1 SAMUEL 2:10 - PATHIAN LEKHABU THIANGTHO (BSI)

¹⁰ Lalpa do-te chu suksiat hi’n tiu in; Chungnung Penpa chu vanah, van-gi’n hung ding ahi. Lalpa‘n kawlkil tiangah vaihawm intin, a lengpa kiang ah hatna pia’n tin, a sathaunu’te thilhitheina chu vang, chawisâng ding ahi, ti in.

1 SAMUEL 2:10 ပူးပေါင်းရင်းမြစ်များ

2 SAMUEL 22:14

Lalpa chun vanpi a gitsak in, Chungnung penpa chun a aw a sua tai.

2 SAMUEL 7:13

Ama chun ka In ding ei sak piak intin; tichun, a lenggam lalchutpha chu kumtuang dai dingin sukdet piak ing ka.

2 SAMUEL 7:8

Ziaziakchun, tu’hin, sepai honte Lalpa chun, ka suak David kiang in zia gual hin la gen ding ahi: Gancha chinna mun, belam hon la chinna mun ngei ah kipat hin, ka mipi Israelte chung ah Leng hiding in ka hun teldaw la hi’n,

JOB LEKHABU 40:9

Pathian gual ah khutbân nei ah, van-git gual in aw sua thei ding la hem?

SAM 132:17

Zia tak ah chun David chawisâng ing ka tin; ka sathaunu’ â dingin thaumei ka guat piak tai.

SAM 148:14

A mite a chawisâng ta’n, a mi ginum zosia’n pâk uh hen la, Israel mipite, ama doichuam mite ngei chun. Lalpa chu pâk tau in!

SAM 2:2

Lei ah lengte a pung khawm un, vaihawmte chule Lalpa leh a sathaunu’ lanna ding thu a gen khawm un;

SAM 2:6

“Keima ngei in ka tâng thiangtho Zion ah, ka lal chu ka chutsak ta ahi,” ti in.

SAM 2:9

Thîk tiang in amau chu khên kêk in la tin, bêlsêkte’n lei bêl a khet phel gual un, amau khên kêk ding la hi,” a tii.

SAM 20:6

Lalpa‘n a sathaunu’ panpi in, a khut chang lam ah hukdawna thahât chun, a van thiangtho ah kipat khin, hun dawnhu ding ahi ti tu’hin ka he tai.

SAM 20:7

Khenkhat in kângtalaite a suang un, khenkhat in sakolte a suang un, ei hawn vang I kisuanpiu chu, Lalpa I Pathian min uh ahi.

SAM 21:1

Aw Lalpa, la hâtna chun lengpa a kipak in, la panpi’na ziakin bang gual bep in a lim ta diam!

SAM 28:8

Lalpa chu a mite â dingin a hatnau ahi’n; a sathaunu’ â ding ah hukhinna kulpi ahi.

SAM 45:7

dik tatna la ngaina’n, nunsiatna chu la huai. Ziaziakchun, Pathian, la Pathian chun la gualte khêl lam in, nasa tak in limna sathau a hun nu’ ta ahi;

SAM 89:17

A hâtnau lopi tak la hi’ngal a; la doisakna ziakin ka dinmun uh, choisa’n in a um tai.

SAM 89:24

Ka ginumna leh ngilneina’n umpi zing intin; ka min ziakin a kî choisa’n in um in a.

SAM 89:25

A khut tuisuagiat chung in ngaksak ing ka tin, a khut changlam luipite chung ah nga’n ah.

SAM 96:13

Lalpa ma ah chun; ama a hung ngal a, lei chung vaihawm dingin a hung ngal a. Ama’n khawvel hi dik tak in vaihawm piak intin, mi zosia a thu tak in vaihawm piak ding ahi.

SAM 98:9

khawvel vaihawm ding ah hung Lalpa ma ngei ah chun. Ama’n khawvel hi dik tak in vaihawm piak intin, doichuam neilo in nam zosia vaihawm piak ding ahi.

PAWTDAWNA THU 15:6

Aw Lalpa, la khut changlam chu, thil hitheina’n a lopi hi! Aw Lalpa, la khut changlam chun, mêlmate a mai chimit tai.

THUGENTU 11:9

Aw khanglai, la khangdawng lai nikhua hin lim inla, la lên lai ni hin la lungthim chu hilim in. La lungthim doidan leh la mit mu nopdan ah chun chia in; ahi’n, zia haw zosia ah hin, Pathian in vaihawmna hun pui lût ding ahi ti hezing in.

THUGENTU 12:14

Pathian in I thilbawl zosiau, a gûk ah kibawl hi hen la, a pha hi’n a sia hileh, a vaihawmna mun ah hun lakhawm sik sek ding ahi ngal a.

ISAI 29:6

nangma chu vang sepai honte Lalpa‘n van-gi tawh, linlîng tawh, husa nasa tak tawh, chîmpei tawh, thigawpi tawh, meipi kuang tawh kithua in, hung kantha ta’n a.

ISAI 32:1

Ngai un, lengpa chun dikna’n vaihawm intin; lal chate’n le thudik in vaihawm ta’n au.

ISAI 45:24

Lalpa bep ah chun dikna leh hatna a um hi, ei hun ti ta’n tiu in; Keima do ding ah hil ah umte chu vang, ka kiang lam ah hung in, mualpho ta’n au.

EZEKIEL 29:21

Ziaphat chuleh, Israel Inkuante â dingin kî pakhat kêdawsak ing ka tin, a lak un thu hun gensak ding ka hi. Ziaphat chuleh, Kei hi Lalpa ka hi ti hun he ta’n au, a tia.

MATTHAI 25:34

Ziaphat chuleh, Lengpa chun, a changlam ah umte kiang ah chun, hung un, nang haw ka Pa maljawlna changte haw, khawvel siam lim ah kipat nang uh â ding ah siam gam chu lua tau in;

MATTHAI 28:18

Jesu a hung ah, a kiang un, “Lei chung leh van ah thuneina zosia ka kiang ah piak ahi tai;

LUKA 1:69

A suak David In sung ah kipat in ei uh â di’n, hukdampa hat tak a hun tungdok tai;

LUKA 19:27

Chuleh, ka mêlmate, a chung ua ka vaihawm ding zadate kha le, zia lam ah hin hun pui un la, ka ma-âng ngei ah hin that un,’ a tia,” ti’n a gen a.

NASEPTE 10:38

Pathian in Nazareth Jesu sathau a nu’ a, Thagau Thiangtho leh thil hitheina’n a thuam a; tichun, ama chun na pha tak sêm in, diabol in a engbawl zosia chu a hi’dam sik sek a.

NASEPTE 4:27

Zia khawpi sung ah hin, ahi, Herod tawh Pontia Pilat ngei le, Jentelte leh Israel mite chu tawh, la suak thiangtho Jesu, sathau la nu’sa chu dodâl dingin a kikhawm tau a,

2 KORINTH 5:10

Mi zosia’n taksa I thilhite, a sia a pha, I hi gual gual un I mu chiat theina ding un, Khrista vaihawmna chutpha man kilâk chiat ding I hiu.

VAIHAWMTE 5:31

AW Lalpa, zia gual chun, la gâlte zosia mangthai tau hen! Himaleh, la gual leh pâite chu vang, jingkal ni suak vak hoi tak gual chu hitau hen, ti in. Tichun, gam chu kum sawmli sung gâl muang tak in a um tai.

1 SAMUEL 12:13

Ngai un, la dot dungzui un, leng ding ah la têl uh chu zia hin a um hi; ngai un, la chung ua leng ah pang ding Lalpa‘n a hun pia ta ahi.

1 SAMUEL 12:17

Tu’ni hi gehu bu-ât hun hilo a hem? La chung ua vaihawm ding leng la kidot ziang uh hi Lalpa mit mu ah thil huaisia tak ahi ti la het ua, la mutheina ding un, Lalpa chu ko ing ka tin, van-gi leh gawpi hun zuksak ding ahi,” a tia.

1 SAMUEL 12:18

Tichun, Samuel in Lalpa a ko ta’n; chuleh, Lalpa‘n zia ni chun van-gi leh gawpi a hun zuksak ah; tichun, mipite chun Lalpa leh Samuel chu a lau ma ma tau hi.

1 SAMUEL 12:3

Zia hin ka um hi; ka chung ah lungkim lo zosia’n Lalpa leh a sathaunu’ ma-âng ah hin gen un. Kua bawngchal ka lâkpiak a um em? A leh, kua sabiltung ka lâkpiak a um em? ahiloleh, kua dawha bawl in a nei ka lâkpiak la um awm? Kua ka hun êngbawl la um awm? Mit kithumsak in kua kiang ah golgûkna ka la ngai em? Zia gual chu a um chun hun gen un, hun dit kit sik sek ing ka,” a tia.

1 SAMUEL 15:28

Samuel in a kiang ah chun, “Tu’ni ma ma hin Lalpa‘n Israel lenggam chu a botthêk ta’n, nang sâng ah phazaw, la Invêngte lak ah midang khat kiang in a pedok tai.

1 SAMUEL 16:1

Samuel kiang ah Lalpa chun, “Saul hi Israelte leng a hi’na kipat ka paithâk ziak ah bang chan lungngai ah um ding la hi em? La sathau bûk ah sathau sungdim in la kipan in; Beth-lehem khua Jesse kiang ah hun sawl ing ka tin, a chapate lak ah kei â ding ah leng ah pang ding ka mudok ta’ngâl in,” a hun ti tai.

1 SAMUEL 7:10

Samuel in hâlmang thillat a lat lai tak in Philistinte chu Israelte do dingin a hun nai ta ma mau ah; himaleh, Lalpa‘n nasa tak ah van a gitsak phatin Philistinte chu a subuai ta’n; tichun, Israelte âng ah chun a jam mang zo tau hi.