Zekaraya 9:16 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹⁶ Vwẹ ẹdẹ yena Ọrovwohwo Ọghẹnẹ rayen na che sivwi ayen kidie ayen igegede rẹ ihwo rọye, kerẹ irhu rẹ erhu rẹ ovie ayen che no vwẹ otọ rọye.

Zekaraya 9:16 ပူးပေါင်းရင်းမြစ်များ

Une rẹ Ejiro 100:3

Riẹn nẹ Ọrovwohwo ọye Ọghẹnẹ! Ọye re ma avwanre, avwanre erọye; avwanre ihwo rọye, kugbe igegede rẹ egbri rọye.

Ẹyano 28:21

Eragha ihwivẹ re cha dia dohwo dodẹ rọye, kerẹ unu rẹ emọ rẹ Izrẹl; ke cha dia kerẹ oka, ọvuọvo vẹ odẹ rọye, kirobo rẹ inurhoro ihwivẹ na epha.

Ẹyano 28:9

Wọ me reyọ oragha ivẹ wo mi si edẹ rẹ emọ rẹ Izrẹl phihọ ayen,

Aizaya 40:10

Nighere, Ọrovwohwo Ọghẹnẹ ra cha vẹ ẹgba, igbabọ rọye ri suẹn kẹ, nighere, osa rọye rhere, osa ẹhwa na e hẹ obaro rọye.

Aizaya 54:12

Ke Me vwẹ oragha re she nẹ Agate vwọ ma osunsun phihọ ọkpọ wẹn, anurhoro wẹn kẹ ichivwo rẹ ẹrovwo, ibiekpẹn eghaghare e vwo fi igbẹhẹ wẹn,

Aizaya 60:14

Emọ re ihwo ri shenyẹ wẹ ke cha rhe ri shiguẹ te otọ kẹ wẹ, kugbe ihwo ejobi re je wẹ fia ki che shiguẹ vwẹ asan awọ wẹn, ke ayen che se we Orere rẹ Ọrovwohwo, Zayọn rẹ Ọfuanfon Ọvuọvo rẹ Izrẹl na.

Aizaya 60:3

Irere buebu ki che bru urhukpẹ wẹn na rhe, ivie ki bru elo wẹn ro vacha na rhe.

Aizaya 62:3

Wọ cha dia erhu rẹ ovie vwẹ obọ rẹ Ọrovwohwo, irhu rẹ ovie vwẹ obọ rẹ Ọghẹnẹ wẹn.

Jerimaya 23:3

Ke me ghwẹ igegede mẹ ri chekọ nẹ asan me djẹ ayen ra ejobi rhe, me ghwẹ ayen rhivwi rhe ukoko rayen, ayen ki vwiẹ ji bu phihọ.

Jerimaya 31:10

Nyo ota rẹ Ọrovwohwo, E ẹgborho na, rere wo ghwoghwo vwẹ erhuru rẹ obo ogboko na, ta nẹ, Ọ rọ hra Izrẹl na ji che koko, ọ je cha sẹro rọye kirobo rẹ osuigegede sẹro rẹ igegede rọye.

Jerimaya 31:11

Kidie Ọrovwohwo tan Jekọp nure, ọ je tan nẹ abọ rẹ ọ rọ gan nọ.

Izikiẹl 34:11

Kidie e nẹ Ọrovwohwo Ọghẹnẹ tare: Nighe, Mẹvwẹ, ekpuyovwi mẹ ọvo kọye re guọnọ ayen phia.

Izikiẹl 34:12

Kirobo rẹ osuigegede guọnọ igegede evo re hrabọ phia na, ọtiọye me cha guọnọ igegede mẹ phia, ki mi sivwi ayen nẹ asan ejobi rẹ ayen hrabọ ra rhe vwẹ ẹdẹ rẹ enu de bi hwi kugbe ẹdẹ rẹ egho de mu kpoi.

Izikiẹl 34:31

Ovwan kẹ igegede mẹ, igodẹ rẹ egbri mẹ, mẹvwẹ kẹ Ọghẹnẹ wẹn, eriyin Ọrovwohwo Ọghẹnẹ tare.

Maika 5:4

Ko vrẹn mudia ghẹrẹ igegede rọye vwẹ ogangan rẹ Ọrovwohwo na, vwẹ ọrhọ rẹ odẹ rẹ Ọrovwohwo Ọghẹnẹ rọye. kọ cha dia vwẹ egbemọphẹ, vwẹ ọke yena kọ cha rho re duvwu ẹtan rẹ akpọ na.

Maika 7:14

Vwẹ ọkpọ wẹn sun ihwo wẹn, igegede re wọ vwọ reuku, rẹ ayen ọvo dia evun rẹ egbo ọvo sogolo vwẹ ohri rẹ okogbe; jẹn ayen ghẹrẹ oma vwo Bashan vi Gilẹad kerẹ ọke rẹ awanre.

Zẹfanaya 3:20

Vwẹ ọke yena ki mi se we kpo uwevwi, vwẹ ọke yena ri mi de che se ovwan koko; e, ki mi ru we vwo kperi usi re de jiri uwe vwẹ ohri rẹ ihwo rẹ akpọ na, re me da vwẹ ughwẹ rẹ ovwan rhivwi rhe vwẹ irharo rẹ ovwan na, eriyin Ọrovwohwo na tare.

Hegae 2:23

Vwẹ ẹdẹ yena, eriyin Ọrovwohwo rẹ otuofovwi na tare, ke me reyọ owẹ, E Zerubabẹl odibo mẹ, ọmọ ri Shealtiẹl eriyin Ọrovwohwo tare, ki nu ru we kerẹ ubiosa, kidie Me jẹ wẹ reyọ nure, eriyin Ọrovwohwo rẹ otuofovwi na tare.

Zekaraya 10:6

Me cha kẹ uwevwi ri Juda ogangan, mi ji che sivwi uwevwi ri Josẹf. Me cha ghwẹ ayen hirhe rhe fikiridie mi ni aruẹdọn rayen, ayen ke cha dia kerẹsiẹ rẹ a mrẹ nẹ Me je sen ayen dẹvo-o; kidie mẹvwẹ hẹ Ọrovwohwo Ọghẹnẹ rayen mi che nyo kẹ ayen.

Zekaraya 8:23

E nẹ Ọrovwohwo rẹ otuofovwi tare: Vwẹ ẹdẹ yena eshare ihwe che nẹ ẹgborho rẹ ephẹrẹ Kephere rhe cha yọnre ewun rẹ ohwo ri Ju, ta ne, Jẹn avwanre nene uwe, kidie Me nyori nẹ Ọghẹnẹ vẹ ovwan herọ.

Iyẹnrẹ Esiri ri Luk 12:32

Wa djẹ oshọ-ọ, imigegede mẹ, kidie evun esiri rẹ Ọsẹ na rọ vwọ vwẹ uvie na kẹ ovwan.

Iyẹnrẹ Esiri ri Jọn 10:27

Igodẹ mẹ nyo urhuru mẹ, me riẹn ayen, ayen nene uvwe;