1 Kɔliìŋ 15:45 - WƆŊ FƐ̀Ì EBÒ SÌÀŊ DAYÀA

⁴⁵ Wɔŋ fɛ̀ì Dayàa wààŋ, “Wo felaa jiɛ̀jiɛ̀ɔ, Adamàŋ, àŋ nauŋ wa banè wò yaà wa wo nyuùŋkpùuŋ gè nyiiŋ.” Kɛ̀ɛ̀ wo Adamàŋ dìàmaàŋ, wò yaà wo Jinàŋ kìɛ̀ŋ wɔŋ nyiiŋ.

1 Kɔliìŋ 15:45 ပူးပေါင်းရင်းမြစ်များ

Jɔ̀ɔŋ 1:4

Wuŋ nàŋ yaà wa ko tɔ̀ɔ̀tù wɔŋ nyiiŋ gèeɔ̀, yèè wɔŋ nyiiuŋ nɔɔ̀ŋ nàŋ wa kìɛ̀ŋ e gbolòùŋ koɓɛ̀ anyùùŋ nyaŋ gbiŋ.

Jɔ̀ɔŋ 10:10

Wo nyuùŋ wùaà wò hnàŋ nɔŋ wèè wo wùà, wo jìwà wo nyùùŋ, yèè wo pɔ̀ɔ̀pɔ̀ɔ̀ maŋ nɛ̀ŋ. Kɛɛ mìŋ naŋ hnè wèè kɛ̀ anyùùŋ nyaŋ gbiŋ aŋ kɛɛnɛ̀ŋ wɔŋ nyiiŋ gèe, yèè aŋ wɔŋ kɛɛnɛ̀ŋ e dìa suà wuŋ kpaŋ.

Jɔ̀ɔŋ 10:28

Yèè mìŋ do nyiŋ nàŋ kìɛ̀ŋ wɔŋ nyiiŋ gèe gò jùà, yèè kɛ̀ aŋ naàŋ wa nàwèè ɓɛìŋ fɔ̀. Wo nyùùŋ gbiŋ fèim nyiŋ ɓɛ̀nɛ̀ŋ gè kò sìwè.

Jɔ̀ɔŋ 14:19

E teenga kpàa bà sùà, anyùùŋ nyaŋ e ɗuunyaàŋ naàim wa nàwèè ɓɛìŋ yɛmɛ̀, kɛɛ nyɛ̀iŋ nìŋ doim nàŋ yɛmɛ̀. Yèè e fèfoo nààŋ mìŋ yaà wɔŋ nyiiŋ gèeɔ̀ sùà, nyɛ̀iŋ pɛɛ nìŋ do nàŋ nɔ̀ŋ wɔŋ nyiiŋ gèeo sùà.

Jɔ̀ɔŋ 14:6

Wo Jisɛ̀ naŋ fasàì wààŋ, “Miàŋ nàŋ yaà ke dòmaàŋ, e tɔ̀ɔ̀nyaàaŋ yaà wɔŋ nyiiŋ gèeɔ̀. Wo nyùùŋ gbiŋ fè ɓɛ̀nɛ̀ŋ hnàŋ kòɓɛ̀ wò Dèdaì, sɔɔ̀ nɔŋ woim kɔ̀ɛ̀ɛ̀ kùàŋ sùà.

Jɔ̀ɔŋ 4:10

Wo Jisɛ̀ naŋ wòò wo nìeɔ̀ wààŋ, “Sèè maŋ weè nyìmàŋ e nɛ̀ɛŋ wo Dayà kiɛ̀ŋ anyùùŋ lɛ, yèè miàim wo nyùnɔ̀ɔŋ yààùm daawe wèè e wuiyè tìa wɔ̀, mùŋ heuŋ nàŋ dawè, yèè wò heum nàŋ kìɛ̀ŋ e wùìyèɛ e yèɛ kiɛ̀ŋ wo nyùùŋ wɔŋ nyiiŋ gèe gò jùà lɛ.”

Jɔ̀ɔŋ 4:14

Kɛɛ sèè wo nyùùŋ gbiŋ wo tìà e wùìyèɛ mìŋ do nàŋ kiɛ̀ŋ lɛ, ke jòòmàì naàuŋ wa nàwèè ɓɛìŋ nyɛ̀nɛ̀ŋ julɔfɔ. E wùìyèɛ mìŋ do nàŋ kiɛ̀ŋ lɛ è do nàŋ nɔ̀ŋ ke wuiyè soo wo nyùùŋ wii ko sùà e yèɛ kiɛ̀ŋ wɔŋ nyiiŋ gèe gò jùà.”

Jɔ̀ɔŋ 5:21

Màànààŋ nɔŋ wo Dèda miɔ̀ŋ gè anyuùŋ fàa nyàŋ dìì yèè wo nyiŋ kìɛ̀ŋ wɔŋ nyiiŋ gèe, yɛi nɔŋ e ɗèwè guùŋ bi sùà miàim wo Jɔ̀àfelaauŋ nɔɔ̀ŋ kiɛ̀ŋ wɔŋ nyiiŋ gèe koɓɛ̀ wo nyùnɔ̀ɔŋ mìŋ manaŋ wɔ̀.

Jɔ̀ɔŋ 6:33

Yèè e nɛ̀ŋjeɛ̀ wo Dayà naŋ kiɛ̀ŋ lɛ nàŋ yaà miàŋ wo yèɔ naŋ dèyè e yìwìà ko àìjɛnɛ̀ŋ wɔ wèè ka kìɛ̀ŋ wɔŋ nyiiŋ gèè koɓɛ̀ anyùùŋ nyaŋ e ɗuunyaàŋ.”

Jɔ̀ɔŋ 6:54

Anyùùŋ nyaŋ do nàŋ gbìlè e kenìŋ mɛ̀ yèè aŋ tìà maŋ sɛnìim màŋ nyaŋ, àŋ do nàŋ kɛ̀ɛ̀nɛ̀ŋ wɔŋ nyiiŋ gèe gò jùà, yèè mìŋ do nyiŋ nàŋ gè e fàaà dìì wɔŋ nyiiŋ gèeo sùà ke ɗɔɔ dìàmaàŋ.

Jɔ̀ɔŋ 6:57

Wo Dèdaà yaà wɔŋ nyiiŋ gèeɔ̀ sùà wɔ naim tùɔ̀ŋ, yèè e saɓùuŋ nɛ̀ sùà miàŋ pɛɛ mìŋ yaà wɔŋ nyiiŋ gèeɔ̀ sùà. Yèè e ɗèwè guùŋ nɛ̀ sùà, wo nyùnɔ̀ɔŋ gbiŋ do nàŋ gbìlè e kenìŋ mɛ̀ wɔ wò do nàŋ nɔ̀ŋ wɔŋ nyiiŋ gèeo sùà esaɓù mɛ̀ sùà.

Jɔ̀ɔŋ 6:63

Wo Jìnàŋ Kanaà Dayà nàŋ kiɛ̀ŋ wo nyùùŋ wɔŋ nyiiŋ gèe. E nɛ̀ŋ kɛnɛ gbiŋ e fè è gààŋ nyuùnkpùuŋ sùà wèè e kìɛ̀ŋ wò nyùùŋ wɔ̀ŋ nyiiŋ gèe. Maŋ mìè maŋ mìŋ naŋ gbòò ko nɛ̀ɛ̀iŋ niìŋ maŋ, màŋ nyɛnɛŋ wo Jìnàŋ Kanaà Dayà woiŋ nɔ̀ŋ ko sùà, wo yèɔ kiɛ̀ŋ wɔŋ nyiiŋ gèe wɔ̀.

Jɔ̀ɔŋ 6:68

Kpeiŋ wo Saimɔŋ Piilɛ̀ nauŋ fasàì wààŋ, “Kanaà, sèè è kɛɛ̀ùm maŋjɛ̀wɛ, ɓɛ̀ ɓòò è naiŋ ɓɛ̀nɛ̀ŋ kàa? Tiŋ zà maŋ mìè gbòaum màŋ nàŋ kiɛ̀ŋ wɔŋ nyiiŋ gèe gò jùà.

Nyɛ̀nɛ̀ŋ 3:15

Nìŋ naŋ wa jìwè wo nyùnɔ̀ɔŋ tɔɔ̀ wɔŋ nyiiŋ gèe kɛnɛ wɔ̀, kɛɛ wo Dayà nauŋ wa gè e fàaà dìì wɔŋ nyiiŋ gèeo sùà. Yàwi nààŋ gbiŋ è yààìŋ aŋ sèì koɓɛ̀ e keì lɛɛ̀.

Luùm 5:17

È yaà tɔɔɓaa kɛ̀ esàɓù maŋ jùùmù wo anyùùŋ guùŋ sùà, e fàa naŋ kɛ̀ɛ̀nɛ̀ŋ gààŋ. Kɛɛ e sɛmɛ kɛnɛɛ̀ nàŋ yaà kɛ̀, anyùùŋ nyaŋ gbiŋ naŋ kɛ̀ɛ̀nɛ̀ŋ wɔŋ nyiiŋ gèe esàɓù e jìwààjɛ̀wɛ̀ e nɛ̀ɛŋ wo Jisɛ̀ Kulaì naŋ wa nyɛ̀nɛ̀ŋ lɛ. Wo Dayà naŋ nyiŋ kìɛ̀ŋ e tɛ̀ɛ̀tɛ̀ɛ̀ gò kɛ̀ɛ̀nɛ̀ŋ dìa e yèɛ e gò tomo weè niŋ lɛ̀, yèè wò naŋ nyiŋ jàà kùàŋ dìì wèè aŋ nɔ̀ŋ anyùùŋ tɔ̀ɔ̀nyaàŋ esàɓù e nɛ̀ɛŋ wo Jisɛ̀ Kulaì naŋ nyɛ̀nɛ̀ŋ lɛ.

Luùm 5:21

Kpeiŋ sèè è nɔ̀ŋ yɛi, màànààŋ nɔŋ e jùumù kuwa gààŋ esàɓù e fàa lɛ̀, yɛi nɔŋ pɛɛ è yaà e tɛ̀ɛ̀tɛ̀ɛ̀ Dayàa kuwa gààŋ esàɓù e tɔ̀ɔ̀nyaàŋ, esaɓù kɛ̀ wò wi jàà kùàŋ dìì esàɓù wo Kana wiɔ̀ Jisɛ̀ Kulaì. Tɛɛ̀ naŋ tɔɔ̀ kɛ̀ è doiŋ nàŋ kɛ̀ɛ̀nɛ̀ŋ wɔŋ nyiiŋ gèe gò jùà wèè julɔfɔ.

Luùm 8:2

Wo Jìnàŋ Dayàa wò nyɛ̀nɛ̀ŋ saɓù wèè eiŋ nɔ̀ŋ wɔŋ nyiiŋ gèe sùà e ɗewe kii jɛi sùà, esàɓù e jìwààjɛ̀wɛ̀ e nɛ̀ɛŋ wo Jisɛ̀ Kulaì naŋ nyɛ̀nɛ̀ŋ weè wilɛ̀. Wò bànè ke dòmaŋ joo wèè wo jòèyè yàwi nààŋ bà guùŋ gbiŋ wèè e gòiŋ nàŋ jɔ̀ɔ̀lɔ̀ maŋ kpèè nàànààŋ maŋ kpùnaŋ wi màŋ dìì, e kìlà maŋ nyɛ̀nɛ̀ŋ eiŋ fɔ̀ɔ̀yɛ̀ maŋ jùumù sùà.

1 Kɔliìŋ 15:46

Wo nyuùŋkpùuŋ jiɛ̀ nàŋ hnàŋ, yèèngàà wo nyuùŋ kpùnɔɔ̀ŋ wo Jinàaŋ yaà sùà wɔ wò hnàŋ.

Fèle 3:21

Wò do nàŋ kìlè maŋ kpùnàŋ zɔ̀kpɔ̀ wi màŋ, wo miŋ nyɛ̀nɛ̀ŋ maŋ nɔ̀ŋ mààŋ e ɗeweɛ̀ ke kpùnàŋ e jòòwò gaàŋ gbeeuŋ nɛɛ̀ŋ yaà lɛ. Wò do nàŋ tòòmò e gààaŋ wò kuwa lɛ̀ wo hìàŋ manɛ̀ŋ maŋ gbiŋ e kanauŋ nɛ̀ dìì.

Kòlo 3:4

Wɔŋ nyiiŋ gèe kɛnɛiŋ nɔɔ̀ŋ nàŋ yaà wo Jisɛ̀ Kulaì, sèè wò folo wa nàwèè ɓɛìŋ ko fɛɛ̀feìŋ, kpeiŋ kɛ̀ nyɛ̀iŋ yèè wuŋ do nàŋ fòlò ko fɛɛ̀feìŋ, e kìlà nìŋ do nàŋ nɔ̀ŋ aŋ bàiŋbà e jòòwouŋ nɛ̀ sùà.

Hiɓu 9:14

Nààŋ tɛɛ̀ è yaà tɔɔɓaa lɛ̀, maŋ sɛ̀ìŋ Jisɛ̀ Kulaì maŋ kuwa ngèè e gaàŋ e nìàŋ miiŋ gbiŋ, nààŋ wò naŋ wa wùɔ̀ŋ maŋ sɛ̀ìŋ e teengaà àŋ nauŋ wa jìwè lɛ. E yìwìà esàɓù wo Jìnàŋ Nɛɛmaàŋ yaà wɔŋ nyiiŋ gèeɔ̀ sùà wèè julɔfɔ wɔ̀, wò naŋ kìɛ̀ŋ wuŋ bi wèè wo nɔ̀ŋ e nɛ̀ŋ kìɛŋ, e saaà gèe tùlìà jii sùà koɓɛ̀ Dayài. Maŋ sɛnùuŋ màŋ do nàŋ nyɛ̀nɛ̀ŋ maŋ jii wi màŋ maŋ zɛ̀nɛ̀ŋ e yìwìà maŋ langi foo sùà, wèè kɛ̀ è naiŋ ɓɛ̀nɛ̀ŋ zòòlò wo Dàyà nyiiŋ gèeɔ̀.

Maŋ kèì nyɛɛnɛŋ 16:3

Wo màikà dìà tìyèeɔ̀ naŋ kɔ̀ yèè wo naŋ gɔ̀àì wɔŋ gɛ̀yiuŋ nɔɔ̀ŋ wɔŋ juwoɔ̀ diɛŋ. E wùìyèɛ naŋ kìlè e nɔ̀ŋ mààŋ maŋ sɛ̀ìŋ nyuùŋ fàa, yèè manɛ̀ŋ gè nyiiŋ màŋ gbiŋ wɔŋ juwoɔ̀ sùà naŋ fɔ̀.

Maŋ kèì nyɛɛnɛŋ 21:6

Wò naŋ ɓɛìŋ woò wààŋ, “È nɔ̀ŋ nyɛ̀nɛŋ niŋ. Miàŋ nàŋ yaà jiɛ̀jiɛ̀ɔ yaà wo dìàmaàŋ, ko tɔɔtuì yèè ko jee ɗìi. Wo nyùnɔ̀ɔŋ gbiŋ ke jòòmàì yaà wɔ, mìŋ douŋ nàŋ kìɛ̀ŋ e tɔ̀ɔ̀nyaàŋ wèè wo tìà e wùìyè e yìwìà e wùìyè jɔ̀à nyiiŋ gèeɔ̀ sùà e yèɛ wo naàŋ kìɛ̀ŋ è nɛ̀ŋ gbiŋ lɛ̀.

Maŋ kèì nyɛɛnɛŋ 22:1

Wo màikàa naim tɔ̀ɔ̀ e wuiyè gbee e nyaàiŋ dè e wuiyè sengèì kùwìè nyiiŋ gèeɔ̀, e yèɛ folo ke kpùà kanaà dìì ke yèɛ wo Dayà yaà Ɓaawaaà jaà diɛŋ lɛ̀,

Maŋ kèì nyɛɛnɛŋ 22:17

Wo Jìnàŋ Nɛɛmaàŋ yaà wo jɔunɔ̀ɔŋ wo Ɓaawaaà do nàŋ ɓemè wɔ naŋ woò nyààŋ, “Hnaàŋ!” Wo nyùnɔ̀ɔŋ gbiŋ komo tɛɛ̀ wɔ wo woò wààŋ, “Hnaàŋ!” Hnaàŋ, nyɛ̀iŋ nyàŋ gbiŋ nìŋ yaà ke jòòmàì sùà nyaŋ. Kùwaìŋ e wùìyèɛ kuwa wɔŋ nyiiŋ gèeɔ̀ lɛ wèè e nɔ̀ŋ e nɛ̀ŋ kìɛŋ, koɓɛ̀ wo nyùnɔ̀ɔŋ gbiŋ mànàŋ niìŋ wɔ.