Jerimaya 16:18 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹⁸ Me hwa osa rẹ orukuruku vẹ imwemwu rayen kpahe kẹ ayen, fikiridie ayen vwẹ irivwi rẹ edjọ rayen ri mioma na vwo imovwi otọ mẹ, ayen vwẹ ẹgua-egbe rayen vọn ukuẹriọ mẹ.

Jerimaya 16:18 ပူးပေါင်းရင်းမြစ်များ

Une rẹ Ejiro 106:38

ayen de sun ọbara rẹ ekun kuotọ, ọbara rẹ emeshare kugbe emetẹ rayen, re ayen vwo ze Izobo ke ema ri Kenan, otọ na de rhi gbeku vẹ ọbara.

Aizaya 24:5

Ihwo rẹ akpọ na gbe akpọ na ku tughu tughu kidie ayen gbe irhi rọye ku, ayen de miovwo irhi na, ayen da ghwọrọ ọphọ ri bẹdẹ na.

Aizaya 40:2

Ta ota dẹndẹn kẹ Jerusalẹm, ru wo kperi kẹ tanẹ ofovwi rọye rere, nẹ a vwẹ orukuruku rọye ghovwo, nẹ ọ reyọ osa mie Ọrovwohwo ọhwọhwọ ivẹ fiki rẹ umwemwu rọye.

Aizaya 61:7

Vwẹ ẹdia re omaẹvuọ wẹn ku wo vwo ẹkẹn ivẹ, vwe ẹdia re oma ẹphọphọ ku wọ ghọghọ vwẹ ẹkẹn ute wẹn, fiki rẹ ọtiọye na vwẹ evun rẹ otọ wẹn ku wo ẹkẹn ive, ọwẹn kọ dia aghọghọ re rara.

Aizaya 65:6

Nighere, e siro phihọ obaro mẹ, Mi che fotovwi-i, ẹkẹvuọvo Me cha hwa osa, e, Me cha hwa osa phihọ agada rayen

Aizaya 65:7

orukuruku rayen kugbe orukuruku rẹ ese rayen kugbe, eriyin Ọrovwohwo tare; fikiridie ayen torhẹ egẹn vwẹ enu rẹ igbenu na ayen da van ku vwe vwẹ enu rẹ igbenu itete na, Me cha vwanvwe phihọ agada rayen osa re ọbo rayen ruru rhabae.

Jerimaya 17:18

Otu ri kpokpo uvwe na jẹn oma vo ayen, ẹkẹvuọvo wo jẹ oma vo vwẹ-ẹ, jẹn ofu dje ayen, ẹkẹvuọvo wo jẹn ofu dje vwe-e vwẹ ẹdẹ umwemwu rhe ayen, Guọghọ ayen akuava.

Jerimaya 2:7

Me reyọ owẹ rhe otọ rọ vọnre vẹ emu re wọ ghọghọ vwẹ emamọ vẹ emuesiri rọye. Ẹkẹvuọvo wọ vwọ ro otọ mẹ na nu wo de miovwo, wọ da vwẹ ukuẹriọ mẹ vwo gbe ẹgua.

Jerimaya 3:9

Kidie igberadja na emu gheghe vwọ kẹ ọto na, ọ vẹ oragha kugbe urhe gbe gbe igberadja.

Jerimaya 44:4

Dede na mi dje idibo mẹ emraro na ejejo bru ovwan rhe tanẹ, E, we ruẹ emuẹgha nana ro tu vwe oma na-a!

Jerimaya 7:30

Fikiridie emọ ri Juda ru emu omiomiovwi vwẹ obaro mẹ eriyin Ọrovwohwo na tare, ayen mu orukuruku rayen vi vwẹ uwevwi ra vwẹ odẹ mẹ se na, ayen de gbe ẹgua.

Izikiẹl 11:18

Ayen de rhi te etiyin, kẹ ayen che si emu ejobi ri tuoma na no kugbe emu rẹ ẹgua rọye ejobi.

Izikiẹl 11:21

Ẹkẹvuọvo vwọ kẹ otu rẹ udu rayen nene obo ri tu ayen oma na kugbe obo ri gbe ayen ẹgua na, me nọ ekpẹn rẹ uruemu rayen na vwẹ uyovwi rẹ obọ rayen, Ọrovwohwo Ọghẹnẹ re tarọ.

Izikiẹl 36:18

Kọye mi de ku ophu mẹ ku ayen fiki rẹ ọbara rẹ ayen sun te otọ vwẹ evun rẹ otọ na, kidie ẹdjọ rẹ ayen vwori gbere ẹgua.

Izikiẹl 5:11

Vwẹ ọtiọye na, kirobo re me herọ na, eriyin Ọrovwohwo Ọghẹne tare, uyota, fikirobo wo vwo gbe ẹshẹ mẹ na ẹgua vẹ erharhe eravwọ wẹn ejọbi kugbe ẹgua wẹn ejobi na, vwẹ ọtiọye na ke me nyavwe owẹ te otọ, ẹro mẹ che ju we vwo-o, me je cha re ehrọre-e.

Hosia 9:7

Ẹdẹ rẹ ojẹriọ na rhire, ẹdẹ rẹ osa ẹ hwa tere Izrẹl cha riẹn. Ọmraro na vwonẹ ẹkpa, ohwo rẹ erhi rheri yọ mwa orhuẹ, fiki rẹ orukuruku rode wẹn kugbe omaetuo rode.

Livitikọs 26:30

Ke Me cha guọghọ imukpe re ovwan ejobi, ke Me nyavwe agbada re insẹns rẹ ovwan she, ki mi che mu irivwi re ovwan phihọ enu rẹ irivwi rẹ ẹdjọ re ovwan ejobi, ovwan ki che tue erhi mẹ oma.

Maika 2:10

Vrẹn wọ yanran, kidie ọna dia asan re de rovwoma-a; fiki rẹ emu ogbeghbe rọ guọghọ rọ guọghọ vẹ ivuemiovwo rode.

Ẹvwọphia 18:6

Ru kẹ kirobo rẹ okpuyovwi rọye ru kẹ ihwo efa, hwa osa kpahe kẹ fiki robo ro ruru; uko rọ je vọn na jẹ ọtiọye ọhwọhwivẹ kẹ.