Hibru 9:4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

⁴ ro vwo agbada rẹ oro rẹ ugb oduma kugbe ekpeti rẹ ọphọ na ra vwẹ oro phare riariẹ, ọtoto rẹ oro ri mana epha da hẹ evun rọye, kugbe ọkpọ rẹ Ẹrọn ro mọ idodo, kugbe imẹjẹ rẹ ọphọ na.

Hibru 9:4 ပူးပေါင်းရင်းမြစ်များ

1 Ivie 7:50

Iko na, ehwa na, ize na, imize rẹ insẹns, kugbe evwẹrẹ, ra vwẹ omamọ rẹ ọro duvwu, kugbe abọ rẹ oro, ra sa phihọ ẹchẹ re hẹ obo ẹran rẹ uwevwi na, asan rọ ma fon ejobi, kugbe ẹchẹ rẹ uphephẹ rẹ ẹga na.

1 Ivie 8:21

Kẹ etiyin me da vwe asan kẹ ekpeti na, re ọphọ rẹ Ọrovwohwo vẹ esẹ rẹ avwanre rere, vwẹ ọke rọ vwọ reyọ ayen nẹ otọ rẹ Ijipt rhe.

1 Ivie 8:9

Emuọvo hẹ evun rẹ ekpeti na-a, jokpa rẹ ephapha rẹ elalọ ivẹ na ri Mosis phihọ vwi Horẹb, asan rẹ Ọrovwohwo vẹ ihwo rẹ Izrẹl da re ọphọ, rẹ ayen vwo nẹ otọ rẹ Ijipt cha.

2 Ikun rẹ Ivie 5:10

Emuọvo hẹ evun rẹ ekpeti na-a jokpa rẹ ephapha ivẹ ri Mosis phihọ vwi Horẹb, vwẹ asan rẹ Ọrovwohwo vẹ ihwo rẹ Izrẹl da re ọphọ, rẹ ayen vwo nẹ otọ rẹ Ijipt cha.

Ẹyano 26:33

Wọ me vwẹ oga na ya ahwa na, wo mi mu ekpeti rẹ iseri na rọ evun re oga na rhe; oga na kọye hẹriẹ asan ọfuanfon na nẹ asan rọ ma fon na.

Ẹyano 31:18

Ọ da vwẹ ephapha rẹ iseri ivẹ na vwọ kẹ Mosis, ọke rẹ ọ vẹ ọye vwo ta ota vwẹ enu rẹ Ugbenu ri Sinae nu, ephapha rẹ oragha rẹ Ọghẹnẹ vwẹ urhiabọ rọye si.

Ẹyano 32:15

Etiyin Mosis da rhẹriẹ oma o de won nẹ ugbenu na rhe otọ ọ vẹ ephapha ivẹ rẹ iseri na vwẹ abọ rọye, ephapha re siri tobonẹ tobonẹ; ẹbẹre ọvo rọye vẹ ẹbẹre rivẹ rọye e siri.

Ẹyano 34:29

Ọke ri Mosis vwo wotọ nẹ Ugbenu ri Sinae rhe, ọ vẹ ophapha ivẹ rẹ iseri na vwẹ obọ rọye gbe wotọ nẹ ugbenu na rhe, Mosis gbe rha riẹn nẹ opharo rọye lo-o fikiridie o nene Ọghẹnẹ ta ota.

Ẹyano 37:25

Ọ da rha vwẹ ẹron vwo ru agbada rẹ ugboduma; ugrogro rọye kubit ọvo, ohẹhẹre rọye kubit ọvo; ugrogro te ohẹhẹre abavo, enuẹra rọye kubit ivẹ; idjo rọye vọye oma ọvo.

Ẹyano 39:35

ekpeti rẹ iseri na vẹ ekpọ rọye vẹ akpanurhe rẹ arodọvwẹ na,

Ẹyano 40:3

Wo mi mu ekpeti rẹ iseri na phihọ evun rọye wọ me vwẹ oga vwọ tan.

Livitikọs 16:12

Ọ Me rha reyọ ẹphẹre rọ vọnre vẹ imwerhanre vwo ne enu rẹ agbada rẹ ẹga rẹ Ọrovwohwo na rhe, ọ Me rha ghwẹ ẹkuobọ ivẹ vọn vẹ ugboduma re duvwuru hahavwe; ọ Me ghwẹ ra ro evun rẹ asan ra vwẹ amwa tan na.

Ukeri 17:10

Etiyin Ọrovwohwo da ta kẹ Mosis, Rhoma phi ọkpọ rẹ Erọn phihọ obaro rẹ iseri na, ra sẹro rọye rọ dia oka kẹ ohwo rẹ okpetu, rere wọ vwọ mrasa fuẹ enuebro rẹ ayen brẹ kpahe ovwẹ, ọ dia ọtiọye-e ayen de rhe ghwu.

Ukeri 17:5

Ọkpọ rẹ ohwo re me jẹreyọ ko che yoro phia; ọye kọye mi che vwo fue enuebro rẹ emọ rẹ Izrẹl, rẹ ayen brẹ hwe we na.

Ukeri 17:8

Vwẹ irhiọke Mosis de kpo evun rẹ utughẹ rẹ iseri na, nighere, ọkpọ rẹ Erọn rẹ uwevwi ri Livae de yoro phia ọ da ghwẹ iphọ phihọ, ọ da ghwẹ ẹbe phihọ gbidi, ọ da mọ emamọ ri orhomrẹ evwavware.

Urhi Rivẹ 9:11

Ọ rhi vwo te oba rẹ ẹdẹ ujuvẹ vẹ ason ujuvẹ na re, Ọrovwohwo da vwẹ ẹbẹre rẹ eragha ivẹ rẹ olalọ na kẹ vwẹ, kọye ẹbẹre rẹ eragha rẹ ọphọ na.

Urhi Rivẹ 9:9

Ọke mi vwo yeri kpenu rẹ ugbenu na ra reyọ ẹbẹre rẹ eragha na, kọye ẹbẹre rẹ eragha rẹ ọphọ rẹ Ọrovwohwo nene ovwan re na, Etiyin Me da dia enu rẹ ugbenu na ẹdẹ ujuvẹ vẹ ason ujuvẹ; Me re emu-u Me je da ame-e.

Ẹvwọphia 11:19

Etiyin e de rhie ẹchẹ rẹ uwevwi rẹ Ọghẹnẹ vwẹ obo odjuvwu, a da mrẹ ekpeti rẹ ọphọ rọye vwẹ evun rẹ uwevwi rẹ ẹga na; enu da nyavwaro, edo rode, edo rẹ agbrara, otọ ro kpogho, imicho ride.

Ẹvwọphia 8:3

Amakashe ọfa da rhe rhi mudia kẹrẹ agbada na ọ vẹ omoze rẹ oro vwẹ obọ; a da ghwẹ igboduma kẹ buebu rere ọ vwẹ ayen gua ẹrhovwo rẹ irherẹn na ejobi vwẹ enu rẹ agbada rẹ oro na rọ hẹ obaro rẹ ekete na;