2Time 1:10 - WƆŊ FƐ̀Ì EBÒ SÌÀŊ DAYÀA

¹⁰ kɛɛ è naàŋ nɔ̀ŋ tɔ̀ɔ niŋ ko nɛ̀ɛ̀ŋ wiì e yìwìà e hnàŋ Nyuùŋ Jòèye wiɔ̀, wo Jisɛ̀ Kulaì. Wò hìàŋ e gààŋ fàa ko dìa yèè e yìwìà Ebò Siaàŋ sùà wò wi tɔ̀ɔ̀ wɔŋ nyiiŋ gèe gò jùàa.

2Time 1:10 ပူးပေါင်းရင်းမြစ်များ

Luù 11:36

Sèè ke kpùnaŋ mɔɛ̀ŋ gbiŋ kè nɔ̀ŋ e gbolòùŋ sùà, e yèɛ ke bà gbiŋ fè kè nyìwì sùà, ke gbiŋ do nàŋ mɛ̀ɛ̀ŋ, màànààŋ e gbòlòùŋ laumpòɛ mɛɛŋ ko nɛ̀ɛ̀ŋ muìŋ lɛ.”

Luù 13:7

Kpeiŋ wo felaaà naŋ wòò wo nyùnɔ̀ɔŋ toomàŋ ko kpòkpò bi wɔ̀ wààŋ, ‘Yɛ̀mɛ̀ kià, kà naàŋ hnàŋ ke feè kùù yɛɛ̀ dìì wèè maŋ dòà taai ko kààmè maŋ feè kòmàŋ, kɛɛ kòò mìŋ mɛ̀ɛ̀ŋ nyiìŋ kè bà guùŋ pɛɛ kò dìì. Kɛɛ̀ nyiŋ! Wèè kiìŋ kè sia e dììɛ diɛŋ wèè foo?’

Luù 2:11

Nàaŋ ke ɗɔɔ yɛɛ̀ ko jàwà Dèèweì, àŋ kòmàŋ wo Nyuùŋ Jòèyeiŋ nɔɔ̀ŋ, wuŋ nàŋ yaà wo Jisɛ̀ Kulaì wo Kanaà.

Jɔ̀ɔŋ 1:9

Tɛɛ̀ nàŋ yaà wa e gbòlòùŋ tɔ̀ɔ̀nyaàaŋ e yèɛ yaà wa hìnìè e ɗuunyaàŋ wèè e mɛ̀ɛ̀ŋ anyùùŋ nyaŋ gbiŋ diɛŋ lɛ̀.

Jɔ̀ɔŋ 14:6

Wo Jisɛ̀ naŋ fasàì wààŋ, “Miàŋ nàŋ yaà ke dòmaàŋ, e tɔ̀ɔ̀nyaàaŋ yaà wɔŋ nyiiŋ gèeɔ̀. Wo nyùùŋ gbiŋ fè ɓɛ̀nɛ̀ŋ hnàŋ kòɓɛ̀ wò Dèdaì, sɔɔ̀ nɔŋ woim kɔ̀ɛ̀ɛ̀ kùàŋ sùà.

Jɔ̀ɔŋ 20:31

Kɛɛ àŋ naŋ wa sìngè maŋ yè mɛɛ̀ŋ wèè kɛ̀ muŋ kɛɛnɛ̀ŋ e hààwe wo Jisɛ̀ ko sùà, wo yèɔ wo Dayà naŋ tàeɗùù wɔ wèè wo joeyè anyùùŋ nyaŋ e ɗuunyaàŋ, yèè wèè naŋ haawè kɛ̀ wuŋ nàŋ yaà wo Jɔ̀àfèlàà Dayàa. Sèè nìŋ kɛɛnɛ̀uŋ e hààwe sùà, nìŋ do nàŋ kɛ̀ɛ̀nɛ̀ŋ wɔŋ nyiiŋ gèe gò jùà.

Jɔ̀ɔŋ 4:42

Àŋ naŋ wòò wo nìeɔ̀ nyààŋ, “Tɔɔɓaa e gòiŋ naàŋ nɔŋ hààwè wò Jisɛ̀ èsàɓù è yèɛ mùŋ naŋ wi woò lɛ. Yàwi bì èiŋ kùmìàŋ e yèɛ wò naŋ woò lɛ, yèè è naiŋ haawè kɛ̀ wuŋ nàŋ yaà wo yèɔ wo Dayà naŋ tàeɗùù wèè wo nɔ̀ŋ wo Nyuùŋ Jòèyeɔ̀ wèè e ɗuunyaàŋ wɔ!”

Jɔ̀ɔŋ 5:40

Yèè yɛi nɔŋ è yaà nìŋ naŋ gè maŋhɛɛ wèè naŋ hnàŋ kò nɛ̀ɛ̀ŋ miìŋ wèè naŋ kɛ̀ɛ̀nɛ̀ŋ wɔŋ nyiiŋ gèe.

Nyɛ̀nɛ̀ŋ 13:23

Wo Dayà naŋ wa jɔ̀ɔ̀ ɗààhiì kɛ̀ wo nyùùŋ bà hewa nàŋ fòlò ke kpòò Dèèweɛ̀ sùà wèè wo nɔ̀ŋ wo Nyuùŋ Jòèyeɔ̀ wèè anyùùŋ Ezɔ̀ɛ̀ nyaŋ, yèè wo nyùùŋ bi nàŋ yaà wo Jisɛ̀.

Nyɛ̀nɛ̀ŋ 5:31

Wo Dayà nauŋ jàà wɔŋ kùàŋ jìkauŋ nɔɔ̀ŋ, yèè wò nauŋ nyɛ̀nɛ̀ŋ wo Kana yèè wo Nyuùŋ Jòèyeɔ̀ weè wì, wèè kɛ̀ anyùùŋ Ezɔ̀ɛ̀ nyaŋ fè maŋ tùwo naanààŋ nyiŋ màŋ jɛwɛ aŋ kìlà ko nɛ̀ɛ̀uŋ niìŋ e kìlà maŋ jùumù nyiŋ màŋ nɔ̀ŋ hakɛ̀ jùùya miŋ.

Luùm 16:26

Kɛɛ e tɔ̀ɔ̀nyaàŋ lii è nɔ̀ŋ wòo niŋ ke fòolàa e yìwìà e sìngà aŋ wɛ̀ijì nyaŋ wɔŋ fɛ̀ì Dayàa sùà. Wo Dàyà nyiiŋ gèe gò jùàa naŋ nyiŋ wa woò yèè wò naŋ nyiŋ nyɛ̀nɛ̀ŋ aŋ ɓààyè ebò siaŋ bi koɓɛ̀ anyùùŋ nyaŋ gbiŋ e ɗuunyaàŋ sùà, wèè kɛ̀ aŋ jɔɔlɔ̀ e kìlà aŋ kɛɛnɛ̀ŋ hààwe.

Luùm 2:7

Wo Dayà do nàŋ kìɛ̀ŋ wɔŋ nyiiŋ gèe gò jùà koɓɛ̀ anyùùŋ nyaŋ gbiŋ naŋ kùwò maŋ jii wèè e tɛ̀ɛ̀tɛ̀ɛ̀ɛ àŋ naŋ nyɛ̀nɛ̀ŋ lɛ. Àŋ do nàŋ yɛ̀mɛ̀ e jòòwo, e ɓɛ̀ɛ̀jàa, e keì sìàŋ yaà wɔŋ nyiiŋ gèe wèè julɔfɔ.

Luùm 3:31

Tɛɛ̀ ɓɛ̀nɛ̀ŋ tɔ̀ɔ kɛ̀ esàɓù e hààwe lɛɛ̀ e jàaiŋ maŋ Sàwà Dayà maŋ ɓula? Kpele! E fè yɛi gbiŋ. Kɛɛ tɔɔɓaa è kuwo maŋ Sàwà maŋ kpaŋ e kìlà eiŋ miŋ jɔ̀ɔ̀lɔ̀ dìì tɛ̀ɛ̀.

Luùm 6:6

Èiŋ nyìmàŋ kɛ̀ nààŋ wo Jisɛ̀ Kulaì naŋ wa fɔ̀ɔ̀yɛ̀ wɔŋ vènèkpaaà diɛŋ, yaà maŋ kpùnàŋ jùumù wi màŋ naŋ wa fɔ̀ɔ̀yɛ̀ koɓɛ̀ guùŋ. Tɛɛ̀ naŋ wa kaaìŋ wèè e nyɛ̀nɛ̀ŋ e gààŋ maŋ kpùnàŋ jùumù wi màŋ nɔ̀ŋ pɔ̀ɔ̀pɔɔ niŋ, wèè e go wi ɓɛìŋ nàŋ nyɛ̀nɛ̀ŋ eiŋ nɔ̀ŋ aŋ ɗo wèè maŋ jùumù nyɛ̀nɛŋ.

1 Kɔliìŋ 15:26

Wo joo dìàmaàŋ wèè wo Dayà ɓùlà nàŋ yaà e fàa.

1 Kɔliìŋ 4:5

E wèètii ɓɔ̀ nìŋ gbaaì wò nyùùŋ gbiŋ è keì paŋgàà è tèèngà keì gbàiɛ̀ e haì. E keì gbài dìàmaàŋ do wa nàwèè nàŋ nɔ̀ŋ e tèèngà e hnàŋ Kanaà Jisɛ̀ Kulaìɛ diɛŋ. Wuŋ nàŋ do nàŋ gè maŋ gbùnù ke nyìwì maŋ, yaà esàɓù nyɛ̀nɛŋ miŋ nɛ̀ e gòngò nyuùŋkpùuŋ nyàŋ jiio sùà, wo miŋ gɔaì janjai. Kpeiŋ kɛ̀ wo Dayà do nàŋ fè wo nyùùŋ gbiŋ e tɛ̀nɛɛ̀ŋ wò kanaŋ lɛ̀.

2 Kɔliìŋ 5:4

È yaà tɔɔɓaa maŋ kpùnaŋ màŋ è yààìŋ sùà maŋ, maŋ fè wèè julɔfɔ, esaɓù kɛ̀ è gulìàìŋ ɗìòsùà e kìlà è yààìŋ e wùànàŋ sùà wèè eiŋ miŋ fòlà dìì, eiŋ kɛ̀ɛ̀nɛ̀ŋ maŋ kpùnaŋ jɛi ko àìjɛnɛ̀ŋ.

Gàla 5:4

Nyɛ̀iŋ nyàŋ nìŋ kamàŋ ɗewe wèè naŋ nɔ̀ŋ anyùùŋ tɔ̀ɔ̀nyaàŋ koɓɛ̀ Dayài esaɓù kɛ̀ nìŋ naŋ nyɛ̀nɛ̀ŋ e yèɛ ke Sàwàa naŋ woò lɛ, nàŋ gòò nyiìŋ bi wo Jisɛ̀ Kulaì kɔɔ. Yèè niŋ fè ɓɛìŋ e tɛ̀ɛ̀tɛ̀ɛ̀ Dayàa dìì.

Ɛfesɔ̀ 1:18

Mìŋ dawà wèè maŋ jiiiŋ màŋ maŋ yilè e kìlà niŋ yɛmɛ̀ e gbolòùuŋ nɛ, e wèè niŋ nyìmàŋ kɛ̀ kiìŋ nàŋ yaà ke jii tùliaà ke yèɛ wò naiŋ nyààŋ e weè nyiŋ nɛ̀, kɛ̀ nìŋ do nàŋ yɛ̀mɛ̀ e ɗeweɛ̀ maŋ kpùùmàŋ e keì sìàŋ gbeeuŋ nɛ̀ naŋ banè lɛ, maŋ yè maŋ wò naŋ ɓèmè e ɗààhiì wèè wo fè anyùùŋ nɛɛmauŋ nyàŋ gbiŋ lɛ̀,

Ɛfesɔ̀ 1:9

Esàɓù e nɛ̀ɛŋ wo Jisɛ̀ Kulaì naŋ nyɛ̀nɛ̀ŋ lɛ sùà, wo Dayà naŋ wi nyɛ̀nɛ̀ŋ wèè eiŋ nyìmàŋ e ɗèweɛ̀ wò kuwa ke gbùnu sùà, yèè wò naŋ naàŋ ɗewè tɛ wèè wo niŋ kpɛ̀ɛ̀yɛ̀ nyɛ̀nɛŋ esàɓù Jisɛ̀ Kulaì sùà.

2Tɛsè 2:8

Kpeiŋ kɛ̀ wo Dayà do nàŋ fùlìè Wo Nyuùŋ pɔ̀ɔ̀ maŋ sàwàa, kɛɛ sèè wo Kanaà Jisɛ̀ hnàŋ, wò douŋ nàŋ jìwìè wɔŋ fòìɔ fòloùŋ nyààŋ wɔŋ, yèè e mɛ̀ɛ̀ŋ Kanaà, e dɛngò dɛngòiŋ nii euŋ pɔɔpɔ̀ɔ̀.

2Time 1:1

E yìwìà miàim Pɔɔ̀ sìwè, mìŋ yaà wo keela tàeɗùù wèè Jisɛ̀ Kulaì e yìwìà e gààŋ Dayàa sùà, àŋ naim tùɔ̀ŋ wèè ka wòò e kèè ɗààhiìɛ wo Dayà naŋ wa ɓemè wèè wɔŋ nyiiŋ gèeɔ̀ è kùwaìŋ nààŋ è yààìŋ aŋ bàwibà wo Jisɛ̀ Kulaì sùà lɛ.

2Time 1:8

Ɓɔ̀ mùŋ nyɛ̀nɛ̀ŋ è sàngè, wèè maŋ gbòà kè mìè seì è nyaàiŋ dè wo Kana wiɔ̀ Jisɛ̀ Kulaì. E kìlà ɓɔ̀ mùŋ nyiniàm è sàngè, esaɓù kɛ̀ mìŋ yaà wo nyùùŋ màŋ keì esàɓù Jisɛ̀ Kulaìɛ sùà. Kɛɛ, ɓèmè e jeum keì nyìngàà wèè Ebò Siaàŋ, màànààŋ wo Dayà naum kìɛ̀ŋ e gààŋ wèè maŋ niŋ nyɛ̀nɛ̀ŋ lɛ.

2Time 4:1

Ko fɛ̀ɛ̀fèìŋ Dayài yaà wo Jisɛ̀ Kulaì, wo yèɔ do naŋ gbàì anyùùŋ nyaŋ yaà wɔŋ nyiiŋ gèeɔ̀ sùà yèè aŋ yè nyaŋ naŋ fɔ̀ nyaŋ, yèè nààŋ wò yaà hinie e kanauŋ nɛ̀ sùà mààŋ wo Kana lɛ̀, mìŋ yààùm woo,

2Time 4:8

Eɓìèmàŋjɛ̀wɛ̀ tɛɛ̀ ke ɓɔ̀ɗì kana kòò kè yaà naàŋ bànè hàa nyiŋ e weèim esaɓù kɛ̀ wo Dayà weèim jàà kùàŋ dìì wèè ka nɔ̀ŋ wo nyùùŋ tɔ̀ɔ̀nyaàŋ, ke yèɛ wo Kanaà, wo nyuùŋ gbàì tɔ̀ɔ̀nyaàŋ, wò doim nàŋ kiɛ̀ŋ ke ɗɔɔ yii diɛŋ yɛ̀, yèè e naàŋ nɔŋ nɔ̀ŋ miàŋ guùŋ, kɛɛ è do naŋ nɔ̀ŋ wèè aŋ yè nyaŋ gbiŋ naŋ kùwò maŋ jii e manaŋ sùà wèè e hnàuŋ nɛ̀ lɛ.

Taitɔ̀ 2:11

Wo Dayà dàànè ebò tɛ̀ɛ̀tɛ̀ɛ̀uŋ nɛ̀ wèè wo jòèyè nyuùŋkpùuŋ gbiŋ.

Taitɔ̀ 2:13

nààŋ è yààìŋ fùlìè ke ɗɔ̀ɔ̀ e keì sìàaŋ è naiŋ tùlìè jii lɛ̀, ke ɗɔɔɛ̀ e jòòwò Dayà gbee wiɔ̀ yèè wo Nyuùŋ Jòèye wiɔ̀ Jisɛ̀ Kulaì kè hnàŋ lɛ.

Taitɔ̀ 3:4

Kɛɛ nààŋ e tɛ̀ɛ̀tɛ̀ɛ̀ yaà e mànàŋ Dayàa, wo Nyuùŋ Jòèye wiɔ̀ naŋ nɔ̀ŋ tɔ̀ɔ̀ niŋ ko nɛ̀ɛ̀ŋ wiì lɛ,

Hiɓu 10:32

Ɓɔ̀ nìŋ nyɛɛnɛ̀ŋ wèè màŋ keì nyìnga màŋ nìŋ naŋ wa kɔ̀ɛ̀ɛ̀ sùà maŋ, e teenga jiɛ̀jiɛ̀ɛ nìŋ naŋ wa yɛ̀mɛ̀ e gbòlòùŋ Dayàa lɛ̀.

2Pììlɛ 1:1

E yìwìà miàim Saamɔ̀ŋ Pììlɛ sìwè, nàŋ yaà sìngìè wɔŋ fɛi wɛɛ̀ŋ. Mìŋ yaà wo ɓɔìjɔ̀à yèè wo yèɔ yaà keela tàeɗùù wèè Jisɛ̀ Kulaì. Mìŋ yaà sìngìè koɓɛ̀ anyùùŋ nyaŋ aŋ yè nyaŋ esàɓù e tɔ̀ɔ̀nyààŋ Dayàa sùà yaà wo Nyuùŋ Jòèyeɔ̀ Jisɛ̀ Kulaì, àŋ naŋ nyiŋ fè e hààwè jii nyiŋ nɛ̀ mààŋ e je wilɛ̀ nyaŋ.

2Pììlɛ 1:11

E ɗèwè guùŋ nɛɛ̀ sùà wo Dayà doiŋ nàŋ gè nyààŋ diɛŋ wèè naŋ nɔ̀ŋ e Kànàŋ nyiiŋ gèe gò jùà Kana wiɔ̀, wo Nyuùŋ Jòèyeɔ̀ Jisɛ̀ Kulaìɛ sùà.

2Pììlɛ 1:3

E nɛ̀ɛ̀màŋ Dayàa, e gaàiŋ nɛ̀ è wi kìɛ̀ŋ e nɛ̀ɛŋ gbiŋ è mànàìŋ wèè eiŋ nɔ̀ŋ wɔŋ nyiiŋ gèeɔ̀ fɔɔyɛ̀ Dayà jii wɔ̀ŋ sùà, esaɓù kɛ̀ eiŋ nyìmàŋ wo yèɔ naŋ wi nyààŋ wèè wo wi gòònò e jòòwouŋ nɛ̀ yèè e tɛ̀ɛ̀tɛ̀ɛ̀uŋ nɛ̀ e fèemàŋ wɔ.

2Pììlɛ 2:20

Sèè anyùùŋ dùàŋ aŋ fòlà e gààŋ kààkàà ɗuunyaàŋ dìì esàɓù e jiikɛ̀ɛɛ̀ àŋ kuwa e nyaàiŋ dè wo Kanaà yèè wo Nyuùŋ Jòèye wiɔ̀ Jisɛ̀ Kulaì, kpeiŋ maŋ kààkàà bi maŋ nyiŋ ɓɛìŋ kùwà maŋ nyiŋ gbùwò diɛŋ, anyùùŋ mààŋ nyiiŋ e nɔ̀ŋ kii nyiŋ nɛ̀ è nyɛnɛŋ naàŋ e nànàŋ e nìàŋ ko tɔɔtuì.

2Pììlɛ 3:18

Kɛɛ kùnoìŋ nɔŋ dɛ̀ɛ e tɛ̀ɛ̀tɛ̀ɛ̀ sùà yaà e jììkɛ̀ɛ̀ Kanaà, yèè wo Nyuùŋ Jòèyeɔ̀ Jisɛ̀ Kulaì sùà. E jòòwo nɔ̀ŋ ko nɛ̀ɛ̀uŋ niìŋ nàaŋ yèè julɔfɔ. Àmiinàŋ.

2Pììlɛ 3:2

Mìŋ manaŋ naŋ jàà jii e nyaàiŋ dè maŋ mìè maŋ aŋ wɛ̀ijì nɛɛmaŋ nyàŋ naŋ wa gbòò e gɔuo sùà maŋ yaà maŋ miè gbìaŋ màŋ e yìwìà wo Kanaà yèè wo Nyuùŋ Jòèyeɔ̀ sìwè maŋ yè maŋ aŋ keela tàeɗùùiŋ nyaŋ naiŋ wa fè maŋ.

1Jɔ̀ɔŋ 1:2

Nààŋ wɔŋ nyiiŋ gèeɔ̀ naŋ wi wa fòlò feìŋ, è naiŋ wuŋ yɛmɛ̀, yèè è yààìŋ aŋ sèì wèè e yèɛ è naiŋ yɛmɛ̀ lɛ. Weètii è yààìŋ naàŋ wòò sùà e kèè wɔŋ nyiiŋ gèe gò jùàa wɔŋ yeɔ̀ yaà wa koɓɛ̀ wo Dèdaà yèè wɔ̀ŋ naŋ wi fòlò feìŋ wɔŋ.

1Jɔ̀ɔŋ 4:14

Yèè èiŋ yɛmɛ̀ e mànaùŋ nɛ̀ e kìlà èiŋ fè ke mìè seì koɓɛ̀ anyùùŋ kɛ̀ wo Dèdaà naŋ tùɔ̀ŋ wo Jɔ̀àfelaauŋ nɔɔ̀ŋ wèè wo nɔ̀ŋ wo Nyuùŋ Jòèyè ɗuunyaàŋ.

Maŋ kèì nyɛɛnɛŋ 18:1

Eɓìèmàŋjɛ̀wɛ̀ tɛɛ̀, mìŋ naŋ ɓɛìŋ yɛ̀mɛ̀ wo màikà joo bà wò yaà dèya sùà e yìwìà ko àìjɛnɛ̀ŋ. Wò kuwa wa e gaàŋ gbee, yèè e mɛ̀iŋ kiiuŋ nɛ̀ naŋ wa gbàì e dììɛ gbiŋ diɛŋ gbòlòùŋ.

Maŋ kèì nyɛɛnɛŋ 2:7

Wò naŋ ɓɛìŋ woò wààŋ, “Sèè mùŋ kɛɛnɛ̀ŋ maŋ nùŋ, kòmàŋ e nɛ̀ɛŋ wo Jìnàŋ Nɛɛmaàŋ naŋ wòò koɓɛ̀ ke gbòò anyuùŋ hààwe nyàŋ lɛ. “Koɓɛ̀ anyùùŋ nyaŋ do nàŋ ɓùlò nyaŋ, e jìwààjɛ̀wɛ̀ nyiŋ nɛ̀ do nàŋ nɔ̀ŋ wèè ka nyiŋ gè nyààŋ diɛŋ aŋ gbìlà ke kuù kòmàŋ yìwìà ke kùlɛ̀ɛ kiɛ̀ŋ wɔŋ nyiiŋ gèe, ke yèɛ sia wɔŋ gbòlò maŋ nyùànɛ̀ŋ Dayà maŋ sùà yɛ.”

Maŋ kèì nyɛɛnɛŋ 20:14

Wo Dayà naŋ gbìɛ̀ŋ e fàa e ɗùùnyàŋ anyuùŋ fàa nyàŋ e hmɔɔ̀ŋ kùwa gbee sùà. E hmɔɔ̀ŋ kùwa gbee lɛɛ̀ nàŋ yaà e fàa dìà tìyèeɛ̀.

Maŋ kèì nyɛɛnɛŋ 22:14

E zɔlɔ̀ yaà anyùùŋ nyaŋ naŋ sɔ̀ɔ̀ maŋ ɓuuɓane nyiŋ màŋ tɛ̀ɛ̀ nyaŋ. Àŋ do nàŋ kùwìè e tɔ̀ɔ̀nyaàŋ wèè aŋ gbìlà ke kuù kòmàaŋ e yìwìà ke kùlɛ̀ɛ kiɛ̀ŋ wɔŋ nyiiŋ gèeɔ̀ lɛ, e kìlà aŋ jɔ̀ɔ̀yɛ̀ wɔŋ gbàngì jawa gbeeɔ̀ sùà wèè ko jawa gbeeì.

Maŋ kèì nyɛɛnɛŋ 22:17

Wo Jìnàŋ Nɛɛmaàŋ yaà wo jɔunɔ̀ɔŋ wo Ɓaawaaà do nàŋ ɓemè wɔ naŋ woò nyààŋ, “Hnaàŋ!” Wo nyùnɔ̀ɔŋ gbiŋ komo tɛɛ̀ wɔ wo woò wààŋ, “Hnaàŋ!” Hnaàŋ, nyɛ̀iŋ nyàŋ gbiŋ nìŋ yaà ke jòòmàì sùà nyaŋ. Kùwaìŋ e wùìyèɛ kuwa wɔŋ nyiiŋ gèeɔ̀ lɛ wèè e nɔ̀ŋ e nɛ̀ŋ kìɛŋ, koɓɛ̀ wo nyùnɔ̀ɔŋ gbiŋ mànàŋ niìŋ wɔ.