1 Samuẹl 31:4 - BAIBOL ỌFUANFON NA RẸ ỌPHỌ RẸ AWANRE KUGBE ỌPHỌ ỌKPOKPỌ

⁴ Etiyin Sọl da ta kẹ ohwo rọ ghwa ekuakua rẹ ofovwi rọye, Yoro ọlọkọ wẹn ru wo duvwu uvwe fi, ọ rha dia eriyi-in otu rẹ upheruphe ki che duvwu uvwe fi, kẹ ayen cha vwẹ ovwẹ jodẹ. Ẹkẹvuọvo ọ rọ ghwa ekuakua rẹ ofovwi rọye na gbi yivwi ruo-o; kidie oshọ muro gangan. Ọtiọye na Sọl reyọ oda rẹ obọ rọye o de vwo duvwu oma rọye hwe.

1 Samuẹl 31:4 ပူးပေါင်းရင်းမြစ်များ

2 Samuẹl 1:1

Ri Sọl vwo ghwu nu, ọke ri Devid vwo rhivwi nẹ ihwehwe rẹ Amalẹk rhe, Devid da daji Ziglag ẹdẹ ivẹ.

2 Samuẹl 1:14

Devid da ta kẹ Mavọ oshọ vwo ju we emuo wọ vwọ riẹn obọ wẹn vwo hwe ohwo rẹ Ọrovwohwo vwo mu ovie?

2 Samuẹl 1:20

Wọ ta vwi Gat rẹ, we ghwoghwo vwẹ irhuvwu rẹ Ashkẹlọn rẹ; emetẹ ri Filistia da ghọghọ, emetẹ rẹ ihwo rẹ upheruphe na de mu oma kpenu.

2 Samuẹl 1:6

Emeghele rọ vuẹrẹ na da ta, Me de hẹ ugbenu ri Gilboa; etiyin Sọl da ghwoma nyẹ oshuẹ rọye, nighe, ihwo re gua ekpẹrẹ rẹ ofovwi vẹ iyesi vwọ kpahọ chacha,

2 Samuẹl 17:23

Ọke rẹ Ahitofẹl rhe vwọ mrẹ nẹ iroro rọ jẹre e vwi ro ru emu-u, ọ da rhuẹrẹ ekẹtẹkẹtẹ rọye, o de vrẹn o de kpo uwevwi rọye, vwẹ obo orere rọye, ọ da rhuẹrẹ uwevwi rọye phihọ o de churu ghwu, e de sho phihọ ushi rẹ ọsẹ rọye.

2 Samuẹl 21:12

Devid da yanran ra reyọ ibeku ri Sọl kugbe ọ ri Jonatan rẹ ọmọ rọye mie ihwo ri Jabesh Gilead ri cho ayen ne urhuvwu ri Betshan, asan rẹ ihwo ri Filistia de churu ayen si, vwẹ ẹdẹ rẹ ihwo ri Filistia vwo hwe Sọl vwi Gilboa.

1 Ivie 16:18

Ri Zimri vwọ mrẹ nẹ a reyọ orere na nure, o de kpo uwevwi ohẹrhẹ rẹ ovie, ọ da torhẹ uwevwi rẹ ovie ghene, o de ghwu,

1 Ivie 16:27

Asakiephana eyenre rẹ Omri ro chekọ ro ruru, ẹgba ro vwori, e rhe si ayen phihọ Ọbe rẹ Ikun rẹ Ivie rẹ Izrẹl?

1 Ikun rẹ Ivie 10:4

Etiyin Sọl da ta kẹ ọghwekpo rọye, Reyọ ọlọkọ wẹn ru wo duvwu vwe, ọ dia ọtiọye-e ihwo nana rẹ upheruphe na da rha vwẹ ovwẹ jehwẹ. Ẹkẹvuọvo ọghwekpo rọye se yivwi ruo-o; kidie oshọ muro gangan. Fiki rẹ ọtiọye na Sọl da reyọ ọlọkọ rọye o de vwo hwe oma rọye.

Iguẹdjọ 14:3

Ẹkẹvuọvo ọsẹ vẹ oni rọye da ta kẹ nẹ, Wọ mrẹ aye vwẹ usun rẹ emetẹ rẹ orua wẹ-ẹn, eyẹrẹ vwẹ usun rẹ ihwo rẹ avwanre-e, ru wọ ra vwọ reyọ aye ri Filistia ihwo re yanvwa-a? Ẹkẹvuọvo Samsin da ta kẹ ọsẹ vẹ oni rọye nẹ, Reyọ aye na kẹ vwẹ, fikiridie o je vwe gangan.

Iguẹdjọ 9:54

Etiyin o de bru okpakpa se emeghene rẹ ọshare rọ ghwa ewun rẹ ofovwi rọye, ọ da ta kẹ nẹ. Yoro ọlọkọ wẹn rere wo hwe vwe, rere ihwo vwo jẹ ta kpahe ovwẹ nẹ, Aye ri hwe re. Emeghene na da vwẹ egba nyẹ, o de ghwu

1 Samuẹl 14:6

Jonatan da ta kẹ emeghele rọ ghwa ekuakua rẹ ofovwi rọye na, Yanrhe, jẹn a wanvrẹn kpo obo unuofovwi rẹ ihwo rẹ upheruphe na; ọkeọvo Ọrovwohwo che ru iruo kẹ avwanre; kidie emuọvo sa da Ọrovwohwo obọ ji ro vwo sivwi-i owenẹ oburu eyẹ ọhavweree.

1 Samuẹl 17:26

Devid da ta kẹ ihwo ri mudia kẹrẹ, kidie e ru kẹ ohwo ro hwe ohwo re Filistia nana, ro de si ehwẹjẹ nẹ Izrẹl oma? Kono upheruphe nana ohwo ri Filistia nana, ro gbobọ se unuofovwi rẹ Ọghẹnẹ ri bẹdẹ na?

1 Samuẹl 17:36

Odibo wẹn hwe ikpohrokpo kugbe ikorhi; upheruphe nana ohwo ri Filistia kọ họhọ ọvo vwẹ usun rẹ ayen, kidie o gbobo se unuofovwi rẹ Ọghẹnẹ ri bẹdẹ na.

1 Samuẹl 26:10

Devid da ra, Kirobo rẹ Ọrovwohwo herọ na, Ọrovwohwo ọvo ri che phio hwe; eyẹ ẹdẹ rẹ ughwu rọye cha; eyẹ o che kpo ofovwi ọ me ghwọrọ

1 Samuẹl 31:5

Ọke rẹ ohwo ro ghwa ekuakua rẹ ofovwi rọye vwọ mrẹ nẹ Sọl ghwuru, o da je vwẹ oda rọye duvwu oma rọye hwe ọ vẹ ọye de ghwu.