1Time 4:6 - WƆŊ FƐ̀Ì EBÒ SÌÀŊ DAYÀA

⁶ Sèè maŋ kàà maŋ keì wòo mɛɛ̀ŋ koɓɛ̀ anyuùŋ hààwe nyàŋ, mùŋ do nàŋ nɔ̀ŋ wo ɓɔìjɔ̀à tòmo siaŋ wèè wo Jisɛ̀ Kulaì, mùŋ do naŋ dììyè muàŋ bi e nɛɛmaŋ e yìwìà ke mìè hààweɛ̀ yèè e kàà tɔ̀ɔ̀nyaàaŋ e yèɛ mùŋ naŋ dè maŋjɛ̀wɛ lɛ̀.

1Time 4:6 ပူးပေါင်းရင်းမြစ်များ

Maafiù 13:52

Kpeiŋ wo Jisɛ̀ naŋ nyiŋ woò wààŋ, “Tɛɛ̀ naŋ tɔɔ̀ kɛ̀, wo kààmɔ̀ɔ̀ŋ maŋ Sàwà Dayàa bà gbiŋ wo yèɔ kile wo nɔ̀ŋ wo nyùùŋ màŋjɛ̀wɛ̀im wɔ̀ e Kànà àìjɛnɛ̀ɛŋ sùà wò yaà mààŋ wo kɛ̀ɛ̀nɛ̀ŋ ko gboo wo yèɔ fulià manɛ̀ŋ jɛi yèè manɛ̀ŋ gɔu e yìwìà ko saaŋ bàànè manɛ̀ŋ hàauŋ niìŋ.”

Luù 1:3

Miàŋ bi kà nyɛ̀nɛ̀ŋ maŋ nɔnɔŋ tùaŋ wèè maŋ keì mɛɛ̀ŋ gbiŋ tɛ̀ɛ̀ e yìwìà ko tɔɔtuì, weètii mìŋ naŋ ɗewè wèè ka sìngà maŋ keì mɛɛ̀ŋ guùŋ guùŋ, màànààŋ màŋ naŋ kaaìŋ lɛ. Dàa Tìɔ̀felɔ̀,

Nyɛ̀nɛ̀ŋ 1:15

Maŋ ɗɔɔ kpàa naŋ mààŋ yèè anyuùŋ hààwe nyàŋ naŋ dèènè koɓɛ̀ guùŋ. Àŋ yaà wa e sɔ̀ngɔ̀ anyuùŋ hɔ̀nɔ̀ɔ̀ guùŋ kpɛ̀ɛ̀ùŋ guùŋ (120), kpeiŋ wo Pììlɛ naŋ sie wèè wo gbòà koɓɛ̀ anyùùŋ nyaŋ.

Nyɛ̀nɛ̀ŋ 20:31

Yɛ̀mɛìŋ nyɛ̀iŋ bi diɛŋ! Jàaìŋ jii kɛ̀ mìŋ naiŋ wa gbòò kɔɔ maŋ gɔɛɛ yèè e dùùm, mìŋ naŋ kɔ̀ e keì nyìnga dìì, yèè mìŋ naiŋ kaà wèè maŋ dòà taai.

Nyɛ̀nɛ̀ŋ 20:35

Kàiŋ tɔ̀ɔ̀ maŋ keì nyɛ̀nɛŋ màŋ gbiŋ sùà kɛ̀ sèè nìŋ tomàŋ nyìnga e ɗewe lɛɛ̀ sùà, nìŋ do nàŋ kpùùmò wo yèɔ yaà e zɔ̀kpɔ̀ sùà wɔ. Jàaìŋ jii, maŋ mìè maŋ wo Kanaà Jisɛ̀ wuŋ bi naŋ wa woò maŋ wààŋ, ‘E zɔlɔ̀ zimgbe doum nàŋ nɔ̀ŋ sèè mùŋ kiɛ̀ŋ wo nyùùŋ, e nìàŋ sèè wo nyùùŋ woum kiɛ̀ŋ.’ ”

Luùm 15:15

Wɔŋ fɛi wɛɛ̀ŋ sùà, kà gbòà janjai yèè kà kàmè ɗewe wèè ka dè maŋ jiiŋ màŋ koɓɛ̀ maŋ keì titi bà. Mìŋ naŋ tɛɛ̀ nyɛ̀nɛ̀ŋ esàɓù e keì sìàaŋ wo Dayà naim kiɛ̀ŋ lɛ.

1 Kɔliìŋ 4:17

E wèè esaɓù lɛɛ̀, mìŋ yaà tùaŋ sùà wo Timetè ko nɛ̀ɛ̀ŋ niìŋ, wo yèɔ yaà wo jɔ̀à mànaŋ tùlìà jii miɔ̀ŋ e hààweɛ̀ sùà wɔ, ke gbòò anyuùŋ hààwè Dayà nyaŋ e tɛɛ. Wèè woo dè maŋ jiiiŋ màŋ koɓɛ̀ maŋ keì ɗì maŋ mìŋ naŋ dè maŋjɛ̀wɛ wɔŋ nyiiŋ jɛiɔ̀ ke gbòò Jisɛ̀ Kulaìɛ sùà lɛ, maŋ yè maŋ mìŋ naŋ kaà maŋ ke gbòò anyuùŋ hààwe nyàŋ gbiŋ sùà koɓɛ̀i gbiŋ mìŋ kɔ̀ lɛ.

2 Kɔliìŋ 11:23

Àŋ yaà aŋ ɓɔ̀ìjɔ̀à Jisɛ̀ Kulaì? Mìŋ yaà gbuuyè mààŋ wo nyuùŋ zùwo, kɛɛ mìŋ yaà wo ɓɔìjɔ̀à kɛnɛ e nyiŋ nìàŋ! Mìŋ naŋ tomo nyìnga, àim gbìàŋ ko sààŋ nyìwì e teenga zimgbe sùà, àim vuwò nyìnga yèè kà gbɛ̀ɛ̀ ko nyɛ̀mgbɛ̀ fàa e teenga zimgbe sùà.

2 Kɔliìŋ 3:6

Wuŋ naŋ nyɛ̀nɛ̀ŋ è naiŋ ɓɛnɛ̀ŋ wèè eiŋ nɔ̀ŋ aŋ ɓɔìjɔ̀à tòmo wèè e mìèsùàguùŋ jɛ̀ìɛ, e yèɛ e fè kè sàwà sìnga, è yaà wèè Jinàaŋ. Ke sàwà sìngaà hiàŋ e fàa, kɛɛ wo Jinàaŋ kiɛ̀ŋ wɔŋ nyiiŋ.

2 Kɔliìŋ 6:4

Kɛɛ, e nɛ̀ŋ gbiŋ è naŋ nyɛ̀nɛ̀ŋ, è tɔɔ̀ kɛ̀ è yààìŋ aŋ ɓɔ̀ìjɔ̀à Dayà esàɓù maŋ keì nyìnga kà dìì ke jii jùa diɛŋ, maŋ mɔ̀ɔ̀nɛŋ, yèè maŋ nimilà.

Ɛfesɔ̀ 6:21

Wo Tachikɔ̀ wo ɓɔìjɔ̀à yèè wùìya tùlìà jii wiɔ̀ e tòmò Kanaà Jisɛ̀ Kulaìɛ sùà doiŋ nàŋ gbàì jii nyaàiŋ dè e ɗeweɛ̀ e kɔɔ mɛ̀ yaà lɛ, yèè e nɛ̀ɛŋ mìŋ yaà nyinie lɛ̀.

Fèle 2:20

Wuŋ guùŋ nɔŋ nàŋ yaà wo bàimbà wèè e gòngo siaàŋ mìŋ kuwa yèè tɔɔɓaa wo yèɔ naŋ kpɛɛ̀ŋ weèiŋ wɔ̀.

Fèle 2:22

Kɛɛ nyɛ̀iŋ bi nàŋ nyìmàŋ e ɗeweɛ̀ wò naŋ tɔɔ̀ kɛ̀ wò yaà nyuùŋkpùuŋ kɛnɛ tùlìà jii lɛ̀. Wo Timetè naŋ nɔ̀ŋ mààŋ wo jɔ̀àfelaa ko nɛ̀ɛ̀ŋ miìŋ, yèè wòim tòòmò kùàŋ sùà wèè e ɓaayè Ebò Siaàŋ.

Fèle 3:16

E ɗewe gbiŋ è do nàŋ nɔ̀ŋ, kùùnò wiìŋ kà ko feìŋ e nyaàiŋ dè maŋ kpèè guùŋ miiŋ è naiŋ wa gbeè maŋ e jèèsùà e hàì nàaŋ.

Kòlo 2:19

Aŋ fè ɓɛìŋ àŋ bà nyiŋ bà wò Jisɛ̀ Kulaì sùà, wo yèɔ yaà ɓɛ̀màŋɗì ke kpùnaàŋ wɔ. Wo Jisɛ̀ Kulaì nàŋ kiɛ̀ŋ ke kpùnaàŋ gààŋ, yèè wò toomàŋ maŋ suono suono màŋ yèè maŋ kèìŋ maŋ wèè maŋ kùwà koɓɛ̀ guùŋ kpaŋ, e kìlà kè dɛkɛ̀ màànààŋ wo Dayà manaŋ lɛ̀.

Kòlo 3:16

Tɔ̀ ke miè gbìaàŋ e nyaàiŋ dè wo Jisɛ̀ Kulaì dià maŋ jiiŋ màŋ sùà. Kààaìŋ e kìlà niŋ kiɛ̀ŋ maŋ mìè gòo koɓɛ̀ aŋ dàwiiŋ nyàŋ e jiikɛ̀ɛ sùà. Dààaìŋ maŋ nùŋ, e nyaàiŋ dè wo Jisɛ̀ Kulaì, yèè maŋ nùŋ nɛɛmaŋ. Dààaìŋ wɔŋ nùŋ ke sɛ̀ gèe koɓɛ̀ Dayài maŋ jiiŋ màŋ sùà.

Kòlo 4:7

Wo wùìya mànaŋ wiɔ̀ Tachikɔ̀, wò yaà wo ɓɔìjɔ̀à tùlìà jii, e kìlà wò naŋ wi tòòmò maŋjɛ̀wɛ wèè eiŋ tomo wèè wo Kanaà wɔ, wò doiŋ nàŋ kìɛ̀ŋ ke miè gbìaàŋ e nyaàiŋ eim dè.

1Tɛsè 3:2

yèè è naiŋ tùɔ̀ŋ wo Timetè wùìya wiɔ̀, è yààìŋ tòòmò koɓɛ̀ guùŋ wèè Dayà, nààŋ è woàìŋ Ebò Siaàŋ nyaàiŋ dè wo Jisɛ̀ Kulaì lɛ. È nauŋ tùɔ̀ŋ nɛ̀ɛ̀iŋ niìŋ wèè woiŋ nyììnè maŋ jii, yèè wo kpùùmàŋ e hààweiŋ nɛ̀,

1Time 1:10

e kpùlìà anyùùŋ maŋ kpèè naanààŋ nyaŋ, anyuùŋ nyɛ̀nɛ̀ŋ hmɔ̀ŋtù fɛɛ̀ nìngè nyaŋ, anyuùŋ ɓèmè anyùùŋ e ɗo dìì, aŋ yè nyaŋ tɔɔ e kìlà àŋ fè maŋ mìè seì tòa nyàŋ, ɔ̀ɔ̀ aŋ yè nyaŋ kaà e keì gò kɛ̀ɛ̀nɛ̀ŋ jiikɛ̀ɛ è hààweɛ̀ sùà nyaŋ.

1Time 4:16

Yɛ̀mɛ̀ muaŋ bi diɛŋ, yèè e nɛ̀ɛŋ mùŋ kaà anyùùŋ nyaŋ lɛ̀ diɛŋ. Jèèe ko nyìnìè maŋ keì mɛɛ̀ŋ, efefoo sèè mùŋ nyɛ̀nɛ̀ŋ miìŋ, mùŋ do nàŋ jòèyè muaŋ bi yèè aŋ yè nyaŋ gbiŋ mùŋ naŋ kàa nyaŋ.

1Time 6:3

Wo nyùnɔ̀ɔŋ gbiŋ naŋ kàà e hààwe joo, yèè wo fè nyìmèè màŋ mìè gbòà tɔ̀ɔ̀nyààŋ Kana wiɔ̀ Jisɛ̀ Kulaì maŋ, yèè è nɛ̀ɛŋ e hààwe wilɛ̀ kàa lɛ,

2Time 1:6

Wèè esaɓù lɛɛ̀, mìŋ yaào dè sùà ke jii mɔɛ̀ŋ, wèè maŋ tòòmò e kìɛɛ̀ŋ wo Dayà naum kiɛ̀ŋ nààŋ mìŋ naum wa gbùwò wɔŋ kùàŋ zòòlo miɔ̀ŋ diɛŋ lɛ̀.

2Time 3:10

Mùŋ naŋ dè e kàa mɛ̀, ke kpèè miɛ̀ŋ, yèè esàɓù wɔŋ nyiiŋ gèe miɔ̀ŋ maŋjɛ̀wɛ, màŋ tùàŋ e hààwe mɛ̀, ke jii tɔumtɔ̀ùm miɛ̀ŋ, e mànàŋ mɛ̀, yèè ke jii nyìngè miɛ̀ŋ wèè e keì nyìnga kuwa mɛ̀ gbiŋ maŋ nɔnɔŋ.

2Time 4:3

E teenga do nàŋ hnè, anyùùŋ naàŋ mɔ̀nɔ̀ŋ àŋ do kùmìàŋ è kàà tɔ̀ɔ̀nyaàŋ, kɛɛ àŋ do nàŋ dè e ɗèwè nyiŋ biɛ̀ maŋjɛ̀wɛ, àŋ do nàŋ kàmè aŋ kààmɔɔŋ wèè aŋ nyiŋ wòò e yèɛ do nyiŋ kai nàŋ fɔ̀ɔ̀yɛ̀ jii lɛ̀.

Taitɔ̀ 2:1

E wèè muàŋ Taitɔ̀, kàà e keì kɛnɛɛ̀ yaà e hààweɛ̀ sùà lɛ.

1Pììlɛ 2:2

Nɔ̀iŋ mààŋ aŋ jɔaa kòmàŋ jɛ̀ì, e teenga gbiŋ sùà e wùànàŋ maŋ yaà màì gò kɛ̀ɛ̀nɛ̀ŋ tɔ̀mɛ màŋ e gààŋ Jìnàŋ Dayàa sùà e nyɛ̀nɛ̀iŋ, wèè kɛ̀ sèè nìŋ yàà miìŋ naŋ dɛɛ̀ e kìlà wo Dayà woiŋ joeyè.

2Jɔ̀ɔŋ 1:9

Wo nyùnɔ̀ɔŋ gbiŋ gò jèè è kàà kìì Kulaì lɛɛ̀ diɛŋ wɔ̀, kɛɛ wo nììnyàŋ e kàà kii bi wɔ̀, wo kuwà Dayà kè jiiuŋ nɛɛ̀ŋ sùà. Wo nyùnɔ̀ɔŋ gbiŋ naŋ jèè e kàa kii lɛɛ̀ diɛŋ wɔ̀ wò kuwa wo Dèdaà yèè wo Jɔ̀àfelaauŋ nɔɔ̀ŋ ke jiiuŋ nɛɛ̀ŋ sùà.

Juù 1:5

Jòòpɛɛ nàŋ nyìmàŋ tɛɛ̀ gbiŋ, kɛɛ, mìŋ manaŋ ka kɛ̀lɛ̀ɛ̀ maŋ jiiiŋ màŋ koɓɛ̀ e ɗeweɛ̀ wo Kanaà Dayà naŋ wa jòèyè anyùùŋ ko Ezɔ̀ɛ̀ nyaŋ e yìwìà e dìì fùɔ̀ŋ Ijèɛ diɛŋ lɛ̀, tii naŋ mààŋ, yèè wò naŋ pɔ̀ɔ̀pɔ̀ɔ̀ aŋ yè nyaŋ gò wa haawè nyaŋ.