ISAI 12:1 - PATHIAN LEKHABU THIANGTHO (BSI)

¹ Zia ni phat chuleh, zia gual hin hun gen ta’n la: Aw Lalpa, ka chung ah lungna male chin, la lungnatna chu lamang in; lei thamuan tâk ziakin hun pâk ing ka.

ISAI 12:1 ပူးပေါင်းရင်းမြစ်များ

NEHEMIAH 8:10

Chuleh, a kiang un, “Chiau inla, an tui pen ne’n, uain thum tak chu dawn unla; bangma neilote â dinginle a chanvo ding uh thot piak un; zia ni hi I Lalpau â ding ah ni thiangtho a hi’ngâl in; lungngaina’n mang kiu in, Lalpa kipakna chu la hâtnau ahi ngâl in,” ti’n a gen a.

JOB LEKHABU 11:16

La gentheina hemil ta’n la tin, tui luangmangsa gual bep in ngai ta’n la.

JOB LEKHABU 13:16

Pathian neilote chu a kiang ah hung lo ding a hiziak un, zia chu ka hukdamna hiding ahi.

SAM 30:5

A lungnatna chu hun chomkhat bep dai ahi’n; a doisakna chu vang damsung dai ahi. Kâ-na chu a jan giak mai thei, ahi’n, jingkal ah chun kipakna a hung tung ngal sek hi.

SAM 71:21

Nang in ka letna ei sukpun piak in, ei hun thamuan kit ding la hi.

SAM 85:4

Aw, ka hukdamnau Pathian, ei tungding kit inla, ka chung ua la lung hilona chu koimang ta’n.

SAM 86:17

Lei doichuamna tepte’na chu ei etsak inla; tichun, ei mudate chun a muu ah, a mualpho theina ding un. Lalpa, ei panpipa leh ei thamuanpa chu, nangma la hi.

SAM 9:1

Ka lungthim zosia’n Lalpa kiang ah kipak thu gen ing ka tin; la thilmak bawl zosia genjak ding ka hi.

ISAI 10:25

Hun chomlokâl sung in la chung ua ka lungnatna dam pai ta’n tin; tichun, ka lungnatna amau siatna dingin a chung un chuta’n a.

ISAI 10:4

suangkul ngak ding ah sawl lut leh, a thite lak ah um ding bep in a um tau ah; Chutisapi’nle, a lung a dam diak puai, a khut a lâm nalai lai hi.

ISAI 11:16

Tichun, Aigupta gam ah kipat, Israelte hungna ding lampi a um gual khan, a mipi nutsia ah um sunte â dingin, Assuria ah kipat in lamlian hung um ta’n a.

ISAI 14:3

Lalpa‘n la natna leh lunggimna kipat leh, gim tak ah na sepsak la hi’na kipat chawldamna a hun piak phat leh,

ISAI 2:11

Mi kingaisângte chu hi’niam in um intin uh, mi kisathei zosia chu hi’tawm in um in au; zia hun chuleh Lalpa bep chu, choisa’n ah um ding ahi.

ISAI 25:1

Aw Lalpa, nang chu ka Pathian la hi; la kumtuang lemguatna ginum leh thutak in la tuansua ah, thil lamdang tak la bawl ziakin, la min pâk in, hun chawihoi ing ka.

ISAI 25:9

Zia ni phat chuleh, zia gual hin kigen in a: En tiam u, zia hi I Pathian uh, ei hukdok ding ah sawtpi I la ngâk uh kha ahi. Zia hi I la ngâk uh Lalpa chu ahi; a hukdamna hin lim in kipak hitiu.

ISAI 26:1

Zia ni phat chuleh, Judah gam ah zia La hi sak hunghita’n a: Khawpi det tak I nei ui; gual zaw’na chu kulbâng leh khawpi ûmna gual in a siam hi.

ISAI 35:10

Tichun, Lalpa tatsate chu, hung kile’kit intiu in, La sa kawm in Zion ah hung intiu in, a luchung un kumtuang kipakna chu khuk ta’n au; kipakna leh nopna chang ta’n tiu in, lungngaina, thûm leh mauna chu lêng mang ta’n a.

ISAI 49:13

Aw vante haw, kipak in La sau in, aw khawvel, lim ta’n; aw tângte haw, La sa’n hung kikodok un! Lalpa‘n a mite a thamuan ta’n, genthei thuakte chung in, a lainatna tunsak ding ahi ta’ngal a.

ISAI 51:3

Lalpa‘n Zion chu thamuan ding ahi ngâl a; a mun siatna zosia chu thamuan intin, a gamthip chu huan a hem gual in, a gamkeu haw chule Lalpa huan gual in hun siam in a. Kipakna leh limna ama ah um intin, kipak thugenna leh Lasak git het hita’n a.

ISAI 54:7

Hun chomcha sung â ding bep in ka hun nusia in; maleh, lainatna lian tak in hun pui khawm kit ding ka hi.

ISAI 54:8

Ka lungnatna huaisia tak ziakin, chomkhat ka hun kisêl mangsan ah; maleh, kumtuang hepina ziakin, hun lainat zing ta’ng ka, ti’n Lalpa, nangma hun Tanpa chun a gen hi.

ISAI 54:9

Zia hi kei â ding ah Noah hun lai gual kha ahi; Noah hun ah tuilet gual kha, lei chung ah tung kit talo ding ah, thu ka la tiam gual khan; tichun, la chung ah lungna talo ding leh, hun vau talo dingin ka kitiam ta ahi.

ISAI 60:10

Gam dang mite chun la kulbâng uh hun bawl piak intiu in; chuleh, a lengteu chunle la nau hun sep piak ta’n au; ka lungnat ziakin ka hun vaw pâi ta’n, maleh, ka hun doisakna ziakin, la chung in ja’ngaina ka nei tai.

ISAI 61:10

Lalpa ah chun nasa tak ah kipak in, ka pumpi’n ka Pathian chawihoi ing ka; ama’n hukdamna puan in ei thuam in, dikna puan ei khû ta’n, pâkkhi vui ah mopa a kithuam gual leh, mo chu sana kijem gual in, ei jem ta’ngal a.

ISAI 64:5

Thanuam tak ah thil dik tak bawlte leh, la lampite ah nangma hun hezingte chu, nang in la kituakpi sek hi. Ngaitia, ka gilo tau a, nang la lung a na’n, lei kihei mangsan ziakin, ka la chawn khial tau ahi.

ISAI 65:18

Himaleh, zia ka thilsiam ziak ah chun, lim leh kipak tak in um zing un; ngai tiam in, Jerusalem chu kipakna ding leh, a sung ah chêngte le limna hiding in ka siam ahi.

ISAI 66:13

Mi khat a nu’n a thamuan sek gual in, hun thamuan ta’ng ka; Jerusalem ah chun thamuan in um ta’n la.

JEREMIAH 30:19

Ziate ah kipat chun kipak thugenna leh, kichawlimna husa hung pawt in a. Mi tam tak hiding in hun hi’pung ing ka tin, tawm them hita pua’n au; ja’um tak in siam ing ka tin, musit um hita pua’n au.

JEREMIAH 31:13

Ziaphat chuleh, nungakte lim tak in lâm ta’n tiu in, tichun, a têk a khang kipak ma ma ta’n au. A lusûnnau limna’n chansak in, thamuan ing ka tin, a lungngainau limna’n chansak ta’ng ka.

HOSEA 11:8

Aw Ephraim, bangti’n hun haisan thei ding ka hem? Aw Israel, bangti’n hun pedok thei ding ka hem? Admah gual ah bangti’n hun siam thei ding ka hem? Zeboim gual ah bangti’n hun bawl thei ding ka hem? Ka sung ah hin ka lungchang a kitum in, ka khawtuana a nasa’n, a thûk ma ma hi.

HOSEA 6:1

“Hung un, Lalpa kiang lam ah kile’kit hitiu; ei puaitel chu ama ahiziak in, ama’n ei hi’dam ding ahi, ei vaw liam maleh ei tuam piak ding ahi.

ZEKARIAH 1:16

Ziaziakchun, Lalpa‘n zia gual hin a gen hi: Ja’ngaina tawh Jerusalem lam ka hun nga kit tai; zia sung ah chun ka In sak hi’ntin, Jerusalem chung ah chun te’na kithungdok kit ta’n a,” sepai honte Lalpa chun a tii.

ZEKARIAH 14:20

Ziaphat chuleh, sakol telnengte ah chunle, “Lalpa â ding ah Thiangtho,” kiti sut in um ta’n a. Chuleh, Lalpa In ah anhuanna bêlte chu mâichâm âng ah kuang thiangthote gual chu hita’n tin;

ZEKARIAH 14:9

Chun, leilung pumpi’n Lalpa chu leng hung hita’n a; zia hun chuleh Lalpa leh a min bep chu biak hita’n a.

ZEKARIAH 8:11

Tu’hin vang a um nalai sunte chu tu’ma lam ah gual khan bawl kit ta pua’ng ka, ti hi sepai honte Lalpa kamsuak ahi.

ZEKARIAH 8:19

Sepai honte Lalpa‘n zia gual hin a gen hi: “Judah Inkuan ah mite â dingin, tha li’na anngawlna, tha nga’na anngawlna leh tha sagi’na anngawlna leh tha sawmna anngawlna nikhuate hi, kipakna leh limna, Judah Inkuante’n kipak tâng gual chiat ah a mat dingteu chu ahi; ziaziakchun, dikna leh kichamna chu thangai tau in”.

ROMTE 11:15

Amau haw pâmpai ah a umnau bawn, khawvel kituak theina a hung hi’chun, amau haw kilop lut kitna chu bang gual bep in thina pat hinna a hung hita bep diam!