Isẹ 4:4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

⁴ o de yono uvwe, ọ da ta kẹ vwẹ nẹ, Jẹn udu wẹn yọnre eta mẹ gangan: sẹro rẹ irhi mẹ, rere wọ rhọ:

Isẹ 4:4 ပူးပေါင်းရင်းမြစ်များ

Jẹnẹsis 18:19

Ẹjo, kidie Me jẹrẹ reyọ nure, nẹ oyono emọ rọye vẹ evwruwevwi rọye ejobi re ayen sẹro rẹ idjerhe rẹ Ọrovwohwo re ayen ru uruemu rẹ ọvwata vẹ ọsoso; rere ive rẹ Ọrovwohwo vẹ kẹ Ebraham na o vwo se ruo gba kẹ.

1 Ikun rẹ Ivie 28:9

Wẹ, Solomọn rẹ ọmọ mẹ, riẹn Ọghẹnẹ rẹ esẹ wẹn, rere wọ ga vwẹ udu wẹn ejobi vẹ udu rẹ ẹguọnọ; kidie Ọrovwohwo re hiẹn ubiudu, ọ me rha riẹn iroro kiroro vẹ ona ejobi. Wọ da guọnọ, ku wọ mrẹ, ẹkẹvuọvo wọ da siọn, kọ djẹ wẹ kufia bẹdẹ.

Une rẹ Ejiro 119:11

Mi phi ota wẹn phihọ udu mẹ rere mi vwo ji umwemwu eruo kpahe owẹ.

Une rẹ Ejiro 119:144

Iseri wẹn ọvwata rhiri bẹdẹ, kẹ vwẹ ẹruọ rere Me vwọ sa rhọ.

Une rẹ Ejiro 119:168

Me Yọnrọn iji wẹn kugbe iseri wẹn, kidie idierhe mẹ ejobi e he obaro wẹn.

Isẹ 22:6

Yono ọmọ phihọ idjerhe ro che nene, ọ da ghwanre nure ọ rha cha yan jovwo-o.

Isẹ 23:26

Ọmọ mẹ, vwẹ udu wẹn kẹ vwẹ, rere wo jẹ ẹro wẹn vughe idjerhe mẹ.

Isẹ 3:1

Ọmọ mẹ, wo jẹn uyono mẹ chọrọ owẹ ẹro-o, ẹkẹvuọvo sẹro rẹ irhi mẹ vwẹ evun rẹ udu wẹn;

Isẹ 3:2

kidie ẹdẹ o grogro kugbe ikpe buebu kugbe omavwerhovwẹ buebu kọye wo che vwo.

Isẹ 7:2

yọnrọn irhi mẹ rere wọ vwọ rhọ, sẹro rẹ eyono mẹ kere ọmọ-ero wẹn.

Aizaya 55:3

Rhie erhọn wẹn, ri wo bru vwe rhe; nyo, re erhi wẹn vwọ rhọ; ke Me vẹ owẹ re ọphọ re rara, omamọ rẹ uvi rẹ ẹguọnọ ro jẹrhẹriẹ ri mi vwo kẹ Devid.

Jerimaya 38:20

Jerimaya da ta, A cha reyọ owẹ vwọ kẹ aye-en. Mu ọghọ kẹ urhuru rẹ Ọrovwohwo vwẹ obo re me vuẹ wẹ na, kọ yovwi kẹ wẹ, ke ji sivwi urhuarho wẹn.

Iyẹnrẹ Esiri ri Jọn 12:50

Me riẹnre nẹ urhi rọye hẹ arhọ ri bẹdẹ. Obo re me ta na, me ta kirobo rẹ Ọsẹ na vuẹ vwẹ.

Ẹfesọs 6:4

Esẹ na, wa kpare emọ rẹ ovwan ophu-u, ẹkẹvuọvo wa ghẹrẹ ayen vwẹ ẹghwọ kuo kugbe uyono rẹ Ọrovwohwo.

Urhi Rivẹ 4:9

Wọ Me jomaotọ, vwẹ ẹro re ẹnwẹn wẹn dẹndẹn, obo rẹ ẹro wẹn mrẹre da rha chọre owẹ ẹro, ri de nẹ udu wẹn vwẹ ẹdẹ rẹ akpọ wẹn ejobi; ẹkẹvuọvo wo mi jẹ emọ wẹn kugbe emọ rẹ emọ wẹn riẹn ayen;

Urhi Rivẹ 6:6

Eta nana ri mi jiji kẹ wẹ nonẹ na, Me dia evun rẹ udu wẹn;

2 Timoti 1:5

A karohọ ovwẹ omamọ rẹ esegbuyota ru wo vwori, eseghuyota ro rhe oni wẹn rode Lọis kugbe Yunaisi oni wẹn rẹ orere, o mu vwe ẹro asakiephana nẹ wo ji miere esegbuyota rayen.

2 Timoti 3:15

nẹ ọke emọ wẹn rhe ọye wọ vwọ riẹn ọhe ọfuanfon na rọ sa kẹ aghwanre vẹ esivwo fiki rẹ esegbuyota kpahe Kristi Jesu.

Hibru 5:9

re vwo ruo gba nu kọ rhe dia esiri rẹ esivwo ri bẹdẹ na vwọ kẹ ayen ejobi ri mu ọghọ kẹ.

Iguẹdjọ 13:12

Manoa da ta kẹ nẹ, Ọke rẹ eta wẹn na da rhe dia uyota nu, ke mavọ akpọ rọ ọmọ na cha dia, didi iruo o che ru?