San Juan 17:25 - Bible in Tzeltal de Oxchuc y Tenejapa

²⁵ Jtat, te toj awo'tane, ma sna'bat aba te mach'atic ayic ta swenta te balumilale. Yan te jo'one ya jna'bat aba jtuquel. Te mach'atic xch'uunejonixe sna'ojiquix te ja'at la aticunon tele.

Nuevo Testamento Tzeltal de Amatenango

²⁵ Jtat, te lek awoꞌtane, te machꞌatik ayik ta skuenta te balmilale ma snaꞌbeyat aba. Pero te joꞌone ya jnaꞌbeyat aba. Te machꞌatik xchꞌuunejonixe snaꞌojikix te jaꞌat la atikonon tale.

Bible in Tzeltal Bachajón

²⁵ Jtat te toj awo'tan, ma ba sna'beyejat aba te mach'atic ayic ta bahlumilal, pero ho'on ya jna'bat aba, soc te mach'atic li' ayic sna'ojiquix te ha'at la aticonon tale.

San Juan 17:25 ပူးပေါင်းရင်းမြစ်များ

Isaías 45:21

Ac'a c'opojicuc soc ac'a stejc'an sbaic ta yaq'uel pruebaetic, ac'a sjojc'obey sbaic, teme jich yo'tanique: “¿Mach'a la sneeltesbey sc'oplal ta alel ta xjajch'ibal in bitic to? ¿Mach'a la yalbey sc'oplal c'alal ta namey tel?” xiuquic me. ¿Ma bal jo'ucon te Ajwalilone? Ma'yuc yan Dios jich bit'ilon. Ta jtojol ma'yuc yan Dios te ya yaiy tsalaw soc te ya xcoltaywane.

San Mateo 11:27

Soc la yal xan: —Te Jtate yac'ojbon ta jc'ab spisil te bitic aye. Ma'yuc mach'a ya sna'bey sba te Nich'anile; ja' nax ya sna'bey sba te Tatile. Soc ma'yuc mach'a ya sna'bey sba te Tatile; ja' nax stuquel te Nich'anile, soc uuc te mach'a jayeb ya yac'bey sna'bey sbae.

San Mateo 16:16

La yal te Simón Pedroe: —Ja'at Cristoat te Snich'anat te cuxul Diose —xi'.

San Lucas 10:22

Soc la yal xan: —Te Jtate yac'ojbon ta jc'ab spisil te bitic aye. Ma'yuc mach'a ya sna' stojol te mach'a a te Nich'anile. Ja' nax ya sna' stojol te Tatile. Soc ma'yuc mach'a ya sna' stojol te mach'a a te Tatile. Ja' nax ya sna' stuquel te Nich'anile, soc uuc te jayeb mach'a ya yac'bey sna'bey sbae —xi' te Jesuse.

San Juan 1:18

Te Diose, jtul ma'yuc mach'a yilojbey sit; ja'uc me to, te jip jtul Snich'an te jun nax ay soc te Tatile, la yaq'uix jna'beytic sba te Diose.

San Juan 15:21

Spisil in to ya spasbeyex ta jo'on jwenta, melel ma sna'beyic sba te Mach'a la sticunon tele.

San Juan 16:27

melel te Jtate c'ux ya yaiyex ta yo'tan. Ja' c'ux ya yaiyex ta yo'tan yu'un te bit'il c'uxon ta awo'tanique soc te bit'il xch'uunej awo'tanic te talemon ta stojol te Diose.

San Juan 16:3

Jich ya spasic yu'un xujt' ma sna'beyic sba te Jtate, soc ma sna'bonic jba uuc.

San Juan 16:30

Ta ora to la jna'tiquix te spisil ay ta awo'tan. Jich ma puersauquix te ay mach'a ya sjojc'obat xane. C'otix ta co'tantic te talemat ta stojol te Diose —xiic.

San Juan 17:11

“Te jo'one ma ba ya x'ainonix ta balumilal. Te ja'ique ya xjilic ta balumilal stuquelic. Yan te jo'one ya xtalonix ta atojol. Ch'ul Jtat, te mach'atic awac'ojbone, canantaybon me ta awu'el swenta yu'un jun nax me ya xc'otic ta spisilic, jich te bit'il jun nax ayotique.

San Juan 17:18

Jich te bit'il la aticunon tel ta balumilale, ja' nanix jich te mach'atic cu'une ya jticun bael uuc.

San Juan 17:21

Jun nax me ac'a c'otuc ta spisilic, Jtat, jich te bit'il jun ayotique. Soc jun nax me ac'a c'otuc ta jwentatic, swenta yu'un ya me xc'ot ta yo'tanic te mach'atic ayic ta balumilal te ja'at la aticunon tele.

San Juan 17:23

Te jo'one ainemon ta yo'tanic. In te ja'ate ja' ainemat ta co'tan uuc, swenta yu'un jc'axel me jun ya xc'otic. Tey me ya sna'ic stojol a te mach'atic ayic ta balumilal te ja'at la aticunon tele, soc te c'ux ya awaiy ta awo'tan te mach'atic xch'uunejonixe, jich bit'il te c'ux ya awaiyon ta awo'tane.

San Juan 17:3

Ja' ay xcuxlejalic sbajt'el q'uinal yu'un te ya sna'bat aba ja'at te jip jtul mero Diosate, soc te ya sna'beyic sba uuc te Jesucristo te la aticun tele.

San Juan 17:8

Melel la calbeyix yaiyic te bila awalojbone. La yich'iquix ta muc', soc c'otix ta yo'tanic te talemon ta atojol ta melele. La xch'uunix yo'tanic te ja'at la aticunon tele.

San Juan 3:17

Ma ja'uc la sticun tel Snich'an ta balumilal yu'un te ya yac' ta lajel yu'un smulic te ants-winiquetique. Ja' la sticun tel yu'un te ya scoltaye.

San Juan 6:19

Ay niwan jo'eb o waquebuc kilómetro sbeeneliquix ta barco a te la yilic Jesús te yac ta beel tel ta ba mar. Jich noptsaj tel tey a ta bay te barcoe. Xiwic yu'un.

San Juan 7:29

Te jo'one ya jna'bey sba, te melel talemon ta stojol soc ja' la sticunon tel —xi' te Jesuse.

San Juan 8:19

Jich yu'un la yalbeyic: —¿Banti ay te atate? —xiic. La yal te Jesuse: —Te ja'exe ma x'ana'bonic jba soc ja' nanix jich ma x'ana'beyic sba uuc te Jtate. Teme ya ana'bonic jbae, ja' nix jich ya ana'beyic sba uuc te Jtate —xi'.

San Juan 8:55

Ja'uc me to, ma x'ana'beyic sba. Yan te jo'one, ya jna'bey sba. Te yacuc cal te ma jna'bey sbae pajal jpas-lototic ta jpisiltic te jichuque. Ja'uc me to, ya jna'bey sba ta mero melel. Soc ja' ya quich' ta muc' te bila ya yale.

Hechos 17:23

Melel te c'alal c'axon tel ta yilel te ch'uunjibaletic awu'unique, la jta jun scajtijib majt'anil te banti jich ts'ibubile: “Ja' yu'un te Dios te ma na'biluc sbae”, te xi' te ts'ibubile. Jich yu'un te Dios te awich'ojic ta muc' te ma x'ana'beyic sbae, ja'ix te mach'a ya calbeyex sc'oplale.

Hechos 26:18

Yu'un ya me xc'o ajambey sitic, swenta yu'un ya yijq'uitayic te ijc' q'uinale, jich me ya xbeenic ta saquil q'uinal. Soc swenta yu'un ma me ayuc xan ta sc'ab te Satanase, ja' me ya yac' sbaic ta sc'ab te Diose. Jich me ya xch'uunonic, soc ya me jpasbey perdón yu'un te smulique, soc ya me yac' ainuquic tey a ta banti ainemic te mach'atic ch'ultesbilique”, xi' ta yalbelon te Jesuse.

Romanos 1:28

In te bit'il ma la sc'an sna'beyic sba ta melel te Diose, jich ijq'uitayotic yu'un Dios. Jich jowejic ta jyalel, ja' la spasic te bila ma jichuc ya sc'an pasele.

Romanos 3:11

Jtul ma'yuc mach'a c'oem ta yo'tan. Jtul ma'yuc mach'a ya sle te Diose.

Romanos 3:26

Ta ora to, Dios la yac' ta ilel te stojil chajbanel yu'un jmultic swenta yu'un tey me ya xchicnaj ta jamal te bit'il toj yo'tan stuquele. Soc te mach'a ya yac' xch'uunjel yo'tan ta swenta te Jesuse, ja' toj ya x'ilot yu'un te Diose.

1 Corintios 1:21

Ja'uc me to, ta swenta sp'ijil te Diose, te mach'atic ayic ta balumilal ma la sna'beyic sba Dios ta swenta nax te sp'ijilique. Ja' lec la yaiy ta yo'tan Dios te ya scoltay te mach'atic ya xch'uunic te sc'ope, manchuc teme jowil c'op nax c'oem ta yo'tanic te yantique.

1 Corintios 15:34

Wiq'uiluc me asitic jiche. Ma me xale amulic. Melel ay cha'oxtulex te ma ba ana'ojbeyic sba te Diose. Jich ya calbeyex swenta yu'un jich me ya xq'uexawex a.

2 Corintios 4:4

Melel te dios yu'un in balumilal to, sc'atp'unej ta ma'sit te mach'atic ma ba xch'uunejic te Diose. Jich ma xju' ya sna'ic stojol xujt'uc. Swenta yu'un jich ma xyilbeyic xojobil yutsilal te lec yach'il c'op yu'un te Cristoe, melel te Cristoe pajal yilel soc te Diose.

2 Tesalonicenses 1:8

Jich me ya xtal yac'bey castigo te mach'atic ma la sna'beyic sba te Diose soc te ma la sc'an xch'uunic te lec yach'il c'op yu'un te Cajwaltic Jesucristoe.

Hebreos 8:11

Ma yejt'aluc ya sp'ijubtes xan sbaic, ni ja'uc soc te sjo'taque, ni ja'uc soc te yermanotaque. ‘Na'beya sba te Cajwaltique’, ma xiuc xan ta yalbel sbaic, te melel spisilic ya me sna'bonic jba te muc' biq'uitetique.

1 Juan 1:9

Yan teme jamal ya caltic te jmultique, jna'ojtic stojol te jich ya spasbotic perdón te Diose, soc ya spocbotic loq'uel spisil ta jten te sbolil co'tantique. Yu'un toj yo'tan soc jun yo'tan stuquel te Diose.

Apocalipsis 13:8

Spisil te mach'atic nainemic ta balumilale la slajin sbaic ta stojol te muc'ul chambalame, ja' te mach'atic ma nacaluc sbiilic ta lista swenta cuxinel te yich'oj te Alalchij te laje, te la yich' ts'ibuyel c'alal to te bi ora pastaj te ch'ulchan balumilale.

Apocalipsis 16:5

La caiy stojol c'opoj te ch'ul abat te swentainej te ja'etique. Jich la yal: “Toj awo'tan atuquel, Cajwal te Ch'ul Diosate, te atalel ayat ta namey soc ta sbajt'el q'uinal, te melel la awaiyix chajbanwanej.