Zẹfanaya 3:4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

⁴ Emraro rọye ihwo ogbarogba, i vwo esegbuyota-a, irherẹn rọye gbe obo re fonro ẹgua, ayen zighẹ urhi na.

Zẹfanaya 3:4 ပူးပေါင်းရင်းမြစ်များ

Aizaya 9:15

ọkpako kugbe ohwo ro vwo oghọ ọye uyovwi, ọmraro ro yono efian ọye urhurhuvwun,

Jerimaya 23:32

Nighe, Mi mu kpahe otu re mraro rẹ evwerhẹ rẹ efian, eriyin Ọrovwohwo tare, kugbe otu re ta kẹ ayen me vwẹ efian evwọrọ vẹ ozighi rayen vwo sun ihwo mẹ ghwru yi mi ji aye-en me je kẹ ayen oganga-an; ayen dia erere kẹ ihwo nana-a, eriyin Ọrovwohwo tare.

Jerimaya 34:19

Isun ri Juda, isun ri Jerusalẹm, eghwanra na, irherẹn na, vẹ ihwo rẹ otọ na ejobi re wan uherevie rẹ ọmọ rẹ erhuẹn ra vare na vrẹn,

Jerimaya 5:31

emraro na mraro rẹ efian irherẹn na ki nene idjedje rayen ihwo mẹ ghwa reyọ wan ọtiọye, komavọ ovwan ru vwẹ ọke rẹ oba de te?

Jerimaya 8:10

Vwẹ ọtiọye na ke me vwẹ eya rayen kẹ ihwo efa, ke me vwẹ udju rayẹn kẹ otu ri phi ayen kua, fikiridie nẹ omotete rayen re te omirẹgua vwo urhuru rẹ igho rẹ eku; nẹ orherẹn re te ọmraro ejobi vwọrọn ofian.

Uvwerhe 2:14

Emraro wẹn mraro rẹ efian vẹ ọphiẹnvwẹ kẹ wẹ, ayen se tue orukuruku wẹn phia-a rọ vwẹ ughwe wẹn rhivwi rhe, ẹkẹvuọvo kẹ ayen bọ epha rẹ efian ro suẹn ohwo ghwrẹ.

Izikiẹl 22:26

Irherẹn rọye vwẹ urhi mẹ gbe ozighi ayen de gbe ekuakua efuanfon mẹ ẹgua, ayen rhe vwo ofẹnẹ kẹ obo re fonro kugbe obo re vwo gbe otọ-ọ, eyẹ ayen ji yono ofene rọ herọ kẹ obo ri jẹfuọn vẹ obo re fọnro-o, ayen se ẹdidjala mẹ gbe emu-u, ọtiọye na ke ayen gbe vwe ẹgua vwẹ ohri rẹ ayen.

Izikiẹl 22:6

Nighe, isun rẹ Izrẹl re hẹ evun wẹ, ohwo ọvuọvo vẹ obo rẹ ogangan rọye teri ghwe mu kpahe ọbara esuo.

Izikiẹl 44:23

Ayen ki yono ofẹnẹ rọ herọ kẹ obo re tete oma kẹ vẹ obo re vwo gbotọ, ke dje kẹ ayen ofẹnẹ rọ herọ ke obo re fonro kugbe obo ri gberi.

Hosia 9:7

Ẹdẹ rẹ ojẹriọ na rhire, ẹdẹ rẹ osa ẹ hwa tere Izrẹl cha riẹn. Ọmraro na vwonẹ ẹkpa, ohwo rẹ erhi rheri yọ mwa orhuẹ, fiki rẹ orukuruku rode wẹn kugbe omaetuo rode.

Maika 2:11

Ohwo de vrẹn kpo otafe ra ta eta ifefe vẹ efian, tanẹ, me ta ota rẹ udi vẹ udi ọgangan kẹ ovwan, kọye re cha ta ota kẹ ihwo nana.

Maika 3:11

Igbuyovwi rọye da udi tavwe ri ki brorhiẹ, irherẹn rọye yono fiki rẹ osa, emraro na hẹrhẹ igho re ke mraro, ye ayen vwẹ oma kpahe Ọrovwohwo ayen me ta, Ọrovwohwo na he uherevie rẹ avwanre-e? Emu umwemwu ọvuọvo che te avwanre oma-a.

Malakae 1:6

Ọmọ mu ọghọ kẹ ọse rọye, odibo mi rhe mu ọghọ kẹ onini rọye. Me da dia ọsẹ, kẹ ọghọ mẹ rhọ? Me da rha dia onini, kẹ oshọẹdjẹ mẹ rhọ? eriyin Ọrovwohwo rẹ ọgba rẹ ofovwi na ta kẹ wẹ, E irherẹn, re jẹ odẹ mẹ fia na? Wọ rọ ta nẹ, idjerhe vọ ma vwọ jẹ odẹ wẹn fia?

Malakae 2:7

Kidie ẹbẹrunu rẹ orherẹn ọye re sẹro rẹ erianriẹn, ihwo ke guọnọ uyono nẹ unu rọye cha, kidie ọyinkọ rẹ Ọrovwohwo rẹ otuofovwi na o ruẹ.

Malakae 2:8

Ẹkẹvuọvo wo kurhẹriẹ nẹ idjerhe na; wọ da nẹrhẹ ihwo buebu she fiki rẹ uyono wẹn; we gbe ọphọ ri Livae ku, eriyin Ọrovwohwo rẹ otuofovwi tare,

Matiu 7:15

Kenoma kẹ emraro rẹ efian ri ku ewun rẹ ogegede phihọ, yẹ obo evun rayen pha brabra gbegbo kerẹ okpohrokpo.

2 Kọrẹnt 11:13

Kidie ihwo etieye na hẹ iyinkọn rẹ efian, iruiruo rẹ ophiẹvwe, re vwẹ oma nẹ nẹ ayen iyinkọn ri Kristi.

1 Jọn 4:1

Imoni re ghare, ovwan se erhi kerhi gbuyota-a, ẹkẹvuọvo wa davwe ayen ni tavwe sẹ ghine erhi rẹ Ọghẹnẹ ayen ruẹ; kidie emraro rẹ ofian buebu ro evun rẹ akpọ na re.

Ẹvwọphia 19:20

E de mu eranvwe na, kugbe emraro rẹ efian na ri ruẹ emu rẹ igbunu kẹ mrẹ na re vwọ phiẹn ihwo ra ka oka rẹ eranvwe na phihọ na kugbe ihwo re gọ oma rọye. E de mu ayen ivẹ na ọkpokpọ teye ẹtẹrhe rẹ erhanre rọ torhẹ vẹ ibiosio rẹ erhanre.

Iguẹdjọ 9:4

Ayen da reyọ ibi rẹ idọnọ efuanfon ujorha gbe ihwe nẹ evun rẹ uwevwi ri Baalberit vwọ kẹ Abimẹlẹk, ọ da vwẹ igho na vwo durhie ihwo re epha Zighizighi ri gbosoghoro, ayen da yan nene.

1 Samuẹl 2:22

Asakiephana Eli ghworo gangan, o de nyo obo rẹ emọ rọye ruẹ vwẹ Izrẹl ejobi, obo rẹ ayen vẹ eya ri gbe odibo vwẹ anurhoro rẹ utughẹ ra da vwa oma na shẹvwerhẹ.