Joẹl 2:12 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹² Dede vwẹ Asakiephana, eriyin Ọrovwohwo tare, vwẹ udu wẹn ejobi rhivwi bru vwẹ rhe,. vẹ owẹvwe echiro, vẹ oviẹ, kugbe omaemuohọ,

Joẹl 2:12 ပူးပေါင်းရင်းမြစ်များ

2 Samuẹl 24:10

Ẹwẹn ri Devid de rhi kpokpo ro vwo kere ihwo na nu. Devid da rhe ta kẹ Ọrovwohwo, Mi ru imwemwu rhuarho vwẹ obo mi ruru na. Asakiephana Ẹ Ọrovwohwo, Me rẹ wẹ, si orukuruku rẹ odibo wẹn nu; fikiridie mi ru emu rẹ ẹkpa.

2 Ikun rẹ Ivie 30:6

Etiyin aghwoghwo da ro Izrẹl kugbe Judea ejobi vẹ ẹbe rẹ ovie vẹ isun na siri, kirobo rẹ ovie na ji iji, tanẹ, E ihwo rẹ Izrẹl, wẹ rhivwi bru Ọrovwohwo, Ọghẹnẹ rẹ Ebraham, Aizik, kugbe Izrẹl, rere o rhivwi bru umuku rẹ ovwan re djẹ va ovie rẹ Asiria obọ.

2 Ikun rẹ Ivie 6:27

Gbe nyo vwẹ odjuvwu, ru wọ vwẹ umwemwu ghovwo idibo wẹn ihwo wẹn Izrẹl, vwẹ ọke wo de yono ayen idjerhe esiri rẹ ayen yan nene; re wọ rhọ osio phihọ otọ wẹn, re wọ vwọ kẹ ihwo wẹn ne vwọ reuku.

Ẹsta 4:16

Yanran, re koko ihwo ri Ju ejobi ra mrẹ vwi Susa, re we chiri owẹvwe kẹ vwẹ, wa ria-a, wa je da-a vwẹ ẹdẹ erha te ason te uvo. Mẹvwẹ vẹ emetẹ mẹ ji chiri owẹvwe kirobo ri wo ruru na. Ọke yena ki mi bru ovie na, jẹ ọna vẹ urhi she phihọ-ọ, ọ da dianẹ me ghwọrọ, me ghwọrọ.

Ẹyano 33:5

Kidie Ọrovwohwo ta kẹ Mosis nẹ, Ta kẹ ihwo rẹ Izrẹl na, Ovwan ihwo vẹ udu ọgangan; Me da ro usun rẹ ovwan vwẹ ọmọke, Mi hwe ovwan. Fikirẹ ọtiọye na wa gba ghwẹ ekuakua rẹ osẹvwe rẹ ovwan nu, rere me vwo riẹn obo re me vẹ ovwan ru.

Aizaya 22:12

Vwẹ ẹdẹ yena Ọrovwohwo Ọghẹnẹ rẹ otuofovwi ko che se ihwo rhe viẹ rhi muomahọ, rhe wanre uyovwi korie rhe, vwẹ esiso rhuo,

Aizaya 58:4

Nigherẹ, wo chire owẹvwe re wọ vwọ mrasan ghwọ họnre re wọ vwẹ ọchẹn phi ihwo. Owẹvwe echiro kerẹ owẹ na nonẹ na cha sa nẹrhẹ enyo urhuru wẹn vwẹ obenu-u.

Jerimaya 3:22

We rhivwi rhe emọ rẹ igberadja na, Mi sivwi ọfarhiẹ rẹ ovwan na. Nighe, avwanre bru we rhe; kidie wẹ Ọrovwohwo Ọghẹnẹ rẹ avwanre.

Jerimaya 36:7

Siẹvo ye orẹ rayen che kpo obaro rẹ Ọrovwohwo, nẹ dohwo didjerhe umwemwu rọye cha rhẹriẹ nu, kidie ophu vẹ ivuemiovwo rẹ Ọrovwohwo ro roro kpahe ihwo nana rhoro gangan.

Jerimaya 4:1

Ọ da dianẹ wo kurhẹriẹ, E Izrẹl, eriyin Ọrovwohwo tare, mẹvwẹ wo kurhẹriẹ bru rhe. Ọ da dianẹ wo si ẹgua wẹn nẹ obaro mẹ ru wọ gbe phariẹ-ẹ.

Jerimaya 4:2

Wo de duvwu iyori, kirobo rẹ Ọrovwohwo herọ na, vwẹ evun rẹ uyota, vẹ ọsoso kugbe ọvwata, irere na ejobi ki vwo ebruba vwẹ oma rọyen, vwẹ oma rọye kọye ayen de vwo urinrin.

Izikiẹl 33:11

Ta kẹ ayen, kirobo re me herọ na, eriyin Ọrovwohwo Ọghẹnẹ tare, mi vwo omavwerhovwẹ vwẹ ughwu rẹ ohwumwemwu-u, ẹkẹvuọvo rẹ ohwu-mwemwu rhẹriẹ oma nẹ idjerhe rọye re ọ rhọ, rhẹriẹ oma, rhẹriẹ oma nẹ idjerhe ọbrabra wẹn, kidie wo di vwo ghwu, E uwevwi rẹ Izrẹl?

Daniẹl 9:3

Etiyin mi de hirhe opharo mẹ ku Ọrovwohwo Ọghẹnẹ, vwọ guonọ vwẹ ẹrhovwo vẹ orẹ vẹ owẹvwe echiro vẹ amwa rẹ uvweri vẹ iwurhie.

Hosia 12:6

Ọtiọye owẹ, vwẹ ọchuko rẹ Ọghẹnẹ wẹ, rhivwi rhe, yọnrọn ẹguọnọ vẹ ọsoso gan, re wọ hẹrhẹ Ọghẹnẹ wẹn kọke kọke.

Hosia 12:7

Ọneki ro vwo ovwanvwọn rẹ ọghware, Oshenyẹ ọye ọ guọnọ.

Hosia 14:1

Rhivwi, E Izrẹl, bru Ọrovwohwo Ọghẹnẹ wẹn kidie wọ kprowọ fiki rẹ orukuruku wẹn.

Hosia 6:1

Amọ, re rhivwi bru Ọrovwohwo kidie ọ bẹrẹ avwanre nure ko sivwi avwanre; O bru ora phihọ avwanre rere ọ rha gban.

Joẹl 1:13

Vwẹ esiso rhuo re wọ viẹ, E irherẹn na berọma, E otu ri gbe odibo vwẹ enu rẹ agbada na Ro uwevwi, vwẹ esiso rhuo shevwerhẹ. E otu ri gbe odibo kẹ Ọghẹnẹ mẹ! Fikiridie izobo rẹ ọka vẹ izobo rẹ udi e si ayen nẹ uwevwi rẹ Ọghẹnẹ wẹn re.

Zekaraya 7:3

rẹ ayen je nọ irherẹn rẹ uwevwi rẹ Ọrovwohwo rẹ otuofovwi vẹ emraro na, Mi ji muomahọ ji chiri owẹnvwe vwẹ emeranvwe riyori, kirobo mi ruru vwẹ ikpe buebu ye?

Zekaraya 7:5

Ta ke ihwo rẹ otọ na ejobi kugbe irherẹn na, Ọke re ovwan vwo chiri owẹnvwe ji muomahọ vwe emeranvwe riyori veẹ ọrighwrẹ, vwẹ ikpe ujorha gbe ihwe nana, mẹvwẹ ovwan chiro kẹ?

Malakae 1:9

Asakiephana gba guọnọ aroesiri rẹ Ọghẹnẹ, rere o ni arodọvwẹ rẹ avwanre. Wa da vwẹ emu ọtiọye na yọnrọn obọ rhe ko ni arodọvwẹ rẹ ovwan we roro? eriyin Ọrovwohwo rẹ otuofovwi na tare.

Iruo rẹ Iyinkọn na 26:20

ẹkẹvuọvo ki mi ke ghwoghwo vwi Damaskọs, o ki rhi te Jerusalẹm ra wan orho ri Judia ejobi, kugbe otu ri Keferi rhe, rere ayen kurhẹriẹ bru Ọghẹnẹ rhe re ayen ru uruemu ro fori kẹ ekuorhẹriẹ rayen.

Iguẹdjọ 2:4

Ọke rẹ amakashe rẹ Ọrovwohwo na vwo ta eta nana kẹ ihwo rẹ Izrẹl ejobi nu, ihwo na ejobi da kpare urhuru rayen kpenu, ayen da viẹ.

Iguẹdjọ 20:26

Etiyin otu rẹ ofovwi, rẹ ihwo rẹ Izrẹl ejobi na, da yanran ra viẹ vwẹ obi Bẹtẹl; ayen de tidia chiri owẹvwe vwẹ obaro rẹ Ọrovwohwo re te ọke rẹ ovwọnvwọn vwẹ ẹdẹ yena, ayen de ze izobo ra torhẹre kugbe izobo rẹ ufuoma vwẹ obaro rẹ Ọrovwohwo.

1 Samuẹl 7:3

Etiyin Samuẹl da ta kẹ uwevwi rẹ Izrẹl ejobi, Wa da vwẹ udu rẹ ovwan ejobi kurhẹriẹ bru vwe rhe, we gbe ku edjọ erhorha na kufia kugbe Ashera na nẹ ohri rẹ ovwan, re we hirhe udu rẹ ovwan ku Ọrovwohwo, re wa ga ọye ọvo, ko sivwi ovwan nẹ obọ rẹ ihwo ri Filistia.

1 Samuẹl 7:6

Etiyin ayen da ra ghwẹ koko vwi Mizpah, ayen de vo ame kpare ku hẹ obaro rẹ Ọrovwohwo, ayen de chiri owẹvwe vwẹ ẹdẹ yena, ayen da ta vwẹ etiyin, Avwanre ru umwemwu kpahe Ọrovwohwo. Samuẹl da vwẹ ihwo rẹ Izrẹl gu ẹdjọ vwi Mizpah.