2Tɛsè 1:7 - WƆŊ FƐ̀Ì EBÒ SÌÀŊ DAYÀA

⁷ yèè nyɛ̀iŋ nyàŋ naŋ yɛ̀mɛ̀ e mɔ̀ɔ̀nɛŋ nyàŋ, wò doiŋ nàŋ filè e kìlà wo wi filè yàwi pɛɛ. Wò do tɛɛ̀ nàŋ nyɛ̀nɛ̀ŋ sèè wo Kanaà Jisɛ̀ yaà aŋ màìkà gaàuŋ nyàŋ àŋ hnàŋ e yìwìà ko àìjɛnɛ̀ŋ,

2Tɛsè 1:7 ပူးပေါင်းရင်းမြစ်များ

Maafiù 16:27

Miàim wo Jɔ̀àfèlàà Nyuùŋ kpùnɔɔ̀ŋ do nàŋ hnè e teenga kpuu sùà e jòòwò Dèda miɔ̀ŋ yaà aŋ màikàuŋ nyàŋ sùà wèè ka kìɛ̀ŋ e jìwààjɛ̀wɛ̀ koɓɛ̀ anyùùŋ nyaŋ gbiŋ wèè maŋ keì maŋ àŋ naŋ nyɛ̀nɛ̀ŋ maŋ.

Maafiù 16:28

Miŋ woòiŋ e tɔɔɓaaà, aŋ nyùùŋ bà kòò àŋ yaà kià, yèè aŋ naàŋ fɔ̀ e jèèsùà aŋ yɛ̀mɛ̀ miàim wo Jɔ̀àfèlàà Nyuùŋ kpùnɔɔ̀ŋ ka hnàŋ e kana mɛ̀ sùà.”

Maafiù 25:31

Yèè wo Jisɛ̀ naŋ nyiŋ ɓɛìŋ woò wààŋ, “Sèè miàim wo Jɔ̀àfèlàà Nyuùŋ Kpùnɔɔ̀ŋ hnàŋ wa nàwèè e jòòwo gbee mɛ̀ sùà, yèè aŋ màikà nyaŋ gbiŋ àŋ yààìm kɔɔ, mìŋ do nàŋ jɛ̀ì ke kpùà Kana miɛ̀ŋ diɛŋ.

Maafiù 25:41

“Kpeiŋ mìŋ do nàŋ wòò aŋ yè nyaŋ sìàìm wɔŋ kùàŋ gbɔnɔŋ nyàŋ mìàŋ, ‘Yèwa nìim feìŋ, nìŋ yaà e gbòònò Dayàa dìì. Kɔ̀àaìŋ niŋ sɛɛ̀ e hmɔ̀ɔ̀ɛŋ e yèɛ fè nyime wèè julɔfɔ lɛ̀ sùà, e yèɛ àŋ naŋ banebànè wèè wo Sɛ̀tanàaŋ yaà aŋ màikàuŋ nyàŋ lɛ.

Maafiù 26:64

Wo Jisɛ̀ naŋ nyiŋ fasàì wààŋ, “Yɛi nìŋ naŋ woò. Kɛɛ tɔ̀ miŋ woòiŋ e tɔɔɓaaà, yèè nyɛ̀iŋ nààŋ gbiŋ nìŋ do nàŋ yɛ̀mɛ̀ miàim wo Jɔ̀àfèlàà Nyuùŋ Kpùnɔɔ̀ŋ mìŋ jaa wɔŋ kùàŋ jìkà wo Dayà Gaàŋ Gbeeɔ̀ yèè mìŋ yaà hìnìè wɔŋ ɗùkpù ke nyiliɛ̀ diɛŋ!”

Luù 16:25

Kɛɛ wo Eɓulɔhɛɛ̀ŋ nauŋ fasàì wààŋ, ‘Dàwi miɔ̀ŋ, kɛ̀ɛ̀nɛɛ̀ŋ ke jii jàa kɛ̀ mùŋ kuwa wa e tɛ̀ɛ̀tɛ̀ɛ̀ɛ gbiŋ e teengaà mùŋ yaà wa wɔŋ nyiiŋ gèeɔ̀ sùà lɛ, yèè mùŋ naŋ wa gè maŋhɛɛ wèè maŋ tɔ̀ɔ̀ ke nyowo koɓɛ̀ Lazɔlɔ̀i jòòpɛɛ wò yaà wa kùwìè e keì nyìngaà gbiŋ. Kɛɛ kòò wò yaà naàŋ ke jii fàa sùà, yèè muàŋ mùŋ yaà kùwìè e keì nyìnga.

Luù 17:30

Yɛi nɔŋ e kèì guùŋ bi do nàŋ nɔ̀ŋ sèè miàim wo Jɔ̀àfèlàà Nyuùŋ Kpùnɔɔ̀ŋ hnàŋ wa nàwèè.

Jɔ̀ɔŋ 1:3

Yèè esàɓù wo nyùùŋ bì sùà wo Dayà naŋ wa bànè manɛ̀ŋ maŋ gbiŋ. Wo Dayà gò wa bànè è nɛ̀ŋ gbiŋ èɓìèmàŋjɛ̀wɛ̀ wò nyùùŋ bi.

Jɔ̀ɔŋ 1:51

Mìŋ yààìŋ wòò sùà e tɔɔɓaaà kɛ̀ nìŋ do nàŋ yɛ̀mɛ̀ ko àìjɛnɛ̀ŋ ko yilè yèè naŋ yɛ̀mɛ̀ aŋ màìkà Dayà nyaŋ àŋ jowo àŋ deye e kìlà naŋ nyiŋ yɛmɛ̀ àŋ yaà dèyà sùà miàim wo Jɔ̀àfèlàà Nyuùŋ Kpùnɔɔ̀ŋ diɛŋ.”

Nyɛ̀nɛ̀ŋ 1:11

Aŋ felaa nyàŋ naŋ nyiŋ dawè nyààŋ, “Nyùnòò fùɔ̀ŋ Galaliì nyɛɛ̀ŋ, wèè kiìŋ nìŋ sia kià nìŋ yaà yɛ̀ɛ̀mɛ̀ ke nyiliɛ̀? Wo Kanaà Jisɛ̀ wɛɛ̀ wo Dayà naiŋ yaà gè sìwè wò naŋ kɔ̀ ko àìjɛnɛ̀ŋ wɔ, do ɓɛìŋ nàŋ kɛɛ̀ e ɗèwè guùŋ nɛ sùà màànààŋ nɔŋ nìŋ nauŋ yɛmɛ̀ wò naŋ jòwò ko àìjɛnɛ̀ŋ lɛ.”

Nyɛ̀nɛ̀ŋ 3:19

Fèìŋ maŋ tùwo naanààiŋ màŋ jɛwɛ, Kpeiŋ, niŋ kìlà koɓɛ̀ Dayài, wèè wo juuyà maŋ jùumùiŋ màŋ hakɛ̀.

Luùm 8:17

Nààŋ è yààìŋ aŋ jɔ̀à Dayà, è doiŋ nàŋ yɛ̀mɛ̀ e kpùùmaàŋ wò naŋ bànè hàa wèè anyunùuŋ nyàŋ lɛ. Yèè yàwi pɛɛ doiŋ nàŋ yɛ̀mɛ̀ e nɛ̀ɛŋ wo Dayà naŋ bànè hàa wèè Jisɛ̀ Kulaì, màànààŋ nɔŋ wò naŋ niŋ yɛmɛ̀ lɛ. Kɛɛ sɔɔ̀ eiŋ kà e mɔ̀ɔ̀nɛŋ dìì wèè e keì sìàŋ nyɛ̀nɛŋ màànààŋ wo Jisɛ̀ Kulaì naŋ niŋ kɔ̀ dìì lɛ, wèè kɛ̀ yàwi pɛɛ e yɛmɛ̀iŋ e jòòwo màànààŋ wò naŋ niŋ yɛmɛ̀ lɛ.

1 Kɔliìŋ 3:13

Yèè àŋ do nàŋ tùɔ̀ŋ e tòmò nyùùŋ gbiŋ maŋ nɔnɔŋ e teengaà ke Ɗɔ̀ɔ̀ Jisɛ̀ Kulaìɛ do niŋ nàŋ tɔɔ̀ lɛ. Ke ɗɔɔ yii e hmɔ̀ɔ̀ŋ nàŋ do nàŋ gɔ̀ì e tòmò nyùùŋ gbiŋ sùà, e hmɔ̀ɔ̀ɛŋ do nàŋ wɔ̀ɔ̀ e tòmò nyùùŋ gbiŋ yèè e tɔ̀ɔ̀ e nɔ̀ŋ kii kɛnɛ niŋ nɛ̀.

2 Kɔliìŋ 4:17

Maŋ keì nyìnga nyɛɛ̀ mɛɛ̀ŋ wèè e teenga kpuu, màŋ yaà wì bànèbane sùà wèè e jòòwo gò jùà. E yèɛ do nàŋ nyɛ̀nɛ̀ŋ maŋ keì nyìnga wi màŋ gbiŋ maŋ nɔ̀ŋ mààŋ maŋ fè è nɛ̀ŋ bà gbiŋ sùà lɛ.

Ɛfesɔ̀ 1:2

Tɔ̀ wo Dayà wo Dèdaà wiɔ̀ yèè wo Kanaà Jisɛ̀ Kulaì fèiŋ tɛ̀ɛ̀tɛ̀ɛ̀ yèè ke jii fàa.

Kòlo 1:16

E saɓùuŋ nɛ̀ sùà wo Dayà naŋ wa bànè manɛ̀ŋ maŋ gbiŋ ko àìjɛnɛ̀ŋ yaà e dììɛ diɛŋ, maŋ yè maŋ nìŋ yɛmɛ̀ e kìlà niŋ fè yɛmɛ̀ maŋ, e kpùlìà aŋ jinàŋ nyaŋ e ɗùùnyàŋ àìjɛnɛ̀ɛŋ sùà, yaà anyuùŋ gbeegbèè nyiŋ nyàŋ. Wo Dayà naŋ wa bànè e ɗuunyaàŋ gbiŋ e saɓùuŋ nɛ̀ sùà yèè e weèuŋ.

1Tɛsè 3:13

E ɗewe mààŋ tɛɛ̀ sùà, tɔɔɓaa wò do nàŋ sìè maŋ jiiiŋ màŋ gààŋ, e tɔ̀mɛ naìŋ nɔ̀ŋ yèè nìŋ do nàŋ nɔ̀ŋ anyuùŋ nɛɛmaŋ ko fɛ̀ɛ̀fèìŋ Dayà wiɔ̀ wo Dèdaà e teengaà wo Kana wiɔ̀ Jisɛ̀ yaà anyùùŋ nɛɛmaŋ nyàn gbiŋ wò kanaŋ nyàŋ àŋ hnàŋ.

2Time 2:12

Sèè è naiŋ jèè kɔ̀ɔ̀yɛ̀ keì nyìnga dìì, yàwiiŋ nyiŋ doiŋ nàŋ nɔ̀ŋ e kana kɛ̀ɛ̀uŋ nɛ̀ sùà. Sèè euŋ gììyà maŋhɛɛ, wò do wi nàŋ gììyè maŋhɛɛ.

Taitɔ̀ 2:13

nààŋ è yààìŋ fùlìè ke ɗɔ̀ɔ̀ e keì sìàaŋ è naiŋ tùlìè jii lɛ̀, ke ɗɔɔɛ̀ e jòòwò Dayà gbee wiɔ̀ yèè wo Nyuùŋ Jòèye wiɔ̀ Jisɛ̀ Kulaì kè hnàŋ lɛ.

Hiɓu 10:27

Kɛɛ e yèɛ nɔŋ àŋ naŋ naàŋ ɓɛ̀nɛ̀ŋ nyɛ̀nɛŋ lɛ̀ nàŋ yaà, wèè aŋ nyɛ̀nɛ̀ŋ jùù e teengaà àŋ yaà fùlìè kitiɛ̀ wo Dayà do nàŋ heè lɛ, yèè e hmɔɔ̀ŋ kùwa gbeeɛ̀ do nàŋ sùɔ̀ŋ anyùùŋ nyaŋ naŋ gììyè wo Dayà maŋhɛɛ nyàŋ.

Hiɓu 12:29

Weètii, kùwa wiìŋ e ɗààhìì Dayàa kpaŋ, esaɓù kɛ̀, wò do wi nàŋ pɔɔpɔ̀ɔ̀, sèè è gouŋ haawè.

Hiɓu 4:1

Nààŋ wo Dayà naŋ woò wààŋ wò do wi nàŋ kìɛ̀ŋ e nyiiŋ gèe, e yèɛ wò naŋ jɔ̀ɔ̀ ɗààhiì wèè wo wi kiɛ̀ŋ lɛ, è kuwa eiŋ yɛ̀mɛ̀ yàwi bi diɛŋ, wèè yàwi nààŋ bà guùŋ gbiŋ go niŋ nàŋ sòò yɛ̀mɛ.

Hiɓu 4:11

Weètii nyɛ̀nɛ̀ŋ wiìŋ e tɛ̀ɛ̀tɛ̀ɛ̀ɛ gbiŋ è naiŋ ɓɛ̀nɛ̀ŋ nyɛ̀nɛŋ wèè e yɛmɛ̀iŋ e nyiiŋ gèe lii, wèè kɛ̀ yàwi nààŋ bà guùŋ gbiŋ gòiŋ niŋ nàŋ sòò yɛ̀mɛ, màànààŋ àŋ naŋ wa nyɛ̀nɛ̀ŋ esàɓù e hààwe gò kɛ̀ɛ̀nɛ̀ŋ nyiŋ nɛ̀.

Hiɓu 4:9

Kɛɛ wo Dayà naŋ jɔ̀ɔ̀ ɗààhiì wèè wo wi kìɛ̀ŋ ke ɗɔ̀ɔ̀ nyiiŋ gèe, màànààŋ wo Dayà wuŋ bi naŋ wa gè nyiiŋ ke ɗɔ̀ɔ̀ nɔɔnɔŋ le tìyèeɛ̀ diɛŋ lɛ̀, jòòpɛɛ ke ɗɔɔ bi kòò kè hnè weè.

Hiɓu 9:28

E ɗèwè guùŋ nɛ sùà wo Dayà naŋ wa kìɛ̀ŋ wo Jisɛ̀ Kulaì e sùà guùŋ kpò wèè wo nɔ̀ŋ e nɛ̀ŋ saaà, yèè wò naŋ fɔ̀ e sùà guùŋ kpò wèè wo gùà maŋ jùùmù anyuùŋ zimgbe. Kɛɛ sèè wò hnàŋ ɓɛìŋ, e naàŋ ɓɛìŋ nɔ̀ŋ wèè wo gùà màŋ jùumù. Wò do nàŋ hnè wèè wo jòèyè anyùùŋ nyaŋ gbiŋ yàaùŋ fulie nyàŋ.

1Pììlɛ 3:22

wo yèɔ naŋ naàŋ kɔ̀ ko àìjɛnɛ̀ŋ wò jaa wɔŋ kùàŋ jìkà Dayàa, wò yaà nyìnìè maŋ tòmò gaàŋ gbeegbèè màŋ gbiŋ ko àìjɛnɛ̀ŋ e kìlà wò kuwa e gààŋ aŋ màìkà nyaŋ diɛ̀ŋ.

2Pììlɛ 3:7

Kɛɛ ke mìè gbòà guùŋ yii wo Dayà naŋ yɛi wa gbòò le, naŋ kìlìè maŋ àìjɛnɛ̀ŋ maŋ yèè e dìì lɛɛ̀ nàaŋ kùàŋ feìŋ wèè e hmɔ̀ɔ̀ŋ go miŋ nàŋ pɔɔpɔ̀ɔ̀, e jèèsùà ke ɗɔ̀ɔ̀ gbài kitiɛ̀ diɛŋ wo Dayà wo gbàì anyuùŋ gò nyìmàŋ Dayà nyaŋ e kìlà wo nyiŋ sìà e hmɔ̀ɔ̀ŋ wa nàwèè.

Juù 1:7

Jàaìŋ ko Sɔdɔ̀ùŋ yaà ko Gòmolà jii, yèè maŋ jawa gbɛ̀ɛ̀ kɔɔ miŋ màŋ. Anyùùŋ bi naŋ wa nyɛ̀nɛ̀ŋ mààŋ aŋ màikà nyaŋ naŋ wa nyɛ̀nɛ̀ŋ lɛ. Àŋ naŋ wa tòòmò maŋ kpùnaŋ nyiŋ màŋ wèè maŋ kèì nàànààŋ ke yɛ̀ɛ̀ hmɔtu kà tinàŋ gbiŋ nyìniaŋ. Àŋ naŋ kɔ̀ e nìmìlà kèì nyìngà e hmɔɔ̀ŋ kùwa dìì wèè nyiiŋ gèe gò jùà julɔfɔ, wèè e nɔ̀ŋ e gòo sengèì wèè anyùùŋ nyaŋ gbiŋ.

Maŋ kèì nyɛɛnɛŋ 1:7

Yɛ̀mɛìŋ, wo Jisɛ̀ yaà hinie ke nyili fuaà diɛŋ! Anyùùŋ nyaŋ gbiŋ douŋ nàŋ yɛmɛ̀, e kpùlìà anyùùŋ nyaŋ nauŋ jùwò e ɓula nyàŋ. Maŋ ziì maŋ gbiŋ e ɗuunyaàŋ do nàŋ nɔ̀ŋ ke nyowo sùà weèuŋ. Tɔɔɓaa yɛi è do nàŋ nɔ̀ŋ!

Maŋ kèì nyɛɛnɛŋ 14:10

wo Dayà do nyiŋ nàŋ kìɛ̀ŋ e keì nyìnga sèè wò tuù, e teenè mààŋ wò naŋ tìè maŋ tala muaŋ nyìnga maŋ yè maŋ wò naŋ gɔ̀àì wɔŋ kpòò ke jii fiìuŋ nɛɛ̀ŋ sùà maŋ. Anyùùŋ nyaŋ gbiŋ do tɛɛ̀ nàŋ nyɛ̀nɛ̀ŋ nyaŋ, àŋ do nàŋ kùwò e nimilà gbee e hmɔ̀ɔ̀ŋ yèè e sɔfɔ̀ sùà, ko fɛ̀ɛ̀fèìŋ aŋ màìkà nɛɛmaŋ nyàŋ yaà wo Ɓaawaaà.

Maŋ kèì nyɛɛnɛŋ 14:13

E teenga lɛɛ̀ sùà, mìŋ naŋ kòmò ke mìè gbòa e yìwìà ko àìjɛnɛ̀ŋ kè naŋ woò wààŋ, “Sìngà tɛɛ̀, e zɔlɔ̀ yaà anyùùŋ nyaŋ gbiŋ e yìwìà nàaŋ, àŋ do nàŋ fɔ̀ɔ̀yɛ̀ e tòmò Kanaà Jisɛ̀ sùà nyaŋ!” Wo Jinàŋ Nɛɛmaàŋ naŋ fasàì wààŋ, “Tɛɛ̀ yaà tɔ̀ɔ̀nyaàŋ, àŋ do nàŋ gè nyiiŋ wèè e tòmo nyìngaà àŋ naŋ nyɛ̀nɛ̀ŋ lɛ, esaɓù kɛ̀ e jìwààjɛ̀wɛ̀ e tòmo nyiŋ nɛ̀ do nyiŋ nàŋ nɔ̀ŋ maŋjɛ̀wɛ.”

Maŋ kèì nyɛɛnɛŋ 20:11

Mìŋ naŋ yɛ̀mɛ̀ ke kpùà kana fua gbee yèè wo nyùnɔ̀ɔŋ jàa nyìŋ diɛŋ wɔ̀. E dììɛ yaà ko àìjɛnɛ̀ŋ nauŋ wa jɔ̀ɔ̀nɔ̀ŋ ko fɛɛ̀feìŋ yèè wo nyùùŋ gbiŋ gò miŋ wa ɓɛìŋ yɛmɛ̀.

Maŋ kèì nyɛɛnɛŋ 21:4

Wo Dayà do nyiŋ nàŋ hààngè maŋ fɛɛ̀màì maŋ fɛ̀ɛ̀. Wo nyùùŋ gbiŋ naàŋ ɓɛìŋ fɔ̀, wo nyùùŋ gbiŋ naàŋ ɓɛìŋ kɛ̀ɛ̀nɛ̀ŋ kè jii mɔ̀ɔ̀nɛŋ ɔ̀ɔ̀ wo gòlà ɔ̀ɔ̀ wo kɛ̀ɛ̀nɛ̀ŋ è sàaŋ è kɔɔuŋ nɛ̀ sùà. Maŋ keì gɔu mɛɛ̀ŋ gbiŋ màŋ naàŋ mààŋ.”

Maŋ kèì nyɛɛnɛŋ 22:16

“Miàim Jisɛ̀, Kà tùàŋ wo màikà miɔ̀ŋ wèè wo woò ke mìè seì yɛɛ̀ ko nɛ̀ɛ̀iŋ niìŋ nyɛ̀iŋ nààŋ anyuùŋ hààwe nyàŋ gbiŋ. Mìŋ yaà e gùlò e yìwìà ke kpòò Dèèweɛ̀ sùà. Miàŋ nàŋ yaà wɔŋ ɗù maŋ nyiìŋ tɛ̀tɛ̀ɔ mɛɛŋ wɔ̀ŋ.”

Maŋ kèì nyɛɛnɛŋ 22:6

Wo màikàa naim ɓɛìŋ woò wààŋ, “Maŋ miè gbòaim mɛɛ̀ŋ màŋ yaà tɔ̀ɔ̀nyaàŋ yèè mùŋ kuwa maŋ miŋ hààwè. Wo Kanaà Dayà, wo yèɔ kiɛ̀ŋ wo Jinàuŋ nɔɔ̀ŋ koɓɛ̀ aŋ wɛ̀ijì nyaŋ wɔ̀, naŋ tùɔ̀ŋ wo màikàuŋ nɔɔ̀ŋ wèè wo tɔɔ̀ aŋ ɓɔìjɔ̀àuŋ nyàŋ kɛ̀ kiìŋ nàŋ do nàŋ kaaìŋ e teenga kpuu sùà.”

Maŋ kèì nyɛɛnɛŋ 22:9

Kɛɛ wò naim woò wààŋ, “Kpele, ɓɔ̀ mùŋ dè màŋ gɛ̀ɛ̀nìum màŋ dììnaŋ è weèim! Mìŋ yaà nɔŋ wo ɓɔìjɔ̀à mààŋ muàŋ bi e kpùlìà aŋ wùìya gbànaŋ nyàŋ, aŋ wɛ̀ijì nyaŋ yaà aŋ yè nyaŋ gbiŋ jɔɔlɔ̀ maŋ mìè gboa màŋ dìì wɔŋ fɛi wɛɛ̀ŋ sùà nyaŋ. Zòòloò nɔŋ wo Dayà wuŋ guùŋ.”

Maŋ kèì nyɛɛnɛŋ 6:11

Wo Dayà naŋ wa kìɛ̀ŋ wo bà guùŋ gbiŋ wɔŋ ɓuuɓane fua, yèè wò naŋ nyiŋ woò wààŋ kɛ̀ aŋ fòlà e teenga kpàa bà. Àŋ kuwa wa aŋ fòlà e teenga e jèèsùà anyùùŋ ɗuunyaŋ nyàŋ aŋ jìwà aŋ wùìya gbànaŋ nyàŋ wo Dayà naŋ gè nyaàŋ diɛŋ wèè àŋ jìwà nyaŋ ke gbòò anyuùŋ hààwe nyàŋ sùà, e kpùlìà anyùùŋ màŋjɛ̀wɛ̀uŋ nyàŋ, màànààŋ àŋ naŋ nyiŋ wa jìwè lɛ.