ISAI 42:10 - PATHIAN LEKHABU THIANGTHO (BSI)

¹⁰ Lalpa pâk in La thak sau inla, kawlkil langkhat lam ah kipat, a langkhat lam tiang in pâk tau in! Tuisuagiat leh a sung ah chêng zosia, tuikual gam leh a sung ah chêng zosia’n le, a awu sua chiat tau hen.

ISAI 42:10 ပူးပေါင်းရင်းမြစ်များ

1 KHANGTHU 16:32

Tuisuagiat leh a sung lua dim zosiate chu, gi dul dul uh hen la, gamlak leh a sung ah um zosiate chu thanuam tak in um tau hen.

SAM 150:6

Bangkim a hathei taphot in Lalpa pâk uh hen! Lalpa chu pâk tau in!

SAM 33:3

Ama pâk in La thak sau inla, thiam tak leh ngai tak in tum un.

SAM 40:3

Ka kam ah La thak a koi in, I Pathian pâkna La ngei chu. Mi tam tak in zia chu mu’n, lau intiu in, Lalpa ging ta’n au.

SAM 65:5

Aw ka hukdampa Pathian, tizat um tak ah thilbawl in gâl zaw’na’n lei dawnhu ta’n: nang chu kawl kîmvêl tiang ah mi zosia leh, tuisuagiat gamla pen tiang ah umte kinepna chu la hi.

SAM 72:10

Tarshish leh thialkâl tin ah lengte chunle, leiman hun chawi uh hen la; Sheba leh Sheba lengte’n le, thilpiak hun chawi tau hen.

SAM 96:11

Vante khi lim uh hen la, lei hile kipak ta hen; tuisuagiat leh a sung ah, um zosia gi hum hum tau hen;

SAM 97:1

Lalpa chu lal ahi! Lei hi lim ta hen; tuisuagiat ah thialkâl zosia kipak tau hen!

PAWTDAWNA THU 15:1

Ziaphatchun, Mosi leh Israelte chun Lalpa pâk in zia La hi a hun sa tau a: Lalpa pakna’n La sa’ng ka tin, lopi tak in gual ei zawsak ta’ngal a: sakol leh a chung ah chuangte chu, Tuipi sung in a pai lut tai.

PAWTDAWNA THU 20:11

Ni guk sung in Lalpa’n lei leh van, tuisuagiat leh a sung ah um zosia hi a siam zo ah, a ni sagi ni’n a la chawlsan tâk ziakin, Lalpa’n Sabbath ni chu maljawl in, a suthiangtho ta ahi.

ISAI 11:11

Zia ni phat chuleh, Lalpa‘n a mite lak ah a um nalai sunte chu, Assuria, Aigupta, Pathros, Ethiopia, Elam, Shinar, Hamath leh tuisuagiat pang ah gam zosia ah kipat huai khawm dingin a khut chu a vêl in hun lâm kit ta’n a.

ISAI 12:5

Lalpa pâk in La sau in, lopi tak in thil a bawl ngal a; zia chu lei chung zosia ah het hi hen.

ISAI 42:4

Khawvel ah a vaihawmna a dindaw masia, chautha pua’n tin, lungthuai diak pua’n a; thialkâl gam ah mite’n a thuhilna chu a la ngak zing ui.

ISAI 44:23

Aw vante haw, La sa tau in, Lalpa‘n a bawl zo tai; leimun niam pente haw, hung kikodok tau in. Aw tângsangte, gammâng leh, a sung ah thing zosiate haw, La sa’n hung kikojak tau in! Lalpa‘n Jakob a hukdok ta’ngal a, Israelte lak in choisa’n in, hung um ding ahi tai.

ISAI 48:20

Babulonte ah kipat pawtdok unla, Kaldaite ah kipat in tai mang un; kipak tak ah kiko in, “Lalpa‘n a suak Jakob chu a hukdok tai,” ti’n, kawlkil tiang in genjak unla, va puangjak tau in.

ISAI 49:13

Aw vante haw, kipak in La sau in, aw khawvel, lim ta’n; aw tângte haw, La sa’n hung kikodok un! Lalpa‘n a mite a thamuan ta’n, genthei thuakte chung in, a lainatna tunsak ding ahi ta’ngal a.

ISAI 49:6

Israelte lak ah a suakcha sunte tundin kit ah, Jakob namte photdin kitna ding ah, ka suak ah la pan hi thil bailam ahi puai; kawlkil tiang ah mite kiang chan ah, ka hukdamna a tun theina dingin, namtin salvâk dingin hun siam ding ka hi.

ISAI 51:5

Kin tak in ka hukdamna hun naisak ing ka tin, ka hukdamna pawtdok in, ka khutbân in mi tinte chung ah vaihawm ding ahi; kawlkil tiang ah mite’n ei ngâk un, ka khutbân chule a kinepnau ahi.

ISAI 60:6

Midian leh Ephah gam ah sangawngsau tuaidawng hon tawh, sangawngsau hon in hun tuam in au; Sheba ah chêng zosia hung in au. Sana leh begawte hun pua’n tin uh, Lalpa pâkchâtna chu hung puangjak ta’n au.

ISAI 60:9

Tuikual gam tin ah umte chu ka jai ei ngâk in, Tarshish longliante chu hung masa’n, khual gamla tak ah kipat la chate, a sana leh dangkateu tawh hun pawkhawm dingin, Keima, Israel Mithiangtho Lalpa, la Pathian uh hin, Keima ei chawihoi theina ding un, la mipiteu chu ka chawisâng ta’ngal a.

ISAI 62:11

Ngai un, Lalpa‘n kawl kîmvêl tiang ah mite kiang in, zia thu hi a puang jak tai: Zion chanu kiang in zia gual hin gen un: “Ngai in, la hukdamna a hung tung tai; ngai in, a kipakman chu a chawi in, nasep man ah a piak ding chule, a ma-âng in a um hi,” ti in.

ISAI 65:14

ngaitia, ka suakte chu lungthim kipak ziakin, limna La sa’n tiu in, maleh, nanghaw vang lungthim nat ziak leh, lungngaina nat ziakin, kap jak in la tiu in, kiu veng vung in lau.

ZEPHANIAH 2:11

Lalpa chu a chung un huham intin, lei chung ah pathian zosia lau ah kithinsak ta’n tin; mitin in a umnau mun chiat ah kipat tuisuagiat pâm leh, tuikual gam zosia ah kipat in, a âng ah hung bokkhup ta’n au.

THUPUAN 14:3

Ziate chun, lalchutpha leh thilhing palite leh upate ma ah chun La thak a sau a. Lei ah kipat tatdaw tâk mi nuai khat sîng li leh sang li te longal kuama’n zia La chu a hethei puau hi.

THUPUAN 5:9

La thak a hun sau a: “Nang, Lekhabu chu la ah, a teptênate tham ding ah ting pen chu la hi; tha inla um ah, chitin, namtin, pautin leh mipite lak ah chun, la thisan inla tandok a, Pathian kiang la tut ta’n;