1 KHANGTHU 25:1 - PATHIAN LEKHABU THIANGTHO (BSI)

¹ David tawh a sepai hotu liante haw chun, Asaph, Heman leh Jeduthun chate lak ah kipat in theile, tingtang leh dakkhutbette mangcha thugen ding leh pâkna La sa dingte le a guat un. Zia mawpuakna neite min leh a mawpuaknau chu zia gual hi ahi:

1 KHANGTHU 25:1 ပူးပေါင်းရင်းမြစ်များ

1 LENGTE 10:12

Lengpa’n almug thingte chun Lalpa In leh lengpa Inkhuam lian dingte leh, Lasa mite â ding pekkhuangte leh tingtangte a siam ah; zia tawhbang almug thing chu tu’ni tiang in a hung lut ta pua’n, mu zaw le ahi ta puai.

2 LENGTE 3:15

Himaleh, tingtang tum thiam khat ei hun sawl piak in,” a tia. Zia phat ah chun, tingtang tum thiamte chun a hun tum phat un, Lalpa thilhitheina a chung in a hung um ta’n.

1 KHANGTHU 12:28

Sepai hangsan, tangval Zadok leh amau Inkuan lak ah, hotu ngen sawmni leh pani a hiu hi.

1 KHANGTHU 13:8

David tawh Israel mipi zosia chu La sa kawm in, lilute, tumgitte, vai khutbette, gawsemte tawh pengkulte mût in, a theitawp uh sua in Pathian âng ah chun a lâm tau ahi.

1 KHANGTHU 15:28

Tichun, Israelte zosia chun, belam kîte, pengkulte, dakkhutbette, theile leh thilgithei gui neite tumgi kawm ah ngai tak ah kiko in, Lalpa Thuthung thingkuang chu a hun paw to tau ahi.

1 KHANGTHU 23:2

Israel miliante, thiampute leh Levite zosia chu David in a ko khawm a.

1 KHANGTHU 25:2

Asaph chate lak ah chun: Zakkur, Joseph, Nathaniah leh Asarelah, Asaph chate cheng hi Asaph thunuai ah chun, lengpa thupiak dungzui in thu a gen sek diu ahi.

1 KHANGTHU 25:3

Jeduthun suan ah kipat chun Jeduthun chate ma ma: Gedaliah, Zeri, Jeshaiah, Shimei, Hashabiah leh Mattithiah, pagukte hin a pau Jeduthun thunuai ah um in, theile tawh thua ah Lalpa kiang ah kipak thu gen leh pâkna La sa kawm in thu a gen diu ahi.

1 KHANGTHU 25:9

Tichun, a âisân masak pen uh chu Asaph a dingin Joseph chung in a kia’n; a pani’na chu Gedaliah chung in a kia’n, ama tawh a suapite tawh a chateu chu sawm leh pani a hiu.

1 KHANGTHU 6:16

Levi chate chu: Gershom, Kohath tawh Merari a hiu.

1 KHANGTHU 6:33

Zia gual ah nasem ah kimangte min chu ziate hi a hiu ah; chuleh, a chateu chule ziate hi a hiu: Kohath phunggui chu: La sak thiam Heman, ama chu Joel chapa ahi’n, ama chu Samuel chapa ahi’n;

1 KHANGTHU 6:39

chuleh, a suapipa Asaph chu a changlam ah um zing ahi; zia Asaph chu Berekhiah chapa ahi’n, ama chu Shimea chapa ahi’n,

1 KHANGTHU 6:44

A veilam ah chun a chanauteu Merari chate a pang zing un: Ethan, apa chu Kish, ama pa chu Abdi, ama pa chu Mallukh,

1 KHANGTHU 9:33

Chun, a sun a jan ah mawpua a hiziak un, Levi Inkuante lakah La sakna lam ah hotute chu tempul pindan ah chun a chêngden un; mawpuakna dang vang bangma piak belap ahi puau hi.

2 KHANGTHU 23:1

A kum sagi’na chun Jehoiada thangtawm in sepai hotu lian pangate tawh kihotuak in, thuthung a siam tau a; zia sepai hotu liante chu: Jehoram chapa Azariah, Jehohaman chapa Ishmael, Obed chapa Azariah, Adaiah chapa Maaseiah leh Zikhri chapa Elishaphat a hiu.

2 KHANGTHU 23:13

a et leh, kotkhak bul, sûtpi bul ah sepai hotu liante leh pengkul mutte lak ah lengpa ding chu a mu ta’n; chuleh, a gam sung ah mipi zosia kipak tak ah pengkul mutte leh La sate’n lengpa lawm ah thil gihawi chitin tawh kithuate chu a mu tai. Athaliah in a puan a botthêk ah, “Kidawha bawlna! Kidawha bawlna!” ti’n a kiko a.

2 KHANGTHU 23:18

Jehoiada chun Mosi Dan lekhabu kizik dungzui in, lim takah La sa kawm ah David in Lalpa In ah Lalpa kiang ah hâlmang thilpiak lân ding ah a la guatsa, Levi thiampute mapuina sêm dingin, David in thu a la piak gual ah Lalpa In veng dingte chule a guat tai.

2 KHANGTHU 23:9

Thiampu Jehoiada chun Lengpa David gâlvan cheicha leh phawlian leh a neu, Pathian Insung ah kikoikhawm haw chu sepai hotu liante kiang in a hun pedok a;

2 KHANGTHU 29:13

Elizaphan Inkuan ah kipat in Shimri tawh Jeuel; Asaph Inkuan lak ah kipat in Zekhariah tawh Mattaniah a hiuah;

2 KHANGTHU 29:14

Heman Inkuan ah kipat in Jehuel tawh Shimei a hiuah; Jeduthun Inkuan ah kipat in Shemaiah tawh Uzziel a hiu.

2 KHANGTHU 31:2

Thiampute leh Levite chu a pawl pawl un, a sepnau dungzui chiat leh a sep dan dungzui chiat un Hezekiah chun a hawm jak ah; thiampute leh Levite chu hâlmang thil lân dingte, kichamna thil lân dingte, Lalpa huang kotbul ah choihoina La sa ding leh kipak thu gen dingte in a hawm gual a.

2 KHANGTHU 34:12

Mipite chun ginum tak in na a sêm chiat tau a. Ziate nasepna chu enkai dingin Levi phung ah mi ma ma, Merari chate lak ah Jahath leh Obadiah tawh, Kohath chate lakah Zekhariah leh Meshullam chu a guatdok tau a. Levi chite lak ah thil githei tum thiam ngen haw chu,

2 KHANGTHU 35:15

Asaph suan ah mi La sate chule David, Asaph, Heman leh lengpa thiamgau Jeduthun te thupiak gual in, amau panmun ding chiat in a pang tau a. Kotkhak vêngte chule kotkhak bul tin in a pang chiat un, amau thasâng ah a chipiteu Levite chun kithoina a la lat piak ziak un, kuama a sepnau sukbuai in a um puau hi.

2 KHANGTHU 5:12

thiampute dan ah La sa pawlte: Asaph, Heman, Jeduthun leh a chateu leh a Inkuanteu zosia, puan malngat ah kithuam ah, vai khutbette, theilete leh lilute chawi kawm ah, mâichâm sualam kâi ah thiampu pengkul mutte za khat leh sawmni chu tawh a ding khawm ui.)

2 KHANGTHU 8:14

Chuleh, a pa David in a la guat dungzui in, thiampute sep ding haw chu a pawl pawl in a guat piakah; Levite chule pâkna La sa ding pawl, nisi’n ah thiampute mawpuakna dungzui ah pang dingte leh, kul kotkhak chuam chuam veng dingte chule a pawl pawl in a guat ah; zia gual ah chu bawl dingin Pathian mi David chun thu a la pia ta him ahi.

EZRA 2:41

La sate chu: Asaph suante chu za leh sawmni leh giat a hiu.

EZRA 6:18

Tichun, Mosi lekhabu kizik dungzui in, Jerusalem ah Pathian hona nasêm dingin thiampute chu chan a kihawm ua, Levite le a panmun chiat un gual tuak a hitau hi.

NEHEMIAH 11:17

Asaph chapa Zabdi chapa Mika chapa Mattaniah chu, kipak thugenna hun pantu lak ah hotu ahi’n; ama kithuapite lak ah hotu Bakbukiah tawh Jeduthun chapa Galal chapa Shammua chapa Abda le a hiu a.

NEHEMIAH 12:24

Chun, Levite lak ah hotute chu: Hashabiah, Sherebiah leh Kadmiel chapa Jeshua lawi a pawl pawl in a kisiam un. Pathian mi Lengpa David in thu a la piak tawh kituak in, pawl nite chun hun khat ah Pathian pakcha leh kipak thu gen in a kidawngtuau a.

NEHEMIAH 12:27

Jerusalem kulbâng latna ding ah chun, Levi mite chu limna, kipakna, La sakna, vaikhutbet, tumgitte leh tingtangte tawh kithua ah a lopna a hung pan theina ding un, a umnau chiat ah kipat Jerusalem ah hungkhawm dingin a hawl khawm tau a.

SAM 81:2

Pâkna La sau inla, khuangneute, pekkhuang ngainop umte leh, tingtangte’n ama chawihoi un.

SAM 81:3

Thathak leh I kût hunbiu thalik lai tak inle, pengkul mût un.

EZEKIEL 40:44

Kotpi sungnung zawk pawlam ah a huang sungnung zawk ah chun, La sate â dingin pindan pani a um ah; mallam kotpi pang ah zia pindan um chun simlam a nga’n; sualam kotpi pang ah pindan um zaw chun mallam a ngat hi.

1 SAMUEL 10:5

Ziazaw chuleh, Philistinte kikulna Gibeath-elohim hung tung in la tin; zia khawpi chu la lut phat leh jawlnei hon khat, pekkhuangte, khuangneute, lilute leh tingtangte tum ah, thoimual ah kipat hung suk tawh kituak in la tin; amau chu thagau a la chang intin uh.