Jerimaya 24:7 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

⁷ Me kẹ ayen udu rẹ ayen vwọ riẹn nẹ mẹvwẹ Ọrovwohwo na; ayen cha dia ihwo mẹ ke me dia Ọghẹnẹ rayen, kidie ayen cha vwẹ udu rayen ejobi rhivwi bru uvwe rhe.

Jerimaya 24:7 ပူးပေါင်းရင်းမြစ်များ

2 Ikun rẹ Ivie 6:38

Ọ da dianẹ ayen kurhẹriẹ vwẹ iroro rayen ejobi vẹ udu rayen ejobi vwẹ evun rẹ otọ rẹ ayen da hẹ ighuvwu na, re mu ayen ra ighuvwu na, rẹ ayen de hirhe opharo ku otọ rayen na da nẹ ẹrhovwo, otọ ru wọ kẹ esẹ rayen na, orere ru wọ jẹreyọ na, kugbe uwevwi re me bọn kẹ odẹ wẹn na,

Une rẹ Ejiro 119:2

Ebruphihọ kẹ ayen otu re yọnrọn iseri rọye, re vwẹ udu rayen ejobi guọnọ,

Aizaya 51:16

Mi de phi ota mẹ phihọ unu wẹn, mi de si we nu vwẹ uhoho rẹ obọ mẹ, Me da riẹn idjuvwu na phihọ ma da ton uchivwo rẹ akpọ na phihọ, ta ke Zayọn nẹ, Ovwan ihwo Mẹ.

Jerimaya 11:4

ri mi ji iji kẹ esẹ rẹ ovwan re me vwọ reyọ ayen nẹ otọ rẹ Ijipt cha, nẹ erhanre rẹ utehru, ta nẹ, Kerhọn rẹ urhuru mẹ, re we ru obọ me ta kẹ ovwan, kẹ ovwan dia ihwo mẹ, ke me je dia Ọghẹnẹ rẹ ovwan,

Jerimaya 29:10

Kidie enẹ Ọrovwohwo tare: Ọke rẹ ikpe ujorha gbẹ ihwe da gba vwẹ Babilọn nu, ki mi bru ovwan cha, ri ru ive me gba kẹ ovwan vwọ reyọ ovwan rhivwi rhe asan etinẹ na.

Jerimaya 3:10

Yi Juda rẹ oniọvo rẹ ofian rọye na se rhivwi bru vwe rhe vẹ udu rọye ejobi-i, omeru ọ epha, eriyin Ọrovwohwo tare.

Jerimaya 30:22

Ku wa dia ihwo mẹ, ke me dia Ọghẹnẹ rẹ ovwan.

Jerimaya 7:23

Ẹkẹvuọvo urhi nana me vwọ kẹ ayen, Nyo urhuru mẹ, ke me dia Ọghẹnẹ kẹ ovwan, ovwan ke dia ihwo mẹ, rere wa yan vwẹ idjerhe ejobi ri mi dje kẹ ovwan rere o vwo yovwi kẹ ovwan.

Izikiẹl 11:17

Fiki rẹ ọtiọye na gba ta kẹ ayen, Enẹ Ọrovwohwo tare: mi che si we koko nẹ oma rẹ ihwo na rhe, me me ghwẹ wẹ koko nẹ evun rẹ ẹkuotọ ra hra wẹ ra jovwo na, ke me vwẹ otọ rẹ Izrẹl na kẹ wẹ.

Izikiẹl 14:11

rere uwevwi rẹ Izrẹl vwo jẹ yan ghwro nẹ oma mẹ, eyẹ ayen vwo je oma rayen ẹgua egbe ọfa fiki rẹ ogbeku rayen, ẹkẹvuọvo rere ayen vwọ sa dia ihwo mẹ rere me je vwọ dia Ọghẹnẹ rayen, eriyin Ọrovwohwo Ọghẹnẹ tare.

Izikiẹl 16:62

Ke me vẹ owẹ re ọphọ ọfa, ku wọ riẹn nẹ mẹvwẹ Ọrovwohwo na.

Izikiẹl 37:23

Ayen gbe vwẹ ema rayen kugbe obọ ri tuoma na gbe oma rẹ ayen ẹgua ọfa-a, eyẹ ogbeku rayen, ẹkẹvuọvo ki mi sivwi ayen vwo nẹ imwemwu rẹ ayen vwo she kpo uko na, ke me hworhẹ ayen, ke dia ihwo mẹ, ke me dia Ọghẹnẹ rayen.

Izikiẹl 37:27

Ẹdia mẹ kẹ ohri rẹ ayen ọ dia, ke me dia Ọghẹnẹ rayen, ayen ke dia ihwo me.

Izikiẹl 39:22

Uwevwi rẹ Izrẹl kọ cha riẹn nẹ mẹvwẹ Ọrovwohwo Ọghẹnẹ rayen, nẹ ẹdẹ yena yanran.

Hosia 2:22

otọ ke rha kpahe kẹ eka, udi kugbe ọfigbo, ayen ejobi ke kpahe kẹ Jezrẹl,

Zekaraya 13:9

Ki mi che phi ẹkẹn rerha nana phihọ erhanre, re ruo fon kirobo re ru idọnọ fuan ye, ka davwe ayen kirobo ra davwe oro na. Ayen se odẹ Mẹ, ki mi nyo ke ayen. Ke Me ta nẹ, Ayen ihwo mẹ, Kẹ ayen ta nẹ, Ọrovwohwo na Ọghẹnẹ Mẹ.

Zekaraya 8:8

ke Me reyọ ayen rhe vwọ dia uherevie ri Jerusalẹm ayen ke dia ihwo Mẹ ke Me je dia Ọghẹnẹ rayen, vwẹ uyota vẹ ọsoso.

Ọbe ri Pọl si rhe Ihwo ri Rom 6:17

Ẹkẹvuọvo ẹkpẹvwẹ kẹ Ọghẹnẹ, nẹ ovwan re dia eviẹn rẹ umwemwu jovwo na rhoma rhe vwẹ udu rẹ ovwan mu ọghọ kẹ oka rẹ uyono re yono ovwan jovwo,

Hibru 11:16

Ẹkẹvuọvo kirobo rọ epha na, ayen guọnọ ọrho ro me yovwi, kọye hẹ, orere rẹ obo odjivwu. Vwẹ ọtiọye na Ọghẹnẹ gbe vuoma re de se Ọghẹnẹ rẹ aye-en, kidie ọ rhuẹrẹ orere phihọ kẹ ayen nure.

Hibru 8:10

Ọnana hẹ ọphọ re me vẹ uwevwi rẹ Izrẹl cha re vwẹ ọke rẹ ẹdẹ yena da wan nu, eriyin Ọrovwohwo tare; ki mi che phi urhi mẹ phihọ udu rayen, ke si ayen phihọ ubiudu rayen, ke me dia Ọghẹnẹ rayen, ayen ke dia ihwo mẹ.

1 Samuẹl 7:3

Etiyin Samuẹl da ta kẹ uwevwi rẹ Izrẹl ejobi, Wa da vwẹ udu rẹ ovwan ejobi kurhẹriẹ bru vwe rhe, we gbe ku edjọ erhorha na kufia kugbe Ashera na nẹ ohri rẹ ovwan, re we hirhe udu rẹ ovwan ku Ọrovwohwo, re wa ga ọye ọvo, ko sivwi ovwan nẹ obọ rẹ ihwo ri Filistia.