NEHEMIAH 9:1 - PATHIAN LEKHABU THIANGTHO (BSI)

¹ Zia tha ah a ni sawmni leh li ni chun, Israel mipite chu anngawl ah saidip puan sil in, leivui kibuak khum in a kikhawm tau a.

NEHEMIAH 9:1 ပူးပေါင်းရင်းမြစ်များ

2 SAMUEL 1:2

A nithum ni’ chun, Saul leh a lawite giabuk ah kipat pawsal pakhat, puanâk tel neng nung leh a luchang ah buanthuak bek net nut in a hung a. David kiang a hung tun phatin leitual ah bokkhup in jâna a hun pia.

2 KHANGTHU 20:3

Jehoshaphat chu a lau ma ma ziang ta’n; Lalpa a hun hawl phatin Judai gam pumpi anngawl ah pauchap ding thu a hun puang tai.

2 KHANGTHU 7:10

Lalpa‘n a phatna chu, David leh Solomon tawh a mipi Israelte zosia chung ah a taklat tâk ziakin, a tha sagi’na, a ni sawmni leh thum ni chun mipite chu kipak leh lungdam tak in a In lam chiat un a sawl kit tai.

EZRA 8:21

Ziaphatchun, Ahava lui pang ah chun, Pathian âng ah kikoi niam ding leh, ka chateu tawh, ka nei leh lamteu pum ah bit takah ka zin theina ding ua lam dik ei kawkmu theina dingin, anngawlna ding thu ka puang ta’n.

EZRA 8:23

Ziaziakchun, anngawl in zia gual chu bawl piak dingin ka Pathian kiang un ka don ngût ngût ziang tau ah; chuleh, ama’nle ka dotnau chu ei ngaitha tai.

NEHEMIAH 8:2

A dot dungzui un thiampu Ezra chunle Dan Lekhabu chu mipi kikhawmte, numei leh pawsal zosia, hetna nei zosia’n a het ding un a kiang un a hun chawi a. Zia hun chu a tha sagi’na a ni khat ni ahi.

ESTHER 4:16

“Chia inla, Susa khua Juda mi zosia ko khawm inla, kei â dingin anngawl in pauchap un; sûn thum leh jan thum sung chu bangma ne lo leh dawn lo in um chiat un. Nanghaw’n la bawl gual un kei leh ka nasêm nungakte hinle bawl ing kau. Ziazaw chuleh, dan lo gual tak himaleh, lengpa kiang in vachia ing ka; ka manthai leh ka manthai himai hen,” ti’n a gen tai.

ESTHER 4:3

Lengpa thupiak leh a thu vaisawm tunna gambung taphot ah chun, Judate lak ah lusûnna huaisia tak, anngawlnate, kâ leh mauna a hung um ah; mi tam tak chu saidip puan sil in leivui lak in a lum tau a.

JOB LEKHABU 2:12

A vak gâl mu lai un a mêl chu a hethei ziang ta puau a, aw ngai tak in a kap ta mai un; a puan uh botthêk in leivui a kibuak khum tau a.

ISAI 22:12

Zia ni ah chun, sepai honte Pathian chun, kap ah lusûn ding leh sam metkol ah, saidip puan sil dingin a hun ko a;

JOEL 2:12

Ahi’n la, tu’hin le Lalpa‘n, la lungthim zosiau in anngawl ah, kap leh lusûn kawm in ka kiangah, hung kihei kit un;

THIAMPUTE LEKHABU 23:34

“Israelte kiang in zia gual hin gen in, a ti’n: Zia tha sagi’na ni sawm leh nga ni’ kipat chun, Lalpa â ding ah Biakbûk Kût ni sagi la mat ding uh ahi.

THIAMPUTE LEKHABU 23:39

Tha sagi’na, ni sawm panga ni ah thâigate la lakkhawm phat uh leh, Lalpa â dingin ni sagi Kût la mat ding uh ahi; a ni khat ni chu sabbath ni tawh kituak intin, a ni giat tin ni chule sabbath ni tawh a kituak kit ding ahi.

JOSHUA 7:6

Ziaphatchun, Joshua chun, Israel upate tawh a puanteu botthêk in, Lalpa thuthung thingkuang mai ah bokkhup in a mâi ua lei tual si hial in a luchung ua leivui kibuak khum in, nitâk lam tiang in a bokkhup tau a.

THUPUAN 11:3

Ka thu ei hetpi panite kiang in thu pia’ng ka tin, amau chun saidippuan sil in ni sang khat za ni leh sawmguk sung thu gen in au,” a tia.

VAIHAWMTE 20:26

Ziaphatchun, Israel mipi zosia tawh sepai zosia chu Bethel ah chia kit in, Lalpa âng ah kitung ah kap in, nitâk lam tiang in an a ngawl tau a. Chuleh, Lalpa âng ah hâlmang thillat leh kichamna kithoina thillatte a lân tau a.

1 SAMUEL 4:12

Zia ni ma ma’ chun, Benjamin phung ah mi pakhat, a puante tel net nut leh a luchung leivui nât nem num in, kido’na kipat in Shiloh a hung tai tung a.

1 SAMUEL 7:6

Tichun, mipi zosia Mizpah ah hungkhawm in, tui a khai un; kithoina thillat in zia tui chu Lalpa âng in a sungtha tau a. “Lalpa chung in ka la bawlkhial tau hi,” ti’n, zia ni chun an a ngawl tau a. Tichun, Samuel in Mizpah ah kipat in Israel zosia chung in vai a hawm tai.