San Juan 7:37 - Bible in Tzeltal de Oxchuc y Tenejapa

³⁷ Ja' bayal sc'oplal yu'unic te slajibal c'aal yu'un te q'uine. Jich ora te tejc'aj jajch'el te Jesuse. Tulan la yal: —Te mach'a ay ta taquinti'ile, ac'a taluc ta jtojol, ac'a yuch' te ja'e.

Nuevo Testamento Tzeltal de Amatenango

³⁷ Jaꞌ ben tulan skꞌoplal yuꞌunik te último kꞌaal yuꞌun te kꞌine. Te kꞌaal abi, te Jesuse tekꞌa jajchel, y tulan a kꞌopoj. Jich a yal: —Teme ay machꞌa takin yoꞌtane, a me taluk ta jtojol, a me tal yuchꞌ te jaꞌe.

Bible in Tzeltal Bachajón

³⁷ Ta slajibal sc'ahc'alel te q'uin te tulan sc'oblal, la stehc'an sba te Jesús, tulan la yal: Te mach'a taquin yo'tan, ac'a taluc ta jtojol soc ac'a yuch'.

San Juan 7:37 ပူးပေါင်းရင်းမြစ်များ

Nehemías 8:18

Te q'uin la spasic ta swenta te Diose, jalaj juqueb c'aal. C'alal to ta xjajch'ibal soc c'alal ta slajibal te q'uine, te Esdras jujun c'aal la yawtaybey yaiyic te sc'op Dios ts'ibubil ta slibroil te mandaliletic yu'un te Diose. Ta swaxaquebal c'aal la yich' pasel tsoblej te mero bayal yutsil sc'oplale, jich nix bit'il costumbre jajch'em ta pasele.

Salmos 143:6

Ya jtoy moel jc'ab ta atojol; taquejemix co'tan yu'un te ma jtaate, jich c'oemonix ya caiy te bit'il taquin lume.

Salmos 42:2

Taquin co'tan ta stojol Dios, ja' te Dios yu'un te cuxlejale. ¿Bi wan ora ya xtalon xan te ya jtejc'an jba ta stojol te Diose?

Salmos 63:1

Dios cu'un, ja'at Diosat cu'un. Spisil co'tan ya jleat, melel taquin co'tan ya caiy, ya jc'anat jichuc ja', Cajwal; mero spisil soc jcuxlejal ya jc'anat, jich bit'il taquin lumq'uinal te ma'yuc ya'lele, jich bit'il lumq'uinal te ma'yuc bi cuxul tey a.

Proverbios 1:20

Ta calleetic soc ta banti ya stsob sbaic te lume, te p'ijil-o'tanil ya yac' ta aiyel sc'op;

Proverbios 8:1

Te p'ijil-o'tanil yac ta c'op; te p'ijil jolol ya yac' ta aiyel te sc'ope.

Proverbios 8:17

Jo'on c'ux ta co'tan te mach'a c'uxon ta yo'tane, te mach'atic ya sleonic ya me staonic.

Proverbios 8:3

ya yac' sba ta aiyel ta xujc' ti'nailetic, ja' te ayic ta yochibal lum, jich ya yal:

Proverbios 9:3

La sticun criadaetic yu'un ta aw c'alal ta stoyolil te lume:

Cantares 5:1

Ochonix tel ta nichimaltic cu'un, ja'at jch'ielat, te quinamate. La quich'ix te mirra cu'un soc te perfumeetic cu'une, la jpasix prueba te chab cu'une, la cuch'ix te vino soc te leche cu'une. Ja'ex te jun co'tantique, we'anic soc uch'aic, uch'aic spisil te bi ya ac'anique.

Isaías 12:3

Ja' nix jich te ja'exe ya xju' ya xba awuch'ic soc sbujts' awo'tanic te sloq'uibja' yu'un colele.

Isaías 40:2

c'oponaic soc yutsil awo'tanic te mach'atic ac'bot yijq'uitayic te Jerusalén, soc albeya yaiyic: te mosoinel ta stojole, lajix sc'oplal, la stojix te faltaetic yu'une. La cac'beyix castigo ta jc'ab, ja' te buen tulan castigo la yich' yu'un spisil te smulique —xi'.

Isaías 40:6

Ay c'op la yich' alel: —Awunan —xi'. La jac' te jo'one: —¿Bi ya cal ta aw? —xoon. La yalbon: —Ja' te bit'il spisil ants-winiquetic, jichic nax bit'il ac, stalel ay yilel te nichim ta aquiltique.

Isaías 44:3

Melel ya me cac' oquinuc ja' ta jochol taquin q'uinal, bebe-ja'etic ya xc'ot ta bay te taquin q'uinale. Jo'on ya cac'bey yach'il xcuxlejal te ats'umbale, te bendición cu'une ya jticunbey ta stojol.

Isaías 55:1

Te Cajwaltic ya yal: —Ja'ex te taquin awo'tanique, la'ic, la' uch'aic ja'; ja'ex te ma'yuc ataq'uinique, la'ic, leaic trigo ta majt'anil, soc we'anic; leaic vino soc leche, ni ma'yuc ta tojel.

Isaías 55:3

La'ic ta jtojol, soc aiya awaiyic, aiybon awaiyic stojol te jc'ope, yu'un jich me ya xcuxinex. Te jo'one ya jpas trato ta sbajt'el q'uinal ta atojolic, jich me ya xc'ot ta pasel te bit'il caloj ta swenta xc'uxul co'tan ta stojol David.

Isaías 58:1

Te Cajwaltic la yalbon: —Ma xiwat ta aw, tulan me x'awunat, jich xatoyes ac'op te bit'il sc'op oq'ues. Coma te lum cu'un te ya spasic te mulile; coma te lum yu'un Jacob te jelawiquix bayal ta jtojole.

Jeremías 16:19

Cajwal, yipat co'tan soc jcanantaywanejat cu'un, ja' anjibalat cu'un ta ora nax yu'un te bila xiweltic sba te ya xtal ta jtojole. Ya me xtal ta atojol te nacionetique, ya xtalic ta sti'il balumilal, jich me ya yalbat: —Ja' nax lotil diosetic te la yu'uninic te jme'-jtatique te ma'yuc yutsil soc ni ma'yuc yu'el.

Jeremías 2:2

—Baan, albeya te lum Jerusalén, awtaya, swenta yu'un ya me yaiyic stojol ta lec: “¡Jich ya yal sc'op te Cajwaltique! Ya jna' te c'alal ach'ixat to a, jun awo'tan ta jtojol, te c'alal la quic' quinaminate, c'ux la awaiyon ta awo'tan. La ats'aclinon ta jochol taquin q'uinal, ja' te lumq'uinal te mero ma'yuc bila ya xju' ta ts'unel tey a.

Ezequiel 47:9

Ta bayuc ya xc'ot te ja'e, ya me xju' ya xcuxin bayal ta jchajp chambalametic, soc mero bayal me chayetic ya x'esmajic yu'un. Melel te ya'lel muc'ja' in to ya me sc'atp'un ta lequil ja' te ch'aal ja'e. Ja' yu'un ya xju' bayal bila ya xcuxinic tey a.

Levítico 23:36

Ta jujun c'aal ja' to c'alal ya sts'acaj te juqueb c'aal, ya me achiq'uic majt'anil swenta quich'jibal ta muc' jo'on te Ajwalilone. Ta swaxaquebal c'aal ya me apasic xan ch'ul tsoblej, ya me achiq'uic majt'anil swenta quich'jibal ta muc' awu'unic. Sjunal me c'aal te q'uine, ma me ayuc bila at'elil ya apasic a.

Levítico 23:39

“Ta yo'lajunebal c'aal sjajch'el te sjuquebal u, te c'alal la atsobiquix a te sit awawal-ats'unubic, ya me apasic juqueb c'aal q'uin swenta quich'jibal ta muc' jo'on te Ajwalilone. Soc ya me acux awo'tanic ta sbabial c'aal soc nix ta swaxaquebal c'aal.

Miqueas 6:9

Te Cajwaltic yac ta yiq'uel te lum, soc ja' me p'ijilil te lamalotic nax ta yaiyel stojole: —Aiya awaiyic ja'ex lum soc te jconsejeroetic awu'une.

Zacarías 9:15

Te Cajwaltic te Spisil ya xju' yu'un, ya me scanantay te mach'atic ay yu'une. Ja'ic me ya spech'ic ta teq'uel te j'ac'jimoch'etic soc te tonetic yu'un jimochile; soc ya me sbiq'uic c'oem te scontroique. Ya me yuch'beyic xch'ich'el jichuc vino, ya me snojes xch'ujt'ic a jich te bit'il ya yich' nojesel muc'ul taza, ya me yuch'ic jich te bit'il xulubil yu'un te scajtijib smajt'an te Diose.

Números 29:35

“Ta swaxaquebal c'aal, ya me apasic tsoblej te muc' sc'oplale, ma me ayuc at'el ya apasic a.

San Mateo 11:28

La'ic me ta jtojol ta apisilic ja'ex te lubenex yu'un te tulan at'ele soc te ijc'atsile. Jo'on ya cac'beyex acux awo'tanic.

San Mateo 3:3

Te j'alwanej yu'un Dios te Isaías sbiile, la sts'ibubey jilel sc'oplal te Juane: “Ya me xchicnaj aw ta jochol taquin q'uinal, te jich ya yale: ‘Chajbanbeyaic me sbe te Cajwaltique, toj me xajamic bael te sbee’ xi' me”, te xie.

San Mateo 5:6

“Bin nax me yutsil te mach'atic ayic ta wi'nal soc te taquin yo'tanic yu'un te bila toj ta pasele, te melel ya me xnojesbot ta yo'tanic te bila leque.

San Juan 1:23

La sjac' te Juane: —Jo'on ay ta jwenta te ya x'awunon ta jochol taquin q'uinale, jich bit'il la yal te Isaiase te j'alwanej yu'un te Diose: “Lec me xachajbanbeyic sbe te Cajwaltique”, te xie —xi' te Juane.

San Juan 14:6

Jesús la yalbey: —Jo'on te beone, te smelelilone, soc te cuxlejalone. Jtul ma'yuc mach'a ya xtal ta stojol Jtat, jo'on nax ta jwenta.

San Juan 4:10

Te Jesús la yalbey: —Te lajuc ana' stojol te majt'anil yu'un te Diose, soc te lajuc ana'bey sba te mach'a la sc'anbat ja'e, ja'at la ac'anbon te jichuque. Jich me ya cac'bat te ja' te cuxul stuquele —xi'.

San Juan 4:11

Jich la yal te antse: —Tatic, ma'yuc bila ya aloq'ues tel a te ja'e, soc mero najt' coel te pozoe. ¿Banti ya ata ya awal te ja' te cuxul ya awac'bone?

San Juan 4:14

Yan te mach'a ya yuch' te ja' ya cac' jtuquele, sbajt'el q'uinal ma xtaquej yo'tan yu'un. Melel te ja' ya cac' jtuquele, jich bit'il sloq'uib ja' ya xc'ot ta yo'tan. Ya me xcuxin sbajt'el q'uinal yu'un —xi' te Jesuse.

San Juan 5:40

ja'uc me to, ma x'ac'anic te ya xtalex ta jtojole, yu'un ma x'ac'anic te ya xcuxinexe.

San Juan 6:35

Jesús jich la yalbey: —Jo'on wajon yu'un te cuxlejale. Te mach'a ya xtal ta jtojole xujt' ma xwi'naj yo'tan; soc te mach'a ya xch'uunone, xujt' ma xtaquej yo'tan.

San Juan 6:37

Spisil mach'a ya yac'bon te Jtate ya xtal ta jtojol. Te mach'a ya xtal ta jtojole ma ba jch'oj loq'uel.

San Juan 6:55

Melel te jbaq'uetale, ja' mero we'elil soc te jch'ich'ele ja' ya sc'an ya awuch'ic stuquel.

San Juan 7:28

Te c'alal yac ta p'ijubteswanej ta templo te Jesuse, tulan caj ta c'op: —¿Melel bal te ya ana'bon jba soc te ya ana' te banti talemone? Ja'uc me to, ma jtuquel-o'tanuc te talemone. Ja' ticunbilon tel yu'un te mach'a smelelil ya xc'opoje te ma x'ana'beyic sbae.

1 Corintios 10:21

Ma xju' te jun buelta ya awuch' te bila ay ta vaso yu'un te Cajwaltique, soc ta yan buelta ya awuch' te bila ay ta vaso yu'un te pucujetique. Soc ma xju' te jun buelta ya xwe'at ta bay Smesa te Cajwaltique, soc ta yan buelta ya xwe'ex ta smesa te pucujetique.

1 Corintios 10:4

Soc spisilic la yuch'ic te ja' yu'un te Diose, melel la yuch'ic te ja' loc' tel ta ton yu'un te Diose, joinbilic ta beel yu'un. In te tone, ja' ix te Cristoe.

1 Corintios 11:25

Ja' nanix jich te c'alal laj yo'tanic ta we'ele, la stsac ta sc'ab te vasoe soc jich la yal: “Ja' in vaso to, ja' yach'il trato te ya sta yip a ta swenta te jch'ich'ele. Jujun buelta te ya awuch'ique, pasaic ta swenta jna'jibal”, xi'.

1 Corintios 12:13

Yu'un te c'alal la quich'tic ja' ta swenta te Espiritue, jich jun nax jbaq'uetaltic c'ootic ta jpisiltic. Manchuc teme judioetic o teme jyanlumetic o ayic ta mosoil o teme libre ayique, jun nax te Ch'ul Espíritu te la quich'tic ta jpisiltique.

Efesios 5:18

Ma me xyacubex yu'un te vinoe, te melel swenta abolteselic stuquel. Ja'uc me nojeluc ta awo'tanic te Ch'ul Espiritue.

Apocalipsis 21:6

Soc la yalbon xan: —Ju'ix cu'un. Jo'on Alfaon, jo'on Omegaon. Ayon ta xjajch'ibal soc ayon ta slajibal. Te mach'a taquin yo'tane, smajt'an me ya cac'bey yuch' te sloc'ja' te ya yac' cuxinele.

Apocalipsis 22:1

Te ch'ul abate la yac'bon quil muc'ja' te ya yac' cuxinele. Xlemet nax jich bit'il cristal. Tey loc' tel ta bay smuc'ul nactijib te Diose soc te Alalchije,

Apocalipsis 22:17

Te Ch'ul Espíritu soc te yinam te Alalchije ya yalic: “La' me”, xiic. Te mach'a ya yaiy stojol, jich ac'a yal uuc: “La' me”, xiuc me uuc. Te mach'a taquin yo'tane, ac'a taluc teme ya sc'an yo'tane. Smajt'an ya x'ac'bot yuch' te ja' te ya yac' cuxinele.