùà taai kɛ̀ muŋ nyimààìm.” Yèè wò naŋ fòlò wo ka wo ɓàà ɗì gòla.

Luù 12:9

Kɛɛ anyùùŋ nyaŋ naŋ wòò ko fɛ̀ɛ̀fèìŋ anyùùŋ nyààŋ aŋ nyimààìm nyaŋ, miàim wo Jɔ̀àfèlàà Nyuùŋ kpùnɔɔ̀ŋ do wa nàwèè nàŋ woò mìàŋ miŋ nyimààŋ nyiìŋ ko fɛ̀ɛ̀fèìŋ aŋ màìkà Dayà nyaŋ.”

Luù 22:29

Yèè nààŋ nɔŋ wo Dèda miɔ̀ŋ naim kìɛ̀ŋ e tɔ̀ɔ̀nyaàaŋ wèè ka kɛ̀ɛ̀ e kana, yɛi nɔŋ mìŋ doiŋ nàŋ kìɛ̀ŋ e tɔ̀ɔ̀nyaàŋ bì.

Luù 22:30

Nìŋ do nàŋ jènɛ̀ŋ yèè naŋ tìà wɔŋ gbɛ̀gbɛ̀ miɔ̀ŋ diɛŋ e Kana mɛ̀ sùà. Yèè nìŋ do nàŋ jɛ̀ì maŋ kpùà kana diɛŋ wèè naŋ nɔ̀ŋ aŋ sìèfeìŋ maŋ zìì ɗì zììyà jɛ̀wɛ̀ tìyèe màŋ diɛŋ ko Ezɔ̀ɛ̀.”

Luù 9:26

Sèè wo nyùùŋ gbiŋ woim nyìnìàŋ sàngè e kpùlìà kè mìè gbìàŋ ebò siaàŋ, kɛ̀ miàŋ, wo Jɔ̀àfèlàà Nyuùŋ Kpùnɔɔ̀ŋ douŋ wa nàwèè nàŋ nyìnìè sàngè e teengaà mìŋ hnàŋ wa nàwèè e gbolòùŋ mɛ̀ yàà gbòlòùŋ mɛ̀ɛ̀ŋ gbèè Dèdauŋ miɔ̀ŋ sùà yaà aŋ màikà nɛɛmaŋ nyàŋ.

Nyɛ̀nɛ̀ŋ 14:22

Àŋ naŋ wa kìɛ̀ŋ anyuùŋ hààwe nyàŋ maŋ jii nyingè yèè àŋ naŋ nyiŋ pɔwɔ̀ wèè aŋ jeèè tɔ̀ɔ̀nyaàŋ e hààwe nyiŋ nɛ̀ sùà. Àŋ naŋ nyiŋ woò nyààŋ, “È kuwa eiŋ kà e keì nyìnga zimgbe dìì pangàà è kɔ̀àìŋ e Kànà Dayàa sùà.”

Luùm 5:17

È yaà tɔɔɓaa kɛ̀ esàɓù maŋ jùùmù wo anyùùŋ guùŋ sùà, e fàa naŋ kɛ̀ɛ̀nɛ̀ŋ gààŋ. Kɛɛ e sɛmɛ kɛnɛɛ̀ nàŋ yaà kɛ̀, anyùùŋ nyaŋ gbiŋ naŋ kɛ̀ɛ̀nɛ̀ŋ wɔŋ nyiiŋ gèe esàɓù e jìwààjɛ̀wɛ̀ e nɛ̀ɛŋ wo Jisɛ̀ Kulaì naŋ wa nyɛ̀nɛ̀ŋ lɛ. Wo Dayà naŋ nyiŋ kìɛ̀ŋ e tɛ̀ɛ̀tɛ̀ɛ̀ gò kɛ̀ɛ̀nɛ̀ŋ dìa e yèɛ e gò tomo weè niŋ lɛ̀, yèè wò naŋ nyiŋ jàà kùàŋ dìì wèè aŋ nɔ̀ŋ anyùùŋ tɔ̀ɔ̀nyaàŋ esàɓù e nɛ̀ɛŋ wo Jisɛ̀ Kulaì naŋ nyɛ̀nɛ̀ŋ lɛ.

Luùm 8:17

Nààŋ è yààìŋ aŋ jɔ̀à Dayà, è doiŋ nàŋ yɛ̀mɛ̀ e kpùùmaàŋ wò naŋ bànè hàa wèè anyunùuŋ nyàŋ lɛ. Yèè yàwi pɛɛ doiŋ nàŋ yɛ̀mɛ̀ e nɛ̀ɛŋ wo Dayà naŋ bànè hàa wèè Jisɛ̀ Kulaì, màànààŋ nɔŋ wò naŋ niŋ yɛmɛ̀ lɛ. Kɛɛ sɔɔ̀ eiŋ kà e mɔ̀ɔ̀nɛŋ dìì wèè e keì sìàŋ nyɛ̀nɛŋ màànààŋ wo Jisɛ̀ Kulaì naŋ niŋ kɔ̀ dìì lɛ, wèè kɛ̀ yàwi pɛɛ e yɛmɛ̀iŋ e jòòwo màànààŋ wò naŋ niŋ yɛmɛ̀ lɛ.

Fèle 1:28

Kɛ̀ɛ̀nɛiŋ maŋ jii nyingè sèè nyɛ̀iŋ yèè aŋ jooiŋ nyàŋ nìŋ deenàŋ koɓɛ̀ guùŋ. Ke jii tùliaiŋ nɛɛ̀ŋ do nyiŋ nàŋ tɔɔ̀ kɛ̀ wo Dayà do nyiŋ nàŋ pɔɔpɔ̀ɔ̀, yèè kè doiŋ nàŋ tɔɔ̀ kɛ̀ wo Dayà doiŋ nàŋ joeyè. Wo Dayà do nàŋ nyɛ̀nɛ̀ŋ tɛɛ̀ gbiŋ e kaaìŋ.

1Time 5:8

Kɛɛ sèè wo nyùùŋ gbiŋ go yɛ̀mɛ̀ ke kpoouŋ nɛɛ̀ŋ diɛŋ, ɓɔɔɓɔɔ ngèè aŋ yè nyaŋ yaà ke kpòò nyiiŋ biɛ̀ sùà nyaŋ, àŋ gììyà e hààweɛ̀ maŋhɛɛ, yèè àŋ nìàŋ anyuùŋ gò kùwìè hààwe nyàŋ.

Juù 1:4

Anyuùŋ gò nyìmàŋ Dayà nyaŋ, aŋ bà nyiŋ àŋ kɔ̀ɛ̀ kùàŋ dìì àŋ wi sɛ̀ɛ̀ e tɛɛ ke gbùnu sùà e gòiŋ nyìmàŋ, aŋ yè nyaŋ yaà pɔ̀ɔ sùà ke miè gbìaàŋ nyaàiŋ dè e tɛ̀ɛ̀tɛ̀ɛ̀ Dayà wiɔ̀ nyaŋ, wèè kàìsa aŋ yɛmɛ̀ ke kàfaì wèè maŋ kpèè naanààŋ nyiŋ màŋ, aŋ yè nyaŋ naŋ gè wo Jisɛ̀ Kulaì wo kɛ̀ɛ̀nɛŋ yèè wo Kana wiɔ̀ kùàŋ dìì nyaŋ. E gɔuo sùà, wɔŋ fɛ̀ì Dayàa wa kpɛ̀ɛ̀yɛ̀ wòò e kèì e kitiɛ̀ wo Dayà naŋ nyiŋ hèè diɛŋ lɛ̀.

Maŋ kèì nyɛɛnɛŋ 1:6

e kìlà wò naŋ wi nyɛ̀nɛ̀ŋ aŋ kana, wèè eiŋ zòòlò Dayà wo Dèdauŋ nɔɔ̀ŋ mààŋ aŋ sìèfèìŋ zòòlo. E jòòwo yèè e gààŋ nɔ̀ŋ koɓɛ̀ wo Jisɛ̀ Kulaìi wèè julɔfɔ yèè julɔfɔ! Àmiinàŋ.

Maŋ kèì nyɛɛnɛŋ 1:9

Miàŋ nàŋ yaà wo Jɔ̀ɔŋ, wo wùìyaiŋ nɔɔ̀ŋ, yèè wo nyùùŋ màŋjɛ̀wɛ̀ wo Kanaà Jisɛ̀. Miàŋ nàŋ yaà wo dàwiiŋ nɔɔ̀ŋ ke jii tɔumtɔ̀ùm sùà, wo yèɔ yaà kɔ̀ɔ̀yɛ̀ e keì nyìngaà dìì e yèɛ hnàŋ koɓɛ̀ aŋ yè nyaŋ yaà aŋ bà nyiŋ bà e Kanauŋ nɛ̀ sùà nyaŋ. Àŋ naim wa gbìɛ̀ŋ ke tììŋ Pamòɛ sùà mààŋ wo nyùùŋ keì, esaɓù kɛ̀ mìŋ naŋ gbòò ke mìè Dayàa, yèè mìŋ naŋ wòò e tɔ̀ɔ̀nyaàaŋ e nyaàiŋ dè ke mìè seìɛ wo Jisɛ̀ naŋ wa gɔ̀ì sùà yɛ.

Maŋ kèì nyɛɛnɛŋ 2:13

Kà nyìmàŋ kɛ̀ koɓɛ̀i mùŋ joà lɛ, kuŋ wo Sɛ̀tanàŋ kuwa ke kpùà kanauŋ nɛɛ̀ŋ. Mùŋ yaà e tɔ̀ɔ̀nyaàŋ sùà ko nɛ̀ɛ̀ŋ miìŋ, e kìlà muŋ gò gììyà è hààwe mɔ̀ɛ̀ màŋhɛɛ e deè mɛ̀ sùà, e yìwìà e teengaà pɛɛ àŋ naŋ wa jìwè wo Aŋtipà, wo sèì tɔ̀ɔ̀nyaàŋ miɔ̀ŋ, koɓɛ̀i wo Sɛ̀tanàŋ joà lɛ.

Maŋ kèì nyɛɛnɛŋ 20:4

Mìŋ naŋ yɛ̀mɛ̀ maŋ kpùà kana. Anyùùŋ nyaŋ jàà miìŋ wa diɛŋ nyàŋ, nyiŋ àŋ naŋ wa kìɛ̀ŋ gààaŋ wèè aŋ hàà kiti. Anyùùŋ bi zà nàŋ yaà wa aŋ jìnàŋ anyùùŋ nyaŋ àŋ naŋ wa kɛ̀ɛ̀ maŋ ɗì nyaŋ wèè aŋ kìɛ̀ŋ maŋ mìè seì, esaɓù kɛ̀ àŋ naŋ wa wòò e tɔ̀ɔ̀nyaàaŋ e nyaàiŋ de e yèɛ wo Jisɛ̀ naŋ wa gɔ̀àì sùà lɛ yèè àŋ naŋ gbòò ke mìè Dayàa. Nyiŋ nàŋ yaà anyùùŋ nyaŋ naŋ wa gè maŋhɛɛ wèè aŋ zòòlò wo yilì kùùnoɔ̀ yaà wo dayà joouŋ nɔɔ̀ŋ, e kìlà àŋ naŋ gè maŋhɛɛ wèè aŋ nyiŋ hàà e fèè wo yilì kùùnoɔ̀ maŋ ɗìfeìŋ ɔ̀ɔ̀ maŋ kùàŋ sùà. Anyùùŋ nyɛɛ̀ŋ naŋ wa kɛ̀ɛ̀ wɔŋ nyiiŋ gèe sùà yèè àŋ naŋ kɛ̀ɛ̀ kana wo Jisɛ̀ Kulaì maŋjɛ̀wɛ wèè maŋ doa tààsùùŋ guùŋ.

Maŋ kèì nyɛɛnɛŋ 20:6

E zɔlɔ̀ yaà e kpùùmaŋ gbee è yaà anyuùŋ jiɛ̀jiɛ̀ nyaŋ nàŋ wa yèwè e fàaà dìì wɔŋ nyiiŋ gèeɔ̀ sùà nyaŋ. E fàa dìà tìyèeɛ̀ kuwà è gààŋ kò diɛŋ nyiŋ. Àŋ do nàŋ nɔ̀ŋ aŋ sìèfèìŋ zòòlo yèè anyùùŋ nɛɛmaŋ wèè Dayà yaà wo Jisɛ̀ Kulaì, e kìlà àŋ do nàŋ kɛ̀ɛ̀ kana wo Jisɛ̀ Kulaì maŋjɛ̀wɛ wèè maŋ doa tààsùùŋ guùŋ.

Maŋ kèì nyɛɛnɛŋ 3:10

Nààŋ nìŋ naŋ jɔ̀ɔ̀lɔ̀ ke mìè gbòa miɛ̀ŋ dìì e hàì ko dìaì lɛ, miàŋ pɛɛ mìŋ doiŋ nàŋ joeyè e tèèngà e keì nyìngaà yaà hìnìè e ɗuunyaàŋ diɛŋ lɛ̀, wèè e nɔ̀ŋ e wàa wèè anyùùŋ nyaŋ gbiŋ e dììɛ diɛŋ.

Maŋ kèì nyɛɛnɛŋ 3:21

Anyùùŋ nyaŋ do nàŋ ɓùlò nyaŋ, mìŋ do nyiŋ nàŋ kìɛ̀ŋ e tɔ̀ɔ̀nyaàŋ wèè aim jɛ̀ì kɔɔ ke kpùà kana miɛ̀ŋ diɛŋ, màànààŋ nɔŋ mìŋ naŋ wa ɓùlò yèè mìŋ naŋ jɛ̀ì wo Dèda miɔ̀ŋ kɔɔ ke kpùà kanauŋ nɛɛ̀ŋ diɛŋ lɛ̀.”

Maŋ kèì nyɛɛnɛŋ 3:8

Kà nyìmàŋ e nɛ̀ɛŋ gbiŋ nìŋ nyɛnɛŋ lɛ̀. Kà nyìmàŋ kɛ̀ nìŋ kuwa e gaàŋ jɔ̀à. Nàŋ jɔ̀ɔ̀lɔ̀ ke mìè gbòa miɛ̀ŋ dìì e kìlà nìŋ kùwàìm e hààwe sùà. Kà yìlè wɔŋ gbemgbee ko fenìiŋ, wɔŋ yèɔ wo nyùùŋ gbiŋ fè ɓɛ̀nɛ̀ŋ yìla wɔ̀ŋ.

Maŋ kèì nyɛɛnɛŋ 5:10

Mùŋ naŋ nyiŋ nyɛ̀nɛ̀ŋ aŋ nɔ̀ŋ aŋ kànà sìèfèìŋ zòòlo wèè aŋ zoolò Dayà, yèè àŋ do nàŋ nɔ̀ŋ aŋ kana e dììɛ diɛŋ.”