JEREMIAH 38:2 - PATHIAN LEKHABU THIANGTHO (BSI)

² Lalpa‘n zia gual hin a gen hi: Kuale zia khawpi sung ah umden taphot chu, chemjam, kial leh natpi’n thi ding a hiu; ahi’n, kuale Kaldaite khut ah kipedok ziang tapo chu hing intin, a dam sung siau chu gâlhing mat gual ah um in, hing ding a hiu.

JEREMIAH 38:2 ပူးပေါင်းရင်းမြစ်များ

JEREMIAH 21:4

Zedekiah kiang in zia gual hin vagen un, a ti’n: Lalpa, Israelte Pathian chun zia gual hin a gen hi: Kulbâng pawlam ah hun ûm zo ta, Babulon lengpa leh Kaldai sepaite la do-nau hiam leh thal zosia kha bangmalo hun suasak ing ka tin; la khawpiu lailung ah hin, amau chu a leng un hun pui khawm sik sek ding ka hi.

JEREMIAH 24:8

Himaleh, Judai gam ah Lengpa Zedekiah tawh a siamângte zosia tawh, Jerusalem ah um nalai sunte leh, zia gam ah um te tawh Aigupta gam ah um nalaite chu theichang ga phalo, nêk tâk lo khop ah sia gual hin, bawl ding ka hi, Lalpa‘n a tii.

JEREMIAH 27:11

Himaleh, Babulon lengpa ngawngkol bât ah, a na sep piak nuam tapo chu, a gam chiat un nusia ing ka tin, a lou chiat uh kithaw in, hing in au, Lalpa‘n a ti ahi.

JEREMIAH 27:13

Babulon lengpa na sêm nuam lo taphot chungchâng ah Lalpa‘n a la gensa gual ngei in, bang ding ah chemjamte, kialte leh natpite ah nang leh la mipite thi mai ding la hiu em?

JEREMIAH 29:16

David lalchutpha kichupa leh, zia khawpi chêng zosiate leh la chanauteu la saltânnau ah hung panglote chung thu, Lalpa‘n zia gual hin a gen hi:

JEREMIAH 29:18

Chuleh, chemjamte, kialnate leh natpite hun delzui sak pek ing ka; tichun, ka nawmangna gam zosia ah chun, nam zosia leh lenggam zosiate tizat leh hânsiadongte etsakna, mi tizat, eulau leh musit hung hita’n au.

JEREMIAH 34:17

Ziaziakchun, Lalpa‘n zia gual hin a gen hi: Kuama’n a Invêngteu leh a gualteu thâdok ding ka ti gual in la zawm puau ah; nanghaw chung ah chemjam, natpi leh kial hung tung dingin ka thâdok tai, Lalpa‘n a tii. Khawvel lenggam zosia’n a tizat ding uh la chung un hun tunsak ding ka hi.

JEREMIAH 39:18

Matheilo in hun hukdok tei ding ka hiziak in, chemjam ah thâlup in um pua’n la; keima lei ginchâk ziakin la hinna chu gâl lâk ah taidok gual in um ta’n la, Lalpa‘n a tii, ti in.

JEREMIAH 42:17

Aigupta gam ah chêng ding ah vachia gaw tei tei zosia chu, chemjam ah te, kial ah te leh natpi ah ten thi’n au; a chung ua siatna ka tunsak dingte lak ah kipat in kuama suakcha pua’n au.

JEREMIAH 42:22

Zia hi pha tak cha’n he tau in, chia ah chên den la nop tun tunnau gam ah chun, chemjam, kial leh natpite in thi ngei ngei ding la hiu, ti’n a gen tai.

JEREMIAH 44:13

Jerusalem ah umte chemjam tawh, kialna tawh natpi’ ka gawt gual in, Aigupta gam ah chêngte chule gawt tho tho ding ka hi;

JEREMIAH 45:5

Nang in, nang â ding ah thil thupi tak hawl la hi em? Zia gual chu hawldâ mai in; mi zosia chung ah siatna hun tun ding ka hi’ngal a, Lalpa‘n a tii; himaleh, mun tin ah la chiana taphot ah, nangma â ding ah la phatna dingin la hinna hun pia’ng ka,” ti in a gen tai.

EZEKIEL 14:21

Lalpa Pathian in zia gual hin a gen ngal a: Jerusalem gawtna palite, chemjam, kialna, gam sahângte leh natpi, mihing leh gancha that gam ding ah ka hun sawl hun ding chu a huaisia na ding e!

EZEKIEL 6:11

Lalpa Pathian in zia gual hin a gen a: La khut bêng in, la keng tat in; chuleh, Israel Inkuante a la ki’dak umnau zosia chu aw! ti’n gen in. Chemjam in pûk intiu in, natpi leh kialte ziakin thi’n au.

EZEKIEL 7:15

Pawlam ah chemjam, sunglam ah natpi leh kialna, gamlak ah umte chemjam ah thi’n tiu in, khawpi sung ah umte chu, kial leh natpi’n thizo in au.