1 TIMOTHI 1:9 - PATHIAN LEKHABU THIANGTHO (BSI)

⁹ Ziate hi a umzia hetchian ding ahi, Dan chu miphate â ding ah kibawl a hipua’n, Dan kãl mite leh Dan botsete, migilote, mithianglote, mibuakte, pa ahiloleh nu thatte, mithatte haw leh,

1 TIMOTHI 1:9 ပူးပေါင်းရင်းမြစ်များ

2 SAMUEL 16:11

David in Abishai tawh a sepaite zosia kiang ah chun, “Ka chapa ma ma’n thalup guan ei hawl ahileh, zia Benjamin mi vang chun bang bawldâ ding a hem! Limsak dâ mai un, a nop dan dan in ei hân khum mai hen, Lalpa‘n a sawl ahi ngal in.

2 LENGTE 19:37

Chuleh, a pathian Nisrokh biakna In ah a pathian ho ah a um lai in, a chapate Adramelekh tawh Sharezer chun chemjam in a vathat ua; zia phat ah chun, amau chu Ararat gam lam in a jam mang tau hi: tichun, a chapa Esarhadon chu ama thasâng ah vaihawm in a hung pang tai.

2 KHANGTHU 32:21

Lalpa‘n a vansawlchâk pakhat hun sawl in, Assuriate sepai hangsan leh a hotute leh a sâpliante zosia chu a hung bantan sik sek tai. Tichun, ama chu zakcha tak in a gam lam un a kile’kit tai. A pathian In ah a vachia phatin, ama chate ma ma chun chemjam in a that tau hi.

PAWTDAWNA THU 20:13

Tual that kin.

PAWTDAWNA THU 21:14

Ahi’nla, tup mawng ah dawha phalo nei ah that ahileh vang, ama chu thalup dingin ka mâichâm ah kipat in la puidaw ding ahi.

THUPILTE 20:20

La nu a hem, la pa a hem hânsia la law khum chun, sîn leh têt kibang khop ah thim lak in, la thaumei kimût mit piak ding ahi.

THUPILTE 28:17

Mi thalup ziak ah mawpawpa chu, a thi ni tiang in vâkvai hen la; kuama’n panpi kiu hen.

THUPILTE 28:24

A nu a hem, a pa a hem suam ah, “Thil ka bawl khial puai,” ti chu, suam mang lak ah pang ahi.

THUPILTE 30:11

A pateu hânsialaw ah, a nuteu maljawlna pelo mile a um ui.

THUPILTE 30:17

A pa simmaw leh a nu thu ngainêpte mit chu, phâigam va-âk in kheldok intin, musanete’n a sa le ne’n au.

JEREMIAH 23:11

Jawlnei chunle thiampu gual tho in, Pathian a ngaisak ta puau a; ka In sung natiang in a nunsiatnau chu ka mu tai, Lalpa‘n a tii.

EZEKIEL 21:25

Nang Israel hotu gilo leh nunsia, la gitlona gawtna ding nikhua, huntawp ni chu a nai tai;

THIAMPUTE LEKHABU 20:9

Kuale, a nu a hem, a pa a hem, hânsia lawkhum taphot chu tha ngei ngei ding ahi; a nu leh a pa a sapsiat ziakin a thisan maw kipuak in a.

MATTHAI 10:21

Tha dingin unau leh unau kimattua sak intiu in, pa’n le a cha matsak intiu in; chate’nle a nu leh pateu do intiu in, thâsak in au.

ROMTE 1:30

demhatnate, Pathian huatnate, musitnate, kiletsaknate, uannate, gitlo thil pandokte, nu leh pa thu awilonate;

ROMTE 4:13

Abraham leh a suante kiang ah, khawvel golua’na ding thutiam kha dan ziak a hipua’n, ginna ah dikna ziakin ahi zawi.

ROMTE 5:20

Sukkhialna a kilat tam zawk diak theina dingin dan chu a hung lut a. Himaleh, gitlona a punna chun hepina le a pung zaw diak sek hi.

ROMTE 6:14

Gitlona chun la chung un thu nei talo ding ahi ngal in. Dan vaihawmna nuai ah um la hita puau ah, hepina nuai ah um la hizaw tau hi.

GALATIA 3:19

Ahiloleh, bangtidan ah dan chu um a hem? Chi suan thutiamna chu a hung tun masang in sukkhialnate ziakin belap in a um ah, vansawlchâkte mang ah palai khut ah sukdet ahi.

GALATIA 5:18

Himaleh, Thagau pui ah la um ua leh, dan nuai ah chun la um puau hi.

GALATIA 5:21

ênna, tualtha’na, zukhamna, kinoptelna leh zia tawhbang haw hi. Zia gual thilbawl chîngte chun Pathian gam lua pua’n au, tia ka hun hilkhol gual ah khan ka hun hil kit la hiu.

GALATIA 5:23

thunuaigolna leh kisumtheina ahi; ziate tawh kikãl hi dan a um puai.

DAN LEKHABU 27:16

A nu a hem a pa a hem jalo tapo chu, hânsiadong in um tau hen, a ti zaw phat uh leh, mipi zosia chun, “Amen,” tiu hen la.

2 THESSALONITE 2:8

Zia chu lakmang ahi’phat leh, dan susepa chu hung kilang intin, Lalpa Jesu’n ama chu a kam ah hu thâ khum in that intin, a hung kilâkna chun hi’mangthai in a.

1 TIMOTHI 4:7

Thu kiphuak kawm polche leh tuanthu manlote ah chun kihi’ nât kin. Pathian ngaisakna lam in kisawizoi in.

1 TIMOTHI 6:20

Timothi, la kiang ah vopsak ah um chu vêngpha ta’n. Diklo tak ah pilna a tiu, thu kigen mai mai leh kinialnate chu kiheimang san in;

2 TIMOTHI 2:16

Holimna polchete kiheisan in; zia chun mite Pathian ngaisak lona lam in a pui lût deu deu sek hi.

2 TIMOTHI 3:2

Mite chu, ama bep kihepite, dangka ngainate, kiphatsakte, lochalte, mi hosiat chîngte, nu leh pa thumanglote, kipakna châng helote, thiangtholote,

TITA 1:10

Dan khawksa lo leh thu manlo mawk gen gente, mi thêm ah puimangte a tam tangal ua, a diak in zektante lak in a tam diak uh ahi.

TITA 1:16

Pathian he a kitiu in, himaleh a nasep ua chun ama a kihetlosak ui. Ki’dak um tak leh thu awilo tak in, thilpha hi’na ding lam taphot in a ting zo ta puau hi.

TITA 1:6

mi kuale dem kâi lo, ji pakhat nei, a chate ginum, noptatna lam ah dem kâi lo, danlo gual ah talo a hi’nâk ua leh,

TITA 3:3

Eihawle malai ah khan mingol tak, thu awilo, thep zaw ah um, gilo leh mitthîp hatte, huat ah um leh kihawtua ah umte I la hiu a.

HEBRAITE 11:31

Ginna’n nawchizuaknu Rahab khan enthate kha thamuang tak ah a tunsak ziakin, a ginglote manthaina khan a mangthai khawm ta puai.

HEBRAITE 12:16

Mithanghuai a hem, Esau gual ah Pathian jalo hung um kha’n lau; ama chun a cha upa hi’na chu an khatvei nêk in a khawng a,

1 PETER 2:7

Ziaziakchun, nanghaw a gingte â ding ah chun man tam ahi, a ginglote â dingin vang: “Insate suang doilo chu, a kil ah suang phachuam pen a hung hi tai,” ti ahi ngal a.

1 PETER 3:20

amau chun malai ah Noah dam lai ah Long tuk sungsia, Pathian dawtheina a ngak lai khan thu a mang puau ah, zia Long ah chun mi tawmcha, mi pagiat, tui ah kipat hukhin in a um uh ahi.

1 PETER 4:18

Chuleh, “Midik nangawnle hukdam hâm hâm ahi chun, Pathian ngaisaklote leh migilote chu, bang a suak ta diam uh?”

JUDA 1:15

mi zosia chung ah vaihawm intin, mi zosia’n Pathian ngaisak lo tak ah, Pathian ngaisak lona thil a bawl zosiau leh, migilo, Pathian ngaisaklote’n a chung ah khau tak ah a gen zosiau mawchansak in a,” ti in.

THUPUAN 21:8

Himaleh, mi dawilokte, ginglote, ki’dak umte, tualthatte, thanghuaite, dawi mangte, milim ho-te, juautheite zosia chun mei leh kât ah kâng meidil chang ta’n au, zia chu thi ni’na chu ahi,” a tia.

THUPUAN 22:15

A pawlam in uichate, dawithiamte, thânghuaite, tualthatte, milim hote leh juau thu dawi leh juau thugen chîngte um in au.