Emọs 6:2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

² Wanvrẹn kpo Kalneh, re wọ mrẹ, nẹ etiyin re wo kpo Hamat rode na, wo rhe kpo Gat ri Filistia. Ayen yovwi nọ uvie nana? Yẹrẹ ubrakpọ rayen rho nọ ubrakpọ rẹ ovwan?

Emọs 6:2 ပူးပေါင်းရင်းမြစ်များ

Jẹnẹsis 10:10

Emuophihọ rẹ uvie rọye ki Babẹl, Erẹk kugbe Akad, enana ejobi kẹ otọ ri Shinar epha.

2 Samuẹl 8:9

Ọke ri Toi rẹ ovie ri Hamat vwo nyo nẹ Devid phi utuofovwi ri Hadadezar ejobi kua,

1 Ivie 8:65

Ọtiọye na Solomọn da rẹ orẹ na vwẹ ọke yena, kugbe Izrẹl ejobi vẹ ọye, Ọghwẹgbe rode na, nẹ unu ri Hamat re te Ẹtẹrhe rẹ Ijipt, vwẹ obaro rẹ Ọrovwohwo Ọghẹnẹ rẹ avwanre ẹdẹ ighwrẹ.

Ivie rẹ Ivẹ 17:24

Ovie rẹ Asiria da kua ihwo nẹ Babilọn rhe, vẹ Kuta, vẹ Ava, Hamat, vi Sefavem rhe, ọ da ghwẹ ayen phihọ irere ri Sameria ra kua ihwo rẹ Izrẹl nu na, ayen de rhe vwo Sameria, ayen de yeri irere rọye.

Ivie rẹ Ivẹ 17:30

eshare ri Babilọn da ma Sukotbenot, eshare ri Kut da ma Nagal, eshare ri Hamar da ma Ashima,

Ivie rẹ Ivẹ 18:34

Edjọ ri Hamat vẹ e rẹ Apad rhọ? Edjọ rẹ Sefavim vẹ e rẹ Hena kugbe Iva rhọ? Ayen se sivwi Sameria nẹ obọ mẹ re?

Ivie rẹ Ivẹ 19:13

Ovie ri Hamat rhọ? Ovie rẹ Apad rhọ? Ovie rẹ orere rẹ Sefavem rhọ? Ovie rẹ Hena rhọ? Eyẹ ovie rẹ Iva rhọ?

2 Ikun rẹ Ivie 26:6

Ọ da yanran ra họnre ihwo ri Filistia, o de kporọ igbẹhẹ ri Gat she kugbe igbẹhẹ ri Jabneh kugbe igbẹhẹ rẹ Ashdọd; ọ da bọn irere phihọ ubrakpọ rẹ Ashdọd kugbe asan efa vwẹ otọ ri Filistia na.

Jerimaya 49:23

Vwọ kpahe Damaskọs Hamat vẹ Apad kpoghore, kidie ayen nyo ikun omiomiovwo re, Ayen ra wran vwẹ evun rẹ oshọ, kerẹ abadi rọ họnran rọ sa fon riẹi.

Nahum 3:8

Wo yovwi nọ Tib ro tidia vwẹ orhoma ri Nile, rẹ ame riariẹ phihọ, rọ ghwrọrọ phihọ abadi rẹ ame da rhuọrhuọ igbẹhẹ rọye?

1 Samuẹl 17:23

Rọ vẹ ayen vwọ ta ota na, nighe, Ọgba na, ohwo ri Filistia ri Gat, re se Golayat, o de yoro nẹ edje rẹ ihwo ri Filistia rhe, ọ da je ta eghẹre rẹ ota rọ ta jovwo na. Devid de nyo.

1 Samuẹl 17:4

Etiyin ọgba ọvo de nẹ erhọn rẹ ihwo ri Filistia rhe re se odẹ rọye Golayat, ri Gat, rẹ ugrogro rọye dia kubit esan gbe esabọ.

1 Samuẹl 5:10

Etiyin ayen de mu ekpeti rẹ Ọghẹnẹ na kpo Ekrọn. Ẹkẹvuọvo ọke rẹ ekpeti rẹ Ọghẹnẹ mi rhi vwo te Ekrọn, ihwo rẹ Ekrọn de bunu, Ayen mu ekpeti rẹ Ọghẹnẹ rẹ Izrẹl bru avwanre rhe obonẹ re ọ rhi hwe avwanre vẹ ihwo rẹ avwanre.

1 Samuẹl 5:8

Etiyin ayen de ji ikọn re se ehọnvwọre ri Filistia ejobi koko, ayen da ta, Mavọ e ru ekpeti rẹ Ọghẹnẹ rẹ Izrẹl na? Ayen da kpahe, E jẹn e mu ekpeti rẹ Ọghẹnẹ rẹ Izrẹl na rhivwi kpo Gat. Etiyin ayen de mu ekpeti rẹ Ọghẹnẹ rẹ Izrẹl na rhivwi kpo oboyi.