1 SAMUEL 30:6 - PATHIAN LEKHABU THIANGTHO (BSI)

⁶ Mipite chu a ji leh chateu ziak ah a lungthim uh a nat ma ma ziakin, David chu suang ah se’lup a guat ziang phat un, David â dingin lauthawn um tak ahi tai. Himaleh, David chu Lalpa a Pathian ah chun ama leh ama a hung kisuhat tai.

1 SAMUEL 30:6 ပူးပေါင်းရင်းမြစ်များ

THILSIAM THU 32:7

Jakob chu lau in, a lungkham ma ma ziang ta’n; a kiang ah mi umte, belam honte, bawng honte leh sangawngsaute chu hon ni a sua ah:

2 SAMUEL 17:8

Hushai in, “La pa tawh a mite chu gamlak ah savom no kiluak piak gual ah lungna a hiu ti la hia’i. Zia bep chule hilo in, la pa chu gâl bawldan thiam tak ahi ziakin, tu’jan ah hin a sepaite lak ah umlo ding ahi.

2 LENGTE 4:27

Tâng chung ah Pathian mi kiang a hung tun phatin, a keng a hung tu ta’n. Gehazi chun sawt mang gua’n a hun nai a. Himaleh, Pathian mi chun, “Limsak kin, lunggimna lian tak nei ahi; Lalpa‘n zia chu kei ah kipat a selgu’n, ei hil nai lo ahi,” a tia.

JOB LEKHABU 13:15

En un, ei that ngei ngei ding ahi, kinepna him ka nei puai; himaleh, ka panna chu a kiang ah tut him him ding ka hi.

SAM 116:10

“Nasa tak ah sukgenthei ah um ka hi,” ka ti lai inle ka ginna chu ka vop zing in;

SAM 138:3

Ka hun ko ni ma ma in, nang in lei dawnhu ta hen; ka thagau hatna lei hipun piak tai.

SAM 18:2

Lalpa chu ka suangpi, ka kulpi det leh ei hukdokpa ahi; ka Pathian, ka kisêlna suangpi, ka phaw leh ka hukdamna kî leh ka kulpi ahi.

SAM 18:6

Ka lungjin in Lalpa ka ko ah: ei panpi dingin ka Pathian ka ko hi. A tempul ah kipat in ei la ngaitha’n, ka kona aw a he tai.

SAM 25:17

Ka lungthim buainate hi ei dawn jang piak inla, ka lungjinna kipat hin ei puidok ta’n.

SAM 27:14

Lalpa chu ngâk zing in; kisuhat inla, la lungthim chu kihânsak ta hen; ahi, Lalpa chu ngâk zing in!

SAM 31:24

Lalpa ngâk zosiate haw, hât tak leh hangsan tak in um tau in.

SAM 42:11

Aw ka hinna, bang ding ah lungkia, ka sung ah hi bî theilo la hem? Pathian ah kinem ta’n la: ama ei panpipa leh ka Pathian chu, pakcha kit ding ka hi.

SAM 42:5

Aw ka hinna, bang a tia bok zing la hem? Bang ding ah ka sung ah um thim theilo la hem? Pathian ah kinem in; ei panpipa leh ka Pathian chu, pâkcha kit ding ka hi’ngal a.

SAM 42:7

La kawl tuichuak git chun tuili thûk a thawng in, la tui kinawk sâng vûmte chun ei chup mang tau hi.

SAM 56:11

Pathian ka ging hi, ka lau puai, Mihing mai mai in bang ei law thei ding a hem?

SAM 62:1

Ka hinna hin thipbek in Pathian bep a ngâk a; ama ah kipat in ka hukdamna, hung pawt ding ahi ngal a.

SAM 62:5

Ka hinna’n thip bek in Pathian bep a ngâk ah; ka kinepna chu ama ah kipat ahi ngal a.

SAM 71:4

Aw ka Pathian, mi nunsiate khut leh, mi phalo leh mi gûkkhelte dawha phalo, lak ah kipat chun ei hukdok in.

SAM 71:5

Aw Lalpa, ka naupan lai ah kipat ka hun muan leh, ka kinepna la hi’ngal a.

PAWTDAWNA THU 17:4

Tichun, Mosi chunle Lalpa a ko ta’n, “Zia mipite hi bang law ding ka hi tam? Suang ah ei seplum dingsa’n a um ziang tau hilam?” a tia.

THUPILTE 18:10

Lalpa min hi kulpi det ahi hen, midik in zia chu a bêl in humbit in a um sek hi.

ISAI 25:4

Migentheite’n kisêlna’n a hun mang un, a lungdon lai ua tasamte kisêlna la hi’n; thigawpi lak ah bitna leh, nisa lak ah dailîm la hi. Phalbi lai ah thigawpi gual ah mi huhamte’n a nawu a,

JEREMIAH 16:19

Aw Lalpa, ka hatna leh ka kulpi, buai lai ah ka kisêlna; kawl kîmvêl ah kipat namtin hung khawm in, la kiang in: Ka pu leh pateu in zuau thu leh, thil manlote tilo ngal, bangma a la lemlaw puau hi.

JONAH 2:2

“Ka lungdonna tawp khawk in Lalpa chu ka ko ah, ama’n ei hun dawnhu tai; Sheol gilpi sung ah kipat in ka hun ko a, nang in ka aw la he tai.

KISIMNA LEKHABU 14:10

Himaleh, mipi zosia chun, amau teni suang ah sêlup a gaw tau a. Ziaphatchun, Israelte zosia mu ah kikhopna biakbûk chung ah chun Lalpa lopina a hung kilang ta’n.

MATTHAI 21:9

A ma lam ah chiate leh a nung lam ah hungte chu a kiko ua: David Chapa kiang ah Hossana! Lalpa min ah hung chu a vangpha ahi! Chungnung pen ah Hossana! a tiu a.

MATTHAI 27:22

Pilat chun a kiang un, “Jesu, Messiah kiti hi bang ka law ta diam?” a tia. A leng un a kiko ua, “Ama chu kros ah khenden in,” a hun tiu a.

JOHAN 8:59

Ziaphatchun, suang ah se ding gua’n suang a luak tau a; himaleh, Jesu chu a kisêl ah, tempul ah kipat chun a pawtdok tai.

ROMTE 4:18

Tichun, nam tam takte pa a hung hi’theina ding ah chun, a kigen tasa gual ngei in, kinepna ding umlo kei inle kinepna a la neitheina, ginna a nei ziakin, “La suan chu zia gual ah chu tam tak hiding a hiu,” ti chu a hung dik ta ahi kha.

ROMTE 4:20

Ginna tasam in Pathian thutiam chu a ginglel diak pua’n, ginna hat tak in Pathian a chawihoi zaw ta’n;

ROMTE 8:31

Zia thute ah chun bang gen ding I hitau em? Pathian ei lam ah a pan chun kua’n ei do thei ding a hem?

2 KORINTH 1:6

Ka thokgim ua leh nangmau thamuanna ding leh hukdamna ding ahi’n; ka thamuan ua leh, kei uh thok gual ah la thok phat ua leh la het ua, la thamuanna ding uh ahi.

2 KORINTH 4:8

Langkhat langkhat in haksatna ka tuak ui; himaleh, ka lungkia diak puau ah; suklungjin in ka um un, ka lungkia diak puau hi;

2 KORINTH 7:5

Makedonia ka tun unle taksa ah chawldamna him him ka nei puau in, langkhat langkhat ah sukgenthei in ka um un; pawlam in kidonate a um ah, sunglam in launate a um hi.

HEBRAITE 13:6

Ziaziakchun, ei un hangsan tak in, “Lalpa chu ei panpipa ahi, mihing in bangma ei law ding lau pua’ng ka,” I tithei ui.

VAIHAWMTE 18:25

Chun, Dan mite chun, “Ka kiang un bangma gen kin; achutiloleh, ka lak ua tangval lungchom deu khat in, la hinna leh la In sung mite hinna hun lak piak khawlaw kha’n ah,” a ti piak tau hi.

VAIHAWMTE 20:22

Israelte chu a chia to un, sun nitum in Lalpa âng ah chun a kap tau ah; chuleh, “Ka chanauteu Benjaminte do ah kipan kit ding ka hiu em?” ti’n Lalpa a dong kit tau a. Tichun, Lalpa‘n, “Vado kit un,” ti’n a hun dawnhu a.

1 SAMUEL 1:10

Lungkham ma ma ahiziak in, Lalpa kiang in a pauchap ah, thasia tak mai in a kap tai.

1 SAMUEL 23:16

Saul chapa Jonathan chu Horesh ah David kiang in a hung a; zia tak ah chun Lalpa‘n a khut a suk-hat piak a.

1 SAMUEL 28:15

Ziaphatchun, Samuel in Saul kiang ah chun, “Bang ding ah ei subuai mai mai ding bep ah ei kodok la hi em?” a hun tia. Saul in, “Philistinte’n ei do un, Pathian in lah ei nusia ta’n; mang lam hileh, jawlneite mang inle ei dawnhu nuam ta pua’n, ka lung a kham ma ma phatin, nang in ka bawl ding ei hil lechin tia, hung ko ka hi,” ti’n a dawnhu a.