1 Kɔliìŋ 1:21 - WƆŊ FƐ̀Ì EBÒ SÌÀŊ DAYÀA

²¹ Wo Dayà e jiikɛ̀ɛ̀uŋ nɛ̀ sùà wò naŋ nyɛ̀nɛ̀ŋ e nyìngà wèè anyùùŋ auŋ nyìmàŋ, e yìwìà e jììkɛ̀ɛ̀ nyiŋ bi lɛ̀ sùà. Kɛɛ, wo Dayà naŋ ɗewè wèè wo nɔŋ jòèyè anyùùŋ nyaŋ naŋ hààwè ke mìè gbìàŋ ɓàaɓàaà è woàìŋ lɛ.

1 Kɔliìŋ 1:21 ပူးပေါင်းရင်းမြစ်များ

Maafiù 11:25

E teenga lii sùà wo Jisɛ̀ naŋ woò wààŋ, “Dèda, Kànà àìjɛnɛ̀ɔŋ yèè ɗuunyaàŋ, mìŋ naum gè sɛ̀ esaɓù kɛ̀, mùŋ naŋ nyɛ̀ɛ̀nɛ̀ŋ maŋ keì mɛɛ̀ŋ gbiŋ anyuùŋ nyìmàŋ nɛ̀ŋ nyaŋ sìwè, yèè mùŋ naŋ miŋ tɔ̀ɔ̀ anyuùŋ gò nyìmàŋ nɛ̀ŋ nyaŋ.

Luù 10:21

E teenga lii sùà, e zɔlɔ̀ naŋ wa dìè Jisɛ̀ e yìwìà wo Jìnàŋ Nɛɛmaàŋ sùà. Kpeiŋ wò naŋ woò wààŋ, “Dèda, Kànà àìjɛnɛ̀ɔŋ yèè ɗuunyaàŋ, mìŋ naum gè sɛ̀ esaɓù kɛ̀, mùŋ naŋ nyɛ̀ɛ̀nɛ̀ŋ maŋ keì mɛɛ̀ŋ gbiŋ anyuùŋ nyìmàŋ nɛ̀ŋ nyaŋ sìwè yèè mùŋ naŋ miŋ tɔ̀ɔ̀ anyuùŋ gò nyìmàŋ nɛ̀ŋ nyaŋ. Hɛ̀ɛɛ̀ŋ Dèda, tɛɛ̀ naum wa fɔ̀ɔ̀yɛ̀ ke jii.”

Luù 12:32

“E jùù ɓɔ̀ è nyɛ̀nɛ̀iŋ, nyɛ̀iŋ nààŋ nyùùŋ nyaŋ yaà mààŋ aŋ ɓaawaa nyàŋ. Wo Dèdaiŋ nɔɔ̀ŋ ko àìjɛnɛ̀ŋ manaŋ woiŋ kìɛ̀ŋ e Kanaà.

Jɔ̀ɔŋ 12:31

Kpeiŋ kɛ̀ e teengaà lɛɛ̀ naàŋ wèè wo Dayà wo gbàì anyùùŋ nyaŋ e ɗuunyaàŋ, yèè wo Dayà kòò wò jaa naàŋ wo sìèfèìŋ e ɗuunyaŋ lɛɛ̀ diɛŋ tɛ.

Luùm 1:28

Nààŋ anyùùŋ nyɛɛ̀ŋ naŋ gè maŋhɛɛ wèè aŋ ngèè pɛɛ gòngò e kèè Dayàa, wò dangà wèè maŋ jìì kòmàŋ kàaɓì nyiŋ màŋ maŋ nyiŋ toomò. Weètii àŋ nyɛnɛŋ maŋ keì sàngè maŋ yè maŋ gò tɛɛwɛ̀ wèè aŋ nyɛ̀nɛ̀ŋ maŋ.

Luùm 11:33

Diè wo Dayà yaà yɛi tɛ̀ɛ̀ zimgbe koɓɛ̀ anyùùŋ nyaŋ gbiŋ le! Diè wò kuwa yɛi jiikɛ̀ɛ zimgbe yèè wò naŋ nyìmè e keì fèemàŋ le! Ɓòò naŋ ɓɛ̀nɛ̀ŋ gɔ̀àì è kitiuŋ nɛ̀ sùà? Ɓòò naŋ ɓɛ̀nɛ̀ŋ nyìmàŋ maŋ kpèèuŋ màŋ?

1 Kɔliìŋ 1:18

Ke miè gbìaàŋ nyaàiŋ dè e fà Jisɛ̀ Kulaìɛ wɔŋ vànèkpaaà diɛŋ, è yaà e kèì ɓàaɓàa koɓɛ̀ anyùùŋ nyaŋ naŋ go nyàŋ, kɛɛ e wèè yàwi nyàŋ è naìŋ jòèyè nyaŋ, e gààŋ Dayàa le.

1 Kɔliìŋ 1:23

Kɛɛ sèè è nɔ̀ŋ wèè yàwi, è woàìŋ kɛ̀ àŋ naŋ wa jìwìè wo Jisɛ̀ Kulaìɛ wɔŋ vànèkpaàa diɛŋ. Ke miè gbìaŋ bi zà nàŋ sie aŋ Juùù nyaŋ e wùàŋ, yèè koɓɛ̀ anyùùŋ nyaŋ fè àŋ Juùù nyaŋ àŋ gongà kɛ̀ è yaà e ɓàaɓàa,

1 Kɔliìŋ 1:24

kɛɛ wèè anyùùŋ nyaŋ wo Dayà naŋ nyààŋ lɛ, aŋ Juùù yèè anyùùŋ nyaŋ fè àŋ Juùù nyaŋ, ke miè gbìaŋ bi nàŋ yaà Jisɛ̀ Kulaì ko nɛ̀ɛ̀ŋ nyiŋ niìŋ wo yèɔ yaà e gààŋ Dayàa, yèè e jììkɛ̀ɛ̀ Dayàa wɔ̀.

1 Kɔliìŋ 1:25

E nɛ̀ɛŋ yaà mààŋ e ɓààɓàà Dayà lɛ̀, è kɛ̀ɛ̀jii è nìàŋ e jììkɛ̀ɛ̀ nyuùŋkpùuŋ, yèè e nɛ̀ɛŋ yàà mààŋ e zɔ̀kpɔ̀ Dayà lɛ, è nyìngà sùà è nìàŋ e gààŋ nyuùŋkpùuŋ.

1 Kɔliìŋ 1:27

E nɛ̀ɛŋ e ɗuunyaàŋ naŋ nyààŋ e ɓàaɓàa lɛ̀, tiŋ wo Dayà naŋ tàeɗùù titi wèè esaɓù, tiŋ nàŋ yaà wèè wo sìà anyuùŋ kɛ̀ɛ̀jii nyàŋ e sàngè, yèè wò naŋ ɓèmè e nɛ̀ɛŋ e ɗuunyaàŋ nyaaŋ e zɔ̀kpɔ̀ lɛ wèè wo sìà anyùùŋ gààŋ nyaŋ e sàngè.

1 Kɔliìŋ 11:32

Kɛɛ wo Kanaà gbaì wì, yèè wo wi nimilà wèè wo go wi nàŋ hèè kiti diɛŋ e kpùlìà anyùùŋ ɗuunyaŋ gbànaŋ nyàŋ.

1 Kɔliìŋ 2:14

Wo nyùnɔ̀ɔŋ gbiŋ kuwà wò Jìnàaŋ wɔ̀, wo fè yɛ̀mɛ̀ è kìɛɛ̀ŋ yewe wò Jìnàŋ Dayàa sìwè lɛ. Wo nyùùŋ mààŋ wii tɔɔɓaa wo gò jàà màŋ kìɛŋ mɛɛ̀ŋ jii, yèè màŋ yaà mààŋ e ɓàaɓàa ko nɛ̀ɛ̀uŋ niìŋ, esaɓù kɛ̀ e gbììŋ gbììŋ miŋ nɛ̀, wo nyuùŋ kɛ̀ɛ̀nɛ̀ŋ Jinàaŋ nɔŋ naŋ miŋ ɓɛ̀nɛ̀ŋ tùàŋ maŋ nɔnɔŋ wo Jinàaŋ sùà.

1 Kɔliìŋ 4:10

Esàɓù Jisɛ̀ Kulaì sùà, è yààìŋ anyuùŋ zùwo, kɛɛ nìŋ gongà kɛ̀ nìŋ naŋ kɛ̀ɛ̀jii nààŋ nìŋ yaà aŋ bàiŋbà Jisɛ̀ Kulaì sùà lɛ. È naiŋ yɔkpɔ̀, kɛɛ nìŋ gongà kɛ̀ nìŋ yaà e gààŋ. Àŋ naŋ wi kɔ̀ɔ̀yɛ̀ fɛ̀ɛ̀ sùà, kɛɛ nìŋ gongà kɛ̀ àŋ kiɛ̀ìŋ e ɓɛ̀ɛ̀jàa.

1 Kɔliìŋ 6:2

Niŋ nyimààŋ kɛ̀ ànyùùŋ nɛɛmaŋ nyàŋ nàŋ do wa nàwèè nàŋ gbààì e ɗuunyaàŋ? Sèè nyɛ̀iŋ nìŋ nɔ̀ŋ anyuùŋ gbààì e ɗuunyaàŋ maŋ sàwà, kɛ̀ niŋ fè ɓɛnɛ̀ŋ wèè naŋ gbàì màŋ sàwà nyɛɛnyɛ̀ɛ̀ mààŋ mɛɛ̀ŋ?

Gàla 1:15

Kɛɛ wèè paŋ aŋ kòmàim wa, wo Dayà naim wa tàeɗùù e yìwìà e tɛ̀ɛ̀tɛ̀ɛ̀uŋ nɛ̀ sùà,

Gàla 4:8

E teenga gɔu sùà niŋ nyimààŋ wa wo Dayà, nìŋ yaà wa aŋ ɗo wèè aŋ yè nyaŋ fè àŋ dayà kɛnɛ nyàŋ.

Ɛfesɔ̀ 1:9

Esàɓù e nɛ̀ɛŋ wo Jisɛ̀ Kulaì naŋ nyɛ̀nɛ̀ŋ lɛ sùà, wo Dayà naŋ wi nyɛ̀nɛ̀ŋ wèè eiŋ nyìmàŋ e ɗèweɛ̀ wò kuwa ke gbùnu sùà, yèè wò naŋ naàŋ ɗewè tɛ wèè wo niŋ kpɛ̀ɛ̀yɛ̀ nyɛ̀nɛŋ esàɓù Jisɛ̀ Kulaì sùà.

Ɛfesɔ̀ 3:10

Wo Dayà do nàŋ tòòmò ke gbòò anyuùŋ hààwe nyàŋ, wèè wo tɔ̀ɔ̀ anyùùŋ gbèègbèè fuɔŋ nyàŋ, yèè anyùùŋ gààŋ nyaŋ ko àìjɛnɛ̀ɛŋ aŋ nyìmàŋ e kèè maŋ jiikɛ̀ɛ gɛ̀wɛɛ̀ maŋ gbiŋ wò kuwa màŋ.

Kòlo 1:19

È yaà wa esàɓù e kìtì Dayàa wuŋ bi sùà wo Jɔ̀àfelaaà naŋ wa tèènè wo Dayà e nɔ̀ŋ kiiuŋ nɛ̀ gbiŋ sùà.

Hiɓu 1:14

Kiìŋ nàŋ yaà aŋ màikà nyaŋ? Aŋ màikà nyaŋ yaà aŋ jinàŋ aŋ yè nyaŋ tomàŋ wèè Dayà, e kìlà wò tùɔ̀ŋ nyiìŋ wèè aŋ kpuumàŋ anyùùŋ nyaŋ wò manaŋ wo joeyè nyaŋ.

Hiɓu 2:3

Dièsɔa è naiŋ ɓɛ̀nɛ̀ŋ fòlà e kèì nyìngà Dayàa dìì sèè è gèìŋ maŋhɛɛ wèè eiŋ nyìmàŋ e ɗewe kii gbeeɛ̀ wò do nàŋ mɔ̀nɔ̀ŋ wèè wo wi joeyè lɛ? Wo Kanaà Jisɛ̀ wuŋ bi jiɛ̀ naŋ wòò e kèè e jòèye lɛɛ̀, yèè anyùùŋ nyaŋ naŋ wa kòmò ke miè gbìaàŋ nyaŋ, naŋ wi tɔɔ̀ janjai kɛ̀ è yaà wa e tɔ̀ɔ̀nyaàŋ.

Hiɓu 7:25

Wò ɓɛnɛ̀ŋ sààmɛ, yèè e teenga gbiŋ, wèè wo jòèyè anyùùŋ nyaŋ gbiŋ hnàŋ koɓɛ̀ Dayài nyàŋ e saɓùuŋ nɛ̀ sùà, esaɓù kɛ̀ wò yaà wɔŋ nyiiŋ gèeɔ̀ sùà wèè julɔfɔ, wèè wo pɔwɔ̀ wo Dayà weè nyiŋ.

Jìiiŋ 4:4

Nyɛ̀iŋ nààŋ nyuùŋ gò jilɛ̀ŋ nyɛɛ̀ŋ, niŋ nyimààŋ kɛ̀ sèè nìŋ nɔ̀ŋ ànyuùŋ mɔ̀ɔ̀nɔŋ koɓɛ̀ è ɗuunyaàŋ è naŋ tɔɔ̀ kɛ̀ nìŋ yaà àŋ joo koɓɛ̀ Dayài? Wèètii wo nyùnɔ̀ɔŋ gbiŋ naŋ nyɛ̀nɛ̀ŋ e wùànàŋ wèè wo nɔ̀ŋ wo dàwi koɓɛ̀ e ɗuunyaàŋ wɔ, wò mììnè wuŋ bi wo jòò Dayà.

Jìiiŋ 5:15

Yèè e zòòlo kùwìè e hààwe lii do nàŋ jòèyè wo nyuùŋ sàaàŋ, wo Dayà douŋ nàŋ gè dìì, yèè sèè wo weè pɛɛ nyɛ̀nɛ̀ŋ maŋ kèì jùumù wo Kanaà Dayà juuyà maŋ jùumùuŋ màŋ hakɛ̀.

Jìiiŋ 5:20

jàaìŋ tɛɛ jii, wo nyùnɔ̀ɔŋ gbiŋ naŋ kɛ̀lɛ̀ɛ̀ ke jìì wo nyùùŋ maŋ jùumùɔ e yìwìà ke dòmaŋ ɓàuŋ nɛɛ̀ŋ diɛŋ wɔ̀, wò do nàŋ jòèyè wo jìnàŋ nyùùŋ maŋ jùumù wii e yìwìà e fàa dìì. Yèè tii è hiàŋ maŋ jùumù zimgbe jùùyà hakɛ̀.