Aizaya 66:4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

⁴ Mẹvwẹ ọvo kọ cha je okpetu kẹ ayen, Me djẹ oshọ mu ayen; kidie, ọke mi vwo se, ohwo ọvuọvo nyori-i, Me vwọ ta ota ayen kerhọ-ọn, ẹkẹvuọvo ayen ru umwemwu vwẹ obaro Mẹ, ayen da je obo ri tu vwe oma ru.

Aizaya 66:4 ပူးပေါင်းရင်းမြစ်များ

Ivie rẹ Ivẹ 21:2

O de ru obo ri miovwiri vwẹ obaro rẹ Ọrovwohwo, uruemu rẹ ẹgua rẹ ihwo rẹ Ọrovwohwo djẹnẹ otọ na kẹ ihwo rẹ Izrẹl.

Ivie rẹ Ivẹ 21:6

Ọ da vwẹ ọmọ rọye vwo ze izobo, o de yono arọẹmrẹ vẹ epha, ọ vẹ idiẹbo te eriedan ki ruẹ kugbe. Ọ de ru obo re chọre gangan vwẹ obaro rẹ Ọrovwohwo, ọ da nẹrhẹ Ọrovwohwo mu ophu.

Une rẹ Ejiro 81:12

Ọtiọye mi de siobọ nẹ ayen kẹ udu ọgangan rayen, re ayen nene iroro rẹ udu rayen.

Isẹ 1:24

Fikiridie mi seri yu wọ kerhọ-ọn me riẹn obọ yẹ ohwo ọvuọvo davwe erhọ-ọn,

Isẹ 10:24

Obo rẹ ohwo umwemwu djẹ oshọ rọye che bro rhe, ẹkẹvuọvo emu rẹ ọvwata guọnọ ọye a vwọ kẹ.

Aizaya 50:2

Mavọ, ọke Me vwọ rhe, ohwo gbe herọ-ọ? Ọke Mi vwo se, o rhe vwo ohwo ro nyori-i? Obọ Mẹ krẹnọ, ro vwo je ohwo ẹtan? Gbine Mi vwo ogangan re vwo sivwẹ-ẹ? Nighere, vwẹ ẹghwọ re unu mẹ abadi na kọ kpọ, Mi ru urhie na phihọ aton, iyeri rayen ki gbo kidie ame herọ-ọ i mu ghwu fiki r;pe urhuru rẹ ame.

Aizaya 59:15

Uyota kanre, ohwo ro si oma nẹ umwemwu vwe oma rọye mu ufi. Ọrovwohwo mrẹre, o gbi rhe je-e nẹ ọsoso herọ-ọ.

Aizaya 59:7

Awọ rayen djẹ ro umwemwu, ayen bru okpakpa suẹn ọbara rẹ ọvwata te otọ, iroro rayen iroro rẹ orukuruku, evẹre vẹ ẹghwọrọ e hẹ idjerhe rayen.

Aizaya 65:12

Ke Me vwẹ owẹ kẹ ọlọkọ, ovwan ejobi ki che gbe uyovwi phihọ otọ kẹ ọ ro hwe ihwo na; fikiridie, ọke Mi vwo se, wo nyori-i, ọke Me vwọ ta ota, wọ kerhọ-ọn, ẹkẹvuọvo wo de ru umwemwu vwẹ obaro Mẹ, wọ da jẹ obo ri tu vwe oma .

Aizaya 65:2

Me bẹre abọ mẹ vwẹ ẹdẹ na ejobi vwọ kẹ ihwo ri gbe ozighi, re yan phihọ idjerhe ro je yovwo, ri nene ona rẹ evun rayen ọvo,

Aizaya 65:3

Ihwo re kpare ophu mẹ te vwe unu sa kọke kọke ejobi, ri ze izobo vwẹ evun rẹ udju re torhẹ egẹn vwe enu rẹ ikerekpẹn;

Aizaya 65:7

orukuruku rayen kugbe orukuruku rẹ ese rayen kugbe, eriyin Ọrovwohwo tare; fikiridie ayen torhẹ egẹn vwẹ enu rẹ igbenu na ayen da van ku vwe vwẹ enu rẹ igbenu itete na, Me cha vwanvwe phihọ agada rayen osa re ọbo rayen ruru rhabae.

Jerimaya 35:17

Vwẹ ọtiọye na, enẹ Ọrovwohwo Ọghẹnẹ rẹ otuofovwi, Ọghẹnẹ rẹ Izrẹl na tare: Nighe, me cha ghwa umiovwo rhurhu Juda vẹ ihwo ri Jerusalẹm ejobi, umiovwo re me ta kpahe ayen jovwe na, fikiridie me ta kẹ ayen yẹ ayen kerhọ-ọn mi se ayen yẹ ayen nyori-i.

Jerimaya 7:13

Fiki rẹ obo rẹ ovwan vwo ru imu nana, vwẹ asakiephana, eriyin Ọrovwohwo na tare, ọke mi vwo dje ovwan ẹtẹta kẹ wa kerhọ-ọn, mi vwo se ovwan we nyori-i,

Jerimaya 7:30

Fikiridie emọ ri Juda ru emu omiomiovwi vwẹ obaro mẹ eriyin Ọrovwohwo na tare, ayen mu orukuruku rayen vi vwẹ uwevwi ra vwẹ odẹ mẹ se na, ayen de gbe ẹgua.

Izikiẹl 11:8

Wọ djẹ oshọ rẹ ọlọkọ na, ke me reyọ ọlọkọ na vwọ kpahe owẹ, Ọrovwohwo Ọghẹnẹ re tarọ.

Izikiẹl 14:4

Fiki rẹ ọtiọye na gba ta kẹ ayen nẹ, Enẹ Orọvwhhwọ Ọghẹnẹ tare: Kohwo kohwo vwẹ uwevwi rẹ Izrẹl rọ reyọ ema rọye phihọ udu rọye ro de mu uchukurhe umwemwu rẹ orukuruku vwọ rhe obaro rọye, ro de ji bru ọmraro na ra, Mẹvwẹ rẹ Ọrovwohwo na ọvo kẹ ọye cha kpahe kẹ fiki rẹ ema ibuebu rọye na.

Izikiẹl 20:25

Ọ rọ marho mi de ji iji ri je yovwo vwọ kẹ ayen kugbe irhi re ayen de jẹ arhọ evwo;

Matiu 24:24

Kidie Kristi rẹ efian cha rhe, kugbe emraro rẹ efian, ayen cha vwẹ eka buebu phia, kugbe emu rẹ igbunu buebu; rere ayen vwọ phiẹn ihwo buebu ghwru; udu rẹ ayen da gba ihwo ra sanọ reyọ dede na, a jẹ phiẹn ayen.

1 Samuẹl 8:19

Ẹkẹvuọvo ihwo na rha davwerhọ ri Samuelu-u; ayen da ta, Ẹjo, ẹkẹvuọvo avwanre guọnọ ovie ro sun avwanre,