Aizaya 62:2 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

² Ẹgborho na ke cha mrẹ ase wẹn, ivie na ejobi kẹ urinrin wẹn, ka vwẹ odẹ ọkpokpọ se we rẹ unu rẹ Ọrovwohwo ọvo che se.

Aizaya 62:2 ပူးပေါင်းရင်းမြစ်များ

Jẹnẹsis 17:15

Ọghẹnẹ da ta kẹ Ebraham, Vwọ kẹ Serai rẹ aye wẹn, wo gbi se Serai ọfa-a, ẹkẹvuọvo Sera kọye dia odẹ rọye.

Jẹnẹsis 17:5

E gbi se we Ebram ọfa-a, ẹkẹvuọvo ke se we Ebraham, fikiridie mi ru we vwọ dia ọsẹ rẹ ẹgborho buebu.

Jẹnẹsis 32:28

Etiyin ọ da ta, E gbi se odẹ wẹn Jekọp ọfaa, ẹkẹvuọvo kẹ Izrẹl, fikiridie wọ vẹ Ọghẹnẹ kugbe ihwo rẹ akpọ muabọ, yi wo sheri-i.

Une rẹ Ejiro 98:2

Ọrovwohwo nẹrhẹ a riẹn obọẹkparọ rọye nure, ọ vwẹ orhiẹbro rọye phia vwẹ obaro rẹ ẹgborho na.

Aizaya 1:26

Ki mi rhoma vwẹ iguẹdjọ wẹn mu kerẹ ọke rẹ ẹsosuọ ediẹguare wẹn kirobo re epha notọrhe. Ukuko rọye ke che se we orere re ọvwata, orere re esiri na.

Aizaya 26:2

Rhie inurhoro na, rere orere rẹ ọvwata rọ yọnrọn urhi na vwọ ro uwevwi.

Aizaya 43:7

kohwo kohwo ra vwẹ odẹ mẹ se, re me mare vwọ kẹ urinrin mẹ, re me mamare re Me mare

Aizaya 49:23

Ivie ke dia ese rẹ aruakpọ wẹn, ivie re eya ke dia ini re ghẹre ovwan. Ayen ki diguẹ bọvwọn epharo rhuotọ kẹ wẹ, ke rare ekpẹn re awọ wẹn. Etiyin wo ke riẹn nẹ Mẹvwẹ Ọrovwohwo na Otu re hẹrhẹ ovwẹ oma sa vo aye-en.

Aizaya 49:6

ọ da ta, Emu ọphapharhe rere wọ vwọ dia odibo mẹ ra vwọ kpare uvwiẹ ri Jekọp vrẹn kugbe rere a vwọ sẹro rẹ uchekotọ rẹ Izrẹl; Me vwẹ owẹ ru urhukpẹ kẹ ẹgborho na, rere esivwo Mẹ rhi vwo te oba rẹ akpọ na.

Aizaya 52:10

Ọrovwohwo ban igbabọ ọfuanfon rọye phihọ vwẹ irhanro rẹ egborho na ejobi; oba rẹ akpọ na ejobi ke cha mrẹ esivwo rẹ Ọghẹnẹ rẹ avwanre.

Aizaya 56:5

ki Mi phi phihọ evun rẹ uwevwi Mẹ kugbe evun rẹ igbẹhẹ Mẹ emama re ẹkarohọ kugbe odẹ ri yovwi nọ emọ re eshare ve emetẹ, ki Mi mu odẹ ri bẹdẹ kẹ ayen re jẹ sa nyavwe kufia.

Aizaya 60:11

Ke rhie anurhoro weẹ phihọ kẹse kẹse, te ason te uvo e gbi huhu aye-en; rere ihwo vwọ ghwẹ efe rẹ ẹgborho na rhe we, vẹ ivie rayen re tẹrẹ usun.

Aizaya 60:16

Wo che viẹ ame ivie rẹ ẹgborho na, ku wo viẹ ivie rẹ ivie; ku wọ riẹn nẹ Mẹvwẹ, Ọrovwohwo na, Osivwi wẹn Ọtan wẹn, Ọgba Ọvuọvo ri Jekọp na.

Aizaya 61:11

Kirobo rẹ otọ yoro che phia na, kirobo re obo re voro phihọ udju va nẹ otọ cha na, eriyin Ọrovwohwo che ru re ọvwata veẹ ejiro vwọ varhe keẹ ẹgborho na mrẹ.

Aizaya 61:9

Uvwiẹ rayen ka riẹn vwe ohri re ẹgborho na, emọ rayen vwẹ usun re ihwo na, ihwo re mre ayen ki vughe ayen, nẹ ena ihwo rẹ Ọrovwohwo bruphihọ kẹ.

Aizaya 62:12

Ke se ayen ihwo efuanfon na, re Ọrovwohwo tan hirhe, ke se we nẹ Aguọnọ phia, orere re jẹ siọ.

Aizaya 62:4

E gbi se we ọfa nẹ Ọ rasere-e, otọ wẹn e gbi se ọfa nẹ Ọ ra kuanu-u, ẹkẹvuọvo ke se we nẹ Ojevwe Me hẹ evun rọye, otọ wẹn kẹ Orọvwe, kidie ivun wẹn vwerhe Ọrovwohwo, otọ wẹn ka rọvwọ.

Aizaya 65:15

Wọ cha yan jẹ odẹ wẹn vwo kẹ ọ re Me jẹreyọ na vwọ harhe ekan, Ọrovwohwo rẹ Ọghẹnẹ ko ghwie we hwe, ẹkẹvuọvo idibo rọye ko mu odẹ ọfa kẹ ayen.

Aizaya 66:11

rere wọ viẹ rere evun vọn wẹ vwe evie rọye rẹ ofuophu na, rere wọ da vọn vẹ omavwerhe nẹ obuebu rẹ urinrin rọye na rhe.

Aizaya 66:12

Kidie enẹ Ọrovwohwo tare Nighere, Mi che bi erhuvwu vwo rhe kerẹ urhie, efe re ẹgborho na kerẹ ọkẹre rẹ oghwe, ku wo viẹ, ko mu we kpahe awọ rọye, kọ fẹrẹ vwẹ awọ rọye.

Aizaya 66:19

ke Me cha vwẹ oka vi vwẹ uherevie rẹ ayen. Vwẹ uherevie rẹ ayen ri ghwu chekọ na mi de ji ihwo kpo ẹgborho na, kpo Tarshish, Put, kugbe Lud, ri siẹ umurhabọ, kpo Tubal kugbe Javan, re te erhuru re hẹ ogboko na, ri ji nyo usi mẹ-ẹ eyẹ mrẹ urinrin mẹ-ẹ; ayen ki che ghwoghwo urinrin mẹ vwẹ ohri re ẹgborho na.

Jerimaya 33:16

Vwẹ ẹdẹ yena Juda kọ rhọ Jerusalẹm kọ dia vwẹ egbẹrhẹnẹdẹ. Kẹ ọ na odẹ re che vwo se, Ọrovwohwo na ọvwata rẹ avwanre.

Jerimaya 33:9

O nana kọ dia odẹ rẹ aghọghọ kẹ vwẹ, kugbe ejiro vẹ urinrin vwẹ obaro rẹ irere rẹ akpo na ri che nyo erhuvwu ri mi che ru kẹ ayen, oshọ ko mu ayen rẹ ayen de kpogho vwi fiki rẹ erhuvwu vẹ oyovwe ejobi re me rhuẹrẹ hẹrhẹ na.

Maika 5:8

Umuku ri Jekọp ro chekọ ke cha dia ohri rẹ ẹgborho na, vwẹ ohri rẹ ihwo buebu, kerẹ okpohrokpo vwẹ ohri rẹ eranvwe rẹ aghwa, kerẹ upene rẹ okpohrokpo vwẹ ohri rẹ ekru rẹ igegede, ọ da dianẹ ẹ wanvrẹn, ko chiyi ayen muotọ ọ me chẹghẹ kẹnẹ kẹnẹ, o rhe vwo ohwo ro sivwo-o.

Iruo rẹ Iyinkọn na 11:26

Ọke rọ vwọ mrẹ ọ da reyọ vwọ rhe obi Antiọk. Kidie ayen dia ishọshi na ẹgbukpe soso ayen de yono ihwo buebu; Antiọk kọye hẹ asan rẹsosuọ re de mu odẹ kẹ idibo na nẹ ihwo ri Kristi.

Iruo rẹ Iyinkọn na 26:23

nẹ Kristi na cha reoja, nẹ, ọ vwọ dia ohwo rẹsosuọ ro ke vrẹn nẹ ughwu rhe na, ko che ghwoghwo orẹmrẹ kẹ ihwo na ji kugbe otu ri Keferi.

Iruo rẹ Iyinkọn na 9:15

Ẹkẹvuọvo Ọrovwohwo da ta kẹ, Yanran, kidie o hirhe ohwo re me jẹreyọ nure rere ọ ghwa odẹ mẹ bru otu ri Keferi kugbe ivie kugbe emọ rẹ Izrẹl.

Kolose 1:23

Ọ da dianẹ ovwan yọnrọn esegbuyota rẹ ovwan na gan, rẹ ovwan de mudia kokoroko, rẹ odju rhe dju ovwan she nẹ ota rẹ iyẹnrẹ esiri na rẹ ovwan nyori na re ghwoghwo kẹ akpọ na ejobi re na fiki rẹ oye a vwo reyọ Pọl mu ọyinkọn na.

Ẹvwọphia 2:17

Ohwo ro vwo erhọn, e jo nyo obo rẹ Erhi na ta kẹ ishọshi na. Ohwo ro phi kparobọ kẹ me vwẹ mana re sinu rhabae na kẹ, ke mẹ vwẹ ubioragha ọfuanfon kẹ, re si odẹ ọkpokpọ phihọ rẹ ohwo ọfa sa riẹ-ẹn jokpa rẹ ohwo ra vwerọ kẹ ọvo.

Ẹvwọphia 3:12

Ohwo ro phi kparobọ, ki mi che vwo ru uchivwo vwẹ evun rẹ uwevwi rẹ Ọghẹnẹ mẹ; e rhe se ghwie no bẹdẹ-ẹ, ki mi si odẹ rẹ Ọghẹnẹ mẹ vwọ tamuo, kugbe odẹ rẹ orere rẹ Ọghẹnẹ mẹ na, Jerusalẹm Ọkpokpọ na ro nẹ obọ rẹ Ọghẹnẹ rọ hẹ obo odjuvwu rhe otọ na, kugbe odẹ mẹ ọkpokpọ na.