1Jɔ̀ɔŋ 5:13 - WƆŊ FƐ̀Ì EBÒ SÌÀŊ DAYÀA

¹³ Mìŋ naŋ tɛɛ̀ sìngè ko nɛ̀ɛ̀iŋ niìŋ nyɛ̀iŋ nyàŋ naŋ hààwè e dèè Jɔ̀àfèlàà Dayàa sùà nyaŋ, wèè naŋ nyìmàŋ kɛ̀ nìŋ kuwa wɔŋ nyiiŋ gèe gò jùà.

1Jɔ̀ɔŋ 5:13 ပူးပေါင်းရင်းမြစ်များ

Jɔ̀ɔŋ 1:12

Jòòpɛɛ anyùùŋ nyaŋ bà nyiŋ nauŋ wa jàà kùàŋ dìì yèè àŋ nauŋ sìè e hààwe nyiŋ nɛ̀ sùà. Anyùùŋ bi wò naŋ wa kìɛ̀ŋ e tɔ̀ɔ̀nyaàŋ wèè aŋ nɔ̀ŋ aŋ jɔ̀à koɓɛ̀ Dayài.

Jɔ̀ɔŋ 2:23

Esàɓù maŋ kèè mèè maŋ anyùùŋ nyaŋ naŋ wa yɛ̀mɛ̀ wo Jisɛ̀ naŋ nyɛ̀nɛ̀ŋ maŋ, anyuùŋ zimgbe nauŋ wa haawè ko Jùlusɛ̀làm e tèèngà wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ.

Jɔ̀ɔŋ 20:31

Kɛɛ àŋ naŋ wa sìngè maŋ yè mɛɛ̀ŋ wèè kɛ̀ muŋ kɛɛnɛ̀ŋ e hààwe wo Jisɛ̀ ko sùà, wo yèɔ wo Dayà naŋ tàeɗùù wɔ wèè wo joeyè anyùùŋ nyaŋ e ɗuunyaàŋ, yèè wèè naŋ haawè kɛ̀ wuŋ nàŋ yaà wo Jɔ̀àfèlàà Dayàa. Sèè nìŋ kɛɛnɛ̀uŋ e hààwe sùà, nìŋ do nàŋ kɛ̀ɛ̀nɛ̀ŋ wɔŋ nyiiŋ gèe gò jùà.

Jɔ̀ɔŋ 21:24

Wo nyùùŋ màŋjɛ̀wɛ̀ wɛɛ̀ naŋ sìngè maŋ keì mɛɛ̀ŋ gbiŋ. Èiŋ nyìmàŋ kɛ̀ ke mìè seìɛ wò naŋ kiɛ̀ŋ lɛ è yaà tɔɔɓaa.

Jɔ̀ɔŋ 3:18

“Anyùùŋ nyaŋ gbiŋ naŋ hààwè miàim wo Jɔ̀àfèlàà Dayaà sùà wɔ, wo Dayà naàŋ nyiìŋ jèè è keì. Kɛɛ anyùùŋ nyaŋ naŋ gè maŋhɛɛ wèè aŋ hààwè miàim wo Jɔ̀àfelaauŋ nɔɔ̀ŋ sùà nyaŋ, wo Dayà wò nyiŋ kìlìà kiti tɛ.

Jɔ̀ɔŋ 5:24

“Mìŋ yààìŋ wòò e tɔɔɓaaà, anyùùŋ nyaŋ gbiŋ komo ke miè gbìaŋ miɛ̀ŋ yèè àŋ kɛɛnɛ̀ŋ e hààwe wo nyùnɔ̀ɔŋ naim tùɔ̀ŋ wɔ sùà, àŋ kuwa wɔŋ nyiiŋ gèe gò jùà. Aŋ naàŋ nyiŋ wa nàwèè gbaì, esaɓù kɛ̀ àŋ yèwà koɓɛ̀ e fàa àŋ kà koɓɛ̀ wɔŋ nyiiŋ gèe.

Nyɛ̀nɛ̀ŋ 3:16

E yìwìà e hààwe e dèè Jisɛ̀ɛ sùà naŋ wa kìɛ̀ŋ e gààŋ wo felaa wɛɛ̀ nìŋ yɛmɛ̀ yaà yèè nìŋ naŋ nyìmè wɔ. E yìwìà e hààwe e dèè Kanaà Jisɛ̀ɛ sùà naŋ nyɛ̀nɛ̀ŋ wo felaa wɛɛ̀ naŋ jòèyè kpɛlɛmɛɛŋ, nààŋ nìŋ yàuŋ yɛɛmɛ lɛ̀.

Nyɛ̀nɛ̀ŋ 4:12

Wuŋ guùŋ nɔŋ naum ɓɛ̀nɛ̀ŋ jòèye. Wo nyùùŋ bà gbiŋ fè kò àìjɛnɛ̀ŋ dìì wò yèɔ wò Dayà naŋ wi kiɛ̀ŋ wɔ wèè wo wi joeyè eɓìèmàŋjɛ̀wɛ̀ wuŋ.”

2 Kɔliìŋ 5:1

Èiŋ nyìmàŋ kɛ̀ ke saaŋ yɛɛ̀ è yààìŋ yɛi dìì le tèènè mààŋ kè kpùnaŋ wiɛ̀, sèè kè gɔɛ gɔ̀ɛ̀, è kùwàìŋ ke saaŋ e yìwìà Dayà sìwè. Ke saaŋ gò nyìlìà lè sìwè kè yaà ke saaŋ wèè julɔfɔ ko àìjɛnɛ̀ŋ.

Gàla 4:6

Kɛɛ nààŋ è yààìŋ aŋ jɔ̀à Dayà lɛ, wo Dayà naŋ tùɔ̀ŋ wo Jìnàŋ Jɔ̀àfelaauŋ nɔɔ̀ŋ maŋ jii wi màŋ sùà. E kìlà wo Jìnàaŋ naŋ gòlò wààŋ, “Dèda miɔ̀ŋ, Dèda miɔ̀ŋ wɔ.”

1Pììlɛ 5:12

Wo Sailɔ̀ naim kpuumò mìŋ naŋ sìngè wɔŋ fɛi kpuu wɛɛ̀ŋ ko nɛ̀ɛ̀ŋ niìŋ, wo yèɔ mìŋ naŋ ɓemè wèè wo nɔ̀ŋ wo wùìya hààwè tɔ̀ɔ̀nyaàŋ wɔ. Mìŋ yààìŋ sìa sùà ke di kɛ̀ tɛɛ̀ nàŋ yaà e kìɛ̀ŋ tɔ̀ɔ̀nyààŋ Dayàa nyììneìŋ sùà niŋ nɔ̀iŋ sùà.

1Jɔ̀ɔŋ 1:4

È naiŋ tɛɛ̀ sìngè wèè e nyɛ̀nɛ̀ŋ esaɓù wèè e zɔlɔ̀ ge wilɛ̀ dià sùà.

1Jɔ̀ɔŋ 2:1

Mìŋ yaà tɛɛ̀ sìngà sùà ko nɛ̀ɛ̀ŋ niìŋ, nyɛ̀iŋ nààŋ jɔ̀àim nyàŋ, wèè kɛ̀ ɓɔ̀ nìŋ nyɛ̀nɛ̀ŋ màŋ kèì jùumù, kɛɛ sèè wo nyùnɔ̀ɔŋ gbiŋ naŋ nyɛ̀nɛ̀ŋ maŋ kei jùumù wɔ, è kùwàìŋ wo nyùùŋ wèè wo pɔ̀wɔ̀ wo Dèdaà e wèè wi, wo nyùùŋ bi nàŋ yaà wo Jisɛ̀ Kulaì wo nyùùŋ tɔ̀ɔ̀nyaàaŋ.

1Jɔ̀ɔŋ 2:21

E fè mààŋ niŋ nyimààŋ è tɔ̀ɔ̀nyaàaŋ, wèè kaìŋ sìngà wɔ̀ŋ fɛi wɛɛ̀ŋ, kɛɛ nààŋ nìŋ naŋ niŋ nyìmè lɛ, nàŋ nyìmàŋ kɛ̀ e tòa bà gbiŋ e fè è tɔ̀ɔ̀nyaàŋ bi sùà.

1Jɔ̀ɔŋ 2:25

Yèè tɛɛ̀ wo Jisɛ̀ naŋ wa ɓèèmè e ɗààhiì diɛŋ kɛ̀, wò do wi nàŋ kìɛ̀ŋ wɔŋ nyiiŋ gèe gò jùà.

1Jɔ̀ɔŋ 2:26

Mìŋ yaà sìnga sùà tɛɛ̀ ko nɛ̀ɛ̀ŋ niìŋ wèè e nyaàiŋ dè aŋ yè nyaŋ yaà kààmè ɗewe wèè aiŋ zuwò nyaŋ.

1Jɔ̀ɔŋ 3:23

E nɛ̀ɛŋ wo Dayà naŋ wi woò wèè eiŋ nyɛ̀nɛ̀ŋ lɛ nàŋ yaà, wèè eiŋ kɛ̀ɛ̀nɛ̀ŋ e hààwe e dèè wo Jɔ̀àfelaauŋ nɔɔ̀ŋ Jisɛ̀ Kulaì sùà, yèè e mànàŋ aŋ dàwi wi nyàŋ màànààŋ wo Kulaì naŋ wi woò wèè eiŋ nyɛ̀nɛ̀ŋ lɛ.

1Jɔ̀ɔŋ 4:9

Wo Dayà naŋ wi tɔ̀ɔ̀ e mànaùŋ nɛ̀ esàɓù wo Jɔ̀àfèlàà gunùuŋ nɔɔ̀ŋ wò naŋ wi tùɔ̀ŋ e ɗuunyaàŋ wɔ, wèè e kɛɛnɛ̀iŋ wɔŋ nyiiŋ gèe e saɓùuŋ nɛ̀ sùà.

1Jɔ̀ɔŋ 5:10

Wo nyùnɔ̀ɔ̀ŋ gbiŋ naŋ sìè e hààwe wo Jɔ̀àfèlàà Dayaà sùà wɔ, wò kuwa ke mìè seìɛ ke jiiuŋ nɛɛ̀ŋ sùà. Kɛɛ wo nyùnɔ̀ɔ̀ŋ gbiŋ gò hààwè wò Dayà wɔ wò mììnè Dayà nyuùŋ tòa, e fèfoo wo gò hààwè kè mìè seìɛ wò Dayà naŋ fè è nyaàiŋ dè wò Jɔ̀àfelaauŋ nɔɔ̀ŋ lɛ.

1Jɔ̀ɔŋ 5:11

Ke mìè seì bi nàŋ yaà, kɛ̀ wo Dayà naŋ wi kìɛ̀ŋ wɔŋ nyiiŋ gèe gò jùà, yèè wɔŋ nyiiŋ gèe wɛɛ̀ŋ wɔ̀ŋ folo wo Jɔ̀àfelaauŋ nɔ̀ɔ̀ŋ sùà.

1Jɔ̀ɔŋ 5:20

Yèè èiŋ nyìmàŋ kɛ̀ wo Jɔ̀àfèlàà Dayàa naŋ hnè yèè wò naŋ wi fè jiikɛ̀ɛ, wèè eiŋ nyìmàŋ wo Dàyà tɔ̀ɔ̀nyaàaŋ. È yààìŋ anyùùŋ guùŋ wo Dayàa tɔ̀ɔ̀nyaàaŋ sùà, yèè anyùùŋ guùŋ wo Jɔ̀àfelaauŋ nɔɔ̀ŋ Jisɛ̀ Kulaì sùà. Wuŋ nàŋ yaà wo Dàyà tɔ̀ɔ̀nyaàaŋ, yèè wuŋ nàŋ yaà wɔŋ nyiiŋ gèe gò jùàa.