Números 24:9 - Bible in Tzeltal de Oxchuc y Tenejapa

⁹ C'alal ya smejts'an sba ta xcuxel yo'tanic, jich yilel te bit'il león-choj: ma'yuc mach'a ya xjelaw ta stijel. Jelawen yutsil te mach'a ya sc'anbat bendición, ya me yich' castigo te mach'a ya sc'anbat castigo —xi' te Balaam.

Bible in Tzeltal Bachajón

⁹ Ya swuhts'an sba, ya spahcan sba hich te bin ut'il choj, hich te bin ut'il yantsilel choj, ¿mach'a ya stij hahchel? ¡Ayuc bayel bendición yu'un te mach'atic ya sc'ambat bendición, soc bohlobuc me sc'oblal te mach'a ya sbohlobtesbat ac'oblal! xchi.

Números 24:9 ပူးပေါင်းရင်းမြစ်များ

Génesis 12:3

Ya me cac'bey bendición mach'a jayeb te lec yo'tan awu'un. Te mach'a jayeb ma lecuc yo'tan awu'une, boloben me sc'oplal cu'un ya xc'ot. Ja'at me ta awenta te ya cac' bendición ta stojol spisil ants-winiquetic ta balumilal —xi' sc'oplal yu'un te Diose.

Génesis 27:29

Spisil ants-winiquetic ac'a yac' sbaic ta abatinel awu'un, soc spisil ta jchajp lum ac'a squejan sbaic ta atojol. Pasa ta mandal te awermanotaque, ac'a squejan sbaic ta atojol. Ma'yuc bendición ta stojol te mach'a ya scontroinate, ja' nax me ay bendición ta stojol te mach'a lec yo'tan awu'une, —xi'.

Génesis 49:9

Judá, te jnich'anate, jichat te bit'il alal león-choje. Ya xju' awu'un slumtayel, teme laj awo'tan ta sti'ele, jun awo'tan ya apajc'an aba, jichuc mamal león-choj, ma'yucat ta tijel.

1 Reyes 10:20

Ay lajchayeb sloc'omba león-chojetic cotajtic ta swaquebal ta cajalcaj te moibaletic, juju-jcojt' ayic ta juju-jejch'. Ma'yuc yan banti jich pasbil yu'un yantic ajwaliletic a te nactijibale.

2 Crónicas 9:18

Te muc'ul nactijibal ay ta mero sba te swaquebal ta caj moele, soc ay jun scajtijib yacan te muc' ajwalil te pasbil ta oro. Soc ay scajtijib sc'ab ta juju-jejch' te nactijibale, ta jujun sts'eel ay sloc'omba león-chojetic cojt'ajtic tey a.

Ester 6:13

La yalbey yaiy te yinam soc te yamigotac ta spisil te bila c'ot ta pasele, jich albotic yu'un: —Teme sts'umbal judio te Mardoqueo, te ma'yuquix awat'el yacat ta c'oele, ma xju' awu'un stsalel. Puersa me ja'at mero tsalbil ya xc'oat —xiic.

Job 41:10

Teme ay mach'a ya sjachbey slab yo'tane, ya xjajch' sc'ajc'al yo'tan yu'un; ma'yuc mach'a ya xju' yu'un ya spaj sba soc.

Salmos 122:6

Te ja'ex alaic soc awo'tanic: “Lamaluc me q'uinal ta atojol, ja'at Jerusalén; binuc nax me yo'tanic ta nainel te mach'atic c'uxat ta yo'tane.

Éxodo 23:22

Yan teme ya ach'uunbeyic ta melel te sc'ope, soc teme ya apas spisil te bit'il calojbeyexe, ya me jcontroin te mach'atic ya scontroinate. Ja' me jcontro ya xc'ot te mach'atic acontroe.

Isaías 31:4

Te Cajwaltic la yalbon: —Jich me c'oem te bit'il león-choj te smilojix jcojt' chij, te xujt' ma xiw yu'un te jcananetic yu'une, manchuc me ya stsob sbaic tel spisilic te yo'tanuc ya xiwtesic bael ta awe. Jich me ya xtal te Cajwaltic te Spisil ya xju' yu'une, ya xtal scoltay te lum yu'un ta wits Sión.

Miqueas 5:8

Tey ayic xan a te sts'umbal Jacob ta yolil bayal nacionetic, jich me c'oemic te bit'il león-choj ta yolil te ja'mal chambalametic, jich bit'il león-choj ta stojol te jtsojp chijetic. Teme ya xtal, ya me stsac soc ya me sjin, soc ma'yuc mach'a cuxul ya scoltay bael.

Números 22:12

Jich yu'un te Dios la yalbey te Balaam: —Ma me xbaat, ma me x'ac'anbon te ya cac'bey castigo te lume, melel jo'on cac'ojbey bendición —xi' te Diose.

Números 22:6

La', c'anbon castigo ta stojol, yu'un c'ax xan tulanic a te bit'ilotique. Jich wan ya xju' cu'un stsalel a te jichuque, te ya jnutstic loq'uel ta jlumaltic. Ya jna' teme bendición ya ac'anbey, o teme castigo ya ac'anbey, ya nix c'ot ta pasel a”, utaic me —xi'.

Números 23:24

Ja' in lum to ya xwilic jajch'el, jich ya xiwteswanic te bit'il león-choj; ma ba ya xcux yo'tanic ja' to teme ju' yu'un slajinel te bila stsacoje, ja' to teme ju' yu'un yuch'el xch'ich'el te bila lajem yu'une —xi' ta yalel te Balaam.

Números 24:10

Te c'alal la yaiy stojol Balac, bayal ilin ta stojol Balaam. La spac'ulay sc'ab yu'un, jich la yal: —Jo'on la quic'at tel yu'un ya ac'anbey castigo yu'un Dios.

San Mateo 25:40

“Jich me ya yal te muc' ajwalile: “Jamal ya calbeyex, te bit'il jich la apasbeyic jtuluc in to te quermanotaque, manchuc teme peq'uel ayique, jo'on la apasbonic c'oem abi”, ya me yut.

San Mateo 25:45

“Ja'uc me to, jich me ya yalbey: “Jamal ya calbeyex, te bit'il ma jichuc la apasbeyic jtuluc te mach'atic peq'uel ayique, jo'on te ma la apasbonic ta jtojole”, ya me yut.

Hechos 9:5

La yal te Sauloe: —¿Mach'aat a, Cajwal? —xi'. Jich la yal te mach'a yac ta c'ope: —Jo'on Jesuson te ya anutsone. Atuquel ya awuts'in aba te ya alombey ta teq'uel sni' te atojtesjibale —xi'.

Deuteronomio 30:7

Te Cajwaltic Dios ya me yac' c'otuc ta stojol acontroic ta spisil te bitic swenta castigo, soc ya me yac' c'otuc ta stojol te mach'atic ya snutsex soc sbolil yo'tanique.