Ioane 20:17 - Miriam Mer Gospels 1902

¹⁷ Iesu abi detaut, kega, Nole kari atutir kak; abelelam kaka nole karba Babim ogi: bakeamulu uiabim kara keimer giz, a uiabi daratagerare, kega, Kaka Abem pako uaba Aba ogi, kara Ade a uaba Ade.

Ioane 20:17 ပူးပေါင်းရင်းမြစ်များ

Mataio 12:50

Abelelam abele le ikeli kara Baba ra lag penoka kotor ge, E dali kara keimer, pako kara berbet, a kara apu.

Mataio 25:40

Ege Opole uiabi etkalu, kega, Ageakar kaka uabi detager, Abelelam uaba ikerare nerute le kebi kale kara keimer ike, kakanali uaba ikerare.

Mataio 28:7

Ua bakeamlam dudum etomeret abara kaimeg giz, E akaid eudelam; dasmer, E kekiam bakeamulu Galilaiaem, uaba keubu; uaba ko abi erdali abele uteb: dasmer, kaka etomeret uabim.

MAREKO 12:26

Abele eud le giz, ko eded akaida; nako uaba nole Mose ra jauali atager kak, Ade abi detager lulam, kega, Kaka Abarahama ra Ade a Isaaka ra Ade, a Iakobo ra Ade?

MAREKO 16:19

Iesu Opole emetu uiabim daratagereda, iako abim bakuarda kotorem, a Ade ra tuter tag emeri.

Luka 10:4

Uaba bakeauare, nolea ais mani epei, a pako epei, a teter gab: uaba nolea damareda omare le uabi obapit gab ge.

Ioane 13:1

Paseka nole aker kak, Iesu umele abara kerker tabarki ko bakeamulu geseplam tabara Abem, E emetu tabara boai omare gesepem, E uiabi omare, a mop ge tabarki.

Ioane 13:3

Iesu umele Aba de nakuar abi tagem gaire lu uridili, pako E Adelam, a E Adim iako bakeam,

Ioane 14:2

Dordor uteb kara Aba ra meta ge; ese nolea; kaka emetu uabi detagereda; abelelam kai nabakeamulu uteb derser uabim.

Ioane 14:28

Uaba emetu asoli kaka uabi detager, kega, Kai nabakeamulu, kaka iako tabakeam uabim. Ese uaba kari lag, uaba ko sererge kara mer, kega, Kaka Abem nabakeamulu: abelelam kara Aba aule kari tumge.

Ioane 14:6

Iesu abi detaut, kega, Kaka gab, a ageakar, a eded; nole le Abem bakeam, ese nole gab kari dog.

Ioane 16:28

Kaka nabue Babalam, a gesepem tabarki: kaka iako geseb dekaelu, a Abem bakeam.

Ioane 17:11

Peirdi, kaka nole geseb ge emri, epe uiaba geseb ge emri, a kai marim nabakeamulu. Zogozogo Aba, uiabi asesered mara nei ge, abele uiaba ma kari nakuar, ueakai uiaba netat, meribi kaiser.

Ioane 17:25

Geseb ge nole mari opasereret kak, Aba barkak: epe kaka mari opasereret, a uiaba umele mama kari namarida.

Ioane 17:5

Baba, peirdi, kari naospili mara kemem zorom ge meribielam emeret ge, nole geseb kak.

Ioane 20:27

E Toma detager, kega, Mabara baur kei tekau, a dasmer kara neisi tag; a mabara tag tekau, a kara ber ge aziriklu: ma nole uatur kak, debele oituli.

Ioane 7:33

Iesu uiabim detaut, kega, Teupai kaka uabi dog emri, kerker maike kaka abim bakeamulu, kari namarida.