JEREMIAH 18:16 - PATHIAN LEKHABU THIANGTHO (BSI)

¹⁶ A gam uh tizat um tak leh, kumtuang ah mite cheksak khum in a siam tau hi. A haw kha tapo in a tizau a, a luchang uh a thin khum sek ui.

JEREMIAH 18:16 ပူးပေါင်းရင်းမြစ်များ

1 LENGTE 9:8

Zia In hi In chimsa hung hita’n tin; a hung haw kha taphot in maksa’n, a guk in nui sul sul intin uh: “Bangtidan ah Lalpa‘n zia gam leh zia In hi hiti bawl ziang a hem?” ti’n au.

2 KHANGTHU 29:8

Ziaziakchun, Judai gam leh Jerusalem khua chung in Lalpa a lungna ta’n; tichun, tu’ni la mu gual un, mite tizat, maksak leh simmaw in a umsak ta’n ahi.

SAM 109:25

Ei demte nuizatbûk ka hung hita’n, ei mû si’n uh leh a luu ei thin khum sek ui.

SAM 22:7

Ei mu tapo in ei dâi chavai un; a mûk uh a pubawk in, a luchang uh ei pei khum un:

SAM 44:14

Nam tin lak ah mi gensim in lei siam a, mi tin lak ah nuizatbûk in lei siam tai.

ISAI 37:22

ama chung chang ah zia gual hin Lalpa‘n a gen hi: Zion Chanu, nungak thiangtho, nang a hun musit ah, hun hosia ahi; Jerusalem chanu, la nung lam ah a luchang a hun thinkhum ta ahi.

ISAI 6:11

Ziaphatchun keima’n: “Aw Lalpa, bang chan ahi diam?” ti’n ka dong a. Ama’n ka kiang in: “Khawpite a lua ding um lo ah nutsia a hung hiu a, Inte le a chêng ding um lo ah, gam pumpi hisiat dim dem ah, a hawm ah nutsia ahi masia;

JEREMIAH 19:8

Chun, zia khawpi hi tizat um tak leh etzaw umlo tak in siam ing ka tin; a haw kha tapo in a siatnau huaisia tak ziak ah tiza’n, eulau khum chiat ta’n au.

JEREMIAH 25:9

mallam ah nam um zosiate chu ko ing ka tin; ka suak Babulon Lengpa Nebukadrezar natiang, zia gam leh a kim a kiang ah nam um zosiate do ding hin hun pui ding ka hi; tichun, a leng un susia gawp dim dem intin, tichun, mite tizat leh eulau hung hi’n, kumkhua’n chavai ta’n au, Lalpa‘n a tii.

JEREMIAH 29:18

Chuleh, chemjamte, kialnate leh natpite hun delzui sak pek ing ka; tichun, ka nawmangna gam zosia ah chun, nam zosia leh lenggam zosiate tizat leh hânsiadongte etsakna, mi tizat, eulau leh musit hung hita’n au.

JEREMIAH 42:18

Sepai honte Lalpa, Israelte Pathian chun zia gual hin a gen ngal a: Jerusalem khua chêngte chung ah ka lungnatna butthâk ahi gual ma’n, Aigupta gam zuan ah la chia suk phat ua leh, ka lungnatna chu la chung un buntha ngal ding ka hi. Mite luaksuak leh tizat, kamsia tincheng bânna leh nuizatbûk hung hita’n lau. Chuleh, zia mun hi mu kit ta him him pua’n lau.

JEREMIAH 44:12

Judai gam ah nutsia ah umsun te lak ah, Aigupta gam ah chia suk ah, vachên den gawte chu man ing ka tin, a leng un mangthai in au; Aigupta gam ah chun thi’n tiu in, chemjam leh kial in thigam in au; a lian pen ah kipat a neu pen tiang in, chemjam leh kial ah thigam intiu in; tichun, mite chilsek khum leh tizat, hânsia law khum leh nuizatbûk hita’n au.

JEREMIAH 48:27

Israelte chu guchate lak ah kimandok hilomaleh, nang in la nuisan sek ah; amau la genkhâkna taphot ah chun la luchang la thinkhum sek hilo a hem!

JEREMIAH 49:13

Lalpa chun, keima kiminsial in, Bozrah chu tizat um leh gensiat, suksiat dik dek leh hânsedawl hung hi’n ah, a ti ta’ngâl a; chuleh, a khawpi zosiau chule suksiat in um den ta’n au, ti in.

JEREMIAH 49:17

Edom chu mite tizat hung hi’n ah; a kiang haw tapo in tiza’n, a siat nasat ziakin mak sa’n au.

JEREMIAH 50:13

Lalpa a chung ah a lungnat ziakin, kuama chên lo’na leh a hawm ah nutsia hung hita’n a; Babulon haw kha taphot in tiza’n, a beliamna zosia ziakin cheksa’n au.

JEREMIAH 51:37

tichun, Babulon chu ki’dak paikhawmna, si-alte chênna mun leh, mitin tizat leh eulau leh, kuama chênlo’na hung suak ta’n a.

JEREMIAH 51:43

A khawpite haw chu tizat um a suak ta’n, gam gawchâk leh gamkeu, kuama chên tâk lona leh, mihing chotkhâk lona gamgil a suak tai.

JEREMIAH 9:11

Jerusalem chu thilsia kisunvûmna leh, ngei hon kul in siam ing ka tin; Judai gam ah khawpite chu, kuama chên lona, khawhawm in siam ing ka.

KÂ LATE 1:12

Nanghaw lampi vak lumlette haw, nang uh â ding ah bangmalo hiziang a hem? Ei hun en tiam un, ka chung ah lungngaina tung, Lalpa‘n a lungnat hun ah, ka chung ah a hun tunsak gual hi, a um ngai diam?

EZEKIEL 12:19

chuleh, gam sung ah mipite kiang in: Israel gam ah Jerusalem khawpi chêngte kiang in, Lalpa Pathian in zia gual hin a gen hi ti’n: Lau kawm in a an uh ne’n tiu in, a sung ah chêngte hiamngamna ziakin, a gam pumpi phiat nâm ding ka hiziak in, lauthawng kawm in an ne’n tiu in, lungdong tak in tui dawn ta’n au.

EZEKIEL 27:36

Mitin lak ah kivei zosia’n, la thil tuak khawk a sa chiat ui; tizat um tak in la mangthai ta’n, bangtik inle hung um kit ta pua’n la,” a tiu a.

EZEKIEL 36:3

a kiang un zia gual hin la vagen ding ahi: Lalpa Pathian in zia gual hin a gen hi: kil tin ah kipat a hun enggawt ziak ua a hun chomgam tâk ziak un, nam tinte luaknâm ah um in, mitin lak ah holimna leh gensiat in la hung um tau a;

EZEKIEL 6:14

A chung un ka khut lek ing ka tin, gam chu susia’ng ka tin, a chênnau gam zosia gamthip ah kipat Riblah tiang in susia’ng ka. Ziaphat chuleh, kei hi Lalpa ka hi ti hun he ta’n au.

THIAMPUTE LEKHABU 26:32

La gam uh hisia dim dem ing ka tin, zia tak ah chêng ding ah hung la mêlmateu nasan in lamdang sa’n au.

THIAMPUTE LEKHABU 26:43

Ka vaihawmnate a pom lo ziak leh, ka thuguatte a la huat tâk ziak ua, a sukkhialnau zosia ah kipat a kisiamphat kit sung un gam chu nutsia ah um in, a sung ah chêngte umlo kâl in a la kichawldam ta’n a.

MIKAH 6:16

Omri thuguatte leh Ahab Inkuante thilbawl chu la vop zing in, a lemguatnau chu la zui zing ngal a. Ziaziakchun, a hawm ah nutsia in hun siam ing ka tin, la sung ah chêng sunte chule mi nuizatbûk in siam ding ka hi; tichun, ka mite minsiatna chu paw ta’n la.

MATTHAI 27:39

A kiang hun haw malamte chun a luu a sukkhum un, a eng eng in a ho malam un:

MARKA 15:29

Zia tak hun haw khate chun a luu a sukkhum un, “E hei, nang tempul susia, ni thum sung ah sa zo pa,

DAN LEKHABU 28:59

Lalpa‘n nanghaw leh la cha la nauteu chung in natna huaisia leh dam theilote hun lênsak in a.

DAN LEKHABU 29:23

Lalpa‘n a lungnat lai tak ah Sodom leh Gomorrah, Admah leh Zeboim te, a gam pumpi ah mei leh kât ah a hâltum ah, chisuang, meisuang leh suanggial ah dim, bangma ke’daw theilona mun ah a hisiat dante a mu phât uh leh,