Aizaya 45:6 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

⁶ rere ihwo vwọ riẹn, nẹ ẹvacha rẹ ọnre rhe nẹ obuko ọnre rhe nẹ, ọfa rọ ba vwẹ gbe hẹrọ-ọ. Mẹvwẹ Ọrovwohwo na, o gbi vwo ọfa-a.

Aizaya 45:6 ပူးပေါင်းရင်းမြစ်များ

Une rẹ Ejiro 46:10

Fọ gbiẹi, wọ riẹn nẹ Mẹvwẹ Ọghẹnẹ. Mẹvwẹ a kpare kpenu vwẹ ohri rẹ ẹgborho na, Mẹvwẹ a kparẹ kpenu vwẹ akpọ na!

Une rẹ Ejiro 83:18

Jẹn ayen riẹn nẹ wọwẹ ọvo kpoi, rẹ odẹ rọye Ọrovwohwo na, ri Me Kpenu vwẹ enu rẹ kpọ na ejobi.

Aizaya 11:9

Ayen cha wan ohwohwo oma-a vwe ugbenu ọfuanfon mẹ-ẹ; kidie akpọ na cha vọn vẹ erianriẹn rẹ Ọrovwohwo kirobo rẹ ame vọn urhie na.

Aizaya 37:20

Eriyin Asakiephana, E Ọrovwohwo Ọghẹnẹ rẹ avwanre, sivwi avwanre nẹ obọ rọye, rere uvie rẹ akpọ na ejobi vwọ riẹn nẹ wọwẹ ọvo kpoi re hẹ Ọrovwohwo.

Aizaya 43:10

Ovwan iseri mẹ, eriyin Ọrovwohwo tare, kugbe odibo mẹ re me jẹreyọ na, wo vwọ riẹn vwo se vwẹ gbuyota wọ vwọ mrẹ vughe nẹ Mẹvwẹ ọye Tavwe Me ke herọ ya je ma eghẹnẹ vuọvo-o, eye ọfa ra je cha ma vwe ọbuko mẹ herọ-ọ.

Aizaya 44:6

Enẹ Ọrovwohwo tare nẹ, Ovie rẹ Izrẹl vẹ Ọtan rọye Ọrovwohwo rẹ otuofovwi na: Mẹvwẹ ọ rẹ ẹsosuọ Mẹvwẹ ọ rọ ka oba Ọghẹnẹ ọfa gbe herọ vrẹn vwẹ-ẹ.

Aizaya 45:5

Mẹvwẹ Ọrovwohwo na, ọfa gbe herọ-ọ, Ọghẹnẹ ọfa rọ ba vwẹ gbe herọ-ọ; Me vwẹ amwa rhuo we, dede na wọ riẹn vwẹ-ẹ,

Aizaya 47:8

Asakiephana gbe nyo Ọnana, wọwẹ rọ guọnọ ojevwe, ro tidia vwẹ egbemọphẹ rọ ta vwẹ udu wẹn, Mẹvwẹ, ohwo ọfa gbi te vwe-e, Mi gbi tidia kerẹ ayeuku-u ayen riẹn ọdavwe re emọ ri ghwru-u.

Aizaya 49:26

Mi ru otu ri shenyẹ wẹn vwọ re uvwo rẹ omobọ rayen, ọbara rẹ omobọ rayen ko che mu ayen kere udi. Etiyin ihwo ejobi ke riẹn nẹ Mẹvwẹ Ọrovwohwo Osivwi wẹn, Ọtan wẹn, Ọgba Ọvuọvo ri Jekọp.

Aizaya 59:19

Ọtiọye na kẹ ayen cha djẹ oshọ rẹ Ọrovwohwo nẹ obuko ọnre rhe, urinrin rọye nẹ ẹvacha rẹ ọnre rhe, ọ cha rhe kerẹ uto rọ dje ọkẹre rẹ odju rẹ Ọrovwohwo muẹ vwọ djẹ.

Izikiẹl 38:23

Ọtiọye ke me cha vwẹ ọrho mẹ vẹ ẹfuọn mẹ phia ra da riẹn vwẹ vwẹ irharo rẹ ẹgborho buebu. Etiyin ayen ke cha riẹn nẹ mẹvwẹ Ọrovwohwo na.

Izikiẹl 39:21

Ke me vwẹ urinrin mẹ vi vwẹ ohri rẹ ẹgborho na, ẹgborho na ejobi ke cha mrẹ orhiebro mẹ ri che bru, kugbe obọ mẹ re me ghwẹ kpahe ayen.

Joẹl 2:27

Ku wọ cha riẹn nẹ Me hẹ uherevie rẹ Izrẹl, nẹ Mẹvwẹ, Ọrovwohwo na, mẹvwẹ Ọghẹnẹ wẹn ọfa gbe herọ chọ vwẹ ra-a. A gbe cha vwẹ oma vo ihwo mẹ ọfa-a.

Malakae 1:11

Kidie nẹ evacha rẹ ọnre re te eshe kpotọ rọye odẹ mẹ re cha rho vwẹ ohri rẹ ẹgborho na ejobi, vwi kasan kasan ejobi ọye a da torhẹ insẹns kẹ odẹ mẹ, kugbe omamọ rẹ ẹkpẹvwẹ rọ fonrọ; kidie odẹ mẹ ọrhuarho vwẹ ohri rẹ ẹgborho na, eriyin Ọrovwohwo rẹ otuofovwi na tare.