1Pììlɛ 3:1 - WƆŊ FƐ̀Ì EBÒ SÌÀŊ DAYÀA

¹ Sèè mùŋ nɔ̀ŋ wo jɔùŋ kùwìè felaa, jɔ̀ɔ̀lɔɔ̀ wo faniŋ mɔɔ̀ŋ dìì. Sèè pɛɛ wo gò jɔ̀ɔ̀lɔ̀ kè mìè Dayàa dìì, e jɔ̀ɔ̀lɔ mɔ̀ɛ̀ ko nɛ̀ɛ̀uŋ niìŋ douŋ nàŋ nyɛ̀nɛ̀ŋ wo jɔɔlɔ̀, wo nyùùŋ gbiŋ naùŋ ɓɛìŋ gbòò kɔɔ wèètii.

1Pììlɛ 3:1 ပူးပေါင်းရင်းမြစ်များ

Maafiù 18:15

“Sèè wo wùìya mɔɔ̀ŋ wò jààùm e nànàŋ, kɔ̀à ko nɛ̀ɛ̀uŋ niìŋ muŋ woòuŋ niŋ. Kɛɛ nyɛnɛ̀ŋ niŋ ke gbùnuo sùà nyɛiŋ tìyèe fèemàŋ. Sèè wò kumiàŋ e yèɛ mùŋ naŋ woò lɛ, kɛ̀ wò kìlà ko nɛ̀ɛ̀ŋ muìŋ.

Luùm 10:16

Yɛi nɔŋ è yaà koɓɛ̀ anyùùŋ nyaŋ gbiŋ nààŋ kòò àŋ hààwè kè mìè gbìàŋ Èbò Siaàŋ nyaŋ. Tɛɛ̀ naŋ wa kaaìŋ wèè e nyɛ̀nɛ̀ŋ e yèɛ wo wɛ̀ijìɔ Àzaayà naŋ wa woò lɛ e hɛɛnɛ̀ŋ. Wò naŋ woò wààŋ, “Kanaà, ɓòò naŋ wa hààwè maŋ miè gbìaŋ wi màŋ?”

Luùm 6:17

Kɛɛ gè wììŋ wo Dayà ke sɛ̀! Esaɓù kɛ̀ nìŋ yaà wa mààŋ aŋ ɗo e kìlà nìŋ yaà jɔ̀ɔ̀lɔ̀ e ɗèweɛ̀ nìŋ kuwa lɛ̀ koɓɛ̀ maŋ jùumù, kɛɛ nàŋ kìlà yèè nàŋ kɛ̀ɛ̀nɛ̀ŋ e ɓɛ̀ɛ̀jàa maŋ jiiiŋ màŋ sùà wèè naŋ jɔ̀ɔ̀lɔ̀ e tɔ̀ɔ̀nyaàaŋ àŋ naiŋ wa kaà lɛ dìì.

Luùm 7:2

E tɔ̀ɔ̀màŋsèì e keì lɛɛ̀ nàŋ yaà, ke sàwà yɛɛ̀ gbìaŋ kuwa e gààŋ wo jɔ̀ùnèè yɛ̀ɛ̀ɔ diɛŋ wèè koɓɛ̀ wo fanuuŋ nɔɔ̀ŋ, e teengaà wo felaaà yaà wɔŋ nyiiŋ gèeɔ̀ sùà lɛ. Kɛɛ sèè wo felaaà wò fà, kɛ̀ wo jɔunɔ̀ɔŋ fè ɓɛìŋ kè sàwà dìì kòɓɛ̀ wò felaa wii.

1 Kɔliìŋ 11:3

Kɛɛ mìŋ manaŋ wèè naŋ jàà jii kɛ̀ wo Jisɛ̀ Kulaì nàŋ yaà wo ɓɛ̀ è ɗì wèè felaa gbiŋ, wo felaa nàŋ yaà wo ɓɛ̀ è ɗì wèè wo jawèuŋ nɔɔ̀ŋ, yèè wo Dayà nàŋ yaà wo ɓɛ̀ è ɗì wèè wo Jisɛ̀ Kulaì.

1 Kɔliìŋ 14:34

aŋ jɔ̀ùŋ jɛi kpɛ maŋ dèènè ke gbòò anyuùŋ hààwe nyàŋ sùà. Aŋ fè nyaàŋ gè diɛŋ nyiŋ wèè aŋ gbòà, nààŋ maŋ sàwà Mòòze màŋ naŋ woò lɛ, ɓɔ̀ àŋ nɔ̀ŋ àŋ sìèfeìŋ.

1 Kɔliìŋ 7:16

Diè mùŋ naŋ ɓɛ̀nɛ̀ŋ hààwe kɛ̀ muŋ naàŋ jòèyè wò faniŋ mɔɔ̀ŋ muàŋ jɔùŋ kùwìè è hààweɔ̀, ɔ̀ɔ̀ diè mùŋ do nàŋ nyìmè kɛ̀ mùŋ do nàŋ jòèyè wo jawè mɔɔ̀ŋ, muàŋ felaa kùwìè e hààweɔ̀?

Ɛfesɔ̀ 5:33

Kɛɛ è yaà wèè nyɛ̀iŋ pɛɛ, wo fèlàà jɔùŋ gbiŋ sɔɔ̀ maŋ mànàŋ wò jawè mɔɔ̀ŋ màànààŋ nɔŋ mùŋ manaŋ muàŋ bi lɛ̀, yèè wo jɔ̀ùŋ felaa gbiŋ sɔɔ̀ wo kùwìè è ɓɛ̀ɛ̀jàa è wèè fanuuŋ nɔɔ̀ŋ.

Kòlo 3:18

Nyɛ̀iŋ nààŋ jɔ̀ùŋ nèè yɛ̀ɛ̀ nyaŋ, jɔ̀ɔ̀lɔìŋ aŋ faniŋ nyàŋ dìì. E tòmoɛ̀ lɛɛ̀ nìŋ kuwa naŋ nyɛ̀nɛ̀ŋ nààŋ nìŋ yaà anyùùŋ màŋjɛ̀wɛ̀ wo Kanaà Jisɛ̀ lɛ.

Kòlo 4:5

Tòòmoìŋ jiikɛ̀ɛ sùà e nyaàiŋ dè e ɗeweɛ̀ nìŋ tuwà koɓɛ̀ anyùùŋ nyaŋ kuwà hààwe nyàŋ. Tòòmoìŋ e teenga siaàŋ gbiŋ nìŋ kuwa lɛ̀ wèè niŋ kiɛ̀ŋ ke miè gbìaàŋ ko nɛ̀ɛ̀ŋ nyiŋ niìŋ.

2Tɛsè 1:8

e hmɔɔ̀ŋ kùwa sùà wèè wo gbàì e tɔ̀ɔ̀nyaàŋ sùà anyùùŋ nyaŋ naŋ kùwìè wo Dayà maŋhɛɛ nyàŋ, yèè aŋ yè nyaŋ fè jɔ̀ɔ̀lɔ̀ Èbò Siaàŋ nyaàiŋ dè wò Kana wiɔ̀ Jisɛ̀ dìì nyaŋ.

Hiɓu 11:8

E hààwe naŋ wa nyɛ̀nɛ̀ŋ wo Eɓulɔhɛɛ̀ŋ naŋ jɔɔlɔ̀ e teengaà wo Dayà nauŋ wa nyààŋ wèè wo ka koɓɛ̀ wɔŋ fuɔŋ bà wɔŋ yèɔ wo Dayà naŋ wa jɔ̀ɔ̀ ɗààhiì wèè wouŋ kiɛ̀ŋ wɔŋ. Wo Eɓulɔhɛɛ̀ŋ naŋ wa yèwè wɔŋ fuɔuŋ nɔɔ̀ŋ wèè wo ka koɓɛ̀i wo nyimààŋ lɛ.

Hiɓu 5:9

E keì nyìngaà wo Jisɛ̀ naŋ wa kɔ̀ dìì lɛ, naŋ nyɛ̀nɛ̀ŋ wò naŋ wa nɔ̀ŋ wo nyuùŋ tùlìà jii dìà sùà, e kìlà wò naŋ nɔ̀ŋ ko tɔɔtuì wèè e jòèyè anyùùŋ nyaŋ jɔɔlɔ̀uŋ dìì nyaŋ,

1Pììlɛ 1:22

Nààŋ nìŋ yaà naàŋ jɔ̀ɔ̀lɔ sùà e tɔ̀ɔ̀nyaàŋ dìì, e tɔ̀mɛ jùumù fè ɓɛìŋ màŋ nyiiiŋ màŋ, nàŋ naàŋ zɛ̀nɛ̀ŋ. Yèè nàŋ kùwìè e mànaŋ kɛnɛ wèè anyùùŋ hààwè dawiiŋ nyàŋ. Kùwieìŋ e mànaŋ e fèemàŋ e yìwìà maŋ jiiiŋ màŋ diɛŋ.

1Pììlɛ 3:2

E fèfoo àŋ do nàŋ yɛ̀mɛ̀ e ɗeweɛ̀ e zɛ̀nɛ̀ŋ kiium mɔ̀ɛ̀ yèe e jùù yààùm wèè Dayà, e kìlà e tɔ̀mɛ fè è tùwò kiium mɔ̀ɛ̀ sùà lɛ.

1Pììlɛ 3:7

Sèè mùŋ nɔ̀ŋ wo felaa kùwìè jɔùŋ, kùwiè e gòngo wèè jawè mɔɔ̀ŋ. Kùwiàuŋ e ɓɛ̀ɛ̀jàa, esaɓù màŋ nyìngà sùà màuŋ nìàŋ yèè wò yaà bàuŋbà wèè e tɛ̀ɛ̀tɛ̀ɛ̀ wɔŋ nyiiŋ gèeɔ̀ wo Dayà naiŋ kiɛ̀ŋ wɔŋ. Nyɛ̀nɛìŋ tɛɛ̀ wèè e nɛ̀ŋ gbiŋ go nàŋ kèèwè è zòòloiŋ nɛ̀ feìŋ.

1Pììlɛ 4:17

E tèèngà e gbàiɛ̀ è haì, yèè è do nàŋ tɔ̀ɔ̀tù ko sààŋ Dayài jiɛ̀. Sèè è tɔɔtù wì diɛŋ, diè ko jèè e ɗìi do nàŋ nɔ̀ŋ wèè anyùùŋ nyaŋ gò hààwè kè mìè gbìàŋ Ebò Siaàŋ kè yèɛ yewe Dayà sìwè lɛ?