2 Samuel 22:3 - Bible in Tzeltal de Oxchuc y Tenejapa

³ Diosat cu'un, ja'at nac'jibal tonat, ja' majq'uilat Cajwal, ya acoltayon ta awu'el. Mero toyol nac'jibalat cu'un, mero toyol anjibalat, Jcoltaywanejat cu'un atuquel. La acoltayon, ma ba c'ot ta jwenta te tulan uts'inele.

Bible in Tzeltal Bachajón

³ ha Dios cu'un, ha muc'ul ton cu'un ta banti ya jnac' jba; ha jmahquil soc ha yip te jcolele, ha toyol ahnibal cu'un soc jcoltaywanej cu'un, la acoltayon ta uts'inel.

2 Samuel 22:3 ပူးပေါင်းရင်းမြစ်များ

Génesis 15:1

Patil te Abram c'oponot yu'un Dios te chicnaj ta sit yilel, jich albot: —Ma xiwat, Abram, jo'on jcanantaywanejon awu'un, muc' me amajt'an ta bay nax c'alal —xi' sc'oplal.

2 Samuel 22:31

“Jelawen yutsil te be yu'un te Diose; ya smuc'ulin co'tantic te bila ya yal te Cajwaltique. Dios ya scanantay te mach'atic ja' smuc'ulinej yo'tanique.

2 Samuel 22:47

“¡Viva Cajwaltic, jelawenuc yutsil sc'oplal te jcanantaywanej cu'une! Ac'a toyuc xan yutsil sc'oplal te Dios te ya scoltayon soc te ya scanantayone.

2 Samuel 22:49

Ja' te ya scoltayon ta sc'ab te jcontrotac, ja' te mach'atic amen yo'tanic te la stoy sbaic ta jtojole. Ja'at Cajwal, ya acoltayon ta sc'ab te j'uts'inwanejetique.

2 Samuel 22:51

Ya awac'bey yaiy tsalaw te ajwalil tsabil awu'une; spisil ora c'ux ta awo'tan te David soc te sts'umbale”, xi' ta c'ayoj te David.

2 Samuel 23:3

Te Dios yu'un Israel c'opojix, te Jcanantaywanej yu'un Israel jich yalojbon: ‘Ja' te mach'a mero stojil ya swentain te ants-winiquetique, ja' te mach'a yich'oj ta muc' Dios te ya x'at'ej ta muc' ajwalil,

Salmos 14:6

Ya slabanic te bi ya sc'an yo'tan te mach'a peq'uelique; ja'uc me to, te Cajwaltic ya me scanantay.

Salmos 140:1

Cajwal, ac'awon ta libre, ma me x'ochon ta sc'ab te mach'atic amen yo'tanique; canantayawon, ma me x'ochon ta sc'ab te j'uts'inwanejetique,

Salmos 140:11

Ma me xjalajic ta lumq'uinal te mach'atic ma xq'uexawic; spisiluc ora ac'a c'otuc bila amen ta stojolic te j'uts'inwanejetique.

Salmos 140:4

Cajwal, canantayawon, ma me xyu'uninon te mach'atic amen yo'tanetique; canantayawon, ma me x'ochon ta sc'ab te j'uts'inwanejetique, ja' te mach'atic ya xchap sc'opic swenta yu'un ya x'ochon ta sc'abique.

Salmos 142:4

Ya jsujt'es bael jsit ta swa'el jc'ab, ma'yuc mach'a ya quil te ya xtal scoltayone. Ma'yuc mach'a ya xc'opoj cu'un; ma'yuc mach'a ya xtal ta yo'tan te ya scanantayone.

Salmos 144:2

Jun yo'tan cu'un, ja' cawil te banti ya quich' canantayel, ja' te mero toyol anjibal soc te j'ac'aw ta libre cu'une. Ja' jmajq'uil stuquel te ya jcanantay jba a; ja' stuquel te ya yac'bon ta jc'ab te lumetique.

Salmos 18:2

Ja'at Cajwal, jcanantaywanejat, anjibalat cu'un, ja'at la awac'on ta libre atuquel. Diosat cu'un, ja'at nac'jibal tonat, ja' majq'uilat, Cajwal, ya acoltayon ta awu'el. Mero toyol nac'jibalat cu'un.

Salmos 27:5

Te c'alal ya xc'ot yorail woclajel, te Cajwal ya yaxinteson ta yu'el ta templo; ta mero yaxinal ya scanantayon. Ya me yac'on ta sba te muc'ul tontiquil wits te ya scoltayone.

Salmos 28:7

Te Cajwale ay yu'el soc ja' jmajq'uil stuquel; jelawen to xan la smuc'ulin co'tan, jich la scoltayon. Bin nax co'tan yu'un; ya jc'ajintay soc ya calbey wocol yu'un te Cajwale.

Salmos 3:3

Ja'uc me to, ja'at Cajwal ja' jmajq'uilat, ya acanantayon. Ja' cutsilalat, ja'at te ya awac'bon xan yip te co'tane.

Salmos 32:7

Ja'at anjibalat cu'un; te woclajel ma xawac' staon, ya ajoytayon ta awetic yu'un tsalaw.

Salmos 46:1

Te Diose ja' anjibal cu'untic, ja' ya yac' quiptic stuquel; ja' ya scoltayotic te bi ora ay jwocoltique.

Salmos 46:11

Te Cajwaltic te Spisil ya xju' yu'une, ja' sjoinejotic stuquel. Ja' anjibal cu'untic stuquel te Dios yu'un Jacobe.

Salmos 46:2

Ja' yu'un ma'yuc bi ora ya caiytic xiwel, manchuc me ya xyanaj yawil te lumq'uinale, manchuc me ya xmul ta mar te witsetique,

Salmos 46:7

Te Cajwaltic te Spisil ya xju' yu'une, ja' sjoinejotic stuquel. Ja' te Dios yu'un Jacob, ja' anjibal cu'untic stuquel.

Salmos 5:12

Jich yu'un, te ja'at Cajwal, ac'beya bendición te mach'a jun yo'tan ta atojole; te yutsil awo'tan ac'beya jichuc smajq'uil.

Salmos 55:9

Lajina ta jc'axel te jcontrotac, Cajwal, yantesbeya te sc'opique; yu'un ja' nax ya quil te jajch'em c'op yu'unic soc te ma ba jun yo'tan sbaique.

Salmos 59:16

Yan te jo'one ya me jc'ajintayat ta sacubel q'uinal; ya me jchicnantes ta aw ta tulan te xc'uxul awo'tan soc nix te awu'ele. Melel ja'at te jcanantaywanejat cu'un, ja'at anjibalat cu'un te c'alal ayon ta wocole.

Salmos 61:3

melel ja'at te anjibalat cu'une. Jichat bit'il buen tulan toyol ts'ajc' te ya scoltayon ta sc'ab te jcontroe.

Salmos 71:7

Tsobol mach'atic xcham nax la yaiyic cu'un, pero ja'at anjibalat cu'un.

Salmos 72:14

Ya scoltay ta woclajel; soc ma me xyac' c'otuc ta swentaic te uts'inele. Melel mero bayal sc'oplal ta yo'tan te xcuxlejalique.

Salmos 84:11

Melel te Diose, te Cajwaltique, ya yac'otic ta saquil q'uinal, soc ja' jmajq'uiltic stuquel. Te Cajwaltic c'ux ta yo'tan ya yaiy te mach'atic toj bitic ya spasic ta q'uinale, soc ya yich' ta wenta stuquel. Ma me ayuc bila ma x'ac'botic, melel spisil te bitic leque ya me x'ac'botic stuquelic.

Salmos 84:9

Dios cu'un, jcanantaywanejat cu'un, lecuc me ta asit te mach'a ja'at atsaoj ta muc' ajwalile.

Salmos 86:14

Dios cu'un, te mach'atic jbol-o'tanetic soc j'uts'inwanejetic te ma ba xi'ojate ya scontroinonic spisil ora soc ya sc'an ya smilonic.

Salmos 9:10

Cajwal, ja' smuc'ulinejat yo'tanic te mach'atic ya sna'bat abae; ma'yuc bay ya apijt'es te mach'atic ya sleate.

Salmos 9:9

Te Cajwaltic ya me scanantay te mach'atic tenbilic ta uts'inele; te c'alal ay swocolic, ya me scanantay.

Éxodo 15:2

Ja' yu'un ya jc'ajintay te Cajwale, ja' quip soc ja' Jcoltaywanej. Ja' Dios cu'un, cajal yutsil sc'oplal, ja' Dios yu'un te jtate, muc' sc'oplal stuquel.

Proverbios 18:10

Muc' sc'oplal te Cajwaltic, jich te bit'il toyol ts'ajc'; te mach'atic toj yo'tanic ya me xbajt'ic ta stojol ta sleel canantayel.

Proverbios 30:5

Te Cajwaltic ya scanantay te mach'atic ja' smuc'ulinej yo'tan; spisil te bitic yalojbotic, ya sc'an ya smuc'ulin co'tantic.

Isaías 12:2

Ja' Dios te ya scoltayone, ja' smuc'ulinej co'tan, ma xiwon. Te Cajwale, ja' anjibal cu'un soc ja' me quip, ja' jcoltaywanej cu'un —xaex me.

Isaías 32:2

Ta juju-jtulic jich bit'il anjibal ya xc'ot yu'un te tulan iq'ue soc te tulan yic'al ja'ale. Jich me c'oemic te bit'il pasbil beja' ta taquin q'uinale, jich bit'il yaxinal muc'ul ton ta jochol taquin q'uinal.

Isaías 45:21

Ac'a c'opojicuc soc ac'a stejc'an sbaic ta yaq'uel pruebaetic, ac'a sjojc'obey sbaic, teme jich yo'tanique: “¿Mach'a la sneeltesbey sc'oplal ta alel ta xjajch'ibal in bitic to? ¿Mach'a la yalbey sc'oplal c'alal ta namey tel?” xiuquic me. ¿Ma bal jo'ucon te Ajwalilone? Ma'yuc yan Dios jich bit'ilon. Ta jtojol ma'yuc yan Dios te ya yaiy tsalaw soc te ya xcoltaywane.

Jeremías 16:19

Cajwal, yipat co'tan soc jcanantaywanejat cu'un, ja' anjibalat cu'un ta ora nax yu'un te bila xiweltic sba te ya xtal ta jtojole. Ya me xtal ta atojol te nacionetique, ya xtalic ta sti'il balumilal, jich me ya yalbat: —Ja' nax lotil diosetic te la yu'uninic te jme'-jtatique te ma'yuc yutsil soc ni ma'yuc yu'el.

Jeremías 16:9

Melel jo'on Ajwalilon te Spisil ya xju' cu'un, te Dioson yu'un Israel, jamal ya cal: Ya cac'bey xlaj yo'tanic ta c'ayoj in lum to, ta spasel q'uin te bin nax yo'tanic yu'une, soc te c'ayojetic yu'un q'uin, soc sbujts-o'tanil soc te c'ayojetic yu'un jnujbinel. Ja' me ya xc'ot ta pasel te ayex ta q'uinal, soc ya me awilic.

San Lucas 1:47

Bayal sbujts' co'tan ta swenta te Diose te Jcoltaywanej cu'une,

San Lucas 1:69

La sticunbotic Jcoltaywanej te bayal yu'ele, te ja' sts'umbal David te abat yu'une.

San Lucas 1:71

te ya scoltayotic loq'uel ta sc'ab te cajcontrotique soc ta sc'ab te mach'atic yilayejotique.

Deuteronomio 32:37

Jich me ya yalbey: ‘¿Banti ay te diosetic awu'unic, ja' te jcanantaywanejetic awu'unique, ja' te ay smuc'ul awo'tanic ta stojole;

Deuteronomio 32:4

Ja' Jcanantaywanej cu'untic, mero lec yat'el stuquel, mero toj spisil te bitic ya spase. Ja' Dios te jun yo'tan ta jtojoltic, ma'yuc lo'laywanej ta yo'tan; ¡mero stojil ya x'at'ej, mero lec stuquel!

Deuteronomio 33:29

Bayal me awutsil, ja'at Israel, ¿mach'a pajalat soc? Melel ja' nix te Cajwaltic te scoltayejate, ya scanantayat, ja' ya scoltayat stuquel. Ja' puñal awu'un c'oem soc ja' tsalaw awu'un stuquel. Te acontrotac ya me yac' sbaic ta ac'ab, te ja'ate ya me alajinbey te stoybailique —xi' te Moisese.

Tito 3:4

Ja'uc me to, te Diose te Jcoltaywanej cu'untique la yac' ta ilel te bit'il ay yutsil yo'tan soc xc'uxul yo'tan ta jtojoltic soc spisil te ants-winiquetique.

Tito 3:6

Ma p'isbiluc la spucbotic te Ch'ul Espíritu te Diose, Ja' la spuc ta swenta te Jesucristo te Jcoltaywanej cu'untique,

Hebreos 2:13

Soc jich la yal xan: “Ay smuc'ul co'tan ta smaliyel te Diose”, xi'. Soc jich la yal xan yan buelta: “Li' ayon to soc spisil te alnich'anetic te ac'bilon join yu'un te Diose”, xi'.

1 Samuel 2:1

Te Ana la sc'opon Dios, jich la yalbey: —Cajwal, mero bin nax co'tan ta atojol, melel ja'at ya awac'bon xan yip co'tan. Ya xju'ix ya xc'opojon ta stojol te controetic cu'une, melel ja'at la acoltayonix. Mero bin nax co'tan yu'un.

1 Samuel 2:2

Ma'yuc mach'a yan jich ch'ul Dios te bit'il ja'at, Cajwal. Ma'yuc mach'a jich ya xcanantaywan te bit'il ja'at, Dios cu'untic. Jtul ma'yuc mach'a jich te bit'il te ja'ate.