Hosia 2:18 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

¹⁸ Ke me vẹ owẹ cha re ọphọ vwẹ ẹdẹ yena kugbe eranvwe rẹ aghwa, ephran rẹ irharheghe, vẹ ọbo ri kpono vwẹ otọ, ke me guọghọ umurhabọ, ọlọkọ kugbe ofovwi nẹ otọ na; ke me vwẹ owẹ sherhẹ otọ gbiei.

Hosia 2:18 ပူးပေါင်းရင်းမြစ်များ

ỌBE RẸ JOB 5:22

Vwẹ ọke rẹ ẹghwọrọ vẹ owẹvwe, wọ cha hwẹ, wọ gbe cha djẹ oshọ rẹ eranvwe rẹ akpọ-ọ.

ỌBE RẸ JOB 5:23

Kidie wọ vẹ ibieragha rẹ aghwa na cha dia obọ, eranvwe rẹ aghwa na vẹ owẹ cha dia vwẹ ufuoma.

Une rẹ Ejiro 148:10

Eranvwe vẹ uchuru, obo ri kpono vẹ ephran re rhan!

Une rẹ Ejiro 23:2

Ọ vwẹ ovwẹ sherhẹ omamọ rẹ odi o de sun vwe wan oma rẹ ame djidji,

Une rẹ Ejiro 46:9

Ọ nẹrhẹ ofovwi fue re te oba rẹ akpọ na; o vwirhi umurhabọ, o de wurhu ubiri, ọ vwe erhanre torhẹ ekpẹrẹ rẹ ofovwi

Aizaya 2:11

Inieni ọbrabra rẹ ohwo ki che kpotọ eheri rẹ ihwo ka phọphọ ayen; Ọrovwohwo na ọvo kọye a kpare kpenu vwẹ ẹdẹ yena.

Aizaya 2:17

Obrabra rẹ ohwo kọ mrẹ ẹphọphọ eheri rẹ ihwo ke che vwo kpotọ; Ọrovwohwo ọvo a kpare kpenu vwẹ ẹdẹ yena.

Aizaya 2:4

Ko che guẹdjọ rẹ orere vẹ orere, ko che brorhiẹ rẹ ihwo buebu kẹ ayen che duvwu oda rayen phihọ ighwro, ibiri rayen phihọ egbage, orere gbe cha kparo oda vwọ so orere, eyẹ ayen gbe cha kpare ofovwi ọfa-a.

Aizaya 26:1

Vwẹ ẹdẹ yena ka so une nana vwẹ otọ ri Juda. Avwanre vwo orere ọvo rọ ganre ọ vwẹ esivwo vwo vi kerẹ igbẹhẹ ra vwẹ ogben vi.

Aizaya 32:18

Ihwo mẹ ke cha dia asan re ufuoma, asan rẹ eghemọphe, edia rẹ ọmaerovwo fuefu.

Aizaya 54:5

Kidie Oma rọ ma wẹ ọye ọshare wẹn, Ọrovwohwo rẹ otuofovwi na ọye odẹ rọye; Ọfuanfon Ọvuọvo rẹ Izrẹl na ọye Ọtan wẹn Ọghẹnẹ rẹ akpọ ejobi ọye e se.

Aizaya 65:25

Okpohrokpo vẹ ogodẹ ke cha re emu kugbe, ekpẹn kọ cha re ọdi kerẹ erhuẹn, ekpẹn kọ dia emu rẹ ọrọdekọ, ayen gbe woma-a eye ghwọrọ-ọ vwẹ enu rẹ ugbenu ọfuanfon Mẹ ọfa-a, eriyin Ọrovwohwo tare.

Jerimaya 23:6

Juda kọ rhọ vwẹ ẹdẹ rọye na, Izrẹl kọ dia egbẹrhẹnẹdẹ. Ọnana ọye odẹ re vwo se Ọrovwohwo ọvwata rẹ avwanre.

Jerimaya 30:10

Wọ gbe djẹ oshọ-ọ, E Jekọp odibo mẹ, eriyin Ọrovwohwo tare, wo bru udu-u, E Izrẹl, kidie gbe no, mi che sivwi we nẹ ogboko rhe, emọ wẹn nẹ otọ rẹ ighuvwu rhe. Jekọp che rhivwi rhe o mi vwo ofuvwegbe, ohwo ro djẹ osho muo gbe dia-a.

Jerimaya 33:16

Vwẹ ẹdẹ yena Juda kọ rhọ Jerusalẹm kọ dia vwẹ egbẹrhẹnẹdẹ. Kẹ ọ na odẹ re che vwo se, Ọrovwohwo na ọvwata rẹ avwanre.

Izikiẹl 34:25

Me vẹ ayen ke re ọphọ rẹ ufuoma, ke me djẹ eranvwe re djoma nẹ otọ na, re ayen sa dia dẹndẹn vwẹ evun rẹ aton na ayen rhe shevwerhẹ vwẹ evun rẹ egbọ na.

Izikiẹl 39:1

Wẹ, ọmọ rẹ ohwo, mraro kpahe Gọg, re wọ ta, E nẹ Ọrovwohwo Ọghẹnẹ tare: Nighe, mi mu kpahe owẹ, E Gọg, onotu rẹ isun rẹ Mẹshẹk kugbe Tubal,

Zekaraya 14:4

Vwẹ ẹdẹ yena awọ rọye ki che mudia enu rẹ Ugbenu rẹ Oliv rọ hẹ obaro ọnre vwi Jerusalẹm; Ugbenu rẹ Oliv kọ cha bẹre ẹbẹre ivẹ nẹ obaro ọnre re duvwu obuko ọnre ko vwo iyara rode na, eriyin re abọvo rẹ Ugbenu na ko bi kpo obọhwẹre ọnre, ẹbere rivẹ kẹ obọrhe ọnre.

Zekaraya 14:9

Ọrovwohwo kọ dia ovie rẹ akpọ na ejobi, vwẹ ẹdẹ yena Ọrovwohwo kọ dia ọvo odẹ rọye kọ dia ọvo.

Zekaraya 2:11

Ẹgborho buebu che kuoma rayen gbe Ọrovwohwo vwẹ ẹdẹ yena, ke cha dia ihwo Mẹ; ke Me dia uherevie wẹn ko wọ riẹn nẹ Ọrovwohwo rẹ otuofovwi na re cha vwe ji uvwe bru uwe rhe.

Zekaraya 3:10

Vwẹ ẹdẹ yena, Ọrovwohwo rẹ otuofovwi tare, dohwo dọrivẹ rọye ko che se kpo obotọ rẹ vain rọye vẹ obotọ rẹ owe rọye.

Zekaraya 9:10

Mi che si akpẹrẹ nẹ Ifrem kugbe iyesi rẹ ofovwi nẹ Jerusalẹm; e ji si umurhabọ rẹ ofovwi no, kọ ta nẹ ufuoma dia kẹ ẹgborho na ejobi; uvie rọye kọ nẹ abadi re te abadi, ji nẹ Urhie na re te oba rẹ akpọ na.