Apocalipsis 7:12 - Bible in Tzeltal de Oxchuc y Tenejapa

¹² Jich la yalic: “¡Jichuc! Te bendicione, te ich'el ta muq'ue, te p'ijilile, te yalel wocole, te yutsilale, te yu'ele, soc te yipe, ja' ay ta swenta te Dios cu'untic sbajt'el q'uinale”, xiic.

Nuevo Testamento Tzeltal de Amatenango

¹² La yalik: “Jichuk. A me yichꞌ alel te slekilale. Ay te stsaꞌamule, sok ay te spꞌijile. Ya me yichꞌ alel kola yal ta stojol. Ay ta akꞌel ta jkuentae, ay spoder, sok ay spuersa te Dios kuꞌuntike skuenta sbajtel kꞌinal. Jichuk”, xchiik.

Bible in Tzeltal Bachajón

¹² hich yacalic ta yalel: ¡Hichuc! Ac'a yich' halbeyel yutsil sc'oblal, ac'a yich' yutsilal, p'ijil-o'tanil, halbeyel wocol, yich'el ta muc', yu'el soc yip te Dios cu'untic ta scuenta sbahtel q'uinal. ¡Hichuc! xchihic.

Apocalipsis 7:12 ပူးပေါင်းရင်းမြစ်များ

Nehemías 12:46

Melel ta namey ta yorail David soc ta yorail Asaf, ay jwolwanejetic yu'un jc'ayojetic, soc ay c'ayojetic yu'un yalbeyel yutsilal Dios soc swenta yalel wocol ta stojol Dios.

Nehemías 12:8

Te levitaetic ja'ic te Josué, Binuy, Cadmiel, Serebías, Judá soc Matanías, ja' te swentainejic soc sjo'tac te c'ayojetic swenta sc'ajintayel yutsilal te Diose.

Salmos 100:4

La'ic ta bay te ti'nailetic yu'une, ochanic ta templo, ya jc'ajintaytic c'ayojetic ta yalel yutsil sc'oplal soc ta yalel wocol. Albeyaic wocol, albeyaic yutsil sc'oplal te yo'tane.

Salmos 106:48

Bin nax me yutsil stuquel te Dios yu'un Israel ta spisil bael ta sbajt'el q'uinal. Spisiluc me ac'a yalic: “Jichuc”, xiuquic me. ¡Bin nax me yutsil te Cajwaltique!

Salmos 107:22

Ac'beyaic milbil smajt'an swenta yalel wocol; bayaluc me yutsil awo'tanic xawalbeyic yutsil yat'el te Cajwaltique.

Salmos 116:17

Ya me cac'bat milbil amajt'an ta swenta yalel wocol; ya me jc'oponat ta spisil ora, Cajwal.

Salmos 147:7

Albeya wocol ta c'ayoj te Cajwaltique; te Dios cu'untic c'ajintayaic soc arpa.

Salmos 41:13

Te Cajwaltic, te Dios yu'un Israel, jelawen yutsil sc'oplal ta ora to soc ta sbajt'el q'uinal. Jichuc.

Salmos 50:14

Ja'uc me jmajt'an awu'un te ya awalbon wocol ta jtojol; ac'a me c'otuc ta pasel awu'un te bila awaloj ta jtojol jo'on te mero Toyolone.

Salmos 72:19

Bayal me yutsil te Dios te ay yip yu'el xojobil sbajt'el q'uinal te sbiile. Ac'a nojuc ta yip yu'el xojobil spamal te lumq'uinale. Jich ac'a c'otuc ta pasel.

Salmos 89:52

Bayaluc me yutsil sc'oplal sbajt'el q'uinal te Cajwaltique. Jichuc.

Salmos 95:2

Ochucotic bael ta stojol ta yalel wocol, soc ac'a jc'ajintaytic c'ayojetic ta yich'el ta muc'.

Isaías 51:3

Ay me yutsil co'tan ta stojol te Sión, ja' te lum te jinem sts'ajc'ul ta spisile. Ta bay taquin q'uinal ya jc'atp'un ta yaxal q'uinal, jich bit'il t'ujbil te'etic la sts'un Cajwaltic ta Edén. Tey me ay yutsil a te q'uinale, soc bin nax yo'tanic ya xc'ajinic ta yalel yutsilal Dios soc música.

Jeremías 33:11

c'ayojetic yu'un q'uin, soc sbujts-o'tanil, soc te c'ayojetic yu'un nujbinel, soc ya me xchicnaj ta alel: “Albeyaic wocol te Cajwaltic te Spisil ya xju' yu'une, melel te Cajwaltic lec yo'tan stuquel, te xc'uxul yo'tan stalel ay sbajt'el q'uinal”, xiic me. Yu'un ya me yich'ic tel majt'anil ta templo yu'un yalel wocol. Melel ya cac'bey xan yutsilal in lumq'uinal to, swenta yu'un jich ya xcha'c'ot xan te bit'il ay ta xjajch'ibale. Jo'on Ajwalilon, jich ya cal —xi'.

Jeremías 33:9

Te Jerusalén ya me yac'bon yutsil co'tan, ya me yac'on ta ich'el ta muc' soc cutsilal, ta stojol spisil nacionetic ta balumilal. C'alal ya yaiyic stojol ta alel spisil yutsilal te ya cac'bey tel yajwal Jerusalén, soc spisil te ya cac' esmajuque, ya me xnijc' yo'tanic yu'un xiwel —xi'.

Jonás 2:9

yan te jo'one bin nax co'tan ya calbat yutsil ac'oplal soc ya cac'bat milbil amajt'an. Jich me ya xc'ot ta pasel a te bila caloj ta atojole. Ja'at nax atuquel Cajwal, te ya xju' ya xcoltaywanate —xi' te Jonase.

San Mateo 6:13

Ma me xawac' yalucotic yu'un te yiljibal co'tantique. Coltayawotic loq'uel ta bay te bila amene. [Melel te ja'ate muc' ajwalilat atuquel, soc ay awu'el, soc ay awutsilal sbajt'el q'uinal. Jichuc]”, xaex me ta sc'oponel te Diose.

Romanos 11:36

Te melel spisil te bitic aye, ja' yu'un. Ja' nix spasoj spisil, soc ja' swentainej stuquel. Ja' ac'a chicnajuc yutsilal ta bayuc sbajt'el q'uinal. Jichuc.

1 Corintios 14:16

Teme ya awalbey wocol Dios soc te ach'ulele, te mach'a jich to nax aye, ¿bit'il ya xju' ya yal “Jichuc”, teme ma sna' te bila ya awal wocol yu'une?

2 Corintios 4:15

Spisil te bila ya xc'ot ta jwentatic te jo'otique, swenta ac'uxtayelic te ja'exe, swenta yu'un ay me tsobol te ya x'ac'bot bendición yu'un te Diose soc ay me tsobol te ya yalic wocol yu'un te yutsilal te Diose.

Colosenses 2:7

Ismajemuquex me ta lec ta stojol Cristo, soc ipajemuquex me ta lec ta swenta. Jc'axeluc me ay xch'uunjel awo'tanic jich nix te bit'il ac'botex anopique. Albeyaic bayal wocol spisil ora te Diose.

Colosenses 3:17

Spisil te bila ya apasique soc te bila ya awalique, pasaic spisil ta swenta sbiil te Cajwaltic Jesuse. Soc albeyaic wocol te Jtatic Dios yu'un spisil te bila yac'ojbeyexe.

Apocalipsis 1:18

Jtalel cuxulon. Lajon, ja'uc me to, cuxulonix sbajt'el q'uinal. Jichuc. Quich'oj te sllaveil te lajele soc uuc te stsojbjibal animaetique.

Apocalipsis 19:4

Te chaneb xcha'winic (24) ta jtul mamaletic soc te chancojt' bitic cuxajtique la slajin sbaic ta stojol Dios te nacal ta smuc'ul nactijibe. Jich la yalic: “Jichuc ac'a c'otuc ta pasel. ¡Ay yutsilal!”, xiic.