2 KHANGTHU 30:6 - PATHIAN LEKHABU THIANGTHO (BSI)

⁶ Tichun, lengpa leh a khawnbawlte chun lekhathot chu a thotdok zung zung ziang tau a; Israel gam leh Judai gam pumpi chun lengpa thupiak in a thotdok suak tau a; zia gual hin thupiak chu a zik un: “Aw, Israel mipite haw, Abraham, Isak leh Israel Pathian, Lalpa kiang lam ah hin hung kihei kit tau in; chutileh, ama le a thibang sunte kiang lam ah hin hung kihei kit in tin, nanghaw Assuria lengte khut ah kipat suakcha sunte hi hun nai kit ding ahi ngal a;

2 KHANGTHU 30:6 ပူးပေါင်းရင်းမြစ်များ

1 LENGTE 18:36

Kithoina chi khat lat hun ah chun jawlnei Elijah in a hun nai ah, “Aw Lalpa, Abraham, Isak leh Jakob Pathian, nangma hi Israel ah Pathian la hi’n, kei hi la suak ka hi ti leh, lei sawl ah zia thilte hi ka bawl ahi ti tu’ni hin hun tâklang in.

2 LENGTE 15:19

Ziaphatchun, Menahem khutah a gam uh chu, sukdet a hi’theina ding a ngaitua ziakin Pul kiangah chun dangka talent sang khat a la pia’n.

2 LENGTE 15:29

Israel ah Lengpa Pekah vaihawm sung ah chun Assuria ah lengpa Tiglath-pilesar chu a hung kuanah, Aijon tawh, Abelbeth-maakah leh Janoah tawh, Kedesh leh, Hazor tawh, Gilead leh, Galili tawh, Naphtali gam zosiate chu a hun la ta’n, tichun amau haw chu Assuria lam ah sal in a pui tai.

1 KHANGTHU 29:18

Aw Lalpa, ka suantubul uh Abraham, Isak leh Jakob Pathian, la mipite hin zia gual lungthim hi a put zing theina ding un, a lunggil uh hi hi’det piak in.

1 KHANGTHU 5:26

tichun, Israel Pathian chun Assuria Lengpa Pul tawh Assuria Lengpa Tilgath-Pilneser lungthim hun choktho in, Reuben suante, Gad suante leh Manasseh phung ah mi a kimkhatte chu sal ah pui mang in, Halah, Habor, Hara khua leh Gozan luipi tiang hial in tu’ni tiang hin sal in a um khawlaw tau hi.

2 KHANGTHU 28:20

Tichun, Assuriate Lengpa Tiglath-pileser chu a panpi ding hi malak sâng in, a do dingin a hung kuan ta’n, a tawden ta ahi.

ESTHER 3:13

Lengpa gambung tin ah, tha sawm leh ni’na Adar tha, a ni sawm leh thum ni phat leh, Juda mi taphot, a têk a khang, a lian a neu, numei pawsal zosia ni khat sung thu ah a thâgam suak chiat ua, a nei a lamteu zosia gâl lâk ah a kilâk chiat diu, ti’n lekhathot zik in, a thak ding mi a puaksak tau a.

ESTHER 8:14

Tichun, lekha thak vêl dingte chu Lengpa thupiak ah kin tak ah tai vêl dingin, Lengpa sakol hat pen pente ah chun a taisak tau a. Zia thupiak chu Susa ah Lengpa In ah kipat bawl ahi.

JOB LEKHABU 9:25

Ka dam sung nite hi dâk thak, tai vel sâng in a chan-gang zaw’n, a tai mang un, thilpha him him a mu puau hi.

ISAI 1:9

Sepai honte Lalpa‘n tawmcha khat ei la hawil lo vâng leh, Sodom gual in a la um tai tiu in, Gomorrah gual a la hita ding I hiu.

ISAI 6:13

Thinghi thing a hem, gangpi thing a hem, a kiphûk nung ah le a bulsum a um gual in, a lak ua mi sawm lak ah khat ziang le, nutsia a um nâk lai chun, mei ah hâl tum hi nalai in au; chi thiangtho chu a bulsum gual in, um nalai in a,” ti in.

JEREMIAH 29:1

Jawlnei Jeremiah in, Jerusalem khua kipat Nebukadnezar in Babulon lam ah sal ah a puite lak ah, a dam nalai sunte lak ah thiampute, jawlneite leh mipi zosiate kiang in, Jerusalem ah kipat in zia gual hin lekha a thot a.

JEREMIAH 3:14

Aw, mi ginum lo chate haw, hung kihei kit un, Lalpa‘n a tii; nang uh hun neipa ka hi’ngal a. Khawpi khat ah mi pakhat, Inkuan khat ah mi pani a hem, hun lakhawm ing ka tin, Zion ah hun pui tung ding ka hi, ti in.

JEREMIAH 4:1

Lalpa‘n a gen a: Aw Israel, la hung kile’kit ah, keima lam ah la hung kit ua, la ki’dak umnau ka mu’na kipat la lîpthâk ua, la mawk vak tâk lo ua,

JEREMIAH 51:31

Babulon lengpa kiang in a khawpi hi, a mong langkhat ah kipat a mong langkhat lam tiang ah, mêlmate’n a lâk zawu ahi tai, ti thu gen ding thangko kiphamat jen in tai intiu in:

KÂ LATE 3:40

I um danteu ki-enchian in, Lalpa lam ah kile’kit hitiu.

KÂ LATE 5:21

Aw Lalpa, nang â dingin ei tungding kit in, chutileh, tundin kit hibep ing kau; malai gual khan ka niteu siamthak kit in.

EZEKIEL 33:11

A kiang un, Lalpa Pathian in kihaksial hial in, Migilo thi’na chun ka kipak puai; himaleh, migilote chun a umdan uh kiheisan uh hen la, hing leh dam in um leu ka ti ahi; hung kihei kit un, la umdan phaloteu nusia in hung kihei kit tau in; aw Israelte haw, bang ding ah thi mai ding la hiu em?

HOSEA 14:1

Aw Israel, Lalpa la Pathian lam ah hung kile’kit ta’n; la thulimlo’na ziakin la kipal pûk ta ahi.

HOSEA 6:1

“Hung un, Lalpa kiang lam ah kile’kit hitiu; ei puaitel chu ama ahiziak in, ama’n ei hi’dam ding ahi, ei vaw liam maleh ei tuam piak ding ahi.

ZEKARIAH 1:3

Ziaziakchun, a kiang un: Sepai honte Lalpa chun zia gual hin a gen hi: Sepai honte Lalpa‘n ka kiang lam ah hung kihei kit un, keile nang uh lam in hung kihei kit ing ka, sepai honte Lalpa‘n a tii.

ZEKARIAH 1:4

Jawlnei masate’n, “Sepai honte Lalpa chun, ‘La umdan phalo leh, la thil phalo bawlteu chu hun kiheisan un, a tiu a; la pu la pateu in a limsak lo uh leh bangma a la ngaisak lo gual uh khan um kiu in, Lalpa‘n a tii.

JAKOB 4:8

Pathian chu nai un; tichun, ama’nle hun nai in a. Nang uh mi gilote haw, la khut uh sil thiang unla, nang uh mi phalêmte haw, la lunggil uh hithiang un.