Aizaya 1:23 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

²³ Isun wẹn ihwo rẹ okpetu ayen igbeyan rẹ iji. ọvuọvo guọnọ udi ẹriọ ayen mia djẹ nene ẹse? Ayen chochọ rẹ emephrorivwi e karohọ oviẹ rẹ ayeukuu.

Aizaya 1:23 ပူးပေါင်းရင်းမြစ်များ

2 Ikun rẹ Ivie 36:14

Irherẹn ride na ejobi kugbe ihwo na rhe vwo esegbuyota-a, ayen de nene ẹgua rẹ ẹgborho na, ayen de gbe uwevwi rẹ Ọrovwohwo ro ru fon vwi Jerusalẹm ẹgua.

Ẹyano 23:8

Wọ ria udi-i, kidie udi rhuẹ ohwo ẹro, o mi rhe ku orhiẹn rẹ ọvwata rhẹriẹ.

Isẹ 17:23

Ohwo umwemwu dia obuko ria udi nẹ ọ me rhẹriẹ ẹdjọ.

Isẹ 29:24

Ugbeyan rẹ oji tuoma rẹ obọ rọye; o nyo ekan ra harhọ na ẹkẹvuọvo ọ ta phia-a.

Aizaya 1:17

yono emu esiri ru; guọnọ ọsoso, siobọ nẹ oshenyẹ, chochọ rẹ ọmọphrorivwi re wọ rẹ kẹ ayeuku.

Aizaya 1:18

Mọ vwo ọke na re avwanre jẹn iroro kugbe; ọtiọye Ọrovwohwo tare ọ da dianẹ imwemwu wẹn họhọ isene, e cha họhọ ẹton rẹ ogegede owenẹ evwanre kerẹ ododo e cha họhọ ukpọyibo.

Aizaya 1:22

Idọnọ wẹn hirhe oma phihọ isọn rẹ igho a vwẹ ame gua wain wẹn.

Aizaya 28:14

Vwẹ ọtiọye na we nyo ota rẹ Ọrovwohwo na, ovwan ejehwẹ na, ri sun ihwo nana vwi Jerusalẹm!

Aizaya 3:14

Ọrovwohwo o mu ẹdjọ phihọ eguo re, ọ vẹ ekpako na kugbe isun rẹ ihwo rọye. We re ghwọrọ ogba ri vain na, ekuakua re ivwiogbere na hẹ uwevwi wẹn.

Aizaya 30:1

Ekan kẹ emọ ri gbe ozighi, eriyin Ọrovwohwo tare, ri ruẹ obo rẹ ayen ta phihọ otọ, yẹ ẹkẹvuọvo ọ dia ọmẹ-ẹ; re gba oma koko, ẹkẹvuọvo yọ dia ọ rẹ erhi mẹ-ẹ, rere ayen mrasan vwẹ umwemwu ba umwemwu,

Aizaya 33:15

Ohwo rọ yan oyan re ọvwata rọ ta ota re ọsoso, ohwo ro je erere re oshenyẹ fia, ro phorho abọ rọye, ro vwo je udi ẹriọ, rọ vwe obọ di erhọn ro vwo jẹ ikun re ọbara re hweri enyo, ro rhurhu ẹro rọye ro vvvo je uniovwo eno

Aizaya 5:23

ri siobọ nẹ ọ rọ reabe fiki rẹ udi ẹriọ, ayen mi mie ọvwata ase rọye!

Aizaya 65:2

Me bẹre abọ mẹ vwẹ ẹdẹ na ejobi vwọ kẹ ihwo ri gbe ozighi, re yan phihọ idjerhe ro je yovwo, ri nene ona rẹ evun rayen ọvo,

Jerimaya 22:17

Ẹkẹvuọvo wọ vwẹ ibiẹro vẹ udu vwọ kẹ erere ọchọchọ ọvo, vwo sun ọbara rẹ evwata te otọ, ji vwo ru oshenyẹ vẹ ozighi.

Jerimaya 32:32

Fiki rẹ umiovwo rẹ emọ rẹ Izrẹl vẹ emọ ri Juda ejobi rẹ ayen ruru vwọ nẹrhẹ ovwẹ phihọ ophu–ivie rayen vẹ isun rayen, irherẹn rayen vẹ emraro rayen, ihwo ri Juda vẹ ihwo re dia Jerusalẹm.

Jerimaya 4:17

Ayen yan riariẹ phihọ kerẹ ihwo re rhẹrẹ aghwa fikiridie o ru vwe chọ , eriyin Ọrovwohwo tarẹ.

Jerimaya 5:5

Mi bru ihwo ride ra, re me je ta kẹ ayen, kidie ayen riẹn idjerhe rẹ Ọrovwohwo, kugbe urhi rẹ Ọghẹnẹ rayen ẹkẹvuọvo ayen ejobi koko vwirhi urhekpe na, ayen da sanvwe ejọrọn na vwie.

Jerimaya 5:6

Eriyin na okpohrokpo che nẹ aghwa rhi ri hwe ayen, ubido che nẹ atọn cha rhe ghwọrọ ayen. Edjẹnẹkpo ra rhẹrẹ irere rayen, ohwo kohwo rọ ro uphephẹ ka sanvwọ ibribro, kidie ọyanchọ rayen buru gangan, eshe rayen rhoro gangan.

Izikiẹl 12:2

Ọmọ rẹ ohwo, wọ dia uherevie rẹ uwevwi ro muẹkpahe ihwo, ri vwo ẹro re vwọ mrorẹ, ẹkẹvuọvo ye mrorẹ-ẹ, ri vwo erhọn ri vwo nyo ẹme, yi nyo-o;

Izikiẹl 22:27

Isun rọye re hẹ uherevie rọye e họhọ ikpohrokpo re ria eranvwe ọkpokpọ, re rhaphiẹ ọbara, ayen ghwọrọ ihwo rere ayen vwo re erere rẹ eku.

Hosia 4:18

Usun rẹ egbaidi ayen ejobi kẹ igberadja ayen gbe; emu rẹ omaẹvuọ ayen ma guọnọ nẹ ọ rẹ urinrin rayen.

Hosia 5:10

Isun ri Juda da họhọ ihwo re kpare ughwru; enu rẹ ayen mi ku ophu mẹ phihọ kerẹ ame.

Hosia 9:15

Umwemwu kumwemwu rẹ ayen vwẹ oma phia vwi Gilgal; etiyin oma rẹ ayen wan tu vwe cha na. Fiki rẹ obrabra rẹ uruemu rayen ke me djẹ ayen nẹ uwevwi mẹ. Me gbe guọnọ ayen ọfa-a; isun rayen na ihwo rẹ okpetu.

Emọs 5:12

Kidie mi riẹn obo rẹ ogbeku rẹ ovwan bute, kugbe obo re imwemwu re ovwan rho te weẹ ro kpokpo evwata, re ria udi, rọ djẹ ọ rẹ akpọ bẹn nẹ anurhoro na.

Maika 3:11

Igbuyovwi rọye da udi tavwe ri ki brorhiẹ, irherẹn rọye yono fiki rẹ osa, emraro na hẹrhẹ igho re ke mraro, ye ayen vwẹ oma kpahe Ọrovwohwo ayen me ta, Ọrovwohwo na he uherevie rẹ avwanre-e? Emu umwemwu ọvuọvo che te avwanre oma-a.

Maika 3:9

Nyo ọnana, ovwan igbuyovwi rẹ uwevwi ri Jekọp kugbe isun rẹ uwevwi rẹ Izrẹl, rẹ ọsoso tuoma na ri kuẹ uyota ejobi rhẹriẹ,

Maika 6:12

Edafe rẹ ovwan vọnre vẹ ozighi; ihwo rẹ dia evun rẹ orere na vwọrọ efian, ẹrenvwe rẹ unu rayen vọnre vẹ ophiẹvwe.

Maika 7:3

Obo rayen hẹ emu umwemwu eruo, ayen nabọ ruo dẹndẹn; te osun te oguẹdjọ ra nọ ekpẹn rẹ udi, ohwo rode ra ta ota umwemwu rẹ erhi rọye guọnọre; kẹ enẹ ayen rhuo koko.

Zekaraya 7:10

we shenyẹ ayeuku-u, we shenyẹ ọmọphrorivwi-i we shenyẹ ọrharha-a, eyẹ ogbere-e, e jẹn ohwo ovuọvo jẹ iroro umwemwu kpahe omoni rọye vwẹ udu rẹ ovwa-an.

Malakae 3:5

Ki mi che si kẹre owẹ vwẹ orhiebro; ke me cha dia oseri rẹ okpakpa kpahe ebuepha na, kugbe igberadja na, kugbe otu ri duvwu iyori rẹ ogbarogba na, vẹ otu re ghwa otu re durhie iruo ria na, vẹ otu ri kpokpo eme-phrorivwi vẹ eyauku, otu ri gerẹ erhorha phihọ akakọ, ri jẹ oshọ mẹ ẹdjẹ na; eriyin Ọrovwohwo rẹ otuofovwi na tare.

Ukeri 22:7

Etiyin ekpako ri Moab vi Midian de vrẹn vẹ igho ra vwọ bọ epha vwẹ obọ rẹ ayen, ayen de te asan ri Balaam, ayen ke vuẹ ovuẹ ri Balak.

Matiu 21:13

Ọ da ta kẹ ayen nẹ, e siro nẹ, Uwevwi mẹ e se nẹ uwevwi rẹ ẹrhovwo; ẹkẹvuọvo we vwi ro ru unu rẹ iji.

Iyẹnrẹ Esiri ri Mak 11:17

O de yono, ọ da ta kẹ ayen, E siro jovwo, uwevwi mẹ e se nẹ uwevwi rẹ ẹrhovwo kẹ ẹgborho na ejobi? ẹkẹvuọvo ovwan vwi ro ru uwevwi rẹ iji.

Iyẹnrẹ Esiri ri Luk 19:46

tanẹ, E siro, Uwevwi mẹ hẹ uwevwi rẹ ẹrhovwo; ẹkẹvuọvo we vwiro ru unu rẹ iji.

Iyẹnrẹ Esiri ri Luk 24:27

O de mu phihọ nẹ Mosis rhe kugbe emraro na ejobi, ọ da fan otọ rẹ ẹbe efuanfon na ejobi kpahe oma rọye kẹ ayen.

Urhi Rivẹ 16:19

Ovwan chahe uyota na kuẹrhẹriẹ-ẹ; ovwan nẹ abọvo-o, ovwan ria udi-i, kidie udiẹriọ rhuẹ ohwo ẹro o mi ku orhiẹn rẹ ọvwata rhẹriẹ.

Jems 1:27

Omamọ rẹ egagọ ro jẹ ẹgua evwo vwẹ obaro rẹ Ọghẹnẹ rẹ avwanre kugbe Ọsẹ rẹ avwanre na ọ na, rere o mie te asan rẹ emephran orivwi kugbe eyauku re hẹ ukpokpogho, rere o rhe si oma rọye phrẹphrẹ nẹ etatọrọ rẹ akpọ na.

1 Samuẹl 8:3

Dede na emọ rọye yan nene idjerhe rọye-e, ẹkẹvuọvo esi rẹ erere kọye ayen nene; ayen da re udi ayen da bọvwọ ẹdjọ rhu.