1 Kɔliìŋ 2:6 - WƆŊ FƐ̀Ì EBÒ SÌÀŊ DAYÀA

⁶ Yɛi nɔŋ è yaà mìŋ woà ke mìè gbìàŋ jiikɛ̀ɛ koɓɛ̀ anyùùŋ nyaŋ naŋ kamàìŋ wo Jinàaŋ sùà nyaŋ. Kɛɛ e fè è jììkɛ̀ɛ̀ ɗuunyaŋ lɛɛ̀ ɔ̀ɔ̀ anyùùŋ gbèègbèè maŋ gààŋ maŋ yaà e ɗuunyaàŋ lɛɛ̀ diɛŋ lɛ̀, aŋ yè nyaŋ do nàŋ zùmò fàa nyàŋ.

1 Kɔliìŋ 2:6 ပူးပေါင်းရင်းမြစ်များ

Maafiù 13:22

Aŋ bà nyiŋ zà yaà mààŋ manɛ̀ŋ koei màŋ naŋ sɔ̀ɔ̀ maŋ dɛiŋ màŋ sùà lɛ, nyɛɛ̀ŋ nàŋ yaà aŋ yè nyaŋ àŋ komo ke mìè Dayàa. Kɛɛ maŋ haamiŋ màŋ wɔŋ nyiiŋ gèe wɛɛ̀ŋ sùà, yaà manɛ̀ŋ maŋ zuwà nyùùŋ e nyaàiŋ dè e kèì maŋ bàne màŋ, e kpùlìà e wànàŋ manɛ̀ŋ gɛ̀wɛɛ̀ maŋ gbiŋ nɔ̀ŋ maŋ jii nyiŋ màŋ diɛŋ, mɛɛ̀ŋ nàŋ deka dèkà ke mìè Dayàa ke fè kà màŋ jii nyiŋ màŋ sùà, kpeiŋ aŋ fè kà feìŋ è kèè Dayàa sùà nàaŋ ɔ̀ɔ̀ julɔfɔ.

Maafiù 19:21

Wo Jisɛ̀ nauŋ woò wààŋ, “Sèè mùŋ mɔnɔŋ wèè maŋ nɔ̀ŋ wo nyùùŋ tɔ̀ɔ̀nyaàŋ, kɔ̀à mààŋ manɛ̀ŋ siwèum màŋ gbiŋ muŋ kiɛ̀ŋ e nɛɛnɛɛ̀ŋ anyuùŋ pɔ̀ɔ nyàŋ, kɛ̀ màŋ kɛ̀ɛ̀nɛ̀ŋ e sùlò ko àìjɛnɛ̀ŋ. Kpeiŋ muŋ hnàŋ muŋ dèim maŋjɛ̀wɛ.”

Maafiù 5:48

Nìŋ kuwa naŋ nɔ̀ŋ anyùùŋ tɔ̀ɔ̀nyaàŋ, màànààŋ nɔŋ wo Dèdaiŋ nɔɔ̀ŋ ko àìjɛnɛ̀ŋ yaà lɛ.

Luù 16:8

Wèè esaɓù lɛɛ̀, wo kààmɔ̀ɔ̀ŋ wo ɓɔ̀ìjɔ̀à kàaɓì yɛ̀mɛ̀ manɛ̀ŋ diɛɔ̀ŋ nauŋ tɛnɛ̀ŋ wèè e jiikɛ̀ɛ wò naŋ nyɛ̀nɛ̀ŋ wèè wuŋ bi lɛ̀. Yɛi nɔŋ anyùùŋ kàaɓì nyaŋ e ɗuunyaŋ lɛɛ̀ àŋ yaà. Àŋ kuwa e jiikɛ̀ɛ zimgbe manɛ̀ŋ nyɛ̀nɛŋ nyiŋ màŋ sùà e nìàŋ anyùùŋ tɔ̀ɔ̀nyaàŋ nyaŋ.”

1 Kɔliìŋ 1:28

Wo Dayà naŋ ɓèmè e nɛ̀ɛŋ e ɗuunyaàŋ naŋ kɔ̀ɔ̀yɛ̀ fɛ̀ɛ̀ sùà àŋ gongà kɛ̀ e fè nɛ̀ŋ bà gbiŋ sùà lɛ, wèè wo pɔ̀ɔ̀pɔ̀ɔ̀ e nɛ̀ɛŋ e ɗuunyaàŋ gongà kɛ̀ e gbììŋ gbììŋ yaà sùà lɛ.

1 Kɔliìŋ 12:8

Wo Jinàaŋ kiɛ̀ŋ wo nyùùŋ guùŋ ke miè gbìàŋ e gòngo sengèì, wo Jìnàŋ gunɔ̀ɔŋ wo kìɛ̀ŋ wo nyùnɔ̀ɔŋ bàa ke miè gbìaŋ dìà e jììkɛ̀ɛ̀ nyìmaŋ.

1 Kɔliìŋ 14:20

Nyɛ̀iŋ nààŋ wùìyaim nyàŋ, ɓɔ̀ nìŋ gongò mààŋ àŋ jɔ̀à kaiŋ gòngoìŋ mààŋ anyuùŋ kàmaiŋ e kìla niŋ nɔ̀ŋ mààŋ aŋ jɔaa bɔwɔ gò nyìmàŋ keì naanààŋ è fèemàŋ.

1 Kɔliìŋ 2:1

Nyɛ̀iŋ nààŋ wùìyaim nyàŋ, e teengaà mìŋ naŋ hnè ko nɛ̀ɛ̀ŋ nyiìŋ wèè ka wòò ke mìè gbìàŋ gbùnù tɔ̀ɔ̀nyàŋ Dayàa lɛ̀, miŋ gò tòòmò màŋ miè gbeegbèè ɔ̀ɔ̀ è nɛ̀ŋ nyìmaŋ zimgbe.

1 Kɔliìŋ 2:13

Wèètii, e fèiŋ gbòà màŋ mìè maŋ è jììkɛ̀ɛ̀ nyuùŋkpùuŋ kaà nyùùŋ maŋ, sɔɔ̀ maŋ mìè gbòa màŋ wo Jìnàŋ Dayàa kaà wì maŋ, nààŋ è nɔ̀ìŋ kpìnìè maŋ tɔ̀ɔ̀nyaàŋ maŋ wo Jinàaŋ sùà koɓɛ̀ anyùùŋ nyaŋ kuwa wo Jìnàŋ Dayàa nyàŋ.

1 Kɔliìŋ 2:8

Anyùùŋ gbèègbèè ɗuunyaŋ lɛɛ̀ bà gbiŋ gò nyìmàŋ è jiikɛ̀ɛ lɛɛ̀. Sèè aiŋ wa weè nyìmàŋ, aŋ naàŋ wa weè nàŋ jìwìè wò Kànà nɛɛmaàŋ wɔ̀ŋ vànèkpaàa diɛŋ.

1 Kɔliìŋ 3:1

Tɔɔɓaa tiŋ, nyɛ̀iŋ nààŋ wùìyaim nyàŋ, miŋ fèiŋ wa ɓɛ̀nɛ̀ŋ gbòà kɔɔ mààŋ anyuùŋ kùwìè Jìnàŋ Dayàa, mìŋ kuwa wa nɔ̀ŋ wèè kaiŋ gbòà kɔɔ mààŋ anyùùŋ nyaŋ yaà maŋ kpèè ɗuunyaŋ màŋ maŋjɛ̀wɛ nyàŋ, mààŋ aŋ jɔaa wo Jisɛ̀ Kulaì sìwè.

2 Kɔliìŋ 1:12

E zɔlɔ̀ naŋ wi dìè jii, esaɓù kɛ̀ e gòngo wilɛ̀ è wi nyɛ̀nɛ̀ŋ è nyìmàŋ kɛ̀ maŋ kpèè wi màŋ e nyaàiŋ de manɛ̀ŋ maŋ wɔŋ nyiiŋ gèe wiɔ̀ sùà e ɗuunyaŋ lɛɛ̀, kaikai ngèè e mɔ̀ɔ̀nɔɛ̀ŋ yèè e jìlɛɛ̀ŋ yaà wì e fèemàŋ yàwiiŋ nɛ̀, è yaà e gààŋ nɛ̀ɛ̀màŋ Dayàa dìì. E gò e yìwìà è jììkɛ̀ɛ̀ nyuùŋkpùuŋ sùà.

2 Kɔliìŋ 13:11

E gbiŋ sùà, nyɛ̀iŋ nààŋ wùìyaim nyàŋ enììsìàiŋ. Nɔ̀ɔìŋ tɛ̀ɛ̀ yèè niŋ kuwìè e gòngo wèè maŋ keì maŋ mìŋ naiŋ woò maŋ. Fɛ̀ɛìŋ niŋ nɔ̀ŋ ɓɛ̀ guùŋ ke jii fàa sùà. Kɛ̀ wo Dayà kùwìè e mànaàŋ yaà ke jii fàa doiŋ nàŋ nɔ̀ŋ e kɔɔ.

2 Kɔliìŋ 4:3

Sèè ke mìè gbìàŋ Ebò Siaàŋ è woàìŋ yɛ ke nɔ̀ŋ nyɛ̀ɛ̀nɛŋ nyiŋ, kɛ̀ kè yaà nɔŋ e nyɛ̀ɛ̀nɛŋ nyiŋ wèè anyùùŋ nyaŋ naŋ go nyàŋ.

2 Kɔliìŋ 4:4

E wèè wɔŋ fàà anyuùŋ gò kɛ̀ɛ̀nɛ̀ŋ è hààwe nyàŋ, wo dàyà ɗuunyaŋ lɛɛ̀ naŋ nyiŋ dììyè le fɛ̀ɛ̀ wèè ɓɔ̀ àŋ yɛmɛ̀ è gbolòùŋ nɛ yewe kè mìè gbìàŋ Èbò Siaàŋ sùà e nyaàiŋ dè e jòòwò Jisɛ̀ Kulaìɛ, wo yèɔ naŋ tèènè Dayà wɔ.

Ɛfesɔ̀ 2:2

E teenga lii sùà nìŋ naŋ wa dè maŋ kpèè nàànààŋ ɗuunyaàŋ màŋ maŋjɛ̀wɛ, yèè nìŋ naŋ jɔ̀ɔ̀lɔ̀ wo nyuùŋ gbeeɔ̀ wèè maŋ gààŋ aŋ jìnàŋ nyaŋ ke nyiliɛ̀ sùà wo jinàaŋ sia anyùùŋ nyaŋ gbiŋ feìŋ, aŋ yè nyaŋ fè jɔ̀ɔ̀lɔ̀ Dayà dìì nyaŋ.

Kòlo 1:28

Weètii, è daanàìŋ ebò Jisɛ̀ Kulaìɛ koɓɛ̀ anyùùŋ nyaŋ gbiŋ. È toomàìŋ e jiikɛ̀ɛ wilɛ̀ gbiŋ wèè eiŋ kìɛ̀ŋ e gòo yèè eiŋ kàà anyùùŋ nyaŋ gbiŋ, e kìlà wèè e hìàŋ wo bà guùŋ gbiŋ ko fɛ̀ɛ̀fèìŋ Dayài, mààŋ wo nyuùŋ kàmaiŋ wo yèɔ yaà wo bàuŋbà wo Jisɛ̀ Kulaì sùà wɔ.

Kòlo 4:12

Wo Ɛpafilè wo wùìyà nyɛ̀iŋ biɔ̀ bà ke gboòiŋ nɛɛ̀ŋ sùà, wo yèɔ yaà wo ɓɔìjɔ̀à wèè wo Jisɛ̀ Kulaì wɔ, naiŋ tùɔ̀ŋ zùùmo wuŋ pɛɛ. Wò zoolà sɛmɛ e teenga gbiŋ e weèiŋ, wò yaà dààwè Dayà wèè naŋ kùwà e hààweiŋ nɛ̀ kpaŋ, mààŋ anyuùŋ kàmaiŋ e kìlà àŋ naŋ kaikpɔ nyimèè ke gbòò anyuùŋ hààwe nyàŋ sùà, e ɓɛ̀ɛ̀jàa gbee sùà koɓɛ̀ e yèɛ wo Dayà manaŋ lɛ̀.

Hiɓu 5:14

E nɛ̀ŋje nyìnga yaà wèè anyùùŋ nyaŋ naŋ kamàìŋ nyaŋ, esaɓù kɛ̀ àŋ nyìmàŋ e fèèmàŋ e tɔ̀ɔ̀nyaàŋ yaà e keì naanààŋ.

Hiɓu 6:1

Kàmè wiìŋ ɗewe e nɔ̀iŋ anyuùŋ kàmaiŋ, yèè e tɔɔtùiŋ gòngo wèè e nyɛ̀nɛ̀iŋ maŋ kèì nyɛ̀nɛ̀ŋ nyuùŋ kàmaiŋ. Kɛɛ ɓɔ̀ è nɔ̀ŋ màŋ keì jiɛ̀jiɛ̀ maŋ è naiŋ wa gbeè maŋ sùà e nyaàiŋ dè wò Jisɛ̀ Kulaì. Ɓɔ̀ è nɔ̀iŋ ɓɛìŋ wòo sùà è kèè kè kpèè jɛi tɔ̀ɔ̀tu wèè eiŋ fè maŋ tùwo naanààŋ wi màŋ jɛwɛ maŋ yè maŋ hiàŋ e fàa màŋ, e kìlà eiŋ ɗewè wèè eiŋ kɛ̀ɛ̀nɛ̀ŋ hààwe wo Dayà sùà.

Jìiiŋ 3:15

E jiikɛ̀ɛ mààŋ tɛɛ̀ e fè è yèɛ yewe wò Dayà sìwè lɛ, e jè ke fòolàa e ɗuunyaŋ lɛɛ̀ tii, wo Jìnàŋ Dayàa fè niìŋ sùà e jè Sɛ̀tanàaŋ wuŋ bi tii.

Jìiiŋ 3:2

Yàwi nààŋ gbiŋ è nyɛ̀nɛ̀ìŋ maŋ keì bàa zimgbe. Sèè wo nyùnɔ̀ɔŋ gò duonò è gbòauŋ nɛ̀ sùà wɔ, wo kuwà è tɔ̀mɛ yèè wò ɓɛ̀nɛ̀ŋ yɛ̀mɛ̀ ke kpùnauŋ nɛɛ̀ŋ gbiŋ diɛŋ.

1Pììlɛ 5:10

Sèè nìŋ kɔɛ̀ maŋ keì nyìnga mɛɛ̀ŋ sùà wèè e teenga kpuu sùà, wo Dayàa kuwa maŋ tɛ̀ɛ̀tɛ̀ɛ̀ maŋ gbiŋ wɔ̀, wo yèɔ naiŋ nyààŋ wèè wo goonòiŋ e jòòwò nyiiŋ gèe gò jùà ke gbòò Jisɛ̀ Kulaì sùà wɔ, wuŋ bi doiŋ nàŋ nyɛ̀nɛ̀ŋ sengei yèè woiŋ fè e kɔɔ nyingè, woiŋ sìà e gààŋ woiŋ jàà ko tɔɔtu tùlìà jii.