Hegae 2:4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

⁴ Dede na vwẹ Asakiephana we gbe yivwaro, E Zerubabẹl, eriyin Ọrovwohwo tare, yivwaro, E Joshua, ọmọ ri Jehozadak, rẹ orherẹn rode na, yivwaro, ovwan ihwo rẹ otọ na ejobi eriyin Ọrovwohwo tare; ru iruo, kidie me vẹ owẹ herọ, eriyin Ọrovwohwo rẹ otuofovwi na tare.

Hegae 2:4 ပူးပေါင်းရင်းမြစ်များ

1 Ikun rẹ Ivie 28:20

Etiyin Devid da ta kẹ Solomọn rẹ ọmọ rọye, Gan oma wo yivwaro wo ruo, Wọ djẹ oshọ-ọ, wo je emu guegue uwe-e; kidie Ọrovwohwo Ọghẹnẹ rọ dia Ọghẹnẹ mẹ na, vẹ owẹ herọ. Ọ phiẹn wẹ-ẹ eyẹ ọ sen wẹ-ẹ, bẹsiẹ rẹ iruo rẹ uwevwi rẹ Ọrovwohwo na ejobi vwo re.

Zekaraya 8:9

E nẹ Ọrovwohwo rẹ otuofovwi tare: We jẹn abọ rẹ ovwan gan, ovwan ri nyo eta nana ri nẹ unu rẹ emraro rhe na, rhanwe ẹdẹ ra vwọ tọn uchivwo rẹ uwevwi rẹ Ọrovwohwo rẹ otuofovwi phihọ nu na, rere a vwọ bọn uwevwi rẹ Ọghẹnẹ na.

Joshua 1:9

Ọ dia omẹvwẹ ri ji urhi na kẹ wẹ-ẹ? Goma wo yivwaro gangan, wọ phariẹ-ẹ, wo jẹ ofu dje we-e, kidie Ọrovwohwo Ọghẹnẹ wẹn vẹ owẹ herọ vwi kasan kasan wọ ra ejobi.

2 Samuẹl 5:10

Etiyin Devid da rhe rho phihọ, Ọrovwohwo rẹ Ọghẹnẹ rẹ otuofovwi na, vọye da herọ.

Urhi Rivẹ 31:23

Ọrovwohwo da vwẹ ogangan ki Joshua ọmọ ri Nun, ọ da ta kẹ nẹ, Wọ Me gan oma wo vwo udu; kidie wọ cha reyọ emọ rẹ Izrẹl kpo otọ ri mi veri nẹ Me vwọ kẹ ayen na; mi nene uwe dia.

2 Timoti 2:1

Wẹ, ọmọ mẹ, gba gan oma vwẹ ẹserọphẹ rọ herọ vwẹ evun ri Kristi Jesu,

1 Ikun rẹ Ivie 22:13

Etiyin ko yovwi kẹ wẹ wọ da sa yọnrọn irhi vẹ iji rẹ Ọrovwohwo ta kẹ Mosis nẹ ọ vwọ kẹ Izrẹl. Wa gan oma we rhe yivwaro. Wọ djẹ oshọ-ọ.

2 Timoti 4:17

Ẹkẹvuọvo Ọrovwohwo de mudia cha vwẹ ọ da kẹ ogangan mi vwo ghwoghwo ota na gbagba, rere ihwo ri Keferi na ejobi vwo nyo. Vwẹ ọtiọye na e vwo sivwi uvwe nẹ unu rẹ okpohrokpo na.

Ẹfesọs 6:10

Ọ rọ ka oba, wa gan oma vwẹ evun rẹ Ọrovwohwo kugbe ogangan rẹ ẹgba rọye.

1 Kọrẹnt 16:13

Wa rhẹrẹ, we mndia gan vwẹ esegbuyota rẹ ovwan, we yivwaro, wa gan oma.

Hegae 1:13

Etiyin Hegae, ọyinkọ rẹ Ọrovwohwo na da vuẹ ihwo na ovuẹ rẹ Ọrovwohwo na nẹ, Me vẹ owẹ herọ, eriyin Ọrovwohwo na tare.

Iruo rẹ Iyinkọn na 7:9

Esẹ ride na, da rioma kpahe Josẹf, a da shẹ kpo Ijipt; ẹkẹvuọvo Ọghẹnẹ vẹ ọye herọ.

Iyẹnrẹ Esiri ri Mak 16:20

Ayen da yanran, re ghwoghwo ota na vwẹ asan ejobi, Ọrovwohwo de nene ayen ru iruo, ọ da vwẹ eka nene ota na re o vwo ruo gan. Isẹ.

Joshua 1:6

Gba goma rere wo yivwaro, kidie wẹ re cha nẹrhẹ ihwo nana riuku rẹ otọ ri mi duvwu iyori kẹ esẹ rẹ ovwan nẹ me vwọ kẹ ayen na.

Ẹyano 3:12

Ọ da kpahe kẹ nẹ, “Mi che mi nene uwe ra; ọnana kọ dia oka kẹ wẹ, nẹ Mẹvwẹ ri ji we; ọke wọ da rọye ihwo na nẹ otọ rẹ Ijipt rhe nu, ku wọ cha gọ Ọghẹnẹ vwẹ ugbenu nana.

1 Samuẹl 16:18

Emeghele na ọvo da kpahe, Nighere, me mrẹ ọmọ ri Jesse ohwo ri Bẹtlẹhẹm, rọ riẹn hworo gangan, ọ gba, ohwo rẹ ofovwi, ọ vẹ ọhọ rẹ ota, ohwo vẹ erhuvwu; Ọrovwohwo vẹ ọye herọ.

Iguẹdjọ 2:18

Kọke kọke rẹ Ọrovwohwo na vwọ vwẹ iguẹdjọ vwo mu kẹ ayen, yẹ Ọrovwohwo na vẹ Oguẹdjọ na herọ, o de sivwi ayen nẹ obọ rẹ ivwighrẹn rayen, vwẹ ọke rẹ oguẹdjọ na ejobi; kidie Ọrovwohwo na nẹ arodọvwẹ rayen fiki rẹ enuebro rẹ oja vẹ oshenyẹ rẹ ihwo ri mu kpahe ayen.

Ezra 5:2

Etiyin Zerubabẹl omọ ri Shealtiẹl kugbe Jeshua ọmọ ri Jozadak de vrẹn, ayen ke rhoma bọn uwevwi rẹ Ọghẹnẹ rọ hẹ obi Jerusalẹm, emraro rẹ Ọghẹnẹ, de mudia kẹrẹ ayen re cha ayen uko.

Ezra 10:18

Vwẹ usun rẹ emọ rẹ irherẹn na re rọvwọ eya erhorha vwẹ otọ na, a da mrẹ Maaseya, Eliezer, Jarib vi Gedalaya, vwẹ usun rẹ emọ ri Jeshua rẹ ọmọ ri Jozadak kugbe imoni rọye.

Zekaraya 4:6

Etiyin ọ da ta kẹ vwẹ, Ọnana ota rẹ Ọrovwohwo ta kẹ Zerubabẹl: Ọdia ẹgba-a, yẹrẹ oganga-an, ẹkẹvuọvo Erhi Mẹ, Ọrovwohwo rẹ otuofovwi tarọ.