JEREMIAH 30:8 - PATHIAN LEKHABU THIANGTHO (BSI)

⁸ Sepai honte Lalpa chun zia gual hin a gen a: Zia ni phat chuleh, a ngawng ah ngawngkol chu khetbot piak ing ka tin, a thîkkol bûte chule hitan piak ta’ng ka; tichun, mêlhet lo mite chun suak leh sal in man ta pua’n au.

JEREMIAH 30:8 ပူးပေါင်းရင်းမြစ်များ

SAM 107:14

thim lak leh thi’na lim nuai ah kipat in a puidok ah, a kol buteu chu a ât tan piak tai.

ISAI 10:27

Ziaphat chuleh, la liangko ah la puakgik chu lakdaw in um ta’n tin, la ngawng ah a ngawngkol chule sukbot in um ta’n a. Rimmon ah kipat in a hung kipandok ta’n,

ISAI 14:1

Himaleh, Lalpa chun Jakob hun lainat kit intin, Israel chu hun têl kit ta’n a; chuleh, a gam uh tungding kit in a. Chuleh, gam dang mite tawh kizop ta’n tiu in, Jakob Inkuan lak ah hung pang ta’n au.

ISAI 14:25

Ka gam sung ah chun Assuriate chu hi’chimit ing ka tin; ka mualte chung ah chun palchek ding ka hi; ziaphat chuleh, a ngawngkol uh lâk thâk hita’n tin, a liangko ua kipat a puakgik uh lâk thâk hita’n a.

ISAI 14:3

Lalpa‘n la natna leh lunggimna kipat leh, gim tak ah na sepsak la hi’na kipat chawldamna a hun piak phat leh,

ISAI 9:4

Midiante nuaisia ahi lai gual uh khan, a ngawngkol puakgik uh tawh, a liangko ah jawl kibât leh, a gawtte mol chu la khetbot piak ta’ngal a.

JEREMIAH 2:20

Hun sawt tak ah kipat khan, la ngawngkol thiakbong in, la kolbu le la khen bong ah, “La na sêm ta pua’ng ka,” la ti hen. Ahi’n la, tâng sâng chung tin leh, thinglîm tincheng ah chun, nawchizuak in la kiphâ tai.

JEREMIAH 25:14

Nam tam tak ah leng lopi tak tak te chun amau chu a suak ding un kisiam ta’n au; tichun, amau sep ga, a khut ua a sep uh tawh kiphutawk in a chung un thuk kit ta’ng ka.

JEREMIAH 27:2

Zia gual hin Lalpa‘n ka kiang in a hun gen a: Thing ngawngkol leh a khau ding savun in siam inla, la ngawng ah awk in.

JEREMIAH 27:7

Ama lenggam a pûk hun a tun masang sia, nam zosia’n ama leh a chapa leh a tupa na sep piak in au; ziazaw chuleh vang, nam tam tak leh leng lopi takte chun suak in mang ta’n au.

JEREMIAH 28:10

Chun, jawlnei Hananiah chun, jawlnei Jeremiah ngawng ah ngawngkol chu a lâkpiak vakah, a khenbong ta’n.

JEREMIAH 28:13

Chia inla, Hananiah kiang in, Lalpa‘n zia gual hin a gen hi vati’n, “A thing ngawngkol uh la khetbot piak chu, thîk ngawngkol ah hun then piak ding ka hi!

JEREMIAH 28:4

Chuleh, Judai gam ah Jehoiakim chapa Lengpa Jekoniah chule, Judai gam ah kipat Babulon sal ah pui mang ah um zosia kha tawh hun pui kit ding ka hi, Babulon lengpa ngawngkol chu khetbot piak ding ka hiziak in, Lalpa‘n a tii, ti’n a gen a.

EZEKIEL 30:18

Aigupta gam thuneina ka hisiat phat leh, Tehaphnehes chu sûnchang lai tak in thim intin, a kisuanpi a hatna chu suktawp hung hi’n a; a khawpi chu sûmpi’n chup intin, a khawpelte chu sal ah pui in um ta’n au.

EZEKIEL 34:27

Gamlak ah thingte’n a gau sua intiu in, lei inle a gau sua ta’n au. A gam un bit tak in um intiu in; tichun, a saltânnau ngawngkol ka khetbot piak ah, amau sal ah mante khut ah kipat ka hukdaw phat leh, Keima hi Lalpa ka hi ti hun he ta’n au.

NAHUM 1:13

Tu’hin, nangma ah kipat in a ngawngkol uh hi’bong ing ka tin, nang a hun kânna khauhualte chu, sat tan sik sek ing ka,” a tia.