Jeremías 51:5 - Bible in Tzeltal de Oxchuc y Tenejapa

⁵ Te Israel soc Judá, manchuc me staoj smulic ta jtojol, soc teme nojel ta mulil yu'unic te slumale, ma ba pijt'esbilic cu'un, jo'on Ajwalilon, te Spisil ya xju' cu'une, te Ch'ul Dioson yu'un Israel.

Bible in Tzeltal Bachajón

⁵ Como te Israel soc te Judá ma ba ihquitaybilic yu'un te Dios yu'unic, te Jehová te scuentahinej spisil, aunque noj ta mulil te sq'uinalic ta scontrahinel te Ch'ul Dios yu'un Israel.

Jeremías 51:5 ပူးပေါင်းရင်းမြစ်များ

1 Reyes 6:13

Ja' te ya me x'ainon ta yolil te israeletic, soc ma ba ya jpijt'es te Israel te lum cu'une —xi'.

2 Reyes 21:16

Te Manasés la sjoin te yajwal Judá ta spasel te muliletic. Soc ay to xan yan a te bitic amen la spasbey ta sit te Cajwaltique: bayal mach'atic tojol la smalbey xch'ich'el. Noj c'oem ta bayal ch'ich' yu'un ta sjunal te Jerusalén.

Esdras 9:9

Manchuc me ayotic ta mozoinel, ma ba la apijt'esotic ta banti ayotic ta mozoile. La awac' quiltic yutsil awo'tan ta stojol te muc' ajwaliletic yu'un Persia, la ana' yo'bolil jbatic, la awac' jcuxlejaltic yu'un xcha'pasel xan te templo awu'un te banti jineme. Ja'at la awac'botic coltayel ta sq'uinal Judá soc ta lum Jerusalén.

Salmos 94:14

Te Cajwaltic ma ba ya spijt'es te lum yu'un; ma xyijq'uitay jilel stuquelic te mach'atic yu'unineje.

Isaías 44:21

Te Cajwaltic ya yal: —Israel, te lumat yu'un Jacob, na'a me te ja'at cabatate; ja'at cabatat, melel jo'on la jchajbanat. Israel, ma me xch'ayon ta awo'tan.

Isaías 51:15

“Jo'on Awajwalon te Dioson awu'une; te jbiile, ja' te Ajwalil te Spisil ya xju' yu'une. Jo'on la jyuc' te mare soc awun yu'un te sbule.

Isaías 62:12

Te mach'atic israeletic ya me x'albotic: “Ch'ul lum”, xi' me sc'oplal, soc: “Ja' te mach'atic ac'otic ta libre yu'un Cajwaltic”, xi' me sc'oplal. Soc ya me x'albot te Jerusalén: “Lum te Mulanbile”, xi' me sc'oplal, soc: “Te lum ma ba pijt'esbile”, xi' me sc'oplal.

Jeremías 14:19

Cajwal, ¿jc'axel bal la ach'oj bael ta spisil te Judá? ¿Lubat balix yu'un te lum Sión? ¿Bi yu'un la awejch'entesotic te ma'yuc ta poxtayele? La jmaliytic te ya x'esmajotique; ja'uc me to, ma'yuc bila lec la jtatic. La jmaliytic te ay yutsil q'uinal caiytic ta poxtayele; ja'uc me to, ja' nax ay xiwtesel.

Jeremías 14:9

¿Bi yu'un jichat te bit'il jtul winic te jajch'ix xiwel ta yo'tane? ¿Bi yu'un jichat te bit'il jtul soldado te ma xju' yu'un coltaywaneje? Ja'uc me to, Cajwal, ayat ta coliltic; spisilic ya sna'ic te jo'otic lumotic awu'une. Ma me xapijt'esotic —xiic.

Jeremías 16:18

Sbabial ya cac'bey stojic cheb buelta te bila amen soc te smulique, melel la sboltesbonic sc'oplal te lumq'uinal ta scaj te yajcananic te ma cuxuluc soc te ilaybilique; soc ta spamal te lumq'uinal te la cac'bey yu'unin, la spasic te bitic ya quilaye —xi' te Cajwaltique.

Jeremías 19:4

Melel te israeletic la yijq'uitayonic ta yo'tanic, soc yan ac'ot ta c'atp'unel yu'unic in lum to. La yac'beyic pom te lotil diosetique, te ma ba sna'ojbeyic sbae, ni te antiguo sme'-static ma la sna'beyic sba, ni te muc' ajwaliletic yu'un Judá ma la sna'beyic sba. Soc ja' in lum to la snojesbeyic ta xch'ich'el te ants-winiquetic te ma'yuc smule.

Jeremías 23:15

Jich yu'un, te jo'on Ajwalilon te Spisil ya xju' cu'une, ya cal ta stojolic te mach'atic j'alwanejetique: Ya cac'bey swe'ic te bila bayal xch'aale; ya cac'bey ja' yuch'ic te yich'oj veneno. Melel te mach'atic j'alwanejetic ta Jerusalén pujq'uemix yu'unic te bila amen ta spamal te lumq'uinale —xi' te Cajwaltique.

Jeremías 31:37

Te ayuc bi c'aalil ya xju' ta p'isel te ch'ulchane soc te ya xju' ta ilel c'alal ta yiptajib te balumilale, jich me c'aalil ya jch'oj bael ta co'tan Israel ta swenta spisil te bila spasoje. Jo'on Ajwalilon, jich ya cal —xi' te Cajwaltique.

Jeremías 46:28

Jo'on Ajwalilon, jich ya cal: Ma xiwat, lum Jacob, abat cu'un, melel joinejat. Ya jin spisil te nacionetique, ja'ic me te bay la jpuquex baele. Yan te ja'ate ma ba ya jinat; ja' nax ya awich' tojtesel cu'un jich bit'il ya sc'an te awat'ele. Ma me jichuc nax ya quijq'uitayat jilel, puersa ya cac'bat castigo —xi' te Cajwaltique.

Jeremías 50:20

Jo'on Ajwalilon, jich ya cal: Ja' me jich yorail a, te Israel soc Judá ya xjilic ta libre yu'un te falta soc te smulique, melel jo'on ya jpasbey perdón te mach'atic ya cac' cuxinuc xane.

Jeremías 51:19

Mero yan yilel stuquel a te Dios yu'un Jacob; jchicnanteswanej yu'un spisil te bitic aye. La stsa Israel te mero yu'un stuquele. “Ajwalil te Spisil ya xju' yu'un”, xi' te sbiile.

Ezequiel 8:17

Te Cajwaltic la yalbon: —¿La bal awil? Ma tic'uc ya yaiy a te lum Judá te bitic yacalic ta spasel te ilaybil sbae, la to snojesic xan ta bitic amen a te lumq'uinale. Tal yac'bonic xan yich' yip quilimba, te ya yaq'uic te ya xjul stuil ta jni'e.

Ezequiel 9:9

La sjac'bon te Cajwaltic, jich la yal: —Te smul te lum Israel soc te Judá, mero muc'. Te lumq'uinal nojel ta miltomba soc nojel tey a te bila ma stojiluc ta pasel. Ya scuyic te la quijq'uitayix jilel te lumq'uinale, soc te ma ba ya quil te bitic yacalic ta spasele.

Oseas 1:10

Ya me sta sc'aalelal te mach'atic israeletic te jichic te bit'il sji'al mar, te ma'yuc mach'a ya xju' yu'un sp'isel, ni yajtayel. Te bit'il la yich' albeyel: —Ma lumuquexix cu'un te ja'exe —te xi' sc'oplalique, Dios me ya yalbey: —Ja'ex me yal-snich'anex te cuxul Dios —xi' me sc'oplalic.

Oseas 2:1

Ja' yorail te jich me ya awalbeyic te awermanotac winiquetique: —Lumotic yu'un Dios —xaex me. Soc ya me awalbeyic te awermanatac antsetique: —Na'bil yo'bolil abaic —xi' me sc'oplal awu'unic.

Oseas 2:3

Teme ma jichuc ya spase, t'anal me ya quijq'uitay ta jc'axel, jich me ya xc'ot cu'un te bi yilel c'alal a ayine. Ya me jc'atp'un ta jochol taquin q'uinal, ta puro taquin lumq'uinal, soc ya me xlaj ta taquinti'il.

Oseas 4:1

Israeletic, aiya awaiyic te bila ya yal te Cajwaltique. Yalojix c'op ta stojol juez, melel ay c'op yu'un soc te mach'atic nainemic ta lumq'uinale. Yu'un te ants-winiquetic ma ba jun yo'tanic, ma ba c'ux ya yaiy sbaic, soc ma sna'beyic sba te Diose.

Oseas 4:2

Ja' nax esmajem ta alel sbiil Dios te tojol xanix, soc te lotil c'ope, milaw soc elec'. Ya yaiyic mulwej soc ya yuts'inic spat-xujc', jich ya xmilawanic ta jujun buelta.

Miqueas 7:18

Ma'yuc yan Dios jich te bit'ilate, melel ya apasbey perdón yu'un te bila amen spasojique, soc ya ach'aybey ta awo'tan stoybail te lum te jilem xan jtebuque. Te ja'at ya awac'botic quiltic te xc'uxul awo'tan; soc ma'yuc ta awo'tan sbajt'el q'uinal te awilimbae.

Miqueas 7:20

Cajwal, junuc me awo'tan soc ayuc me xc'uxul awo'tan, te jich nix jamal la awal ta namey ta stojol te antiguo jme'-jtatic ja' te Abraham soc Jacob.

Zacarías 12:6

“Te ya sta sc'aalelal te jwentainwanejetic ta Judá jich me ya xc'otic cu'un te bit'il yawil tsajuben ac'al ta yolil si', soc te bit'il c'ajc' te ya yac' tiluc te tombil trigo. Ya me slajin ta swa'el soc ta sq'uexen ta spisil te nacionetic ayic ta sjoyobale. Yan te mach'atic nainemic ta Jerusalén, jun me yo'tanic ya xnainic yan buelta ta slumalic.

Zacarías 12:8

Jo'on Ajwalilon, ya me jcanantay te mach'atic nainemic ta Jerusalén. Te jayeb mach'atic ma'yuc yipic, mero bayal me yipic ya xc'otic, jich me yip ya xc'otic te bit'il muc' ajwalil David. Te patil alnich'anetic yu'un David jichic me te bit'il Dios, jich te bit'il ch'ul abat yu'un Cajwaltic, te neel ay ta beel yu'unique.

Zacarías 2:12

Te Cajwaltic, ya me yic' xan ta stojol te Judá. Ya me yu'unin te ja' mero tsabil yu'un te ay ta ch'ul lumq'uinale, soc ya me yalbey xan sc'oplal te Jerusalén te ja' tsabil lum yu'une.

1 Samuel 12:22

Pero te Cajwaltic, yo'tan ya x'ich'ot ta muc' te xch'ul-biile, jich ma ba ya spijt'esex, ja' ya sc'an te ja'ex te lum ya xc'oex yu'une.