2 Kɔliìŋ 7:11 - WƆŊ FƐ̀Ì EBÒ SÌÀŊ DAYÀA

¹¹ Yɛ̀mɛìŋ naàŋ e ɗeweɛ̀ wo Dayà naŋ tòòmò ke jìì mɔ̀ɔ̀nɛ̀ŋ nyɛiŋ biɛ̀ lɛ, kè naàŋ nyɛ̀nɛ̀ŋ nìŋ manaŋ naàŋ kai wèè naŋ tɔɔ̀ kɛ̀ maŋ keì fèìŋ, nìŋ naŋ tuù. Nìŋ yaà e jùù dìì. E wùànàŋ yààìŋ zimgbe wèè naŋ yɛ̀mɛ̀ e tɔ̀ɔ̀nyaàŋ nɔ̀ŋ gbài niŋ. Nàŋ tɔ̀ɔ̀ nyɛ̀iŋ bi kɛ̀ nìŋ yaà sengei e tɔ̀mɛ bà gbiŋ fèìŋ kɔɔ è keì lɛɛ̀ gbiŋ sùà.

2 Kɔliìŋ 7:11 ပူးပေါင်းရင်းမြစ်များ

Jɔ̀ɔŋ 2:17

Anyùùŋ màŋjɛ̀wɛ̀uŋ nyàŋ naŋ kɛ̀ɛ̀nɛ̀ŋ ke jii jàa kɛ̀ è yaà sìnga niŋ wɔŋ fɛ̀ì Dayàa sùà e kìlà è naŋ woò wààŋ, “Oo Dayà, e mànaŋ mɛ̀ wèè ke Saaŋ Zòòlo mɔɛ̀ŋ sùɔ̀ìm ke jiio sùà zimgbe mààŋ e hmɔɔ̀ŋ kùwa.”

Nyɛ̀nɛ̀ŋ 17:16

E teengaà wo Pɔɔ̀ yaà wa fùlìè wo Silà yèè wo Timetè ko Atɛ̀ìŋ lɛ, wɔŋ nyììŋ jinàuŋ nɔɔ̀ŋ naŋ wa mɔɔnɛ̀ŋ nààŋ wò naŋ yɛ̀mɛ̀ e ɗeweɛ̀ aŋ dayà joo nyàŋ naŋ wa dìè ko jawa gbeeì lɛ.

Luùm 11:20

Tɛɛ̀ è yaà tɔɔɓaa. Wo Dayà naŋ nyiŋ wa jàà e ɓula esàɓù e hààwe gò kɛɛnɛ̀ŋ nyiŋ nɛ̀, yèè mùŋ jaa naàŋ ko jɛ̀i nyiŋ niìŋ, esaɓù kɛ̀ mùŋ kuwa e hààwe. Ɓɔ̀ mùŋ ɓemè muàŋ bi gbee weè niŋ, kɛɛ e jùù e nɔ̀um.

Luùm 14:18

Sèè mùŋ nɔ̀ŋ wo ɓɔìjɔ̀à wèè wo Jisɛ̀ Kulaì e ɗewe lɛɛ̀ sùà, wo Dayà do nàŋ kɛ̀ɛ̀nɛ̀ŋ ke jii fàa weèum, yèè anyuùŋ zimgbe doum nàŋ jàà kùàŋ dìì.

Luùm 3:5

Weètii, sèè esàɓù e hààwe gò kɛɛnɛ̀ŋ wilɛ̀ yaà maŋ kpèè naanààŋ wi màŋ tɔɔ̀ kɛ̀ wo Dayà nyɛnɛŋ tɔ̀ɔ̀nyaàŋ, èiŋ ɓɛ̀nɛ̀ŋ wòo wìàà wo Dayà naŋ nyɛ̀nɛ̀ŋ e keì naanààŋ sèè wò tuù e kìlà wo wi nimilà? Tɛɛ̀ do nàŋ nɔ̀ŋ e zùwo sèè mùŋ dawà yɛi.

1 Kɔliìŋ 12:25

Wèètii e fèemàŋ gòòno bà gbiŋ fè kè kpùnaàŋ sùà, kɛɛ manɛ̀ŋ è kɔɔ gbàgbà miiŋ gbiŋ kuwa e gòngò guùŋ wèè maŋ dàwi miŋ màŋ.

1 Kɔliìŋ 5:2

Diè nìŋ naŋ naàŋ ɓɛ̀nɛ̀ŋ ɓèmè nyiŋ bi gbee? Kɛɛ ke nyowo heiŋ nàŋ diè, yèè wo felaaà naŋ nyɛ̀nɛ̀ŋ e keì mààŋ tii wɔ̀, nauŋ gè ke gboòiŋ nɛɛ̀ŋ sùà.

2 Kɔliìŋ 13:7

È zoolà Dayà wèè ɓɔ̀ nìŋ nyɛ̀nɛ̀ŋ keì naanààŋ. E fè yɛi zoolò wèè e tɔ̀ɔ̀ yàwi bi kɛ̀ è nyɛ̀nɛ̀ŋ tɛ̀ɛ̀, kɛɛ è yaà wèè naŋ nyɛ̀nɛ̀ŋ e keì tɔ̀ɔ̀nyaàaŋ àŋ jaa kùàŋ dìì lɛ jòòpɛɛ è yaà guùŋ mààŋ èiŋ soòò.

2 Kɔliìŋ 2:6

E wèè wo nyùùŋ mààŋ wii, e ngàìŋɓu lɛɛ̀ anyùùŋ nyaŋ gbiŋ nauŋ yɛi fè le, è yaà naàŋ tɛ̀ɛ̀ weèuŋ.

2 Kɔliìŋ 6:4

Kɛɛ, e nɛ̀ŋ gbiŋ è naŋ nyɛ̀nɛ̀ŋ, è tɔɔ̀ kɛ̀ è yààìŋ aŋ ɓɔ̀ìjɔ̀à Dayà esàɓù maŋ keì nyìnga kà dìì ke jii jùa diɛŋ, maŋ mɔ̀ɔ̀nɛŋ, yèè maŋ nimilà.

2 Kɔliìŋ 7:1

Nyɛ̀iŋ nààŋ wùìya wi nyàŋ, wo Dayà ɓèmè maŋ ɗààhiì mɛɛ̀ŋ gbiŋ ko nɛ̀ɛ̀ŋ wiì, e wèètii, gùà wiìŋ yàwi bi sengei e gèiŋ maŋ tɔ̀mɛ màŋ gbiŋ yaà maŋ keìŋ wi màŋ sùà yèè aŋ jinàŋ wi nyàŋ sùà lɛ, e nɔ̀iŋ e nɛɛmaŋ sùà kpɛlɛmɛɛŋ esàɓù e jùùɛ yaà wì kɔɔ wèè Dayà lɛ.

2 Kɔliìŋ 7:7

E hnàuŋ nɛ̀ nɔŋ nààŋ e gò gììyà zɔlɔ̀, kɛɛ ke jii gbàiuŋ nɛɛ̀ŋ sùà, e ɗeweɛ̀ nìŋ nauŋ fè jii nyingè lɛ. Wo naŋ wi wòò e ɗeweɛ̀ nìŋ naŋ haamìŋ zimgbe wèè naim yɛmɛ̀ lɛ, ke nyowoɛ̀ yààìŋ weèim nɛ̀, yèè e ɗeweɛ̀ nìŋ naŋ banebànè wèè naim sìè jɛwɛ lɛ, tii naim ɓɛìŋ nyìnìè zɔlɔ̀.

2 Kɔliìŋ 7:9

Kɛɛ sààmɛ e zɔlɔ̀ yààìm , e fè wèè mìŋ naŋ nyɛ̀nɛ̀ŋ màŋ jiiiŋ màŋ naŋ mɔɔnɛ̀ŋ lɛ, kɛɛ esàɓù maŋ jii mɔ̀ɔ̀nɛŋ mɛɛ̀ŋ sùà nàŋ fè maŋ keì naanààiŋ màŋ jɛwɛ. Maŋ jii mɔ̀ɔ̀nɛŋ mɛɛ̀ŋ, wo Dayà naiŋ miŋ tòòmò diɛŋ e gòiŋ jàà è keì naanààŋ bà gbiŋ.

2 Kɔliìŋ 9:2

Kà nyìmàŋ kɛ̀ è yààìŋ jii wèè naŋ kpuumàŋ, yèè kà kɛ̀ɛ̀ maŋ nyòngà koɓɛ̀ anyùùŋ Mɛsèdonìà nyaŋ e nyaàiŋ eiŋ dè kɛ̀, “Anyuùŋ hààwe nyàŋ ko Àkaayà, àŋ wa banebànè wèè aŋ kpuumàŋ e yìwìà doa bà mɛ̀iŋ.” E wùànàŋ kpùùmaiŋ nɛ̀, è sìà aŋ zimgbe nyiŋ ke di.

Ɛfesɔ̀ 4:26

Sèè mìŋ tuù, ɓɔ̀ nìŋ dangè è wuàiŋ nɛ̀ eiŋ gbìàŋ è jùumù sùà, yèè ɓɔ̀ nìŋ nɔ̀ŋ è tùùiŋ è gɔɛɛ̀ doò jùà fùùŋ.

Ɛfesɔ̀ 5:11

Ɓɔ̀ nìŋ nɔ̀ŋ àŋ bàiŋbà kòɓɛ̀ màŋ keì naanààŋ maŋ anyùùŋ nyaŋ nyɛnɛŋ màŋ, maŋ keì maŋ kaaàŋ ke nyìwìɛ sùà maŋ. Kɛɛ fùlià miŋ ko gbolòùŋ.

Fèle 2:12

Weètii nyɛ̀iŋ nààŋ wùìyaim nyàŋ, nààŋ nìŋ naim wa jɔ̀ɔ̀lɔ̀ dìì e teengaà gbiŋ mìŋ yaà wa ko nɛ̀ɛ̀iŋ niìŋ lɛ, è yaà ngèè pɛɛ naàŋ tɛ̀ɛ̀ wèè naim jɔ̀ɔ̀lɔ̀ dìì nààŋ miŋ fèìŋ ɓɛìŋ è tɛɛ lɛ̀. Weètii sìaìŋ ke di e kìlà niŋ tomo nyìnga e nyaàiŋ dè e jòèyeiŋ nɛ̀, wèè niŋ nyìmàŋ kɛ̀ kiìŋ è naŋ fasàì wèè naŋ wa nàwèè yɛ̀mɛ̀ e jòèye,

1Tɛsè 4:6

E keì lɛɛ̀ sùà, e fèèmàŋ felaa yaà jɔùŋ, wo bà gbiŋ ɓɔ̀ wò kaaɓì àŋ wùìya hààwè Dayà dàwiuŋ nyàŋ ɔ̀ɔ̀ wo nyiŋ nììngè fɛ̀ɛ̀. Èiŋ wa tɛɛ̀ woò gɔu, yèè è yààìŋ fè sùà e gòo nyìnga esaɓù kɛ̀ wo Kanaà Jisɛ̀ do nàŋ ngàìnɓù anyùùŋ nyaŋ nyɛnɛŋ maŋ keì miiŋ nyàŋ.

1Time 5:20

Gbùùyaà aŋ yè nyaŋ gbiŋ naŋ nyɛ̀nɛ̀ŋ jùumù ko ɓài nyàŋ, wèè e jùù nyɛ̀nɛ̀ŋ anyuùŋ gbànaŋ nyàŋ.

2Time 2:15

Nyɛnɛ̀ŋ e tɛ̀ɛ̀tɛ̀ɛ̀ɛ gbiŋ mùŋ naŋ ɓɛ̀nɛ̀ŋ nyɛ̀nɛŋ lɛ̀ wèè wo Dayà jààum kùàŋ dìì, mààŋ wo nyuùŋ tòmoɔ̀ e sàngè fè wèè è tòmouŋ nɛ̀ wɔ, wo yèɔ kaà ke mìè gbìàŋ Dayàa e tɔ̀ɔ̀nyaàŋ sùà wɔ̀.

Taitɔ̀ 3:8

E keì wòo lɛɛ̀ è yaà e tɔɔɓaa. Maŋ kàa mɛɛ̀ŋ, màŋ tomàŋ yèè màŋ kuwa e kpùùmaŋ wèè nyùùŋ gbiŋ. Mìŋ manaŋ wèè maŋ nɔ̀ŋ wòò maŋ keì mɛɛ̀ŋ mìŋ naŋ yaà wòò e kii miŋ màŋ nyìnga, yèè maŋ yɛmɛ̀ kɛ̀ anyùùŋ nyaŋ àŋ miŋ dè maŋjɛ̀wɛ, e wèè anyùùŋ nyaŋ naŋ hààwè Dayà nyaŋ aiŋ nyɛ̀nɛ̀ŋ e kpàŋ è kɔɔ nyiŋ, wèè aŋ nyɛ̀nɛ̀ŋ maŋ keì sìàŋ.

Hiɓu 4:1

Nààŋ wo Dayà naŋ woò wààŋ wò do wi nàŋ kìɛ̀ŋ e nyiiŋ gèe, e yèɛ wò naŋ jɔ̀ɔ̀ ɗààhiì wèè wo wi kiɛ̀ŋ lɛ, è kuwa eiŋ yɛ̀mɛ̀ yàwi bi diɛŋ, wèè yàwi nààŋ bà guùŋ gbiŋ go niŋ nàŋ sòò yɛ̀mɛ.

Jìiiŋ 3:17

Kɛɛ e jiikɛ̀ɛɛ̀ yewe wo Dayà sìwè lɛ e jiɛ̀jiɛ̀ɛ nàŋ yaà, è yaà sengei yèè è manaŋ ke jii fàa, è kuwìà nyùùŋ le siwè sìàŋ, è kuwa mɔ̀ɔ̀nɔŋ, è naŋ dìè ke nyowo yèè è hiàŋ maŋ tùwo siaŋ sìàŋ, e fè nyangè yèè e gò gbɛ̀ɛ̀ è kàaɓì kɔɔ.

1Pììlɛ 1:17

Nìŋ nyaaŋ Dayà Dèda, sèè nìŋ nɔ̀ŋ zoolo, wo yèɔ gbaì e keì koɓɛ̀ anyùùŋ nyaŋ gbiŋ e ɗèwè guùŋ nɛ e yìwìà e tùwò kìì nyùùŋ gbiŋ sùà wɔ. Wèètii, e jùù nɔ̀iŋ kɔɔ sùà wèè Dayà maŋ nyiiŋ gèe gbànaiŋ màŋ sùà e ɗuunyaàŋ diɛŋ.

1Pììlɛ 2:2

Nɔ̀iŋ mààŋ aŋ jɔaa kòmàŋ jɛ̀ì, e teenga gbiŋ sùà e wùànàŋ maŋ yaà màì gò kɛ̀ɛ̀nɛ̀ŋ tɔ̀mɛ màŋ e gààŋ Jìnàŋ Dayàa sùà e nyɛ̀nɛ̀iŋ, wèè kɛ̀ sèè nìŋ yàà miìŋ naŋ dɛɛ̀ e kìlà wo Dayà woiŋ joeyè.

Juù 1:23

Jòèyeìŋ nyùùŋ gbiŋ wo yèɔ manaŋ wo jòèyà wɔ màànààŋ nìŋ henàŋ zòkpò wo nyùùŋ bà e yìwìà e hmɔ̀ɔ̀ŋ sùà lɛ. E jùù kpùlìà ke nyowo nɔ̀ŋ jiiiŋ màŋ diɛŋ wèè wo nyùnɔ̀ɔŋ manaŋ ke nyowo wɔ̀. Kɛɛ wùaìŋ anyùùŋ nyaŋ naŋ kùwò ninaŋ esàɓù maŋ kpèè kùwà ninaŋ nyiŋ màŋ sùà nyaŋ, e pɛɛ nɔ̀ŋ maŋ dèè kɔɔ nyiŋ màŋ.

Maŋ kèì nyɛɛnɛŋ 3:19

Mìŋ gbuuyà e kìlà mìŋ nimilà anyùùŋ nyaŋ gbiŋ mìŋ manaŋ nyàŋ. Weètii, nɔ̀ŋ wo nyùùŋ tɔ̀ɔ̀nyaàŋ, e kìlà muŋ fè maŋ tùwo naanààum màŋ jɛwɛ.