Josué 7:6 - Bible in Tzeltal de Oxchuc y Tenejapa

⁶ Te Josué soc te mamaletic yich'oj yat'elic yu'un Israel, la xch'i' sc'u'ic yu'un, la yaq'uic tan ta sjolic swenta seña xc'uxul mel-o'tan, soc la stinan sba coel c'alal ta lum ta stojol te cajón yu'un te Cajwaltic, ja' to c'alal ch'ay bael te c'aale.

Bible in Tzeltal Bachajón

⁶ Ha yu'un te Josué soc te mamaletic yu'un Israel la sch'i' sc'u'ic yu'un soc la spahcan sbahic ta lum ta stojol te scaxahul te chapbil-c'op yu'un Jehová yalel c'alal ta stibiltayel, soc la yaq'uic tan ta sjolic.

Josué 7:6 ပူးပေါင်းရင်းမြစ်များ

Génesis 37:29

C'alal tal yil te pozo te Rubén, ma ba la sta tey a te José. Bayal la smel yo'tan, la xch'i' sc'u' yu'un.

Génesis 37:34

Jich yu'un te Jacob la xch'i' sc'u' yu'un, la slap xch'ixal pac' yu'un mel-o'tan. Bayal c'aal la yoq'uetay te snich'ane.

2 Samuel 1:11

Te David soc te jayeb mach'atic sjoinej, la sjats sc'u'ic seña xc'uxul mel-o'tan.

2 Samuel 1:12

Jajch'ic ta oq'uel, bayal la smel yo'tanic yu'un te laj te Saúl soc te laj te snich'an, ja' te Jonatán, soc nix te bit'il laj ta tsalel te israeletic, te ja' soldadoetic yu'un te Cajwaltique. La scom swe'elic ja' to c'alal smalel c'aal.

2 Samuel 1:2

Pero ta yoxebal c'aal ay c'ot jtul winic jajch' ta campamento yu'un Saúl. Ch'i'umtic nax sc'u'-spac' soc la smuc sba ta ts'ubil lum, swenta seña mel-o'tan. C'alal jul ta stojol David, la spajc'an sba c'alal ta lum swenta yich'el ta muc' te David.

2 Samuel 12:16

Te David jajch' yalbey wocol Dios yu'un te alale, la scom swe'el, metsel ta lum a ya xc'ax yu'un te jujun ajc'ubale.

2 Samuel 13:19

Pero la yac' stanul c'ajc' ta sjol, la sjats te snajt'il c'u' slapoje. Xchebal sc'ab smojt'esej ta sjol, yac ta oq'uel bael ta xch'ixil be.

2 Samuel 13:31

Ja' yu'un te muc' ajwalil jajch', la sjats sc'u' swenta seña xc'uxul mel-o'tan soc la xchawan sba ta lum. Spisil te abatetic yu'un te tey ayic a, la xch'i' sc'u'ic uuc.

2 Reyes 22:11

C'alal la yaiy te muc' ajwalil te bila ya yal te libro yu'un mandalil, la xch'i' sc'u' yu'un.

2 Crónicas 34:19

C'alal la yaiy stojol te muc' ajwalil te bila la yal te libro yu'un te mandalile, la xch'i' sc'u' yu'un.

Esdras 10:1

Te c'alal quejel ta sc'oponel Dios ta templo te Esdras, soc oq'uel yac ta yalel ta jamal te falta staojic, c'ot ta stojol tsobol israeletic te xchapoj sbaique: winiquetic, antsetic, soc ch'in alaletic te yacalic ta tulan oq'uele. La stsob sbaic ta sts'eel.

Nehemías 9:1

Ta chaneb xcha'winic c'aal sjajch'el a te ue, te israeletic la stsob sbaic, yu'un ya scom swe'elic. La slapic ch'ixal pac' soc la yac' ts'ubil lum ta sjolic.

Ester 4:1

Te c'alal la yaiy te Mardoqueo te bila c'otix ta pasel, la xch'i' sc'u' swenta seña mel-o'tan, la slap ch'ixal pac' soc la smojt'es tanul c'ajc' ta sjol. Jajch' sbeentay te lume, yac ta tulan aw soc xc'uxul mel-o'tan.

Ester 4:3

Soc ta spisil ta juju-jpam q'uinal te banti c'ot sc'op soc te smandal te muc' ajwalile, bayal la smel yo'tanic te judioetique. La scom swe'elic, oq'uic, bic'tal-c'opojic, ay tsobolic la smejts'an sbaic ta stanul c'ajc' soc la slapic ch'ixal pac', jich la yaq'uic ta ilel te smel-o'tanique.

Job 1:20

Te Job la stejc'an sba, bayal xc'uxul mel-o'tan la yaiy. La xch'i' sc'u' yu'un, la sjox te stsotsil sjole, la squejan sba ta lum, la sc'opon Dios.

Job 2:12

Q'uejel to ayic a, la staic ta ilel te Job. Melel ma xna'bajix sba ta lec la yilic, ja' yu'un jajch'ic ta aw soc jajch'ic ta oq'uel. Mero bayal la smel yo'tanic. La xch'i' sc'u'ic yu'un, ta yoxebalic la swilesic moel ts'ubil lum ta toyol, soc la smojt'es ts'ubil lum ta sjolic.

Job 42:6

Ja' yu'un jc'axel me ya jsujt'esix co'tan, ya me jnajc'an jba ta tan soc ta ts'ubil lum —xi' te Job.

Lamentaciones 2:10

Te jtsobwanej-mamaletic ta Sión, ch'abalic nax, nacalic ta ts'ubil lum, ya yac' tan ta sjolic soc ya slapic ch'ixal paq'uetic. Te ach'ixetic ta Jerusalén ya snijan sbaic coel c'alal ta lum ta mel-o'tan.

Números 14:6

Te Josué soc Caleb te ja'ic xc'otuc yilic tel te q'uinale, la xch'i' sc'u'ic ta seña xc'uxul mel-o'tan.

Números 16:22

Ja'uc me to, la spajc'an sbaic, la stinan sba coel c'alal ta lum, jich la yalic: —Ja'at Diosat, te ya awac'bey xcuxlejal spisil ants-winiquetic, ¿tic' bal ya awilintay spisil lum a ta scaj nax smul te jtul winique? —xiic.

Números 16:45

—Loc'anic bael ta stojol te lume, ora nax me ya jlajin —xi' te Diose. Te Moisés soc Aarón la spajc'an sbaic, la stinan sbaic coel c'alal ta lume,

Hechos 14:14

Te c'alal la yaiyic stojol te Bernabé soc te Pabloe, la xch'i' sc'u'ic yu'un soc la sten sbaic ochel ta bay yolil te ants-winiquetique. Jich la yalbey yaiyic ta aw:

Josué 7:7

Jich la yal te Josué: —¿Cajwal, bistuc la ac'asesotic tel soc spisil te lum ta muc'ja' Jordán? ¿Yu'un bal li' ya awac'otiquix ta sc'ab a te amorreoetic te ya smilotic ta jyalele? ¡Teyuc laj jilucotic a ta bay jejch' ja' Jordane!

Apocalipsis 18:19

Soc la sjopic ts'ubilum, la sbusq'uin ta sjolic ta oq'uel yu'un te muc'ul lume. Bayal la smel yo'tanic soc la yoq'uetayic. Jich la yalic xan ta aw: “Mero obol sba te muc'ul lume. Ta swenta te sc'ulejale la sta sc'ulejalic spisil a te mach'atic ay sbarcoic ta mare. Ja'uc me to, ora nax laj ta spisil te lume”, xiic.

Jueces 11:35

Jich yu'un te c'alal la yile, la xch'i' sc'u' yu'un mel-o'tan, jich la yal: —¡Ay, cantsil-nich'an, mero ya x'oc' co'tan awu'un! Ja'at ta awenta te bayalix ayon ta mel-o'tan awu'un. Yu'un ay bi la jchap ta stojol Cajwaltic, jich yu'un ya me xc'ot ta pasel cu'un yo'tic —la yut.

Jueces 20:26

Jich yu'un ta spisil te soldadoetic yu'un Israel soc spisil te lume, cha'bajt'ic ta Betel ta oq'uel ta stojol te Cajwaltique. Sjunal c'aal c'ax yu'unic, ma ba we'ic, soc la yac'beyic majt'anil la xchic'beyic Cajwaltic, soc la smilic majt'anil swenta lamal-o'tanil.

Jueces 21:2

Ja'uc me to, la stsob sbaic ta Betel ta stojol Dios ja' to c'alal och ajc'ubal, la yoc'tay sbaic, jich la yalic ta stojol:

1 Samuel 4:12

Pero ay jtul soldado sts'umbal Benjamín te ju' yu'un te loc' ta anel ta yolil te guerrae. Bajt' ta animal, jun nax c'aal c'ot c'alal ta Silo, jatsemtic sc'u' soc yac'oj lum ta sjol swenta seña mel-o'tan.